Ginigibong Mapanggana an Saindong Pagkahoben

HINAGAD sa mga residente sa sarong nasyon sa Europa na pumili sa tolong pagpipilian: gayon, kayamanan, o pagkahoben. An pangenot na pinili iyo an pagkahoben. Iyo, ibinibilang nin mga tawo ano man an edad na an mga taon nin pagkatinedyer asin an edad na labi pa sanang 20 sarong espesyal na panahon sa buhay. Asin gusto kan gabos na an mga hoben magin mapanggana an pagbalyo hale sa pagkaniaki pasiring sa pagkanasa edad na. Alagad paano?

Puede daw na makatabang an Biblia? An simbag talagang iyo. Siyasaton niato an duwang kabtang kun saen puedeng magin espesyal na tabang sa mga hoben an Tataramon nin Dios, tibaad mas makatatabang sa mga hoben kisa iba pang grupo nin magkakaedad.

Marahay na Relasyon sa Iba

An Jugend 2000 sarong report manongod sa mahiwas an sakop na surbey kan mga aktitud, prinsipyo sa buhay, asin gawe-gawe kan labing 5,000 na hoben sa Alemania. Ihinahayag kan surbey na kun an mga hoben nasa mga aktibidad na paglilibang​—siring baga kan pagdangog sa musika, pagpartisipar sa mga isport, o pagparaistambay sana​—haros pirme sindang kaiba nin ibang tawo. Tibaad orog kisa arin pa man na ibang grupo nin magkakaedad, gusto kan mga hoben na makaibaiba an saindang mga kaedad. Daing duwa-duwa kun siring na an saro kan mga sekreto sa kapangganahan sa pagkahoben iyo an marahay na relasyon sa iba.

Alagad bakong pirmeng pasil na magkaigwa nin marahay na relasyon sa iba. Sa katunayan, inaadmitir nin mga hoben na lalaki asin babae na an sarong kabtang na parateng may problema sinda iyo an relasyon sa tawo. Digdi tunay na makakatabang an Biblia. An Tataramon nin Dios igwa nin pundamental na giya para sa mga hoben sa pagpatalubo nin balanseng mga relasyon. Ano an sinasabi kan Biblia?

An saro sa pinakaimportanteng mga prinsipyo sa mga relasyon nin tawo inaapod na Bulawan na Reglamento sa Paggawe: “Pirmeng trataron an iba siring sa gusto nindong pagtratar ninda sa saindo.” An pagtratar sa iba na may paggalang, dignidad, asin kabootan ineenkaminar sinda na trataron kamo sa kaparehong paagi. An maboot na paggawe puedeng pakalmahon an dai pagkaoroyon asin tension. Kun midbid kamo sa pagigin makonsiderasyon sa iba, posibleng marhay na makua nindo an pagrekonoser asin pag-ako ninda. Bako daw na maoogma kamo na akoon kan iba?​—Mateo 7:​12, Revised English Bible.

Sinasadol kamo kan Biblia na “kamotan mo an saimong kapwa nin siring sa saimo man sana.” Kaipuhan nindong mamotan an sadiri nindo sa sentido na may pagmakolog kamo sa sadiri asin may rasonableng sokol nin paggalang sa sadiri, bakong sobra asin bako man na kulang. Taano ta makakatabang iyan? Bueno, kun mayo kamo nin paggalang sa sadiri, tibaad kamo magin sobra kamapagkritika sa iba, na nakaoolang sa pagkaigwa nin marahay na relasyon. Alagad an balanseng pagpapahalaga sa sadiri sarong basehan na puedeng togdokan nin pusog na pagkakatood.​—Mateo 22:39.

Oras na tumalubo an sarong pagkakatood, kaipuhan na pakosogon iyan paagi sa paghihingoa kan mag-ibong na lado. An pagtao nin panahon sa sarong pagkakatood maninigong magpaogma sa saindo, huli ta “igwang orog na kaogmahan sa pagtao kisa pag-ako.” An sarong porma nin pagtatao iyo an pagpapatawad, na kalabot an pagpalampas sa saradit na sala asin dai pag-asa nin pagkasangkap sa iba. An Biblia nagsasabi sa sato: “Ipaaram nindo sa gabos na tawo an saindong pagkamakatanosan.” Sa katunayan, “sagkod na iyan nasa saindo, makipagkatoninongan sa gabos na tawo.” Paano kun iinapod nin sarong katood sa atension nindo an sarong kaluyahan? Ano daw an saindong reaksion? Estudyare an praktikal na sadol na ini hale sa Biblia: “Dai ka maghidale sa saimong espiritu na makolgan an boot,” huli ta “may marahay na intension an mga hampak na itinatao nin sarong katood.” Bako daw totoo na naiimpluwensiahan nin mga katood an saindong kaisipan, pagtaram, asin gawe-gawe? Huli kaini, pinatatanidan kita kan Biblia: “An maraot na pag-iriba nakararaot sa marahay na mga ugale.” Sa ibong na lado, “sia na naglalakaw na kaiba nin mga madonong magigin madonong.”​—Gibo 20:35; Filipos 4:5; Roma 12:​17, 18; Eclesiastes 7:9; Talinhaga 13:20; 27:​6, REB; 1 Corinto 15:33.

Si Marco nagtataram para sa dakol na hoben na lalaki asin babae sa pagsabing: “An mga prinsipyo sa Biblia dakulang tabang sa pagkaigwa nin marahay na relasyon sa iba. An nagkapirang tawo na midbid ko an iniintindi sadiri sana ninda asin kun anong pakinabang an makukua ninda sa buhay. Tinotokdoan kita kan Biblia na isipon, bakong nin sobra an satong sadiri, kundi an iba. Sa abot kan sakong pakasabot, iyan an pinakamarahay na paagi sa marahay na relasyon nin tawo.”

An nanodan sa Biblia kan mga hoben arog ni Marco nakakatabang bako sanang sa pagkahoben ninda kundi sa maabot pang mga taon sa ngapit. Asin may labot sa ngapit, makakakua kita nin iba pang paagi na an Biblia makakatao nin espesyal na tabang sa mas hoben na kapag-arakian.

Kahaditan Manongod sa Ngapit

Kadaklan sa mga hoben mainusisa. Tibaad labi pa sa ibang grupo nin magkakaedad, gusto nindang maaraman kun ano an nangyayari asin kun taano. Asin ipinaliliwanag kan Biblia, labi pa sa arin man na ibang libro, an mga rason kan kamugtakan sa kinaban asin sinasabi sa sato kun ano an lalaoman niato sa ngapit. Ini an gustong maaraman kan mas hoben na kapag-arakian. Taano ta makaseseguro kita?

Bueno, minsan ngani tinutubod nin dakol na an mga hoben nabubuhay sana para sa presente, an nagkapirang surbey naghahayag nin medyo laen na ideya. Ipinaheheling kaiyan na parateng maingat na inoobserbaran kan mga hoben kun ano an nangyayari sa palibot ninda, dangan naggigibo sinda nin sadiri nindang konklusyon sa kun magigin ano an buhay sa ngapit. An ebidensia kaini iyo na 3 sa 4 na hoben na lalaki asin babae an nag-iisip nin “parate” o “parateng gayo” manongod sa ngapit. Minsan ngani sa pankagabsan an mga hoben optimista, an mayoriya sa mga hoben may paghadit na tinatanaw an ngapit.

Taano ta may paghadit? Dakol sa masunod na henerasyon nin mga adulto an igwa na nin mga problema sa krimen, kadahasan, asin pagdodroga. An mga hoben nahahadit manongod sa pagkaigwa nin dagos-dagos na trabaho sa sarong labi-labi kamakikompetensiang sosyedad. Nakamamate sinda nin pangigipit na makakua nin haralangkaw na marka sa eskuelahan o na magin asensado sa trabaho. An sarong 17 anyos nag-agrangay: “Nabubuhay kita sa sarong sosyedad na inaasikaso an sadiring kapakanan na daing pag-intindi sa iba. An lambang tawo nagmamaigot na gibohon an ano man na gusto nia. Kaipuhan mo pirmeng patunayan kun ano an magigibo mo, asin iyan ikinaaaburido ko.” An saro pang hoben, na an edad 22, nagsabi: “An mga asensado nagigin mapanggana sa buhay asin puedeng mamuhay nin komportable. An mga tawong bakong paborable an kamugtakan, na bakong mapanggana huli sa manlaenlaen na dahelan, dai makasabay, nawawalat na sana.” Taano ta an buhay grabe an kompetensia? An buhay daw pirme na sanang arog kaini?

Realistikong Paliwanag

Kun hineheling nin mga hoben na may paghadit o pagkahandal an sosyedad, minaoyon sinda​—tuyo o dai tinutuyo​—sa Biblia. Ipinaheheling kan Tataramon nin Dios na an presenteng “sosyedad na inaasikaso an sadiring kapakanan na daing pag-intindi sa iba” tanda kan mga panahon. Isinurat ni apostol Pablo an manongod sa satong panahon sa sarong surat para sa sarong hoben na an ngaran Timoteo: “Maabot an delikadong mga panahon na masakit pakibagayan.” Taano ta delikado, asin taano ta masakit pakibagayan? Huli ta, siring kan dugang pang isinurat ni Pablo, an mga tawo magigin “mga mamomoton sa sainda man sana, mga mamomoton sa kuarta, mga nagpapasikat sa sadiri, mga maabhaw, . . . mga daing utang na boot, mga bakong maimbod, . . . maringis.” Bako daw na iyan sarong eksaktong deskripsion kun paano minagawe an dakol na tawo ngonyan?​—2 Timoteo 3:​1-3.

An Biblia nagsasabi na an delikadong mga panahon na ini mangyayari “sa huring mga aldaw,” bago gibohon an dakulang pagbabago sa bilog na sosyedad nin tawo. Maaapektaran kan mga pagbabagong ini an gabos, hoben asin gurang man. Anong klaseng mga pagbabago? Sarong langitnon na gobyerno an sa dai na mahahaloy masalida sa pamamahala kan mga aktibidad nin tawo, asin kakamtan kan mga sakop an “nagsosopay na katoninongan” sa gabos na lugar. “An mga matanos mismo magmamana kan daga, asin sinda mag-eerok dian sagkod lamang.” An kahaditan asin kahandalan magigin nang kabtang kan nakaagi.​—Salmo 37:​11, 29.

Solamente an Biblia an nagtatao nin masasarigan na pakarorop sa ngapit. Kun naaaraman nin sarong hoben kun ano an lalaoman sa masunod na pirang taon, makakapangandam sia para sa mga pangyayari asin makamamateng tiwasay asin mas kontrolado an buhay nia. An pakamateng ini nakaiina nin tension asin kahaditan. Sa paaging ini an espesyal na pangangaipo kan mas hoben na kapag-arakian​—na masabotan an sosyedad asin maaraman kun ano an mangyayari sa ngapit​—tinotokar sa Biblia.

Mapanggana sa Pagkahoben

Basado sa ano an kapangganahan sa pagkahoben? An halangkaw daw na edukasyon, materyal na mga rogaring, asin dakol na katood? Dakol an tibaad maghohonang iyo. An mga taon nin pagkatinedyer asin an edad na labi pa sanang 20 maninigong magtao sa indibiduwal nin sarong marahay na pagpopoon para sa buhay sa huri. Sa ibang pagtaram, an kapangganahan sa pagkahoben puedeng mag-indikar kan mangyayari sa huri.

Arog kan nasabotan niato, puedeng matabangan kan Biblia an sarong hoben tanganing magin mapanggana an saiyang mga taon nin pagkahoben. Naaraman na ini nin dakol na hoben sa mismong buhay ninda. Binabasa ninda an Tataramon nin Dios aroaldaw asin iinaaplikar an saindang nanonodan. (Helingon an “Hatol Hale sa Sarong Hoben na Lingkod ni Jehova,” sa pahina 6.) Tunay nanggad, an Biblia totoong sarong libro para sa mga hoben ngonyan huli ta matatabangan sinda kaiyan na “magin lubos na may kakayahan, biyong nasangkapan para sa lambang marahay na gibo.”​—2 Timoteo 3:​16, 17.

[Blurb sa pahina 5]

An saro kan mga sekreto sa kapangganahan sa pagkahoben iyo an marahay na relasyon sa iba

[Blurb sa pahina 6]

Tibaad labi pa kisa arin man na ibang grupo nin magkakaedad, gustong maaraman kan mga hoben kun ano an nangyayari asin kun taano

[Kahon sa pahina 6, 7]

Hatol Hale sa Sarong Hoben na Lingkod ni Jehova

Si Alexander 19 anyos. Pinadakula sia sa sarong pamilya nin mga Saksi ni Jehova, asin lubos na ikinaoogma nia an pagtao kan bilog niang puso sa saiyang pagtubod. Alagad bakong arog kaini pirme an kamugtakan. Nagpapaliwanag si Alexander:

“Maniwala kamo o dai, nakiasosyar ako sa Mga Saksi ni Jehova bilang sarong dai pa bautisadong hoben sa laog nin labing pitong taon. Kan panahon na iyan, an sakong pagsamba daing kaganagana, saro sanang rutina. Seguro dai sana ako nagkaigwa nin kosog nin boot na onestong ebalwaron an sakong sadiri.”

Dangan nagbago an aktitud ni Alexander. Sia nagpapadagos:

“Pirme akong sinasadol kan sakong mga magurang asin mga katood sa kongregasyon na basahon an Biblia aroaldaw, na mamidbid nin personal si Jehova. Sa katapustapusi, nagdesisyon akong magprobar. Kaya ininaan ko an pagdalan ko nin telebisyon asin ginibong kabtang kan sakong amay na agang rutina an pagbasa sa Biblia. Sa katapustapusi, nagpoon na masabotan ko kun ano an kahulogan kan Biblia. Nasabotan ko kun paano iyan makatatabang sa sako bilang sarong tawo. Asin​—pinakaimportante sa gabos​—nasabotan ko na gusto ni Jehova na mamidbid ko sia. Kan isapuso ko iyan, nagpoon na magtalubo an sakong personal na relasyon sa saiya, asin nag-oswag an pakikikatood sa laog kan kongregasyon. Kanigoan an nagin epekto kan Biblia sa buhay ko! Irinerekomendar ko na basahon kan lambang hoben na lingkod ni Jehova an Biblia aroaldaw.”

Igwa nin minilyon na hoben sa bilog na kinaban na nakikiasosyar sa Mga Saksi ni Jehova. Saro daw kamo sa sainda? Gusto daw nindong makinabang sa pagbasa sa Biblia nin regular? Taano ta dai arogon an halimbawa ni Alexander? Inaan an bakong gayong mahalagang mga aktibidad asin gibohon an pagbasa sa Biblia na kabtang kan saindong pan-aroaldaw na rutina. Tunay nanggad na makikinabang kamo.