Mga Hapot Hale sa mga Parabasa

◼ Taano ta pipira sana sa mga Saksi ni Jehova an nakikakabtang sa tinapay asin arak sa taonan na selebrasyon kan Pamanggihan kan Kagurangnan?

Ini huli ta an mga Saksi ni Jehova, bakong arog kan mga iglesya nin Kakristianohan, tinutubod an katokdoan kan Biblia na an sadit na kabilangan nin mga tawo magkakamit nin langitnon na buhay asin an iba pang maimbod na lingkod nin Dios babalosan nin buhay na daing katapusan digdi sa daga.

An mga iglesya haloyon nang nagtokdo na an langit an balos sa gabos na nakapaogma sa Dios; an iba minaduman sa impiernong may kalayo. Iba man an sinasabi kan Biblia. Malinaw na ipinaheheling kan Kasuratan na pira sanang tawo, arog kan mga apostol, an maghahade kaiba ni Cristo sa langit. Sinabi ni Jesus na an mga ini “sadangoton na aripompon.” Sinasabi kan Biblia na sinda may kabilangan na 144,000. (Lucas 12:32; Kapahayagan 14:3, 4) An dakol na maimbod na naglingkod ki Jehova asin nagkamit kan saiyang pag-oyon nagadan bago bukasan ni Jesus an dalan pasiring sa langitnon na buhay. (Mateo 11:11; Hebreo 10:19-21) Asin pakapilia kan “sadangoton na aripompon,” minilyon pang iba an nagin tunay na mga Kristiano. Para sa gabos na maimbod na ini na dai kabilang sa “sadangoton na aripompon,” an Biblia nagtatao kan paglaom na buhay na daing sagkod sa sarong ibinalik na daganon na paraiso. (Salmo 37:20, 29; Kapahayagan 21:4, 5) Alagad taano an mga ini ta dai man nakikakabtang sa tinapay asin arak? Ipinaheling ni Jesus na an pakikikabtang sa mga emblema sa Pamanggihan kan Kagurangnan para sana sa mga inapod sa buhay sa langit, sa mga nasa bagong tipan.

Siyempre, an pagtubod sa atang ni Jesus kaipuhan para sa gabos na magkakamit kan pagpapatawad nin Dios asin nin buhay na daing katapusan, baga man buhay sa langit o buhay sa paraisong daga. Ipinaheling ini ni Cristo sa Juan 6:51-54: “Ako iyo an nabubuhay na tinapay na naghilig hale sa langit; kun an siisay man kumakan sa tinapay na ini sia mabubuhay sagkod lamang; . . . an tinapay na sakong itatao iyo an sakong laman manongod sa buhay kan kinaban [nin mababalukat na katawohan] . . . An minakakan kan sakong laman asin minainom kan sakong dugo igwa nin buhay na daing katapusan.”

Pero, mahalagang mangnohon na isinabi ni Jesus an mga tataramon na idto bako sanang sa saiyang mga disipulo. Sarong aldaw pakatapos na milagroso niang pinakakan an rinibo, an kadaklan nagdorolok ki Jesus sa Capernaum. Kinaolay sia kan kadaklan na ini na dian kaiba an saiyang mga tataramon sa Juan 6:51-54. Kaya bakong mga disipulo sa pangenot an kaolay ni Jesus kan sabihon nia na sia an piguratibong “tinapay na naghilig hale sa langit” na makatatao nin mas matagal na paglaom sa buhay kisa manna na kinakan sa kapatagan.—Juan 6:24-34.

Sa pagkonsiderar sa suanoy na eksperyensiang idto sa kapatagan, girumdoma kun siisay an nagluwas sa Egipto pasiring sa kapatagan. Idto ‘an mga aki ni Israel na may kabilangan na anom na gatos na ribong makokosog na lalaki, apuwera an saradit, asin an sarong dakulang kadaklan na manlaenlaen.’ (Exodo 12:37, 38; 16:13-18) Kaiba sa “kadaklan na manlaenlaen” na ini an mga Egipcio na naagom nin mga Israelitas asin iba pang Egipcio na nakidamay na sa Israel. An mga Israelitas asin an “kadaklan na manlaenlaen” kapwa nagkakaipo kan manna tanganing mabuhay. Alagad, an “kadaklan na manlaenlaen” daw may paglaom na kapareho kan mga Israelitas? Dai. Minsan ngani sinda puwedeng sumamba kaiba kan mga Israelitas asin maglaom na makalaog sa Ipinanugang Daga, noarin man dai sinda puwedeng magin hade o saserdote sa irarom kan tipan nin Pagboot. Kaya an pagkakan sa literal na manna sa kapatagan dai nagtao sa gabos kan pararehong paglaom.

Ini pagkakalaen na dapat na girumdomon mantang hinohorophorop nindo an isinabi ni Jesus sa saiyang mga disipulo mga sarong taon pakatapos na isabi nia an mga tataramon sa Juan 6:51-54. Sa nahuhuring okasyon na ini, isinasaysay ni Jesus an bagong kaugalean na may labot sa aktuwal na tinapay asin arak na magsisimbolo sa saiyang laman asin dugo. Kan pinoponan nia an pagselebrar kan Pamanggihan kan Kagurangnan, isinabi ni Jesus sa saiyang dayupot na mga parasunod: “An kopang ini nangangahulogan kan bagong tipan paagi sa sakong dugo, na papabuloson manongod sa saindo.” Sa iyo man sanang sadit na grupo nin mga apostol, idinugang nia: “Kamo an mga nakidamay sa sako sa mga pagbalo sa sako; asin ako nakikipagtipan sa saindo, kun paanong an sakong Ama nakipagtipan sa sako, para sa sarong kahadean, tanganing kamo magkakan asin mag-inom sa lamesa ko sa sakong kahadean, asin magtukaw sa mga trono tanganing maghokom sa doseng tribo nin Israel.”—Lucas 22:20, 28-30.

Mangnoha sa nahuhuring mga tataramon na ini na an mga makakan kan aktuwal na tinapay asin mainom kan aktuwal na arak bilang mga emblema na nagsisimbolo sa hawak asin dugo ni Jesus iyo an mga disipulo na nasa “bagong tipan.” An mga iyan mapapasa iba pang tipan, saro na gigibohon sa sainda ni Jesus tangani sindang makaiba sa paghade ‘sa saiyang kahadean.’ Malinaw na an boot sabihon ni Jesus digdi iyo an mga ‘gigibohon na kahadean asin mga saserdote kan satuyang Dios, tanganing magsakop bilang hade sa daga.’ (Kapahayagan 5:10) Kan enot na siglo, pinonan nin Dios na pilion an 144,000 na makikikabtang sa langitnon na Kahadean. An mga Kristiano sa Corinto kabilang sa grupong iyan, huli ta sinda inapod na mga “pinakangbanal kasaro ni Cristo Jesus, na inapod na magin mga banal.” (1 Corinto 1:2; ikomparar an Roma 1:7; 8:15-17.) An “mga banal” na iyan makikikabtang sa Pamanggihan kan Kagurangnan, na nakikikabtang na may apresasyon sa emblemang tinapay asin siring man sa arak na nangangahulogan kan “bagong tipan sa puwersa kan [saiyang] dugo.”—1 Corinto 11:23-26.

Ngonyan an nabubuhay na sana sa daga pirang natatada sa mga pinili nin Dios para sa langitnon na buhay. Solamente an mga iyan na nasa “bagong tipan” an autorisadong makikabtang sa mga emblema, an tinapay asin arak, sa taonan na selebrasyon nin Memorial.

Siyempre, an gabos na tunay na Kristiano ngonyan na naglalaom na mabuhay sagkod lamang sa daga sakop kan Kahadean nakaaaram na ini mangyayari sana paagi sa pagtubod sa atang ni Jesus. Arog kan sabi ni Jesus sa kadaklan, sia “an nabubuhay na tinapay na naghilig hale sa langit.” (Juan 6:51) Pero, iyan dai nangangahulogan na an mga may daganon na paglaom kaipuhan na makikabtang sa literal na mga emblema sa Memorial, huli ta sinda mayo sa “bagong tipan,” ni katipan man sinda ni Jesus na mapasa ‘saiyang kahadean, na nagtutukaw sa mga trono.’

Kaya, an dakulang grupong ini na may daganon na paglaom dai nakikakabtang sa mga emblema, an tinapay asin arak. Alagad ini dai nagpapaheling nin kakulangan nin pagtubod o pag-apresyar sa hawak asin dugo ni Jesus. An totoo, huli sa saindang hararom na pag-apresyar sa saiyang atang asin sa makaoogmang daganon na paglaom na nasa atubangan ninda, sinda presente nanggad taon-taon bilang magalang na mga paramasid sa selebrasyon kan Pamanggihan kan Kagurangnan. Sa paaging ini, ipinaririsa ninda an saindang pagtubod asin nagtatao sinda nin maogmang ebidensia na an natatada sa “sadangoton na aripompon” asin an dakolon na “ibang karnero” may mainit na pagkasararo.—Juan 10:16.