Pinahehelang daw Kita kan Diablo?

AN HELANG NUNGKA KUTANANG NAG-EKSISTER. Linalang kita nin Dios na mabuhay sagkod lamang na sangkap an salud. Sarong espiritung linalang, si Satanas, an nagcausa kan helang, kolog, asin kagadanan tanganing pasakitan nin makuri an pamilya nin tawo kan giyahan nia sa kasalan an satong enot na mga magurang, si Adan asin Eva.—GENESIS 3:1-5, 17-19; ROMA 5:12.

NANGANGAHULOGAN daw ini na an gabos na helang direktang resulta kan pakikiaram hale sa rona nin mga espiritu? Siring sa sinabi sa nakaaging artikulo, an dakol ngonyan siring kaiyan an paghona. An lola kan sadang na si Owmadji naniniwala dian. Alagad an pagkurso daw ni Owmadji—na kun minsan nakagagadan na helang para sa mga akion pa sa tropiko—talagang causa kan dai naheheling na mga espiritu?

An Kabtang ni Satanas

Malinawon an simbag kan Biblia sa hapot na ini. Enot, ipinaheheling kaiyan na dai puedeng apektaran kan espiritu kan satong mga apoon an mga buhay. Kun an mga tawo magadan, “mayo man lamang sinda nin pakaaram.” Mayo sinda nin espiritu na natatadang buhay pagkagadan. Sinda natotorog sa lolobngan, na dian “mayo nin gibohon ni pagplano ni kaaraman ni kadonongan.” (Eclesiastes 9:5, 10) Dai lamang puedeng pahelangon kan gadan an buhay!

Minsan siring, ihinahayag kan Biblia na nag-eeksister an maraot na mga espiritu. An enot na rebelde sa bilog na uniberso iyo an espiritung linalang na midbid ngonyan bilang Satanas. An iba nakiayon sa saiya asin inapod na mga demonyo. Puede daw magcausa nin helang si Satanas asin an mga demonyo? Nangyari iyan. Kalabot sa nagkapira kan mga milagrosong pagpaomay ni Jesus an pagpaluwas nin mga demonyo. (Lucas 9:37-43; 13:10-16) Minsan siring, an kadaklan kan binolong ni Jesus mga helang na bakong direktang causa kan mga demonyo. (Mateo 12:15; 14:14; 19:2) Kaagid kaiyan ngonyan, sa pundamental, an helang resulta nin natural, bakong lihis sa natural, na mga causa.

Paano man an panraratak? Inaasegurar kita kan Talinhaga 18:10: “An ngaran ni Jehova makosog na torre. Dian minadalagan an matanos asin tinatawan nin proteksion.” An Santiago 4:7 nagsasabi: “Tumangon nindo an Diablo, asin sia madulag sa saindo.” Iyo, kayang protehiran nin Dios an saiyang mga fiel sa panraratak asin sa ano man na pambihirang kapangyarihan. Saro iyan sa ipinaririsa kan mga tataramon ni Jesus: “An katotoohan mapatalingkas sa saindo.”—Juan 8:32.

‘Paano man si Job?’ an tibaad ihapot nin nagkapira. ‘Bako daw na maraot na espiritu an nagpahelang sa saiya?’ Iyo, sinasabi kan Biblia na si Satanas an nagcausa kan helang ni Job. Alagad an kamugtakan ni Job pambihira. Si Job haloy nang may proteksion nin Dios sa direktang pag-atake nin demonyo. Dangan inangat ni Satanas si Jehova na pasakitan si Job, asin huli ta kalabot an dakulang mga isyu, hinale ni Jehova nin parsial an saiyang proteksion sa saiyang parasamba sa sarong kasong ini.

Minsan siring, an Dios nagtao nin mga sagkodan. Kan togotan nia si Satanas na pasakitan si Job, puedeng pahelangon ni Satanas si Job sa laog nin sarong panahon, alagad dai nia sia puedeng gadanon. (Job 2:5, 6) Sa kahurihurihi, natapos an pagdusa ni Job, asin binalosan sia nin igo ni Jehova huli sa saiyang integridad. (Job 42:10-17) An mga prinsipyo na pinatunayan kan integridad ni Job haloy nang irinekord sa Biblia asin risang-risa kan gabos. Dai na kaipuhan an siring pa kaiyan na pagbalo.

Paano Naghihiro si Satanas?

Sa haros gabos na pangyayari, an solamenteng koneksion sa pag-oltanan ni Satanas asin kan helang nin tawo iyo an bagay na sinugotan ni Satanas an enot na mag-agom na tawo, asin sinda nahulog sa kasalan. Sia asin an saiyang mga demonyo bako an direktang causa kan gabos na helang. Minsan siring, bakong sobra kamapalangkaw si Satanas tanganing hingoahon na impluwensiahan kita na gumibo nin bakong madonong na mga desisyon asin ikompromiso an satong pagtubod, na puedeng magresulta nin danyos sa satong salud. Dai nia rinatak, ginadan, o pinapaghelang si Adan asin Eva. Inagyat nia si Eva na makisuway sa Dios, asin si Adan nagsunod sa saiya sa dalan nin pakisuway. An helang asin kagadanan kabtang kan resulta.—Roma 5:19.

An sarong bakong fiel na propeta na an ngaran Balaam sarong beses binayadan kan hade nin Moab na sumpaon an nasyon nin Israel, na mapanhumang nagkakampo sa mga linderos nin Moab. Prinobaran ni Balaam na sumpaon an Israel, alagad sia naprakaso huli ta an nasyon pinoprotehiran ni Jehova. Dangan pinonan kan mga Moabita na akiton an Israel na magkomiter nin idolatriya asin seksuwal na inmoralidad. An taktikang ini nagin mapanggana, asin an Israel nawaran kan proteksion ni Jehova.—Bilang 22:5, 6, 12, 35; 24:10; 25:1-9; Kapahayagan 2:14.

Puede kitang makanood nin importanteng leksion sa suanoy na pangyayaring iyan. An tabang nin Dios nagtatao nin proteksion sa fiel na mga nagsasamba sa Dios sa direktang pag-atake kan maraot na mga espiritu. Minsan siring, si Satanas tibaad maghingoang papangyarihon na ikompromiso kan mga indibiduwal an saindang pagtubod. Tibaad hingoahon nia na akiton sinda sa inmoralidad. O, kapareho nin nag-uungal na leon, tibaad hingoahon nia na patakoton sinda na gumibo nin bagay na naghahale kan proteksion sa sainda nin Dios. (1 Pedro 5:8) Iyan an dahelan kun taano ta inapod ni apostol Pablo si Satanas na “an saro na igwa kan kapangyarihan na magtao nin kagadanan.”—Hebreo 2:14.

An lola ni Owmadji naghingoang kombensiron si Hawa na gumamit nin mga agimat asin anito bilang proteksion tumang sa helang. Ano daw kutana an nangyari kun si Hawa suminuko? Sia kutana nagpaheling nin kadaihan nin lubos na tiwala ki Jehova Dios, asin dai na sia makakokompiar sa saiyang pagprotehir.—Exodo 20:5; Mateo 4:10; 1 Corinto 10:21.

Ginamitan man ni Satanas si Job nin pan-agyat. An halean sia nin saiyang pamilya, saiyang kayamanan, asin saiyang salud bakong igo. Tinawan man sia nin maraot na marhay na hatol kan saiyang agom kan ini magsabi: “Sumpaa an Dios asin magadan ka!” (Job 2:9) Dangan sia sinongko nin tolong “katood” na durungan na naghingoang kombensiron sia na sia an dapat basolon para sa saiyang helang. (Job 19:1-3) Sa paaging ini inaprobetsaran ni Satanas an maluya nang kamugtakan ni Job tanganing hingoahon na padesganaron sia asin paluyahon an saiyang kompiansa sa katanosan ni Jehova. Pero, si Job padagos na nanarig ki Jehova bilang an saiyang solamenteng paglaom.—Ikomparar an Salmo 55:22.

Kun kita naghehelang, kita man tibaad magmondong marhay. Sa siring na situwasyon, si Satanas marikas sa paghingoang pahiroon kita minsan paano na ikakompromiso an satong pagtubod. Huli kaini, kun magkahelang, mahalagang isaisip na an pundamental na causa kan satong pagdusa posibleng marhay na minanang pagkabakong sangkap imbes na pambihirang impluwensia. Girumdomon, an fiel na si Isaac nabuta sa laog nin dakol na taon bago sia nagadan. (Genesis 27:1) An causa bakong maraot na mga espiritu kundi pagkagurang. Si Raquel nagadan kan sia nangangaki, bakong huli ki Satanas, kundi huli sa kaluyahan nin tawo. (Genesis 35:17-19) Sa kahurihurihi, an gabos na fiel kan suanoy nagadan—bakong huli sa mga engkanto o sumpa kundi huli sa minanang pagkabakong sangkap.

Sarong siod an imahinaron na igwa nin direktang impluwensia an dai naheheling na mga espiritu sa gabos na helang na sinasapar niato. Iyan puedeng pumukaw nin nakangingiring takot sa mga espiritu. Kun siring, kun kita magkahelang, tibaad masugotan kita na maghingoang sirosiroon an mga demonyo imbes na magdanay na harayo sa sainda. Kun kita mapatakot ni Satanas na gumibo nin espiritistikong mga gibohon, iyan magigin pagpasaloib sa tunay na Dios, si Jehova. (2 Corinto 6:15) Kita maninigong giyahan nin may paggalang na takot sa Dios, bako nin superstisyosong takot sa saiyang Kaiwal.—Kapahayagan 14:7.

An sadang na si Owmadji igwa na kan pinakamarahay na proteksion na posible tumang sa maraot na mga espiritu. Oyon ki apostol Pablo, an Dios ibinibilang siang “banal” huli ta an saiyang ina nagtutubod, asin an saiyang ina puedeng mamibi sa Dios na bantayan an saiyang aking babae paagi sa banal na espiritu. (1 Corinto 7:14) Binendisyonan kan siring na tamang kaaraman, si Hawa nakanompong nin epektibong pagbolong para ki Owmadji imbes na manarig sa mga agimat.

Manlaenlaen na Causa nin Helang

An kadaklan na tawo dai naniniwala sa mga espiritu. Kun sinda nagkakahelang, sinda nagpapadoktor—kun iyan kaya ninda. Siempre, an tawong may helang puedeng magpadoktor pero dai maomayan. Dai kaya nin mga doktor na magmilagro. Alagad an dakol na superstisyosong indibiduwal na puedeng maomayan nagpapadoktor sana kun huri na an gabos. Pinoprobaran nguna ninda an espiritistikong mga paagi nin pagbobolong, asin kun ini dai mag-aser sinda nagpapadoktor bilang huring remedyo. Dakol an nagagadan nin dai man kaipuhan.

An iba nagagadan na dai pa napapanahon huli sa ignoransia. Dai ninda namimidbid an mga sintomas asin dai aram kun anong praktikal na mga paagi an gigibohon tanganing maebitaran an helang. An kaaraman nakatatabang na maebitaran an dai kaipuhan na pagdusa. Mahalagang mangnohon na an may inadalan na mga ina mas dikit an nagagadan na aki huli sa helang kisa sa mga daing inadalan. Iyo, an ignoransia puedeng nakagagadan.

An kapabayaan saro pang causa nin helang. Halimbawa, dakol an nagkakahelang huli ta pinababayaan ninda na magkamang an mga insekto sa kakanon bago iyan kakanon o huli ta an mga nagpepreparar kan kakanon dai nguna naghuhugas kan saindang kamot. Peligroso man an pagtorog na daing kubong sa mga rehion na kontaminado nin malaria.a Kun dapit sa salud, totoo sa parate na “an sarong onsa na prebension mas marahay kisa sarong libra na pagbolong.”

An bakong madonong na estilo nin pamumuhay nagcausa na magkahelang asin magadan na mayo pa sa panahon an minilyon. An pagbuburat, seksuwal na inmoralidad, pagdodroga, asin paninigarilyo nakaraot sa salud nin dakol. Kun an sarong tawo napadadara sa mga bisyong ini asin magkahelang, iyan daw huli ta may nang-engkanto sa saiya o may espiritu na nag-atake sa saiya? Dai. Sia an dapat basolon sa saiyang paghelang. An pagbasol sa mga espiritu dai pag-ako sa paninimbagan sa bakong madonong na estilo nin pamumuhay.

Siempre, may nagkapirang bagay na dai niato kayang kontrolon. Halimbawa, puede kitang mabalad sa mga mikrobio na nagkacausa nin helang o sa polusyon. Ini an nangyari ki Owmadji. Dai aram kan saiyang ina kun ano an nagcausa kan pagkurso. An saiyang mga aki dai nagkakahelang nin parate arog kan ibang mga aki huli ta pinagdadanay niang malinig an saiyang harong asin natad saka pirme siang naghuhugas kan saiyang mga kamot bago magpreparar nin kakanon. Alagad an gabos na aki nagkakahelang paminsanminsan. Mga 25 laen-laen na organikang impeksion an puedeng magcausa nin pagkurso. Posibleng dai maaraman noarin man kun arin an nagcausa kan problema ni Owmadji.

An Solusyon na Panhaloyan

An helang bakong sala nin Dios. “Paagi sa maraot na mga bagay an Dios dai puedeng baloon ni binabalo man nia an siisay man.” (Santiago 1:13) Kun an saro sa saiyang mga parasamba magkahelang, sinusuportaran sia ni Jehova sa espirituwal. “Si Jehova mismo magpapakosog sa saiya sa ibabaw nin sopa nin kahelangan; an gabos niang higdaan sasalidahan mo sa panahon kan saiyang paghelang.” (Salmo 41:3) Iyo, an Dios may pakikidamay. Gusto nia kitang tabangan, bakong danyaran.

Tunay nanggad, si Jehova igwa nin solusyon na panhaloyan para sa helang—an kagadanan asin pagkabuhay liwat ni Jesus. Paagi sa pantubos na atang ni Jesus, an mga tama an kamugtakan nin puso binabalukat sa saindang makasalan na kamugtakan asin sa kahurihurihi magkakamit nin sangkap na salud asin buhay na daing sagkod sa sarong paraisong daga. (Mateo 5:5; Juan 3:16) An mga milagro ni Jesus sarong patanaw kan tunay na pagpapaomay na pangyayarihon kan Kahadean nin Dios. Hahaleon man nin Dios si Satanas asin an saiyang mga demonyo. (Roma 16:20) Tunay nanggad, si Jehova may itinagamang makangangalas na mga bagay para sa mga naggigibo nin pagtubod sa saiya. Kaipuhan sana niatong magin mapasensia asin magtagal.

Mientras tanto, an Dios nagtatao nin praktikal na kadonongan asin espirituwal na paggiya paagi sa Biblia asin sa bilog na kinaban na kasararoan nin magturugang nin fiel na mga parasamba. Ipinaheheling nia sa sato kun paano lilikayan an mga bisyo na nagkacausa nin mga problema sa salud. Asin tinatawan nia kita nin tunay na mga katood na matabang kun lumataw an mga problema.

Isip-isipa giraray si Job. An pagkonsulta sa parabawi an pinakamaraot kutana na ginibo ni Job! Hinalean kutana sia kaiyan nin proteksion nin Dios, asin dai nia kutana nakamtan an gabos na bendisyon na naghahalat sa saiya pakatapos kan grabeng pagbalo sa saiya. Dai liningawan nin Dios si Job, asin dai nia kita lilingawan. “Nadangog nindo an dapit sa pakatagal ni Job asin naheling an bunga na itinao ni Jehova,” an sabi kan disipulong si Santiago. (Santiago 5:11) Kun kita dai noarin man sumuko, kita man maako nin makangangalas na mga bendisyon sa itinalaan na panahon nin Dios.

Ano an nangyari sa sadang na si Owmadji? Nagirumdoman kan saiyang ina an artikulo sa kaibaibang magasin kan An Torrengbantayan, an Awake!, manongod sa oral rehydration na terapi.b Sinunod nia an mga instruksion kaiyan asin ginibo an timpla tanganing inomon ni Owmadji. Ngonyan an sadang na aking babae marahay asin makosog.

[Mga Nota sa Ibaba]

[Mga retrato sa pahina 7]

Nag-areglo si Jehova nin permanenteng solusyon sa problema nin paghelang