An Katotoohan Manongod sa Impierno

MALINAW na gayo, an pundamental na doktrinang nasa likod kan paniniwala sa pagpadusa pakatapos nin kagadanan iyo an paniniwala na an tunay na tawo dai aktuwal na nagagadan kun an laman na hawak nagagadan alagad sarong bagay—na parateng inaapod na kalag—an nakaliligtas sa kagadanan kan hawak. An paniniwalang ini, siring sa naheling niato sa naenot na artikulo, hale sa enot na mga Sumeriano asin Babiloniko sa Mesopotamia. Pakatapos, inadaptar ini kan mga Griego, na an mga pilosopo, siring ki Plato, nagpolido kan teoriya. An saindang pinaoswag na duwahan na paniniwala sa “hawak asin kalag” nagin kabtang kan apostatang Judiong paniniwala.

Kasuarin inadaptar kan naghihingakong mga Kristiano an paniniwala sa siring na buhay pakatapos nin kagadanan? Siertong bakong durante kan panahon ni Jesus asin kan saiyang mga apostol. An Pranses na Encyclopædia Universalis nagsasabi: “An [apokripal na] Apocalypse of Peter (ikaduwang siglo C.E.) an enot na Kristianong libro na nagladawan kan mga pagpadusa asin pagpasakit sa mga parakasala sa impierno.”

Sa katotoohan, maheheling na sa tahaw kan enot na mga ama nin iglesya, igwa nin grabeng dai pagkaoroyon manongod sa impierno. Si Justin Martyr, Clemente kan Alexandria, Tertullian, asin si Cipriano para sa naglalaad na impierno. Si Origen nagmaigot na magtao nin panremedyong pagbiribid kan impierno, na naghingako na an mga parakasala sa katapustapusi ililigtas sa impierno. Sinundan sia sa mas dakula o mas sadit na grado ni Gregorio kan Nazianzus asin Gregorio kan Nyssa. Alagad si Agustin an nagtapos sa siring na maboot na mga punto-de-vista manongod sa impierno. Sa saiyang librong Early Christian Doctrines, an propesor sa Oxford na si J. N. D. Kelly nagsurat: “Kan ikalimang siglo an istriktong doktrina na mayo na nin ikaduwang oportunidad an mga parakasala pakatapos kan buhay na ini asin na an kalayo na masiba sa sainda dai na mapaparong nangongorog saen man.”

Manongod sa purgatoryo, an librong Orpheus—A General History of Religions nagsasabi: “Si San Agustin nagtubod na igwa nin nasa tahaw na kamugtakan nin probasyon sa pag-oltanan kan kagayagayahan sa ngapit asin pagkondenar, na iyan iyo an paglilinig nin mga kalag paagi sa kalayo. Ini an Orpiko [paganong Griego] asin Virgiliano [paganong Romano] na doktrina nin Purgatoryo: mayo nin tataramon manongod kaini sa mga Ebanghelyo. . . . An doktrina nin Purgatoryo . . . nabilog kan ikaanom na siglo, asin ipinahayag na sarong doktrina kan Iglesya paagi kan Konsilyo nin Florence (1439).” An New Catholic Encyclopedia nag-aadmitir: “An Katolikong doktrina manongod sa purgatoryo basado sa tradisyon, bakong sa Banal na Kasuratan.” Manongod sa Limbo, si Cardinal Ratzinger kan Roma nag-aadmitir na ini “saro sanang teolohikal na teoriya.”

Mayo nin Pagpadusa Pakatapos nin Kagadanan

Ano kun siring, an manongod sa Biblia? Sinasabi daw kaini na an kalag nakaliligtas sa hawak sa kagadanan asin kun siring puwedeng padusahan sa naglalaad na impierno o purgatoryo? An New Catholic Encyclopedia nagsasabi: “An paniniwala na an kalag nakaliligtas pakatapos nin kagadanan dai tolos masasabotan sa Biblia. . . . An kalag sa L[umang] T[ipan] dai nangangahulogan na kabtang nin tawo, kundi an bilog na tawo—an tawo bilang an nabubuhay na persona. Sa kaagid na paagi, sa B[agong] T[ipan] nangangahulogan ini nin buhay nin tawo: an buhay nin sarong indibiduwal.”

Kaya nasusudya an pundamental na pasisikadan para sa pagpadusa pakatapos nin kagadanan. An Biblia nagsasabi: “An kalag na nagkakasala, iyan magagadan.” (Ezequiel 18:4, Revised Standard Version, Katolikong Edisyon) Nagsasabi man ini: “An bayad nin kasalan kagadanan.” (Roma 6:23, RSV) Kun siring, kun an Biblia nagsasabi manongod sa habong magsolsol na marumpot na mga tawo na masagkod sa “Gehenna,” “daing sagkod na kalayo,” o “danaw nin kalayo” naggagamit sana ini nin simbolikong lenguahe sa pagtaram manongod sa kaaabtan nindang permanenteng kagadanan, “an ikaduwang kagadanan.”—Mateo 23:33; 25:41, 46; Kapahayagan 20:14; 21:8;a ikomparar an 2 Tesalonica 1:7-9.

An Impierno Nawaran nin Laog Paagi kan Pagkabuhay Liwat

Kun siring, mainit daw sa impierno? Bako sono sa Biblia. Iyo nanggad, an Hebreo asin Griegong mga tataramon na itrinadusir sa nagkapirang Biblia bilang “impierno” nagtotokdo sana sa ordinaryong lolobngan nin gadan na mga tawo. Bako ining mainit na lugar nin pagpasakit. Imbes, ini an lugar nin pahingalo, kun saen maruluwas an mga gadan sa pagkabuhay liwat. (Eclesiastes 9:10; Gibo 24:15) Si Oscar Cullmann, propesor sa Theological Faculty of the University of Basel, Switzerland, asin kan Sorbonne, sa Paris, nagsasabi manongod sa “dakula nanggad na kalaenan sa pag-oltanan kan Kristianong paglaom sa pagkabuhay liwat kan mga gadan asin kan Griegong paniniwala sa inmortalidad kan kalag.” Tama nanggad, an sinasabi nia na “an katotoohan na pakatapos binugtakan kan Kristianismo nin koneksion an pag-oltanan nin duwang paniniwala . . . sa katunayan bako nanggad koneksion kundi pagsikwal sa saro [an doktrina nin Biblia manongod sa pagkabuhay liwat] apabor sa saro pa [an paganong paniniwala sa inmortalidad kan kalag nin tawo].”—Samuya an italiko.

Dai isinikwal kan mga Saksi ni Jehova an saindang pagtubod sa pagkabuhay liwat apabor sa ideya nin inmortalidad kan kalag. Maoogma sindang ihiras saindo an saindang maogmang paglaom asin patunayan saindo hale sa Biblia na, sa katotoohan, an impierno bakong mainit.

[Nota sa Ibaba]