Luminakop an Kristiyanismo sa Dakul na Nasyon

Sinunod kan mga apostol an pagbuot ni Jesus na ipalakop an maugmang bareta sa bilog na daga. Kan 47 C.E., ipinadara si Pablo saka si Bernabe kan mga tugang sa Antioquia sa sarong pagbiyahe sa paghuhulit. Nagduman an duwang maigot na parahulit na ini sa bilog na Asia Minor, sa mga lugar arog kan Derbe, Listra, asin Iconio.

Hinulitan ni Pablo saka ni Bernabe an gabos, mayaman man o pobre, hoben man o gurang. Dakul an nag-ako kan katotoohan manungod ki Cristo. Kan hulitan ni Pablo saka ni Bernabe si Sergio Paulo, an gobernador kan Ciprus, may sarong espiritista na nagkontra sainda. Tinaraman ni Pablo an espiritista: ‘Kaiwal ka ni Jehova.’ Biglang nabuta an espiritista. Kan mahiling iyan ni Gobernador Paulo, nagpuon siyang magtubod.

Naghulit si Pablo saka Bernabe sa gabos na lugar, sa mga harong, sa mga saudan, sa tinampo, asin sa mga sinagoga. Kan paumayan ninda an sarong lalaking pilay sa Listra, inisip kan mga nakahiling sa milagro na mga diyos sinda kaya sinamba sinda kan mga ini. Pero pinapundo sinda ni Pablo saka ni Bernabe asin sinabihan: ‘An Diyos sana an sambahon nindo! Mga tawo lang kami.’ Pagkatapos kaiyan, may nag-arabot na mga Judio na nagsutsut sa mga tawo para maanggot ki Pablo. Kaya ginapo siya kan mga tawo, ginuyod paluwas sa siyudad, asin binayaan. Paghuna kaya ninda, gadan na siya. Pero buhay pa si Pablo! Nag-arabot tulos an mga tugang para tabangan siya asin dinara ninda giraray siya sa laog kan siyudad. Pag-abot nin panahon, nagbalik si Pablo sa Antioquia.

Kan 49 C.E., pinunan ni Pablo an saro pang pagbiyahe. Nagbalik siya sa Asia Minor para bisitahon an mga tugang. Pakatapos, ihinulit niya an maugmang bareta sa mas harayo pa, sa Europa. Nagduman siya sa Atenas, Efeso, Filipos, Tesalonica, asin iba pang mga lugar. Nag-iba saiya si Silas, Lucas, asin an hoben na si Timoteo. Nagtarabangan sinda para makabilog nin mga kongregasyon asin mapakusog an mga iyan. Nag-istar si Pablo sa Corinto nin saro may kabangang taon para pakusugon an mga tugang duman. Naghulit siya, nagtukdo, asin naggibo nin mga surat para sa dakul na kongregasyon. Nagtrabaho man siya bilang paragibo nin tolda. Pag-abot nin panahon, nagbalik giraray siya sa Antioquia.

Dai nahaloy, kan 52 C.E., pinunan ni Pablo an ikatulo niyang pagbiyahe. Nagpuon siya giraray sa Asia Minor. Nagpanorte siya sagkod sa Filipos tapos nagpatimog sagkod sa Corinto. Nag-istar si Pablo sa Efeso nin pirang taon para magtukdo, magpaumay, asin magtabang sa kongregasyon. Aroaldaw man siyang nagpahayag sa publiko sa awditoryum kan eskuwelahan. Dakul an nagdangog asin nagbago kan saindang buhay. Pagkatapos na maihulit an maugmang bareta sa dakul na lugar, nagpa-Jerusalem si Pablo.