Bioetika Asin Pag-operar na Dai Naggagamit nin Dugo

SA DAI pa sana nahahaloy na mga taon nagkaigwa nin dai pang kaagid na pag-oswag sa langtad nin medisina. Minsan siring, mantang rineresolberan an mga problema sa medisina, an nagkapirang pag-oswag nagbunga nin mga problema sa etika.

Kaipuhan na pensaron nin mga doktor an mga problema na arog baga nin: Maninigo daw na dai na gibohon kun beses an puersahan na medikal na pagbolong tangani na an pasyente magadan na may dignidad? Maninigo daw na pangibabawan nin doktor an desisyon nin pasyente kun sa pagmate nia iyan para sa pinakaikararahay kan pasyente? Paano maninigong pantay-pantay na itao an pag-ataman sa salud kun dai kaya kan gabos an mahal na pagbolong?

An siring kakomplikadong mga isyu nagin dahelan na magin sentro nin atension an disiplina sa medisina na inaapod na bioetika. Katuyohan kan espesyalidad na ini na tabangan an mga doktor asin sientista na aksionan an etikong mga implikasyon nin pagsiyasat sa biolohiya asin mga pag-oswag sa medisina. Mantang an dakol sa pinakadepisil na mga desisyon nangyayari sa mga ospital, dakol na ospital an nag-establisar nin mga komite sa bioetika. Sa parate an mga miembro kan komite​—kabale an mga doktor asin abogado—​nag-aatender nin mga seminar sa bioetika, kun saen inaanalisar an etikong mga problema sa medisina.

An nagkapirang hapot na parateng pinalalataw sa siring na mga seminar iyo an: Sagkod saen maninigong igalang nin mga doktor an mga paniniwala kan Mga Saksi ni Jehova na, sa pangenot huli sa relihiosong mga dahelan, nagsasayumang paineksion nin dugo? Maninigo daw na ineksionan nin dugo nin sarong doktor an pasyente tumang sa kabotan kan pasyente kun iyan garo baga “maninigo” sa medikal na paagi? Sono daw sa etika na gibohon iyan na dai aram kan pasyente, na garo baga ‘kun dai iyan aram kan pasyente dai man iyan makakokolog sa boot nia’?

Tanganing husayon sa tamang paagi an siring na mga isyu, kaipuhan nin mga doktor an basado sa katunayan na pagsabot sa punto de vista kan mga Saksi. Sa saindang kabtang, galaga an Mga Saksi ni Jehova na ipaliwanag sa mga doktor an saindang paninindogan, na nakarerealisar na an pagkasinabotan kan kada saro makatatabang na malikayan an komprontasyon.

Pagrinibayan nin mga Punto de Vista

Si Propesor Diego Gracia, sarong prominenteng autoridad sa bioetika sa España, gustong magkaigwa nin siring na pag-orolay an saiyang klase. “Tama sana na tawan kamo [Mga Saksi ni Jehova] nin oportunidad na ipahayag an saindong mga iniisip . . . huli sa nagin mga kadepisilan nindo may koneksion sa mga pag-ineksion nin dugo,” sabi kan propesor.

Sa siring, kan Hunyo 5, 1996, tolong representante kan Mga Saksi ni Jehova an inimbitaran sa Unibersidad nin Complutense sa Madrid, España, tanganing ipaliwanag an saindang punto de vista. Mga 40 doktor asin iba pang propesyonal an presente.

Pakatapos nin halipot na pagpamidbid kan mga Saksi, an sesyon binuksan para sa mga paghapot. An gabos na presente uminoyon na an sarong pasyenteng adulto maninigong magkaigwa kan diretso na sayumahan an sarong partikular na medikal na pagbolong. An klase naniniwala man na dai noarin man maninigong gibohon an pag-ineksion nin dugo na mayo kan may kabatidan na pagtogot kan pasyente. Pero pinag-isip-isip ninda an nagkapirang aspekto kan paninindogan kan mga Saksi.

An sarong hapot manongod sa kuarta. Kun beses an pag-operar na dai naggagamit nin dugo nangangaipo nin espesyal na kasangkapan, arog baga nin pag-operar paagi sa laser, siring man nin mahal na mga bolong, arog baga nin erythropoietin, na ginagamit tanganing pakosogon an pagprodusir nin pulang selula nin dugo. An sarong doktor nag-isip-isip na kun paagi sa pagsayuma sa bakong gayong mahal na pagpipilian (magkakaparehong dugo), tibaad naglalaom an mga Saksi na tatawan sinda nin espesyal na mga pribilehio kan mga serbisyo nin salud-publiko.

Minsan ngani minimidbid na an kuarta talagang sarong bagay na dapat konsideraron nin mga doktor, sinambit nin sarong representanteng Saksi an ipinublikar na mga pagsiyasat na nag-aanalisar sa natatagong mga gastos sa pag-ineksion nin magkakaparehong dugo. Kabale digdi an gastos sa pagbolong sa mga komplikasyon na konektado sa pag-ineksion nin dugo, siring man an kawaran nin entrada huli sa siring na mga komplikasyon. Kinotar nia an sarong kompletong pagsiyasat hale sa Estados Unidos na nagpaheling na an promedyong yunit nin dugo, minsan ngani sa primero nagkakantidad sana nin $250, an totoo nagresulta sa gastos na labing $1,300​—labi sa limang doble kan orihinal na kantidad. Huli kaini, an paliwanag nia, kun kokonsideraron an gabos na bagay, menus gastos an pag-operar na dai naggagamit nin dugo. Apuera kaiyan, an kadaklan sa ekstrang gastos daa sa pag-operar na dai naggagamit nin dugo iyo an kagamitan na puedeng gamiton giraray.

An saro pang problema na nasa isip nin nagkapirang doktor may koneksion sa impluwensia nin kairiba. Ano an mangyayari, an iniisip ninda, kun nagbago an desisyon nin sarong Saksi asin nagpaineksion nin dugo? Isisikwal daw sia kan grupo nin mga Saksi?

An simbag madepende sa aktuwal na situwasyon, huli ta an pagsuway sa ley nin Dios tunay na sarong seryosong bagay, na an kamagurangan sa kongregasyon an dapat na magsiyasat. Boot kan mga Saksi na tabangan an siisay man na nag-agi nin makolog na eksperyensia nin pag-operar na buhay an katimbang asin nagpaineksion nin dugo. Posible na mamomondong marhay an siring na Saksi asin mahahadit manongod sa saiyang relasyon sa Dios. An siring na tawo tibaad mangaipo nin tabang asin pagsabot. Mantang an pundasyon nin Kristianismo iyo an pagkamoot, mamawoton kan kamagurangan, siring man sa gabos na kaso hudisyal, na timbangan nin pagkaherak an karigonan.​—Mateo 9:​12, 13; Juan 7:​24.

“Dai pa daw nindo sisiyasaton liwat an etikong paninindogan nindo sa amay na panahon?” an hapot nin sarong propesor sa bioetika, na nagbisita hale sa Estados Unidos. “Ginibo iyan kan ibang relihion sa nakaagi pa sanang mga taon.”

An paninindogan kan mga Saksi mapadapit sa kabanalan nin dugo sarong doktrinal na paniniwala imbes na sarong etikong punto de vista na sinisiyasat sa panapanahon, an sabi sa saiya. An malinaw na pagboot kan Biblia dai nagtotogot sa pakipagkompromiso. (Gibo 15:​28, 29) An paglapas sa siring na ley nin Dios kapareho man nin pagkonsinte sa idolatriya o pakikisaro na dai aakoon nin Saksi.

Inaapresyar na marhay kan Mga Saksi ni Jehova an pagigin gikan sa boot kan mga doktor​—arog kan mga presente sa seminar sa bioetika sa Madrid—​na igalang an saindang desisyon na humagad nin ibang paagi nin pagbolong na kaoyon kan saindang marigon na pagtubod na basado sa Biblia. Daing duwa-duwa, mahalaga an magigin papel nin bioetika tanganing maparahay an mga relasyon nin pasyente asin doktor patin mapaoswag an mas dakulang paggalang sa mga kagustohan kan pasyente.

Siring sa ibinaretang sinabi nin sarong bantog na Kastilang doktor, dapat na perming girumdomon nin mga doktor na sinda “naggagamit nin bakong sangkap na mga kagamitan asin mga paagi na puedeng masala.” Kaipuhan ninda kun siring an “kombiksion na an pagkamoot maninigo na perming makaabot sa dai kayang maabot nin kaaraman.”