Nagtitiripon an mga Mensahero nin Diosnon na Katoninongan

“KAMI napakosog kan lambang pandistritong kombension na samong inatenderan,” an sabi nin sarong Kristianong magurang sa kongregasyon sa Estados Unidos. “Minsan siring, an taon na ini talagang dai ikaladawan. Nagpuli kami kada aldaw na nag-iisip-isip kun paano an sunod na aldaw makalalabi sa samong mga linalaoman, asin kami dai nasudyaanan!”

Kun kamo nakaatender sa saro kan “Mga Mensahero nin Diosnon na Katoninongan” na Pandistritong mga Kombension, daing duwa-duwa na maoyon kamo sa entusiastikong delegado na ini. An kada aldaw kan kombension nakasentro sa sarong laen na aspekto kan sugo na ginigibo kan Mga Saksi ni Jehova bilang mga mensahero nin Dios. Repasohon niato an tolong aldaw na programa.

‘Abaang Gayon kan Nagbabalangibog nin Katoninongan’

Ini an tema kan enot na aldaw kan kombension. Iyan basado sa Isaias 52:7. Sa masakit na mga panahon na ini, dakol an naglilingkod ki Jehova sa mapan-angat na mga kamugtakan. An pahayag na “Pagdangog sa Maigot na mga Parabalangibog nin Katoninongan” may kabaleng mga interbio sa nagkapirang maimbod na ini. An pakadangog sa saindang personal na mga kapahayagan tunay na nakaparirigon sa boot, asin sa siring sinierto sa mga kombensionista na kaya ni Jehova na pakosogon man sinda, na nagtatao pa ngani nin “kapangyarihan na lihis sa ordinaryo” tanganing tabangan sindang makatagal.​—2 Corinto 4:7.

An mga kahagadan ni Jehova dai nakapagagabat. (1 Juan 5:3) Ini lininaw sa huring pahayag kan programa sa aga, na an kulminasyon kan iluwas an 32 na pahinang brosyur na may titulong Ano an Kahagadan sa Sato nin Dios? An magayon an pagkailustrar na bagong pantabang na ini sa pag-adal daing duwa-duwa na dakula an magigibo sa pagtabang sa dakol pa na makanood manongod sa mga katuyohan nin Dios. An mga komento sa paggamit kan bagong publikasyon na ini makukua sa ultimong artikulo na pag-aadalan sa magasin na ini asin sa pahina 16 asin 17.

An pahayag na “Pagtagal sa Gibohon na Marahay” nagdoon na si Jehova nakaaaram na marhay kan satong mga pagbalo. An pagtagal nangangahulogan na kita magpadagos asin dai mawaran nin paglaom. Itinao ni Jehova sa sato an saiyang Tataramon, an saiyang espiritu, asin an saiyang organisasyon tanganing tabangan kita. Kaipuhan an pakatagal sa paghulit, pero an paghuhulit nakatatabang sa sato na makatagal, huli ta pinapagdadanay kaiyan na buhay an satong pagtubod. Haranihon na sa sagkodan, dai niato maninigong togotan an satong mga problema na paluyahon an satong kaigotan, huli ta idto sanang makatatagal sagkod sa katapusan an maliligtas.​—Mateo 24:13.

An pahayag sa pinakatema na, “An Satong Katongdan Bilang mga Mensahero nin Diosnon na Katoninongan,” inapod an atension sa pagkakalda kan Judiong mga desterrado hale sa Babilonya asin sa pagbabalik kan dalisay na pagsamba sa Jerusalem kan 537 B.C.E. An pangyayaring ini, an paliwanag kan espiker, patanaw sana kan gigibohon kan Kahadean nin Dios sa dai na mahahaloy sa bilog na kinaban. (Salmo 72:7; Isaias 9:​7) An satong presenteng asignasyon iyo na ihulit an maogmang bareta manongod sa Kahadean na ini asin mamuhay kaoyon kan mensaheng iyan. An pagkamoot sa Dios asin sa kataed maninigong magpahiro sa sato na magpadagos sa gibohon na ini na daing poropondo.​—Gibo 5:42.

An sarong tampok na kabtang kan programa kan Biernes iyo an simposium na “Magmaan sa Natatagong mga Siod nin Aling-alingan.” An musika, mga pelikula, video, pasale sa telebisyon, kawat sa video, libro, magasin, asin komiks sa presenteng panahon sa parate nagpapabanaag nin kaisipan nin demonyo. Kun siring, dapat niatong “ikabalde an maraot” asin “mangapot sa marahay.” (Roma 12:9) Iyo, kaipuhan niatong mansayon an marigsok na aling-alingan bilang makababalde asin likayan iyan, mantang pinaghohorophorop niato an mga bagay na mabini, marahay, asin inoomaw. (Filipos 4:8) An mga publikasyon asin mga kagamitan sa pagsiyasat na itinao kan organisasyon ni Jehova pinupukaw an satong isip nin nakaparirigon na mga kaisipan asin pinatotood kita na mamidbid an tama sa sala. (Hebreo 5:14) Kita maninigong mangapot sa mga probisyon na ini kun paanong kita mangangapot sa sarong barsa sa sarong maalon na dagat.

Suminunod an pahayag na “Tumangon an Diablo​—Dai Togotan an Pagriribal.” Dai na sana mahahaloy bago sinda lumaog sa Dagang Panuga, rinibong Israelita an nasiod nin inmoralidad. Dai tinogotan ni Fineas an pagriribal kun dapit sa tunay na pagsamba. Sia naggibo nin dai mapagdududahan na aksion tumang sa mga parakasala, asin an saiyang dai nababangang debosyon nakapaogma ki Jehova. (Bilang 25:​1-13) An kamawotan ni Satanas gibohon an lambang saro sa sato na bakong angay na lumaog sa bagong kinaban nin Dios. Arog ni Fineas, kaipuhan niato kun siring na tumangon an mga paghihingoa kan Diablo na paramogon kita. Maski may agom o daing agom, kaipuhan kitang ‘dumulag sa pakikisaro.’​—1 Corinto 6:18.

“Maimbod na Pagsuportar sa Integridad kan Tataramon nin Dios” an huring pahayag sa enot na aldaw kan kombension. An dakol na paratradusir liniliwat o hinahale an mga kabtang kan Kasuratan. Halimbawa, tanganing pabahawon an boot nin mga paradepensa sa mga diretso nin babae, an mga paratradusir kan The New Testament and Psalms: An Inclusive Version inapod an Dios na, bakong Ama, kundi Ama-Ina asin si Jesus “An Tawo” imbes na an “Aki nin tawo” [sa Ingles, “Son of man”]. Nalalaen, an New World Translation nangapot nin fiel na marhay sa tekstong nasa orihinal na lenguahe kaya iyan nagpangyaring maliwanagan an satong isip sa nagkapirang bagay sa Kasuratan. Halimbawa, sinabi kan espiker: “An eksaktong pakatradusir sa New World Translation an nagtao nin basehan para sa pagreorganisar niato kan mga kongregasyon paagi sa pagnombra nin mga grupo nin kamagurangan, tanganing mas makakomporme sa arogan na itinao kan Kristianong kongregasyon kan enot na siglo.” Ikinapaheheling niato an satong kaimbodan sa Tataramon nin Dios paagi sa pagbasa kaiyan aroaldaw asin paagi sa pag-aplikar kan hatol kaiyan. Sinabi man kan espiker: “Ipinaheheling niato na kita maimbod na mga parasuportar kan Tataramon nin Dios paagi sa maigot na paghuhulit kaiyan sa iba asin paagi sa maingat na paggamit kaiyan mantang tinotokdoan niato an iba, na dai noarin man naghihingoang paoyonon iyan sa sadiri niatong ideya paagi sa pagpiripit o pag-unat kan sinasabi kaiyan.”

‘An Katoninongan nin Dios Minalampas sa Gabos na Kaisipan’

An temang ini, na basado sa Filipos 4:​7, inandam an isip kan mga nagdadangog para sa ikaduwang aldaw kan kombension. An kadaklan kan impormasyon na iinatubang may labot sa tamang pagmansay sa ministeryo, pamilya, pagdusay, asin iba pang aspekto nin pan-aroaldaw na pamumuhay nin saro.

Pakatapos nin pag-orolay sa teksto kan aldaw, iinatubang an simposium na may titulong “Mga Mensahero na Nagdadara nin Maogmang Bareta nin Katoninongan.” An satong mensahe manongod sa katoninongan, asin iyan maninigong ipaabot sa matoninong na paagi. (Efeso 6:15) An katuyohan niato ganahon an mga puso, bakong an mga argumento. An pagpatood asin mga publikasyon na inaako niato hale sa organisasyon ni Jehova nakatatabang sa sato na gibohon an siring kaiyan. Dai niato maninigong togotan an pagkaindiperente o kadaihan nin interes na makapadisganar sa sato. Imbes, kita maninigong padagos na ‘gibohon an bilog niatong makakaya,’ na igwa nin maoswag na rutina nin personal na pag-adal, pag-atender sa mga pagtiripon, asin pakikikabtang sa paghuhulit. (2 Timoteo 2:15) Dai dapat paglingawan an paggibo nin marahay sa iba, nangorogna duman sa mga may relasyon sa sato sa pagtubod. (Galacia 6:10) Siempre, an paggibo kan satong bilog na makakaya dai nangangahulogan na paggibo sagkod sa dai ta na kaya. An magigibo kan lambang saro sono sa saiyang abilidad asin mga kamugtakan inaako ni Jehova.

An banwaan nin Dios nagtatao kan saindang panahon, kosog, asin mga kayamanan tanganing paoswagon an intereses kan Kahadean. An pahayag na “Maogmang Pagtatao sa Laog kan Organisasyon ni Jehova” nagpalataw kan punto na mantang nagdadakol an mga arog-karnero na naghihimate sa mensahe kan Kahadean, igwa nin pangangaipo para sa dugang na kagamitan, mga lugar na pagtitiriponan, asin mga pasilidad sa sanga. An satong mga kontribusyon nagpapangyari na an organisasyon magkaigwa kan ano man na kaipuhan tanganing taposon an paghuhulit sa bilog na kinaban. An buka an palad na pagtatao nagtatao man nin onra ki Jehova asin nagbubunga nin kagayagayahan sa nagtatao. Kun siring, bilang mga Kristiano, dai niato dapat na paglingawan an mahalagang aspektong ini kan satong pagsamba.​—2 Corinto 8:​1-7.

Natapos an sesyon sa aga paagi sa pahayag sa bautismo​—na perming tampok na kabtang sa darakulang pagtiripon kan Mga Saksi ni Jehova. Kanigoan an kagayagayahan na maheling an bagong mga nagdusay na sumunod sa mga lakad ni Jesus paagi sa pagpabautismo sa tubig! (Mateo 3:​13-17) An gabos na naggigibo kan lakdang na ini naedukar sa gikanan kan nakalalabi sa gabos na kadonongan​—an Biblia. Dugang pa, nanompongan ninda an tunay na katuyohan sa buhay, asin sinda binendisyonan kan katoninongan na resulta nin pakaaram na ginigibo ninda an tama.​—Eclesiastes 12:13.

An direkta sa puntong hatol itinao sa pahayag na “Togoti Nindong Ingatan Kamo nin Pakamansay.” An pakamansay mahalagang marhay kun dapit sa mga transaksion sa negosyo. Dai niato maninigong gibohon an personal na pagnegosyo sa Kingdom Hall, ni maninigo man niatong aprobetsaran an kapwa mga Kristiano para sa pinansial na ganansia. (Ikomparar an Juan 2:​15, 16.) An pakamansay kaipuhan man kun nangangapital sa sarong negosyo o kun nangungutang o nagpapautang nin kuarta. “An pagkalugi nin mga negosyo sa tahaw nin mga Kristiano naggiya sa pagkadisganar asin pagkawara nin espirituwalidad pa ngani sa kabtang nin nagkapira na dali-daling luminaog sa bakong seguradong mga plano sa pagganansia nin kuarta,” an paliwanag kan espiker. Dawa ngani bakong sala na an mga Kristiano lumaog sa pakipagnegosyo sa lambang saro, madonong nanggad na mag-ingat. Asin kun an sarong kontrata sa negosyo gibohon sa pag-oltanan nin duwang partido, an mga kondisyon maninigong perming nasusurat.

An pamantayan nin Dios para sa mga lalaki asin babae ipinaliwanag sa pahayag na “Linalang Nia Sindang Lalaki Asin Babae.” An mga papel kan magkalaen na sekso biniribid sa bilog na kasaysayan. “Dakol an namamaluan na an pagkalalaki maisog na pagdominar, pagigin matagas, o makosogon na pag-orgolyo sa pagigin lalaki,” an sabi kan espiker. “Sa nagkapirang kultura bihira, makasosopog pa ngani, na an sarong lalaki maghibi sa publiko o maski sa pribado. Pero an Juan 11:​35 nagsasaysay na mantang kaibanan kan kadaklan sa luwas kan lolobngan ni Lazaro, ‘si Jesus naghibi.’” Kumusta man an mga babae? An pagkababae sa parate ikinamamalo sa pisikal na kagayonan. Alagad an espiker naghapot: “Kun an sarong babae magayon alagad bakong makatanosan asin parapakisuhay, mapagtuya, o arogante, sia daw talagang magayon sa tunay na kahulogan kan tataramon, tunay na igwang kualidad na sa babae?” (Ikomparar an Talinhaga 11:​22; 31:26.) Sa saindang pagtaram, paggawe, asin pag-alinyar, an Kristianong mga lalaki asin babae nagmamaigot na sunodon an mga pamantayan sa Biblia. Sinabi kan espiker: “An lalaki na nagpapaheling kan bunga kan espiritu pasil na igalang, asin an babae na naggigibo kaiyan pasil na kamotan.”​—Galacia 5:​22, 23.

Suminunod an simposium na “An Dios nin Katoninongan Nagmamakolog sa Saindo.” An dakol na Kristiano igwa nin mga kahaditan sa pinansial. Minsan siring, si Jehova nanunuga: “Sa ano man na paagi dai taka babayaan ni sa ano man na paagi pababayaan taka.” (Hebreo 13:5) Sa ibong nin mga pagtios sa ekonomiya, an iba nagpaheling nin pagtitiwala sa panuga na ini paagi sa pag-auxiliary o pagregular payunir. An iba na dai makapagpayunir ngonyan ineenot an intereses kan Kahadean paagi sa pag-aprobetsar sa lambang oportunidad na makapagpatotoo. (Mateo 6:33) An gabos na siring na paghihingoa dapat na komendaran! An organisasyon ni Jehova nagtao nin kadakol na publikasyon tanganing tabangan kita sa satong ministeryo asin tanganing tabangan kita na mapangganahan an satong mga problema. Kun kita nagpapaheling nin apresasyon sa espirituwal na mga probisyon ni Jehova, bebendisyonan nia kita nin katoninongan sa mga panahon na ini nin kariribokan sa ekonomiya.​—Salmo 29:11.

Sa katapusan kan ultimong pahayag kan aldaw na, “Pag-aaboton an Diosnon na Katoninongan sa Buhay Pampamilya,” naogma an mga kombensionista na akoon an bagong libro na An Sekreto sa Kaogmahan nin Pamilya. “Maigot nindong pag-adalan an librong ini nin personal asin bilang mga grupo nin pamilya,” an sadol kan espiker. “Hingoahon nin maigot na iaplikar an hatol kaiyan na basado sa Biblia, asin makasisierto kamo na madudugangan an katoninongan asin kaogmahan kan saindong pamilya.”

“Otobon an Pagkasararo . . . sa Nakapagpapasarong Bogkos nin Katoninongan”

Basado sa Efeso 4:​3, ini angay na tema para sa huring aldaw kan kombension. An Mga Saksi ni Jehova, na tiniripon hale sa gabos na nasyon kan kinaban, tinokdoan nin Dios. Kun siring, sinda namomoot sa katoninongan. Sinusunod ninda an halimbawa ni Jesus asin hinihingoang “otobon an pagkasararo kan espiritu sa nakapagpapasarong bogkos nin katoninongan.”

An katoninongan na nakaiimpluwensia sa organisasyon nin Dios itinampok sa simposium na “Pagmidbid sa Tamang Klase nin mga Mensahero.” An falsong mga propeta nag-eksister sa suanoy na Israel. Minsan siring, an tunay na mga mensahero nin Dios​—siring kan mga propetang si Isaias, Ezequiel, asin Jeremias—​eksaktong naghula kan pagbagsak kan Jerusalem, kan peryodo nin pagkadistiero, asin kan liberasyon kan banwaan nin Dios sa katapustapusi. An kaagid na situwasyon nag-eeksister ngonyan. An falsong mga mensahero kadakol sa mga rona nin politika asin falsong relihion. Pero, si Jehova ibinangon an saiyang mga Saksi tanganing ibalangibog an saiyang katuyohan manongod sa palakaw na ini nin mga bagay. Partikularmente poon kan 1919, an mga lingkod ni Jehova ginamit sa pagbalangibog kan mensahe nin Dios. Laen nanggad sinda sa falsong mga mensahero kan Kakristianohan! Logod kita magmahigos na gibohon an satong kabtang sa gibohon na ini sagkod na sabihon na ni Jehova na iyan tapos na.

An pahayag na “Maghinanyog sa Asin Kuyogon an Tataramon nin Dios” nagdoon na an Kasuratan iyo an nakalalabi sa gabos na gikanan nin paggiya, karangahan, asin paglaom. (Isaias 30:​20, 21; Roma 15:4) An kinaban ngonyan orog na nagigin sobrang magpasunod. Orog kisa kasuarin man, kita kun siring kaipuhan na maghinanyog sa hatol na hale sa Tataramon asin organisasyon nin Dios. Aram ni Jehova an satong mga kaluyahan, asin sa saiyang Tataramon isinabi nia nin malinaw an dalan na pakikinabangon kita. An pakaaram na sinusuportaran kita ni Jehova nagtatao sa sato nin kompiansa na gibohon an ano man na bagay na hinahagad nia sa sato.

Inandam kaini an isip kan mga nagdadangog para sa kompleto an kostium na drama na suminunod. Iyan may titulong “Taano ta Kaipuhan na Igalang an Teokratikong mga Areglo?” Ginagamit an kasaysayan ni Gedeon sa Biblia bilang basehan, an pag-atubang na ini ikinadoon na marhay an sarong mapuersang leksion​—kita kaipuhan na kumuyog sa mga instruksion nin Dios asin dai isalida an satong kaisipan o probaran na likayan an teokratikong hatol.

An pahayag-publiko sa temang “Tunay na Katoninongan sa Katapustapusi!​—Saen Magikan?” An katoninongan na ipinanunuga nin Dios minalampas sa ano man na puedeng imahinaron kan kinaban na ini. “An tunay na katoninongan nangangahulogan nin katoninongan aroaldaw,” an sabi kan espiker. “An katoninongan nin Dios nangangahulogan nin kinaban na daing helang, kolog, kamondoan, asin kagadanan.” Sinasabi sa sato kan Biblia na ‘pinaoontok ni Jehova an mga ralaban sagkod sa kaporoporohi kan daga.’ (Salmo 46:9) Paano nia ini gigibohon? Paagi sa paghale kan parapundar nin guerra, si Satanas na Diablo. (Kapahayagan 20:​1-3) Bubukasan kaini an dalan para sa mga mahoyo na ‘manahon an daga asin magkararanga nin labi-labi sa nagsosopay na katoninongan.’​—Salmo 37:11.

Kasunod nin sumaryo kan artikulong pag-aadalan sa Torrengbantayan para sa semana, an ultimong pahayag para sa kombension iinatubang. May titulong “Nag-aabante Bilang mga Mensahero nin Diosnon na Katoninongan,” an nakapupukaw sa boot na pahayag na ini nagdoon na an satong paghuhulit kapwa nasosolo asin apretado. Ngonyan bakong panahon na magpahorohayahay, mag-istambay, o bumuelta sa salang mga ideya. Kita sinangkapan kan kaipuhan niato​—an mensahe nin Dios, an saiyang banal na espiritu, asin balakid na probisyon na hale sa saiyang mamomoton na teokratikong organisasyon. Bilang mga lingkod ni Jehova, kita logod kun siring padagos na umabante bilang mga mensahero nin diosnon na katoninongan!

[Kahon/Mga retrato sa pahina 9]

Sarong Mamomoton na Probisyon Para sa mga Pamilya

An mga nag-atender sa ikaduwang aldaw kan “Mga Mensahero nin Diosnon na Katoninongan” na Pandistritong Kombension naogmang akoon an bagong publikasyon na may titulong An Sekreto sa Kaogmahan nin Pamilya. An librong ini igwa nin Makakasuratan na impormasyon na pakikinabangan nin gabos na pamilya na namomoot sa Dios.

An sarong magurang sa kongregasyon sa Connecticut, E.U.A., nagkokomento: “Kan Hunyo 15, naresibi niamo an librong Kaogmahan nin Pamilya. Mga Hunyo 16, nangabangaan na ako sa pagbasa kaiyan. Kan ika-17, ginibo niamo an primerong pampamilyang pag-adal kaiyan, asin naparigon nanggad an samong boot! Kan aldaw man sanang idto, natapos kong basahon an libro. An marahay na publikasyon na ini daing duwa-duwa na magigin mahalagang marhay sa gabos na makua kaiyan. An pagigin sadiosan asin sunod sa panahon na impormasyon kan libro nagtatao nin dugang pang ebidensia na ‘an fiel asin madonong na oripon’ nagtatao nin ‘kakanon sa igong panahon’ asin nakaaaram na marhay kan satong mga pangangaipo sa masakit na mga panahon na ini.”​—Mateo 24:​45-47.

[Retrato sa pahina 7]

Magin hoben o gurang gustong maaraman kun ano an kahagadan nin Dios