An Lugar nin Musika sa Modernong Pagsamba

AN PAG-AWIT sarong balaog hale sa Dios. An pag-awit niato nin makosog puedeng magtao nin kaogmahan sa sato asin sa satong Kaglalang. Paagi kaiyan, ikapahahayag ta an satong mga emosyon, kapwa mga kapungawan asin kagayagayahan. Orog pa kaiyan, ikasasabi ta an satong pagkamoot, pagsamba, asin pag-omaw sa Kagtugdas nin awit, si Jehova.

An kadaklan sa mga tres sientos na pagsambit kan Biblia sa musika may koneksion sa pagsamba ki Jehova. An pag-awit konektado man sa kagayagayahan​—bako sanang sa kagayagayahan kan mga nag-aawit kundi sa kagayagayahan man ni Jehova. An salmista nagsurat: “Gumibo logod sinda nin melodiya sa saiya. Huli ta si Jehova nakakukua nin kaogmahan sa saiyang banwaan.”​—Salmo 149:​3, 4.

Alagad gurano kahalaga an pag-awit sa modernong pagsamba? Paano mahihimo kan banwaan ni Jehova ngonyan na paogmahon sia paagi sa pag-awit nin makosog? Ano an maninigong magin lugar nin musika sa tunay na pagsamba? An pagsiyasat sa kasaysayan nin musika sa pagsamba matabang na simbagon an mga hapot na ini.

An Makasaysayan na Lugar nin Musika sa Pagsamba

An enot na pagsambit kan Biblia sa musika dai espesipikong ipinaririsa may koneksion sa pagsamba ki Jehova. Sa Genesis 4:21, si Jubal minimidbid huli sa tibaad pag-imbento kan kaenot-enoteng mga instrumento sa musika o tibaad sa pagpoon nin sarong klase nin propesyon sa musika. Minsan siring, an musika kabtang na nin pagsamba ki Jehova dawa bago pa lalangon an mga tawo. An nagkapirang traduksion nin Biblia ilinaladawan an mga anghel na nag-aarawit. An Job 38:7 nagsasabi dapit sa mga anghel na magayagayang nagkukururahaw asin ‘nagkukururahaw sa pag-omaw.’ Sa siring, may Makakasuratan na dahelan na maniwala na an pag-awit sa pagsamba ki Jehova ginigibo na haloy pa bago naglataw an tawo.

Irinarason nin nagkapirang historyador na an suanoy na musikang Hebreo gabos melodiya, mayo nin kaibang armoniya. Minsan siring, bako sanang sarong nota an puedeng togtogon nin sabay-sabay sa arpa, sarong instrumento na parateng nasasambitan sa Biblia. Siertong narisa kan nagtotogtog kan arpa an armoniya na mapoprodusir paagi sa mga kombinasyon nin mga tono sa instrumento. Imbes na simple sana, daing duwa-duwa na marahayon an saindang musika. Asin kun huhusgaran paagi sa mga berso asin prosa kan Hebreong Kasuratan, makakokonklusyon kita na halangkaw an kualidad kan musika kan mga Israelita. Tunay nanggad, an pagkainspirar sa musikal na mga komposisyon nakalalabing marhay kisa kan sa kataraed na nasyon.

An pagkaorganisar kan suanoy na templo nagpangyari na magkaigwa nin komplikadong mga areglo nin mga instrumento asin mga tingog sa pagsamba sa templo. (2 Cronica 29:​27, 28) Igwa nin mga “direktor,” “eksperto,” “tinotokdoan,” asin “namamayo sa mga paraawit.” (1 Cronica 15:21; 25:​7, 8; Nehemias 12:46) Sa pagkomento sa saindang marahayon na mga abilidad sa musika, an historyador na si Curt Sachs nagsurat: “An mga koro asin orkestra na konektado sa Templo sa Jerusalem nagsusuherir nin halangkaw na pamantayan nin edukasyon, abilidad, asin kaaraman sa musika. . . . Minsan ngani dai ta aram kun ano an tanog kan suanoy na musikang iyan, bastante an satong ebidensia kan puersa, dignidad, asin ekspertong pagkagibo kaiyan.” (The Rise of Music in the Ancient World: East and West, 1943, pahina 48, 101-2) An Awit ni Salomon sarong halimbawa nin pagkamapag-imbento asin kualidad nin mga komposisyon na Hebreo. Iyan sarong estorya na inaawit, na kapareho kan libreto, o teksto, nin sarong opera. An awit inaapod sa tekstong Hebreo na “Awit kan mga Awit,” an boot sabihon, an pinakaekselenteng awit.

Para sa suanoy na mga Hebreo, an pag-awit sarong mahalagang kabtang nin pagsamba. Asin iyan nagtaong lugar para sa positibong kapahayagan nin emosyon sa saindang pag-omaw ki Jehova.

Pag-awit kan mga Kristiano kan Enot na Siglo

An musika padagos na nagin regular na kabtang nin pagsamba sa tahaw kan enot na mga Kristiano. Apuera sa pagkaigwa nin ipinasabong na Salmo, minalataw na ginibo ninda an kaenot-enoteng musika asin mga liriko para sa pagsamba, na itinatao an arogan para sa paggibo nin Kristianong mga awit sa modernong panahon. (Efeso 5:19) An librong The History of Music, ni Waldo Selden Pratt, nagpapaliwanag: “An pag-awit sa pampubliko asin pribadong pagsamba nakaugalean na kan enot na mga Kristiano. Para sa nakombertir na mga Judio ini pagpapadagos kan mga kaugalean sa sinagoga . . . Apuera sa Hebreong Salmo . . . , an bagong pagtubod dayaday na nagkaigwa nin tendensia na gumibo nin bagong mga himno, na kan primero minalataw na sa porma nin mga rapsodia.”a

Sa pagtampok kan halaga nin pag-awit, kan ponan ni Jesus an Pamanggihan kan Kagurangnan, posibleng inawit nia asin kan mga apostol an mga Halel. (Mateo 26:​26-​30) Ini mga awit nin pag-omaw ki Jehova na isinurat sa Salmo asin inawit may koneksion sa selebrasyon nin Paskua.​—Salmo 113-118.

An Impluwensia nin Falsong Pagsamba

Kan dumatong an sinasabing Panahon nin Kadikloman, an relihiosong musika nagin na sanang mamondong pagkantada. Kan mga 200 C.E., si Clemente na taga-Alejandria nagsabi: “Sarong instrumento an kaipuhan ta: an toninong na tingog nin pagsamba, bakong mga arpa o bombo o plauta o trumpeta.” Ipinaotob an mga restriksion, na linilimitaran an musika sa simbahan na magin mga boses na sana. An estilong ini namidbid na kinakantada. “Mayo pang kuarentang taon pakatapos na itindog an Constantinople, ibinawal kan Konsilyo nin Laodicea (A.D. 367) an partisipasyon kapwa nin mga instrumento asin nin mga kongregasyon sa liturhiya. An ortodoksong musika nagin paagi na sana sa boses,” an sabi kan librong Our Musical Heritage. (Samo an italiko.) An mga restriksion na ini mayo nin basehan sa enot na Kristianismo.

Durante kan Panahon nin Kadikloman, an Biblia sarong sirradong libro para sa ordinaryong mga tawo. An mga Kristianong nagin pusuan na makakua o makabasa nin Biblia pinaglamag asin ginadan pa ngani. Bakong makangangalas, kun siring, na an kaugalean nin pag-awit nin mga pag-omaw sa Dios sa kadaklan nawara durante kan madiklom na panahon na iyan. Total, kun an ordinaryong mga tawo dai puedeng makabasa kan Kasuratan, paano ninda maaaraman na awit an ikasampulong kabtang kan bilog na Biblia? Siisay an mapaisi sa sainda na an Dios nagboot sa saiyang mga parasamba na ‘mag-awit ki Jehova nin bagong awit, an saiyang kaomawan sa kongregasyon nin mga maimbod’?​—Salmo 149:1.

Pagbalik kan Musika sa Tamang Lugar Kaiyan sa Pagsamba

Dakol na ginibo an organisasyon ni Jehova na ibalik an musika asin pag-awit sa tamang lugar kaiyan sa pagsamba. Halimbawa, an Pebrero 1, 1896 na luwas kan Zion’s Watch Tower mga awit sana an laog. Iyan may titulong “Zion’s Glad Songs of the Morning” (sa Bicol, “An Maogmang mga Awit kan Kapinonan nin Sion”).

Kan 1938 an pag-awit sa mga pagtiripon kan kongregasyon pinondo kan kadaklan. Minsan siring, dai nahaloy nangibabaw an kadonongan nin pagsunod sa halimbawa asin paggiya kan mga apostol. Sa pandistritong kombension kan 1944, itinao ni F. W. Franz an pahayag na “Awit nin Paglilingkod sa Kahadean.” Ipinaheling nia na an mga awit nin pag-omaw ki Jehova itinatao kan mga linalang nin Dios sa langit haloy pa bago lalangon an tawo asin sinabi nia: “Tama asin nakapaoogma sa Dios na an Saiyang mga lingkod digdi sa daga makosog na umawit nin literal na awit.” Pakatapos ipaliwanag an argumento para sa pag-awit sa pagsamba, ipinaisi nia an pagluwas kan Kingdom Service Song Book na gagamiton sa semanal na mga pagtiripon sa paglilingkod.b Dangan an Informant na Disyembre 1944 (ngonyan inaapod na An Satong Ministeryo sa Kahadean) nagpaisi na magigin kaiba man sa iba pang mga pagtiripon an pambukas asin pantapos na mga awit. Sa giraray an pag-awit nagin kabtang kan pagsamba ki Jehova.

‘Pag-awit ki Jehova sa Satong Puso’

An halaga nin odok sa pusong pag-awit ipinaheheling kan satong mga tugang sa Sirangan na Europa asin sa Aprika na nakaeksperyensia nin dakol na taon na kasakitan asin paglamag. Si Lothar Wagner pitong taon na nainkomunikado. Paano sia nakatagal? Sabi nia: “Sa laog nin nagkapirang semana nagkonsentrar ako na kompletohon an sakong memorya nin mga awit na pan-Kahadean. Kun dai ko aram nin eksakto an teksto minagibo na sana ako nin saro o duwang estropa. . . . Bastante nanggad sa nakaparirigon sa boot asin nakapakokosog na mga kaisipan an satong mga awit na pan-Kahadean!”​—1974 Yearbook of Jehovah’s Witnesses, pahina 226-8.

Durante nin limang taon na pagkainkomunikado huli sa saiyang fiel na paninindogan, naranga si Harold King sa paggibo asin pag-awit nin mga awit nin pag-omaw ki Jehova. An nagkapira sa saiyang mga komposisyon ginagamit ngonyan kan Mga Saksi ni Jehova sa saindang pagsamba. Nakasusustenir an kagayagayahan na konektado sa pag-awit. Alagad dai kaipuhan an paglamag tanganing makombensir kita na mahalaga an pag-awit nin mga pag-omaw sa Dios.

An gabos sa banwaan ni Jehova puedeng makanompong nin kagayagayahan sa awit. Minsan ngani tibaad may mga pag-alangan kita sa pagpahayag kan satong sadiri sa berbal na paagi, ikaluluwas ta an satong mga saboot para ki Jehova kun ibinoboses niato iyan paagi sa awit. Ipinarisa ni apostol Pablo kun paano kita makanonompong nin kagayagayahan sa pag-awit nin mga pag-omaw kan sadolon nia an mga Kristiano na padagos na ‘mag-orolay-olay sa mga salmo asin mga pag-omaw sa Dios patin espirituwal na mga awit, na nag-aawit asin inaakompanyaran an saindong sadiri nin musika sa saindong puso ki Jehova.’ (Efeso 5:19) Kun an satong puso pano nin espirituwal na mga bagay, ikinapahahayag niato iyan nin makosog paagi sa awit. Kaya an liabe sa mas marahay na pag-awit iyo an tamang aktitud nin puso.

An pagkaigwa nin marahay na relasyon ki Jehova nakakokontribwir sa magayagayang espiritu, na nagpapahiro sa sato na itaram, awiton, asin ikurahaw an mga pag-omaw ki Jehova. (Salmo 146:​2, 5) Nag-aawit kita nin odok sa puso manongod sa mga bagay na satong ikinaoogma. Asin kun nagugustohan ta an awit o an mga saboot kan awit, posibleng marhay na aawiton ta iyan na igwa nin tunay na pagmate.

Dai man kaipuhan na an saro umawit nin makosog tanganing makaawit na may pagmate. An makosog na pag-awit bako man na kapareho nin magayon na pag-awit; ni na magayon kun dai nadadangog an pag-awit. An nagkapirang boses na may natural na ugong puedeng magin lataw dawa maluya an pag-awit. An sarong kabtang kan angat sa marahay na pag-awit kaiba nin grupo iyo an pakanood na bumagay. Baga man kamo nag-aawit na may armoniya o magkakapareho an boses, an kosog kan saindong boses na kapareho kan kataed nindo magbubunga nin awit na kawiliwili asin may pagkasararo. An Kristianong kababaan nin boot asin an pagigin andam na magdangog nakatatabang sa saro na magin timbang sa pag-awit nin makosog na may entusiasmo pero dai man nakalalabaw an boses. Minsan siring, an mga may abilidad sa pag-awit o may pambihira kagayon na boses dai maninigong desganaron na umawit nin makosog. An magayon na boses puedeng makatao nin makosog na pagsuportar sa sarong kongregasyon na nag-aawit nin mga pag-omaw ki Jehova.

An pag-awit sa satong mga pagtiripon nagtatao man nin tamang kamugtakan para sa pag-awit sa mga kabtang na pan-armoniya sa mga melodiya. An mga tataong umawit nin armoniya na dai naggagamit nin mga nota o tataong bumasa kan mga nota sa songbook asin tataong awiton iyan pinaririgon an boot na sabayan an pag-awit asin makadagdag sa kagayonan kan musika.c

An nagkapira tibaad magsabi, ‘dai ako tatao kan tono’ o ‘makanoson an boses ko; nagsisintonado iyan sa halangkaw na tono.’ Sa siring, nasosopog sinda kun nag-aawit, dawa sa Kingdom Hall. An totoo mayo nin boses na nag-aawit sa pag-omaw ki Jehova na “makanoson” sa saiyang punto de vista. Kun paanong an boses sa pagtaram puedeng paoswagon paagi sa pagsasanay asin paagi sa pagsunod sa nakatatabang na mga suhestion na itinatao sa Teokratikong Paadalan sa Pagmiministro, an pag-awit nin saro puede man na paoswagon. Napaoswag nin nagkapira an saindang boses paagi sana sa pagharohagonghong mantang may mga ginigibo. An pagharohagonghong nakatatabang na mapakarhay an tono kan boses. Asin sa angay na mga panahon mantang kita nagsosolo o nagtatrabaho sa lugar na dai kita makadidisturbo sa iba, an pag-awit nin mga melodiyang pan-Kahadean sarong ekselenteng ehersisyo para sa boses asin sarong paagi na an saro magin magayagaya, pamugtak an isip.

Puede ta man na enkaminaron an pag-awit nin pirang awit na pan-Kahadean sa mga pagtiripontipon. An siring na pag-awit, na inaakompanyaran nin instrumento na arog baga nin gitara o piano o kan mga rekording sa piano kan Sosyedad, nagtatao nin espirituwal na kualidad sa satong mga pagtiripontipon. Iyan nakatatabang man na manodan an mga awit asin awiton iyan nin marahay sa mga pagtiripon kan kongregasyon.

Tanganing tabangan an mga kongregasyon na magin entusiastiko sa pag-awit sa mga pagtiripon, an Sosyedad nagtao nin nakarekord na mga pan-akompanyar na musika. Kun pinatotogtog an mga iyan, an nag-aasikaso sa sound system maninigong magin mapagrisa sa kosog kan tanog. Kun bakong igo an kosog kan musika, an kongregasyon tibaad masopog sa pag-awit nin makosog. Mantang an tugang na nagkokontrol kan sound system nag-aawit kasabay kan kongregasyon, madedeterminaran nia kun baga nasusundan o dai an musika.

Gumibo nin Melodiya ki Jehova

An pag-awit nagtatao sa sato kan oportunidad na ipahayag an satong mga saboot para sa satong Kaglalang. (Salmo 149:​1, 3) Iyan, bako sanang pagpaluwas nin emosyon, kundi sarong kontrolado, rasonable, asin magayagayang kapahayagan nin satong pag-omaw. An pagsapuso kan pag-awit kan kongregasyon puedeng andamon an satong isip asin puso para sa masunod na programa asin magpahiro sa sato na orog pang makikabtang sa pagsamba ki Jehova. Minsan ngani an pag-awit igwa nin epekto sa emosyon, an mga tataramon puede man na magtokdo sa sato. Paagi kun siring sa pagpahayag kan satong sadiri na magkakapareho an boses asin igwa nin armoniya, may kahoyoan asin kapakumbabaan na iinaandam niato an satong puso tanganing iriba kitang makanood bilang tiripon na banwaan.​—Ikomparar an Salmo 10:17.

An pag-awit perming magigin kabtang nin pagsamba ki Jehova. Kun siring may paglaom kita na mamatean man sagkod lamang an mga saboot kan salmista: “Oomawon ko si Jehova sa bilog kong pagkabuhay. Magibo ako nin melodiya sa sakong Dios sagkod na ako nabubuhay.”​—Salmo 146:2.

[Mga Nota sa Ibaba]

[Kahon sa pahina 27]

Nagkapirang Suhestion Para sa mas Marahay na Pag-awit

1. Iitaas an songbook sa posisyon na dai kamo nakaduko kun nag-aawit. Nakatatabang ini sa saro na humangos nin mas natural.

2. Humangos nin hararom sa kapinonan nin kada frase.

3. An dikit pang pagbuka kan ngoso kisa sa komportable para sa saro sa primero natural na makadadagdag sa kosog asin ugong kan boses.

4. Orog sa gabos, magkonsentrar sa saboot kan inaawit.