Pag-otob sa Saindong Sumpa sa Pag-agom!

AN ALDAW nin kasal sarong magayagayang aldaw. Iyan saro man na seryosong marhay na okasyon. An nobya asin nobyo naggigibo nin solemneng panuga na makaaapektar sa bilog nindang buhay. Idtong mga presente sa kasal bilang mga bisita saksi sa solemneng panugang ini, alagad si Jehova Dios iyo an pangenot na Saksi.

An Biblia dai naghahagad nin espesipikong mga prosedimiento o sarong espesyal na klase nin seremonya sa kasal. Pero, sa pagmidbid na iyan hale sa Dios, an pag-agom nakatodan nang gibohon na solemne paagi sa paggamit nin mga sumpa sa kasal durante nin relihiosong seremonya. Sa nagkapira nang taon an Mga Saksi ni Jehova ginagamit an minasunod na sumpa sa pag-agom: “Ako —— kinukua taka —— na magin sakuyang pinakasalan (na agom na babae/lalaki), tanganing kamotan asin mahalon (Nobya: asin igalang nin hararom) sono sa pagboot nin Dios na yaon sa Banal na Kasuratan para sa Kristianong (mga agom na babae/lalaki), sagkod na kita magkaibang nabubuhay digdi sa daga oyon sa areglo nin Dios sa pag-agoman.”a

Sarong Bagay na Dapat Isipon

Kun kamo naghohorophorop na mag-agom, mahalaga nanggad na isipon an rarom asin kahulogan kan sumpa na ini antes kan aldaw nin kasal. Si Salomon nagsabi: “Dai ka maghumari kun dapit sa saimong ngoso; asin kun dapit sa saimong puso, dai logod iyan magin listong magtaram sa atubangan kan tunay na Dios.” (Eclesiastes 5:2) Kumusta kun kamo may agom na? Kun siring kamo makikinabang sa paghorophorop sa halaga kan solemneng panuga na ginibo nindo sa atubangan ni Jehova. Inootob daw nindo iyan? An mga Kristiano seryoso sa saindang mga panuga. Si Salomon nagpadagos: “Kun ano an saimong sumpa, otobon. Mas marahay pang dai ka manumpa kisa sa ika manumpa asin dai magbayad. Dai mo togotan na papagkasalaon an saimong hawak kan saimong ngoso, ni sabihon man sa atubangan kan anghel na ika nasala sana.”​—Eclesiastes 5:​4-6.

An frase por fraseng pagkonsiderar kan sumpa sa kasal daing duwa-duwang mapayaman kan saindong pakasabot sa solemneng panugang ini.

“Kinukua taka ​—​—”: Ini an pambukas na mga tataramon kan sumpa. Itinatampok kaiyan na inaako nindo an personal na paninimbagan sa saindong desisyon na mag-agom.

Sa irarom kan Kristianong areglo, mayo nin Makakasuratan na obligasyon na mag-agom. Si Jesu-Cristo mismo nagdanay na daing agom asin irinekomendar an pagigin daing agom sa mga ‘makapagtatao nin lugar kaiyan.’ (Mateo 19:​10-12) Sa ibong na kampi, an kadaklan sa mga apostol ni Jesus may agom. (Lucas 4:38; 1 Corinto 9:5) Malinaw na an desisyon na mag-agom personal na bagay. Mayong tawo na igwang Makakasuratan na autoridad na puersahon an iba na mag-agom.

Huli kaini, kamo responsable sa pagpili na mag-agom. Posibleng pinili nindo an saro na saindong aagomon. Kun ginigibo nindo an sumpa sa pag-agom, na sinasabi, ‘Kinukua taka ​—​—,’ kinukua o inaako nindo an tawong iyan kaiba an saiyang mga karahayan​—alagad pati man an saiyang mga kaluyahan.

Pag-abot nin panahon posibleng madiskobre nindo an dai hinohonang mga aspekto nin personalidad kan saindong agom. Magkakaigwa nin pagkadisganar kun minsan. Sinasabi kan Biblia na “an gabos nagkasala asin nagkulang sa kamurawayan nin Dios.” (Roma 3:23) Kaya tibaad kinakaipo nindong gumibo nin mga pagliliwat tanganing mapaoyonan an saindong agom. Ini tibaad masakit, asin kun minsan tibaad garo gusto na nindong sumuko. Alagad girumdoma, an sumpa sa pag-agom ginibo sa presensia ni Jehova. Matatabangan nia kamo na makapanggana.

“Na magin sakuyang pinakasalan (na agom na babae/lalaki)”: Sa kaenot-enoteng kasal, kan si Eva ipaagom ki Adan, sinabi ni Jehova na “sinda magigin sarong laman.” (Genesis 2:24; Mateo 19:​4-6) Sa siring an pagsasaro nin mag-agom iyo an pinakadayupot na relasyon na puede sa pag-oltanan nin duwang tawo. An pag-agom dinadara kamo sa sarong bagong relasyon. Inaako nindo an saro na magin saindong “pinakasalan na agom na babae” o “pinakasalan na agom na lalaki.” Iyan laen sa ano pa man na ibang relasyon. An mga aksion na minacausa nin dikit na danyos sa ibang relasyon tibaad magcausa nin grabeng kolog sa laog kan areglo nin pag-agoman.

Kuanon niatong halimbawa an Makakasuratan na hatol sa Efeso 4:26. Dian sinasabi kan Biblia: “Maanggot kamo, pero dai kamo magkasala; dai nindo pagpasolnopon an aldaw na kamo may kaanggotan.” Tibaad dai nindo perming naresolberan an saindong mga problema sa mga paryente asin amigo sa pinakamadaling panahon na maninigo. Alagad an saindong agom mas dayupot kisa sa siisay pa man na paryente o amigo. An dai pakaresolber tolos-tolos sa mga bagay-bagay kaiba kan saindong agom puedeng magsapeligro kan espesyal na relasyon sa pag-oltanan nindo.

Tinotogotan daw nindo an dai pagkainoyonan nindo mag-agom na dumakula na magin nagpapadagos na gikanan nin pagkauyam o pagkaaburido? An mga dai pagkasinabotan asin nakapaaanggot na mga situwasyon nagpapadagos daw sa nagkapirang aldaw? Tanganing maotob an saindong sumpa, kun lumataw an mga problema dai pagtogotan na lumihis an sarong aldaw na dai nakipagkatoninongan sa saindong agom. Ini nangangahulogan nin pagpapatawad asin paglingaw patin pagmidbid kan saindong mga pagkukulang asin sala.​—Salmo 51:5; Lucas 17:​3, 4.

“Tanganing kamotan”: An magigin agom na lalaki nanunumpa na “kamotan asin mahalon” an saiyang nobya. An pagkamoot na ini kabale an romantikong pagkamoot na posibleng nakapagpadayupot sa sainda. Alagad an romantikong pagkamoot bakong igo. An pagkamoot na ipinanunumpa kan sarong Kristiano para sa saiyang mapapangagom mas hararom asin mas mahiwas.

An Efeso 5:25 nagsasabi: “Mga agom na lalaki, padagos nindong mamotan an saindong agom na babae, kun paanong an Cristo namoot man sa kongregasyon.” An pagkamoot ni Jesus sa kongregasyon dai nanggad kaayon sa kategoriya kan romantikong pagkamoot sa pag-oltanan nin mga sekso. An mga terminong “mamotan” asin “namoot” na ginamit sa tekstong ini hale sa terminong a·gaʹpe, na minapanongod sa pagkamoot na ginigiyahan nin prinsipyo. An Biblia nagboboot digdi sa mga agom na lalaki na magpaheling nin dayaday, dai nagbabago, nagtatagal na pagkamoot sa saindang agom na babae.

Iyan bako sanang “namomotan taka huli ta namomotan mo ako” na klase nin emosyon. An agom na lalaki hinahanap an ikararahay kan saiyang agom na babae na mas enot pa ngani sa saiyang sadiri, asin an agom na babae namomoot sa saiyang agom na lalaki sa kaparehong paagi. (Filipos 2:4) An pagkultibar nin hararom na pagkamoot sa saindong kapadis matabang saindo na otobon an saindong sumpa sa pag-agom.

“Asin mahalon”: Oyon sa sarong diksionaryo, an “mahalon” nangangahulogan na ‘trataron na mahalaga, makamate o magpaheling nin kapadangatan sa.’ Kaipuhan nindong ipahayag an saindong pagkamoot kapwa sa tataramon asin gibo! An agom na babae espesyalmenteng nangangaipo na umako nin dayaday na pagpaheling nin pagkamoot kan saiyang agom na lalaki. An agom na lalaki tibaad inaasikaso an saiyang pisikal na mga pangangaipo, alagad ini bakong igo. May mga agom na babae na igwa nin igong pagkakan asin komportableng harong alagad bako nanggad na maogma huli ta sinda pinababayaan o dai iniintindi kan saindang agom.

Sa ibong na lado, an sarong agom na babae na nakaaaram na sia namomotan asin mahal tunay nanggad na igwang rason na magin maogma. Siempre, iyan puede man na magin totoo sa agom na lalaki. An tunay na pagkamoot napatatalubo na gayo nin tunay na mga kapahayagan nin pagkamoot. Sa Awit ni Salomon, an katipan na pastor nagkagsing: “Abaang gayon kan saimong mga kapahayagan nin pagkamoot, O sakong tugang, sakong nobya! Orog karahay nanggad an saimong mga kapahayagan nin pagkamoot kisa sa arak asin an hamot kan saimong mga lana kisa sa gabos na klase nin olor!”​—Awit ni Salomon 4:10.

“Asin igalang nin hararom”: Sa nag-aging mga siglo, igwa nin mga lalaki na minaltrato asin minenus an mga babae. Minsan ngonyan, oyon sa magasin na World Health, “an kadahasan tumang sa mga babae nangyayari sa lambang nasyon asin sa lambang sosyal asin ekonomikong grupo. Sa dakol na kultura, an pangongolog sa agom na babae konsideradong diretso nin lalaki.” An kadaklan na lalaki tibaad bako man na kulpable kan siring na paggawe. Pero, minalataw na an dakol na lalaki dai nakapaheheling nin tunay na interes sa mga isyu na may labot sa mga babae. Bilang resulta, dakol na babae an nagkaigwa nin negatibong saboot manongod sa mga lalaki. An nagkapirang agom na babae nadangog na nagsasabi: “Namomotan ko an sakong agom na lalaki, alagad dai ko sia kayang igalang!”

Minsan siring, si Jehova Dios pinahahalagahan an babaeng nagmamaigot na igalang an saiyang agom na lalaki​—dawa ngani an lalaki nagkukulang sa saiyang linalaoman paminsanminsan. Minimidbid nia na an agom na lalaki igwa nin asignasyon, o posisyon, na itinao nin Dios. (1 Corinto 11:3; Efeso 5:23) Sa siring an hararom na paggalang sa saiyang agom na lalaki kabtang kan saiyang pagsamba asin pagkuyog ki Jehova. Dai linilingawan nin Dios an pagkuyog nin diosnon na mga babae.​—Efeso 5:33; 1 Pedro 3:​1-6; ikomparar an Hebreo 6:10.

An paggalang sa pag-agoman kaipuhan na ipaheling kan lambang saro, asin iyan maninigong angay na inaako imbes na laomon o hagadon. Halimbawa, an mapait o nakakokolog na pananaram mayong lugar sa areglo nin pag-agoman. Magigin bakong mamomoton o magalang an magtaram nin mapagmenus na mga komento manongod sa saindong agom na lalaki o agom na babae. Daing ikatataong karahayan an paghayag kan mga depekto nin saindong agom sa iba o an pag-estorya kaiyan sa publiko. Dawa sa pagsuba an saro puedeng magpaheling nin labi-labing kadaihan nin paggalang sa bagay na ini. An mga tataramon sa Efeso 4:​29, 32 aplikado kapwa sa agom na lalaki asin agom na babae. Dian an Biblia nagsasabi: “Dai kamo magpaluwas nin maraot na tataramon sa saindong ngoso, kundi ano man na tataramon na marahay para sa pagpakosog siring sa kinakaipuhan . . . Magin maboot sa lambang saro, madinamayon sa mamomoton na paagi.”

“Sono sa pagboot nin Dios na yaon sa Banal na Kasuratan”: Mawot nin Dios na kita magkamit nin katalingkasan sa pagpili asin paghiro. Dai nia kita pinagabatan nin kadakoldakol na lista nin reglamento na nagkokontrol sa buhay nin may agom. Pero, para sa ikararahay niato sia nagtao nin nagkapirang susundan.

Ngonyan, igwa nin abundang klase nin babasahon manongod sa pag-agom, asin dakol na tawo an may sadiring mga pilosopiya. Alagad mag-ingat! Sa temang pag-agom, kadaklan kan impormasyon na makukua tumang sa Biblia.

Midbidon man na an mga kamugtakan magkakalaen sa kada mag-agom-agom. Sa sarong paagi, an mga mag-agom garo mga niebe; sinda tibaad garo parareho sa harayo, alagad sa katunayan an lambang saro daing kaagid, laen sa gabos na iba pa. An kombinasyon kan saindong personalidad asin kan saindong agom dai naduduplikar nin siisay man na mag-agom sa kinaban. Kaya dai maghidale na akoon an personal na mga punto-de-vista nin iba. Mayo nin gibo nin tawong pormula na aplikado sa gabos na pag-agoman!

Sa kabaliktaran, an gabos na pagboot kan Biblia totoo asin puedeng iaplikar. Si apostol Pablo nagsurat: “An gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay.” (2 Timoteo 3:16; Salmo 119:151) Kun babasahon nindo an Biblia asin aakoon an mga katokdoan kaiyan bilang giya sa saindong pan-aroaldaw na pamumuhay, maootob nindo an saindong sumpa sa pag-agom.​—Salmo 119:105.

“Sagkod na kita magkaibang nabubuhay digdi sa daga”: Ini nagtotokdo sa panhaloyan na pag-ibaiba. An Dios nagboot na “babayaan nin lalaki an saiyang ama asin an saiyang ina asin sia magdadanay kaiba kan saiyang agom na babae.” (Genesis 2:24) Mawot nin Dios na kamo magin magkaiba. Paglingkodan an Dios na magkaiba. Pag-adalan an saiyang Tataramon na magkaiba. Magtagama nin panahon na maglakaw na magkaiba, magtukaw na magkaiba, magkakan na magkaiba. Mag-ogma sa buhay na magkaiba!

An nagkapirang mag-agom nagmamaigot na magtagama nin panahon kada aldaw tangani sanang mag-olay. Dawa ngani pakalihis nin dakol na taon nin pag-agoman, an pagigin magkaibang ini mahalaga sa pagkaigwa nin maogmang pag-agoman.

“Oyon sa areglo nin Dios sa pag-agoman”: An pag-agom regalo hale ki Jehova Dios, na iyo an nag-establisar kan areglo nin pag-agoman. (Talinhaga 19:14) An dai pakasunod sa saiyang areglo magsasapeligro bako sana kan kaogmahan sa saindong pag-agoman kundi pati man kan saindong relasyon sa Kaglalang. Sa ibong na lado, kun an agom na lalaki asin agom na babae kinukultibar an sarong marahay na relasyon ki Jehova, na ipinaheheling paagi sa pagkuyog sa saiyang mga areglo, sinda magkakaigwa nin matoninong na relasyon sa iba, pati na sa lambang saro.​—Talinhaga 16:7.

Nungkang lingawan na si Jehova an pangenot na Saksi sa saindong sumpa sa pag-agom. Padagos na otobon an solemneng panuga na ini, asin an saindong pag-agoman magigin gikanan nin kaomawan asin kamurawayan ki Jehova Dios!

[Nota sa ibaba]

[Blurb sa pahina 22]

Sa sarong paagi, an mga mag-agom garo mga niebe. Gabos sinda tibaad garo parareho sa harayo, alagad sa katunayan an lambang mag-agom daing kaagid

[Pasasalamat para sa pinagkuanan]

Snow Crystals/Dover