Ginibo Ninda an Kabotan ni Jehova

Sarong Halimbawa nin Pagsakripisyo sa Sadiri Asin Kaimbodan

PARA sa sarong hoben na paraoma na an ngaran Eliseo, an nagpoon na sarong pinagkatodan nang aldaw nin pag-arado nagin an pinakamakahulogan na aldaw sa saiyang buhay. Mantang sia nagtatrabaho sa oma, si Eliseo dai linalaoman na dinalaw ni Elias, an pangenot na propeta nin Israel. ‘Taano daw ta dinadalaw nia ako?’ an tibaad pinag-isip-isip ni Eliseo. Dai na nia kaipuhan pang maghalat nin haloy para sa simbag. Iinalikboy ni Elias ki Eliseo an saiyang opisyal na gubing, na nagpapaheling na pag-abot nin aldaw si Eliseo an magigin kasalihid nia. Dai binasangbasang ni Eliseo an pangapodan na ini. Tolos-tolos, binayaan nia an saiyang oma tanganing magin katabang ni Elias.​—1 Hade 19:​19-​21.

Pakalihis nin mga anom na taon, panahon nang humale si Elias. An pagkasaysay kan saiyang paghale inapod na “saro sa pinakamakangangalas na mga estorya” sa Hebreong Kasuratan.

Nag-aandam si Elias sa Paghale

Mawot ni Elias na dumalaw nin pangultimo sa Betel, Jerico, asin sa Jordan. Kalabot digdi an paglakaw nin dakol na milya, na an iba kaiyan sa depisil agihan na mga lugar sa bukid. Sa kada pinopondohan sa pagbaklay, inenkaminar ni Elias si Eliseo na magpawalat. Alagad nag-insister si Eliseo na magdanay kaiba kan saiyang kagurangnan sagkod sa katapusan.​—2 Hade 2:​1, 2, 4, 6.

Mantang nasa Betel asin sa Jerico, dinolok si Eliseo kan “mga aki kan mga propeta.”a “Ano talagang aram mo na ngonyan hahaleon ni Jehova an saimong kagurangnan sa pagkapayo sa saimo?” an hapot ninda sa saiya. “Aram ko man na marhay iyan,” an simbag nia. “Alo kamo.”​—2 Hade 2:​3, 5.

Dangan nagduman si Elias asin Eliseo sa Salog nin Jordan. Pag-abot ninda sa Jordan, naggibo si Elias nin sarong milagro mientras na an mga 50 aki kan mga propeta nagmamasid sa harayo. “Kinua ni Elias an saiyang opisyal na gubing asin linukot iyan patin pinakol an katubigan, asin iyan luway-luway na nabanga pasiring digdi asin pasiring duman, kaya sindang duwa buminalyo sa mamarang daga.”​—2 Hade 2:8.

Tolos-tolos pakabalyo ninda, nagsabi si Elias ki Eliseo: “Hagada an maninigo kong gibohon para sa saimo bago ako kuanon sa saimo.” Naghagad si Eliseo nin “duwang kabtang” kan espiritu ni Elias​—na an boot sabihon, an duwang kabtang na sa parate nanonongod sa sarong panganay na aking lalaki. Sa katunayan, tinawan ni Eliseo nin onra si Elias siring kan pagtaong onra nin sarong panganay na aking lalaki sa saiyang ama. Apuera kaini, linahidan sia na magin kasalihid ni Elias bilang propeta ni Jehova sa Israel. Kaya an saiyang kahagadan bakong paslo ni alangan. Minsan siring, nakaaaram na solamente si Jehova an makatatao kan kahagadan na ini, may kababaan nin boot na nagsimbag si Elias: “Mapawot na bagay an hinahagad mo.” Dangan idinugang nia: “Kun maheling mo ako kun kinukua sa saimo, siring kaiyan an mangyayari sa saimo; alagad kun dai, dai iyan mangyayari.”​—2 Hade 2:​9, 10; Deuteronomio 21:17.

Daing duwa-duwa na si Eliseo orog na determinado kisa kasuarin pa man na magdanay na dayupot sa saiyang kagurangnan. Dangan, luminataw an “sarong kalayong karuwaheng panguerra asin mga kabayong kalayo.” Sa mismong atubangan kan nakubhanan na si Eliseo, iinitaas si Elias nin sarong ariporos​—na milagrosong ibinalyo sa ibang lugar.b Pinurot ni Eliseo an opisyal na gubing ni Elias asin nagbalik sia sa gilid kan Salog nin Jordan. Pinakol nia an katubigan, na nagsasabi: “Haen si Jehova na Dios ni Elias, Sia mismo?” Nabanga an katubigan, na nagtatao nin malinaw na ebidensia na si Eliseo sinuportaran nin Dios bilang kasalihid ni Elias.​—2 Hade 2:11-​14.

Mga Leksion Para sa Sato

Kan imbitaran sa espesyal na paglilingkod kaiba ni Elias, tolos-tolos na binayaan ni Eliseo an saiyang oma tanganing maglingkod sa pangenot na propeta nin Israel. Minalataw na menus an nagkapira sa saiyang mga obligasyon, huli ta namidbid sia bilang an saro na “nagbubo nin tubig sa mga kamot ni Elias.”c (2 Hade 3:11) Minsan siring, minansay ni Eliseo na sarong pribilehio an saiyang gibohon, asin sia maimbod na nagdanay kaiba ni Elias.

An dakol sa mga lingkod nin Dios ngonyan nagpapaheling nin kaagid na espiritu nin pagsakripisyo sa sadiri. May mga nagbaya kan saindang “mga oma,” kan saindang mga pagbuhay, tangani na maghulit kan maogmang bareta sa hararayong teritoryo o maglingkod bilang mga miembro nin sarong pamilyang Bethel. An iba nagbiahe pasiring sa ibang kadagaan tangani na magtrabaho sa mga proyektong konstruksion kan Sosyedad. Dakol an nag-ako nin tibaad ibinibilang na hamak na mga gibohon. Alagad ta mayo ni saro na nagpapaoripon ki Jehova na naggigibo nin bakong mahalagang paglilingkod. Inaapresyar ni Jehova an gabos na naglilingkod sa saiya nin gikan sa boot, asin bebendisyonan nia an saindang espiritu nin pagsakripisyo sa sadiri.​—Marcos 10:​29, 30.

Nagdanay si Eliseo kaiba ni Elias sagkod sa katapusan. Nagsayuma siang bayaan an mas may edad na propeta maski kan tawan nin oportunidad. Daing duda, an dayupot na relasyon ki Elias na kinultibar nia pinangyari an siring kaimbod na pagkamoot na magin sarong kaogmahan. Ngonyan, an mga lingkod nin Dios nagmamaigot na pakosogon an saindang relasyon sa Dios asin mas dumayupot sa saindang mga kapagtubod. Bebendisyonan an dayupot na bogkos nin pagkasararo, huli ta nagsasabi an Biblia manongod ki Jehova: “Sa sarong maimbod ika mahiro sa kaimbodan.”​—2 Samuel 22:26.

[Mga Nota sa Ibaba]