Estorya nin Buhay

Si Jehova an Sakong Pailihan Asin Kakosogan

ISINAYSAY NI MARCEL FILTEAU

“Kun pakakasalan mo sia, seguradong makakarsel ka.” Iyan an sabi kan mga tawo sa babae na pinaplano kong pakasalan. Togoti nindo akong ipaliwanag kun taano ta siring kaiyan an sinasabi ninda.

KAN ako mamundag kan 1927, an probinsia nin Quebec sa Canada dominado nin Katolisismo. Pakalihis nin mga apat na taon, si Cecile Dufour, sarong bilog na panahon na ministro kan Mga Saksi ni Jehova, nagpoon na magsongko sa samong harong sa siudad nin Montreal. Huli kaini, parate siang hinuhuma kan samong mga kataed. Sa katunayan, sia inarestar asin minaltrato nin dakol na beses dahelan sa paghuhulit kan mensahe kan Biblia. Kaya madali ming nanodan an pagigin totoo kan mga tataramon ni Jesus: “Ikaoongis kamo kan gabos na nasyon huli sa ngaran ko.”​—Mateo 24:9.

Kan panahon na idto, para sa dakol dai ninda maisip na babayaan nin sarong pamilyang Pranses-Canadiano an saindang relihion na Katoliko. Minsan ngani an sakong mga magurang nungkang nagin bautisadong Saksi, tolos sindang nagkonklusyon na an mga katokdoan kan Iglesia Katolika bakong kaoyon sa Biblia. Kaya inenkaminar ninda an walong aki ninda na basahon an mga literatura na ipinupublikar kan mga Saksi, asin sinuportaran ninda an mga naninindogan sa samo para sa katotoohan sa Biblia.

Paninindogan sa Masakit na mga Panahon

Kan 1942, mantang ako nag-eeskuela pa, ako nagpoon na magkaigwa nin tunay na interes sa pag-adal sa Biblia. Kan panahon na idto an mga aktibidad kan Mga Saksi ni Jehova prohibido sa Canada huli ta sinunod ninda an halimbawa kan enot na mga Kristiano asin dai nakilabot sa mga guerra kan mga nasyon. (Isaias 2:​4; Mateo 26:52) An sakong panganay na tugang na lalaki, si Roland, ilinaog sa kampo nin puersahan na pagtrabaho huli sa pagsayuma nia na magkapot nin armas durante kan guerra mundial na nangyayari kan panahon na idto.

Kan panahon na ini, tinawan ako ni Tatay nin sarong libro sa Pranses na nagladawan kan mga pagdusa kan mga Saksing Aleman huli sa saindang pagsayuma na suportaran an militar na mga kampanya ni Adolf Hitler.a Namotibar ako na makisaro sa siring na makosog an boot na mga halimbawa nin integridad, asin nagpoon akong umatender sa mga pagtiripon kan Mga Saksi ni Jehova na ginigibo sa sarong pribadong harong. Dai nahaloy inagda ako na makikabtang sa paghuhulit. Inako ko an pangagda na lubos an pakarealisar na ako puedeng arestaron asin ibilanggo.

Pakatapos na mamibi para sa kosog, nagtoktok ako sa enot na pinto. Sarong maboot na babae an nagsimbag, asin pakapamidbid ko, binasa ko sa saiya an mga tataramon sa 2 Timoteo 3:​16: “An gabos na Kasuratan ipinasabong nin Dios asin kapakipakinabang.”

“Ano, interesado ka na makanood nin orog pa manongod sa Biblia?” an hapot ko.

“Iyo,” an simbag kan babae.

Kaya sinabi ko sa saiya na may iiiba akong sarong amiga na mas may aram sa Biblia kisa sako, na ginibo ko kan sumunod na semana. Pakatapos kan enot na eksperyensiang idto, ako nagin mas kompiado, asin nanodan ko na dai niato ginigibo an ministeryo sa sadiri niatong kosog. Siring kan sabi ni apostol Pablo, ginigibo ta iyan sa tabang ni Jehova. Tunay nanggad, mahalagang marhay na rekonoseron niato na ‘an kosog na lihis sa ordinaryo sa Dios asin bakong gikan mismo sa sato.’​—2 Corinto 4:7.

Pakalihis kaiyan, an paghuhulit nagin regular na kabtang kan sakong buhay asin siring man an mga pag-arestar asin pagkabilanggo. Bakong makangangalas na an kinukursonada kong aagomon sinabihan, “Kun pakakasalan mo sia, seguradong makakarsel ka”! Pero, an siring na mga eksperyensia bako man talagang siring kaiyan kasakit. Pakasarong banggi sa karsel, sarong kapwa Saksi an parateng nagpapiansa sa samo tangani na makaluwas.

Importanteng mga Desisyon

Kan Abril 1943, idinusay ko an sakong sadiri ki Jehova asin sinimbolisaran iyan paagi sa bautismo sa tubig. Dangan, kan Agosto 1944, idto an enot kong pag-atender sa dakulang kombension, sa Buffalo, Nueva York, E.U.A., sa ibong sana kan linderos nin Canada. Igwang 25,000 na nag-atender, asin inanimar kan programa an sakong pagmawot na magin payunir, an apod sa bilog na panahon na mga ministro kan Mga Saksi ni Jehova. An pagprohibir sa gibohon kan Mga Saksi ni Jehova sa Canada hinale kan Mayo 1945, asin nagpoon akong magpayunir kan suminunod na bulan.

Minsan siring, mantang nadadagdagan an sakong kabtang sa ministeryo, iyo man an mga pagkakarsel sa sako. Sarong beses ilinaog ako sa sarong selda kaibanan si Mike Miller, sarong fiel, haloy nang lingkod ni Jehova. Minatukaw kami sa salog na paril asin nag-oolay. An samong nakaparirigon na pag-oolay sa espirituwal nakapakosog na marhay sa sako. Pero paghaloyhaloy, nagsabong sa isip ko an hapot na, ‘Paano kun igwa kami nin dai pagkasinabotan asin dai kami nag-oolay?’ An panahon na nakaibanan ko sa karsel an mahal na tugang na ini nagtokdo sa sako kan saro sa pinakamagayon na leksion sa sakong buhay​—kaipuhan ta an satong mga tugang asin kun siring maninigo kitang magin mapagpatawad asin maboot sa lambang saro. Ta kun dai, siring sa isinurat ni apostol Pablo: “Kun kamo padagos na nagkikinagatan asin naghihinalonan, mag-ingat kamo na dai kamo magkagaradanan.”​—Galacia 5:15.

Kan Setyembre 1945, inimbitaran ako na maglingkod sa sangang opisina kan Watch Tower Society sa Toronto, Canada, na inaapod niamong Bethel. An espirituwal na programa duman tunay nanggad na nakaparirigon asin nakapakokosog sa pagtubod. Kan suminunod na taon, iinasignar ako na magtrabaho sa oma kan Bethel, mga 40 kilometros sa amihanan kan sangang opisina. Mantang ako nagguguno nin mga strawberry kaiba kan hoben na si Anne Wolynec, nariparo ko bako sana an saiyang pisikal na kagayonan kundi siring man an saiyang pagkamoot asin kaigotan para ki Jehova. Nagin kaming magkarelasyon, asin kinasal kami kan Enero 1947.

Kan suminunod na duwa may kabangang taon, kami nagpayunir sa London, Ontario, asin pakatapos kaiyan sa Cape Breton Island, kun saen nagtabang kami na organisaron an sarong kongregasyon. Dangan, kan 1949, inimbitaran kami sa ika-14 klase kan Paadalan sa Biblia kan Watchtower sa Gilead, kun saen sinanay kami na magin misyonero.

Pagmimisyonero sa Quebec

An mga taga Canada na naggradwar sa nakaaging mga klase nin Gilead iinasignar na buksan an paghuhulit sa Quebec. Kan 1950, kami kaiba an 25 iba pang hale sa samong ika-14 klase uminayon sa sainda. An nadugangan na aktibidad nin mga misyonero nagbunga nin nadugangan na paglamag asin madahas na pagsururog, na sutsut kan mga namomoon sa Iglesia Katolika Romana.

Duwang aldaw pakalihis na umabot sa samong enot na destino sa pagmimisyonero sa siudad nin Rouyn, si Anne inarestar asin isinakay sa likod kan kotse nin mga pulis. Bagong eksperyensia ini para sa saiya, ta hale sia sa sarong sadit na baryo sa probinsia nin Manitoba, Canada, kun saen bihira siang makaheling nin pulis. Naturalmente, sia natakot asin nagirumdoman an mga tataramon na, “Kun pakakasalan mo sia, seguradong makakarsel ka.” Minsan siring, bago naghale, nanuparan man ako kan mga pulis asin isinakay ako sa kotse kaiba si Anne. “Naoogma akong maheling ka!” an kagsing nia. Pero, makangangalas an pagkakalmado nia, na nagsasabi, “Bueno, arog man kaini an nangyari sa mga apostol dahel sa paghuhulit manongod ki Jesus.” (Gibo 4:​1-3; 5:​17, 18) Pagtaodtaod kan aldaw na idto kami pinaluwas na piansado.

Mga sangtaon pakalihis kan insidenteng iyan, mantang nasa ministeryong pagharongharong sa bagong destino mi sa Montreal, may nadangog akong nagkakariribok sa enotan kan kalye asin natanaw ko an sarong anggot na sururog na nangagapo. Kan sosokorohan ko na si Anne asin an saiyang kaiba, nag-abot an mga pulis. Imbes na arestaron an mga miembro kan sururog, inarestar kan mga pulis si Anne asin an saiyang kaiba! Mantang nasa bilanggoan, ipinagirumdom ni Anne sa bagohan na Saksi na naeeksperyensiahan ninda an katunayan kan mga tataramon ni Jesus: “Ikaoongis kamo nin gabos na tawo huli sa ngaran ko.”​—Mateo 10:22.

Kaidto, mga 1,700 na kaso kontra sa Mga Saksi ni Jehova an naghahalat nin pagbista sa Quebec. Sa pankagabsan, kami inakusar nin pagwaras nin sedisyosong mga babasahon o nin pagwaras nin mga babasahon na mayo nin lisensia. Bilang resulta, an Departamento Legal kan Watch Tower Society nagplantar nin kaso kontra sa gobyerno nin Quebec. Pakalihis nin dakol na taon nin pagbista, tinawan kami ni Jehova nin duwang dakulang kapangganahan sa Korte Suprema nin Canada. Kan Disyembre 1950, inabsuelto kami sa sahot na an samong mga babasahon sedisyoso, asin kan Oktubre 1953, sinuportaran an samong diretso na magwaras nin mga babasahon sa Biblia na mayo nin lisensia. Sa siring heling-heling mi kun paanong si Jehova tunay nanggad na sarong lugar na ‘pailihan asin kosog, sarong tabang na danay na makukua sa panahon nin mga kasakitan.’​—Salmo 46:1.

Pambihira nanggad, an bilang kan mga Saksi sa Quebec luminangkaw poon sa 356 kan 1945, kan ako magpoon na magpayunir, sagkod sa labing 24,000 ngonyan! Nangyari nanggad an sinabi kan hula sa Biblia: “An ano man na armas na gibohon tumang sa saimo dai magkakaepekto, asin an arin man na dila na tumindog tumang sa saimo sa paghokom saimong kokondenaron.”​—Isaias 54:17.

An Samong Gibohon sa Pransia

Kan Setyembre 1959, kami ni Anne inimbitaran na maglingkod sa Bethel sa Paris, Pransia, kun saen iinasignar akong mangataman sa pag-imprenta. Sagkod kan pag-abot mi kan Enero 1960, an pag-imprenta ginigibo nin sarong komersial na kompanya. Huling An Torrengbantayan prohibido kan panahon na idto sa Pransia, inimprenta mi an magasin kada bulan sa pormang pulyeto na 64-pahinas. An pulyeto inapod na The Interior Bulletin of Jehovah’s Witnesses, asin igwa iyan kan mga artikulo na pag-aadalan sa mga kongregasyon para sa sambulan. Poon 1960 sagkod 1967, an bilang kan mga nakikikabtang sa paghuhulit sa Pransia luminangkaw poon sa 15,439 sagkod sa 26,250.

Pag-abot nin panahon, an kadaklan na misyonero ibinalyo sa ibang lugar, an nagkapira sa mga nasyon sa Aprika na an tataramon Pranses asin an iba ibinalik sa Quebec. Huling may pigmamate si Anne asin kaipuhan an operasyon, kami nagbalik sa Quebec. Pakalihis nin tolong taon nin medikal na atension, nagrahay an salud ni Anne. Dangan iinasignar ako sa gibohon sa sirkito, na nagsosongko sa laen-laen na kongregasyon kada semana tanganing tumao nin espirituwal na pamparigon sa boot.

Pagmimisyonero sa Aprika

Pakaagi nin pirang taon, kan 1981, naogma kaming marhay na makaresibi nin bagong asignasyon bilang misyonero sa Zaire, na ngonyan Republika Demokratika nin Congo. Dukha an mga tawo, asin sinda nag-agi nin dakol na kasakitan. Kan umabot kami, igwa nin 25,753 na Saksi, alagad ngonyan an bilang na iyan nagin labing 113,000, asin 446,362 an nag-atender sa Memorial kan kagadanan ni Cristo kan 1999!

Kan 1984 nagkua kami sa gobyerno nin mga 200 na ektaryang daga tanganing togdokan nin bagong sangang opisina. Dangan, kan Disyembre 1985, sarong internasyonal na kombension an ginibo sa kabiserang siudad, sa Kinshasa, na 32,000 na delegado an nag-atender hale sa dakol na parte kan kinaban. Pakatapos kaiyan, naontok an gibohon mi sa Zaire huli sa pagtumang na sutsut nin klero. Kan Marso 12, 1986, an responsableng mga tugang na lalaki tinawan nin surat na ipinahayag na ilegal an asosasyon kan Mga Saksi ni Jehova sa Zaire. An pagbabawal na ini sa gabos ming aktibidad pinirmahan kan presidente kaidto kan nasyon, si dipunto Mobutu Sese Seko.

Huli sa biglang mga pangyayaring idto, kinaipuhan na iaplikar mi an hatol kan Biblia: “Alisto an isip kan saro na nakaheling kan kapahamakan asin nagtago.” (Talinhaga 22:3) Naghanap kami nin paagi na makakua nin papel, tinta, negatiba, mga klitse sa pag-imprenta, asin kemikal hale sa luwas kan nasyon tanganing imprentahon an samong mga publikasyon sa Kinshasa. Naggibo man kami nin sadiri ming sistema sa pagwaras. Kan kami maorganisar na, an samong sistema mas epektibo kisa koreo kan gobyerno!

Rinibong Saksi an inarestar, asin dakol an maringis na pinasakitan. Pero, apuera sa pipira sana, tinagalan ninda an siring na pagtrato asin nagdanay sinda na fiel. Ako naarestar man asin naheling ko an teribleng mga kamugtakan na inagihan kan mga tugang sa mga karsel. Dakol na beses kaming ginipit sa gabos na paagi kan pulisiya sekreta asin kan mga autoridad, alagad si Jehova pirmeng naggibo nin luluwasan para sa samo.​​—2 Corinto 4:8.

May ikinatago kaming mga 3,000 na karton nin babasahon sa bodega nin sarong negosyante. Minsan siring, sa kahurihurihi an saro sa saiyang mga trabahador nagsumbong sa pulisiya sekreta, asin inarestar ninda an negosyante. Kan sinda paduman sa bilanggoan, tiempo na nasabatan ninda ako sa sakong kotse. Sinabi sa sainda kan negosyante na ako an nakipag-areglo sa saiya na sarayon an mga babasahon. Uminontok an mga pulis asin inusisa ako manongod kaiyan, na sinahotan akong nagbubugtak nin ilegal na mga babasahon sa bodega kan negosyanteng ini.

“Igwa kamo kan saro sa mga libro?” an hapot ko.

“Siempre, igwa,” an simbag ninda.

“Puede ko daw na maheling iyan?” an hapot ko.

Tinawan ninda ako nin sarong kopya, asin ipinaheling ko sa sainda an pahina sa laog, na nagsasabi: “Inimprenta sa Estados Unidos de Amerika kan Watch Tower Bible & Tract Society.”

“An kapot nindo pagsadiri kan Amerika asin bako kan Zaire,” an ipinagirumdom ko sainda. “An pinagbawalan kan saindong gobyerno iyo an legal na korporasyon kan asosasyon kan Mga Saksi ni Jehova sa Zaire asin bako an Watch Tower Bible & Tract Society kan Estados Unidos. Kaya maninigo kamong mag-ingat na marhay sa ginigibo nindo sa mga publikasyon na ini.”

Tinogotan ninda akong humale ta mayo sinda nin orden kan korte na arestaron ako. Kan bangging idto, nagdara kami nin duwang trak sa bodega asin hinale dian an mga babasahon. Kan dumatong an mga autoridad kan sunod na aldaw, anggoton sinda kan madiskobre ninda na mayo nang laog iyan. Kaidto hinahanap na ninda ako, huling igwa na sinda ngonyan nin orden kan korte para sa pag-arestar sa sako. Nanuparan ninda ako, asin huling mayo sinda nin sasakyan, ako mismo an nagmaneho pasiring sa bilanggoan! May sarong Saksi na uminiba sa sako tanganing madara nia an sakong kotse bago ninda iyan makompiskar.

Pakatapos nin walong oras na pag-usisa, nagdesisyon sinda na ideportar ako. Alagad ipinaheling ko sa sainda an sineroks na kopya nin sarong surat hale sa gobyerno na nagpapatunay kan pagnombrar sa sako na likidaron an mga rogaring kan ngonyan prohibidong asosasyon kan Mga Saksi ni Jehova sa Zaire. Sa siring tinogotan ako na ipadagos an sakong aktibidad sa Bethel.

Pakatapos nin apat na taon nin paglilingkod na nasasakitan dahelan sa pagprohibir sa gibohon sa Zaire, nagkaigwa ako nin nagdudugo na ulser sa estomago na puedeng ikagadan. Napagdesisyonan na ako magbakasyon tanganing bolongon sa Aprika del Sur, kun saen inataman akong marhay kan sangang opisina, asin narahay ako. Pakapaglingkod nin walong taon sa Zaire, na talagang dai malilingawan asin maogmang eksperyensia, nagbalyo kami sa sangang opisina sa Aprika del Sur kan 1989. Kan 1998 nagbalik kami sa samong dagang tinuboan asin poon kaidto naglilingkod giraray sa Bethel sa Canada.

Nagpapasalamat na Makapaglingkod

Kun sinasalingoy ko an sakong 54 taon sa bilog na panahon na ministeryo, nagpapasalamat akong marhay na ginamit ko an sakong kabagsikan nin pagkahoben sa mahalagang marhay na paglilingkod ki Jehova. Minsan ngani kinaipuhan ni Anne na tagalan an dakol na masakit na kamugtakan, dai sia nagreklamo kundi mapagsuportar na marhay sa gabos ming aktibidad. Magkaibanan kaming nagkapribilehio na matabangan an dakol na mamidbid si Jehova, na an nagkapira nasa bilog na panahon na ministeryo na ngonyan. Sarong kagayagayahan nanggad na maheling an nagkapira sa saindang mga aki asin pati an saindang mga makoapo na naglilingkod sa satong dakulang Dios, si Jehova!

Kombensido ako na mayo nin ikaaalok an kinaban na ini na ikakokomparar sa mga pribilehio asin bendisyon na itinao samo ni Jehova. Totoo, nagtagal kami nin dakol na pagbalo, alagad iyan gabos nagserbing pampakosog sa samong pagtubod asin kompiansa ki Jehova. Tunay nanggad na sia nagin torre nin kakosogan, lugar na pailihan, asin tabang na danay na makukua sa panahon nin mga kasakitan.

[Nota sa Ibaba]

[Mga Ritrato sa pahina 26]

Pagpapayunir na magkaibanan kan 1947; kaiba si Anne ngonyan

[Ritrato sa pahina 29]

An mga taga Zaire na nakaolay mi may pagkamoot sa katotoohan sa Biblia