Taano ta Dapat Selebraron an Pamanggihan nin Kagurangnan?

“Inako ko hale sa Kagurangnan an itinao ko man sa saindo.”​—1 CORINTO 11:23.

1, 2. Ano an ginibo ni Jesus kan banggi nin Paskua kan 33 C.E.?

PRESENTE an bugtong na Aki ni Jehova. Yaon man an 11 lalaki na ‘nakidamay sa saiya sa mga pagbalo sa saiya.’ (Lucas 22:28) Huebes na banggi kaidto, Marso 31, 33 C.E., asin an kabilogan nin bulan posibleng marhay na nakakapagayon sa kalangitan sa Jerusalem. Katatapos pa sana ni Jesu-Cristo asin kan saiyang mga apostol sa pagselebrar kan Paskua. Pinahale na an traydor na si Judas Iscariote, alagad bako pang oras tanganing maghale an iba. Taano? Huli ta may gigibohon si Jesus na mahalagang marhay. Ano daw iyan?

² Huling yaon an kagsurat kan Ebanghelyo na si Mateo, paestoryahon niato sia. Sia nagsurat: “Si Jesus nagkua nin tinapay asin, pakapamibi, binaraak nia iyan asin, sa pagtao kaiyan sa mga disipulo, sia nagsabi: ‘Kua, kakan kamo. Ini nangangahulogan kan sakong hawak.’ Siring man, nagkua sia nin sarong kopa asin, pakapagpasalamat, itinao nia iyan sa sainda, na an sabi: ‘Inom kamo kaiyan, kamo gabos; huli ta ini nangangahulogan kan sakong “dugo kan tipan,” na papaboloson manongod sa dakol para sa kapatawadan nin mga kasalan.’” (Mateo 26:26-28) Makasaro sana daw na okasyon ini? Ano an kahulogan kaiyan? May kahulogan daw iyan para sa sato ngonyan?

“Padagos Nindong Gibohon Ini”

 3. Taano ta makahulogan an ginibo ni Jesus kan banggi nin Nisan 14, 33 C.E.?

³ An ginibo ni Jesu-Cristo kan banggi nin Nisan 14, 33 C.E., bakong insidental sanang pangyayari sa saiyang buhay. Ipinaliwanag iyan ni apostol Pablo kan magsurat sa linahidan na mga Kristiano sa Corinto, kun saen sinusunod pa man giraray an arogan na iyan pakalihis nin labing 20 taon. Minsan ngani si Pablo dai kaiba ni Jesus asin kan 11 apostol kan 33 C.E., siertong naaraman nia sa nagkapirang apostol an nangyari sa okasyon na idto. Apuera kaini, minalataw na nakompirmar ni Pablo an mga aspekto kan okasyon na iyan paagi sa ipinasabong na kapahayagan. Nagsabi si Pablo: “Inako ko hale sa Kagurangnan an itinao ko man sa saindo, na an Kagurangnan na si Jesus kan banggi na sia ipasasaloib nagkua nin tinapay asin, pakapagpasalamat, binaraak nia iyan asin nagsabi: ‘Ini nangangahulogan kan sakong hawak na manongod sa saindo. Padagos nindong gibohon ini sa paggirumdom sa sako.’ Siring man an ginibo nia sa kopa, pakapamanggi nia, na an sabi: ‘An kopang ini nangangahulogan kan bagong tipan sa puersa kan sakong dugo. Padagos nindong gibohon ini, sa gabos na panahon na inomon nindo iyan, sa paggirumdom sa sako.’”—1 Corinto 11:23-25.

 4. Taano ta maninigo na selebraron kan mga Kristiano an Pamanggihan nin Kagurangnan?

⁴ An kagsurat kan Ebanghelyo na si Lucas nagpatunay na si Jesus nagboot: “Padagos na gibohon nindo ini sa paggirumdom sa sako.” (Lucas 22:19) An mga tataramon na ini trinadusir man na: “Gibohon nindo ini bilang girumdoman sa sako.” (The Jerusalem Bible) Sa katunayan, an selebrasyon na ini parateng inaapod na Memorial kan kagadanan ni Cristo. Inaapod man iyan ni Pablo na Pamanggihan nin Kagurangnan—sarong angay na pag-apod, ta inestablisar ini sa banggi. (1 Corinto 11:20) An mga Kristiano pinagbobotan na selebraron an Pamanggihan nin Kagurangnan. Alagad taano ta inestablisar an selebrasyon na ini?

Kun Taano ta Inestablisar Iyan

5, 6. (a) Ano an sarong dahelan kun taano ta inestablisar ni Jesus an Memorial? (b) Itao an saro pang dahelan kun taano ta inestablisar an Pamanggihan nin Kagurangnan.

⁵ An sarong dahelan kun taano ta inestablisar an Memorial igwa nin koneksion sa sarong katuyohan na inotob kan kagadanan ni Jesus. Nagadan sia bilang parasuportar sa soberaniya kan saiyang langitnon na Ama. Sa siring pinatunayan ni Cristo na putikon si Satanas na Diablo, na putik na nagsahot na an mga tawo naglilingkod sana sa Dios huli sa paslong motibo. (Job 2:1-5) An pagkagadan ni Jesus bilang fiel nagpatunay na putik an paghingako na ini asin nagpagayagaya sa puso ni Jehova.—Talinhaga 27:11.

⁶ An saro pang dahelan kun taano ta inestablisar an Pamanggihan nin Kagurangnan iyo na tanganing ipagirumdom sa sato na paagi sa saiyang kagadanan bilang sangkap asin daing kasalan na tawo, ‘itinao ni Jesus an saiyang kalag bilang pantubos na karibay nin dakol.’ (Mateo 20:28) Kan an enot na tawo magkasala sa Dios, iwinara nia an sangkap na buhay bilang tawo asin an gabos na oportunidad kaiyan. Minsan siring, sinabi ni Jesus: “An Dios namoot na gayo sa kinaban na itinao nia an saiyang Aking bugtong, tanganing an lambang nagtutubod sa saiya dai mapahamak kundi magkaigwa nin buhay na daing katapusan.” (Juan 3:16) Tunay nanggad, “an ibinabayad nin kasalan kagadanan, alagad an regalo na itinatao nin Dios buhay na daing katapusan paagi ki Cristo Jesus na satong Kagurangnan.” (Roma 6:23) An selebrasyon kan Pamanggihan nin Kagurangnan nagpapagirumdom sa sato kan dakulang pagkamoot na ipinaheling ni Jehova sagkod kan saiyang Aki may koneksion sa kagadanan ni Jesus bilang atang. Maninigo nanggad niatong apresyaron an pagkamoot na iyan!

Noarin Iyan Dapat Selebraron?

 7. Paanong an linahidan na mga Kristiano nakikikabtang sa Memorial “sa gabos na panahon”?

⁷ Mapadapit sa Pamanggihan nin Kagurangnan, si Pablo nagsabi: “Sa gabos na panahon na kumakan kamo kan tinapay na ini asin uminom kan kopang ini, ipinagbabalangibog nindo an pagkagadan kan Kagurangnan, sagkod na sia dumatong.” (1 Corinto 11:26) An indibiduwal na linahidan na mga Kristiano makikikabtang sa mga emblema sa Memorial sagkod sa saindang kagadanan. Sa siring, sa atubangan ni Jehova Dios asin kan kinaban, paorootro nindang ipapahayag an saindang pagtubod sa probisyon nin Dios na atang na pantubos ni Jesus.

 8. Sagkod noarin seselebraron kan grupo nin mga linahidan an Pamanggihan nin Kagurangnan?

⁸ Sagkod noarin seselebraron kan grupo nin linahidan na mga Kristiano an Memorial kan kagadanan ni Cristo? “Sagkod na sia dumatong,” an sabi ni Pablo, na minalataw na nangangahulogan na an mga selebrasyon na ini mapadagos sagkod sa pagdatong ni Jesus tanganing akoon sa langit an saiyang linahidan na mga parasunod paagi sa pagkabuhay liwat durante kan saiyang “presensia.” (1 Tesalonica 4:14-17) Kaoyon ini kan mga tataramon ni Jesus sa 11 maimbod na apostol: “Kun ako magduman asin mag-andam nin lugar para sa saindo, ako madigdi liwat asin ipag-iiba ko kamo, tanganing kun saen ako duman man kamo.”—Juan 14:3.

 9. Ano an boot sabihon kan mga tataramon ni Jesus na nakasurat sa Marcos 14:25?

⁹ Kan establisaron ni Jesus an Memorial, sia nagtaram manongod sa kopa nin arak asin nagsabi sa saiyang fiel na mga apostol: “Dai na nanggad ako mainom pa nin bunga nin ubas sagkod sa aldaw na iyan na iinomon ko iyan na bago sa kahadean nin Dios.” (Marcos 14:25) Mantang dai man si Jesus mainom nin literal na arak sa langit, malinaw na nasa isip nia an kagayagayahan na kun beses isinisimbolisar kan arak. (Salmo 104:15; Eclesiastes 10:19) An magkairibanan sa Kahadean magigin magayagayang eksperyensia na hinihimuyawot ninda kan saiyang mga parasunod na may dakulang pag-antisipar.—Roma 8:23; 2 Corinto 5:2.

10. Gurano kaparate maninigong selebraron an Memorial?

¹⁰ Maninigo daw na an kagadanan ni Jesus selebraron nin bulanan, semanal, o aroaldaw pa ngani? Dai. Inestablisar ni Jesus an Pamanggihan nin Kagurangnan asin sia ginadan sa aldaw nin Paskua, na sinelebrar bilang “girumdoman” kan pagkaligtas kan Israel sa kaoripnan sa Egipto kan 1513 B.C.E. (Exodo 12:14) An paskua sinelebrar nin makasaro sana sa sangtaon, sa ika-14 aldaw kan Judiong bulan nin Nisan. (Exodo 12:1-6; Levitico 23:5) Ipinaririsa kaini na an kagadanan ni Jesus maninigo na selebraron sana nin siring kaparate kan Paskua—taonan—bakong bulanan, semanal, o aroaldaw.

11, 12. Ano an ihinahayag kan kasaysayan manongod sa enot na mga selebrasyon kan Memorial?

¹¹ Kaya, kun siring, an Memorial angay na selebraron nin taonan kun Nisan 14. Nagsabi an sarong reperensia: “An mga Kristiano sa Asia Minor inapod na mga Quartodecimanos [Mga Gusto sa Ikakatorse] huli sa saindang kostumbre na pirmeng pagselebrar kan pascha [Pamanggihan nin Kagurangnan] sa ika-14 kan Nisan . . . An petsang iyan puedeng matangod nin Biernes o sa ano man na ibang aldaw kan semana.”—The New Schaff-Herzog Encyclopedia of Religious Knowledge, Tomo IV, pahina 44.

¹² Sa pagkomento may labot sa kaugalean na iyan kan ikaduwang siglo C.E., an historyador na si J. L. von Mosheim nagsasabi na an Memorial sineselebrar kan mga Quartodecimanos kun Nisan 14 huli ta “ibinilang ninda an halimbawa ni Cristo na igwa kan puersa nin sarong ley.” An saro pang historyador nagsasabi: “An paggamit sa mga simbahan kan Quartodecimanos sa Asia nagpadagos kapareho kan sa simbahan sa Jerusalem. Kan ika-2 siglo sinelebrar kan mga simbahan na ini sa saindang Pascha sa ika-14 kan Nisan an pagkabalukat na inestablisar kan kagadanan ni Cristo.”—Studia Patristica, Tomo V, 1962, pahina 8.

Kahulogan kan Tinapay

13. Anong klaseng tinapay an ginamit ni Jesus kan establisaron nia an Pamanggihan nin Kagurangnan?

¹³ Kan establisaron ni Jesus an Memorial, “sia nagkua nin tinapay, namibi, binaraak iyan asin itinao iyan sa [mga apostol].” (Marcos 14:22) An tinapay na yaon sa okasyon na iyan iyo man sana an tinapay na ginamit sa Paskua. (Exodo 13:6-10) Huling linuto iyan na daing lebadura, iyan lapnad asin maragmo patin dapat na baakon tanganing ikadistribwir. Kan milagrosong padakolon ni Jesus an tinapay para sa rinibong tawo, iyan garo man sana biskuit, huli ta binaak nia iyan tanganing ikadistribwir. (Mateo 14:19; 15:36) Kun siring, minalataw na an pagbaak kan tinapay sa Memorial mayo nin espirituwal na kahulogan.

14. (a) Taano ta angay na daing lebadura an tinapay sa Memorial? (b) Anong klaseng tinapay an puedeng gibohon o lutoon na gagamiton sa Pamanggihan nin Kagurangnan?

¹⁴ Mapadapit sa tinapay na ginamit kan establisaron an Memorial, si Jesus nagsabi: “Ini nangangahulogan kan sakong hawak na manongod sa saindo.” (1 Corinto 11:24; Marcos 14:22) Angay na an tinapay daing lebadura. Taano? Huli ta an lebadura puedeng mangahulogan nin karatan o kasalan. (1 Corinto 5:6-8) An tinapay nagrepresentar sa sangkap asin daing kasalan na hawak ni Jesus bilang tawo, na angay nanggad na idinolot bilang atang na pantubos. (Hebreo 7:26; 10:5-10) Isinasaisip ini kan Mga Saksi ni Jehova asin sinusunod ninda an arogan na ipinaheling ni Jesus paagi sa paggamit nin tinapay na daing lebadura sa mga selebrasyon nin Memorial. Sa nagkapirang kamugtakan, ginagamit ninda an daing timpla na Judiong matzo na dai dinagdagan nin mga panimpla, arog baga nin sibulyas o sogok. Sa iba man, an tinapay na daing lebadura puedeng gibohon paagi sa dikit na harina nin bilog na grano (kun posible, trigo) na minasa sa dikit na tubig. An masa maninigo na pahimpison asin puedeng lutoon sa lutoan na pinahidan nin diit na lana sagkod na magmara asin magragmo an tinapay.

Kahulogan kan Arak

15. Ano an laog kan kopa na ginamit kan establisaron ni Cristo an Memorial kan saiyang kagadanan?

¹⁵ Pakatapos na ipasa an tinapay na daing lebadura, nagkua si Jesus nin kopa, “nagpasalamat asin itinao iyan sa [mga apostol], asin sinda gabos nag-irinom dian.” Nagpaliwanag si Jesus: “Ini nangangahulogan kan sakong ‘dugo kan tipan,’ na papaboloson para sa dakol.” (Marcos 14:​23, 24) Ano an laog kan kopa? Pinaalsom na arak, bakong tagok nin ubas na dai pa pinaalsom. Kun nasasambitan kan Kasuratan an arak, an boot sabihon bakong an tagok nin ubas na dai pa pinaalsom. Halimbawa, papuputokon kan pinaalsom na arak, bakong kan tagok nin ubas, an “daan na mga lalagan na anit,” siring kan sabi ni Jesus. Asin nagsahot an mga kalaban ni Cristo na sia “parainom nin arak.” Iyan magigin daing saysay na sahot kun an arak tagok sana nin ubas. (Mateo 9:17; 11:19) Arak an ininom durante kan selebrasyon nin Paskua, asin iyan an ginamit ni Cristo kan establisaron an Memorial kan saiyang kagadanan.

16, 17. Anong klaseng arak an angay para sa mga selebrasyon nin Memorial, asin taano?

¹⁶ Mapulang arak sana an angay na simbolo kan irinerepresentar kan laog kan kopa, an boot sabihon, an pinabolos na dugo ni Jesus. Sia mismo nagsabi: “Ini nangangahulogan kan sakong ‘dugo kan tipan,’ na paboboloson para sa dakol.” Asin si apostol Pedro nagsurat: “Aram nindo [an linahidan na mga Kristiano] na bakong paagi sa mga bagay na matutunawon, paagi sa pirak o bulawan, na kamo ilinigtas sa saindong daing kamanungdanan na gawe na inako paagi sa tradisyon gikan sa saindong mga kag-anak. Kundi idto paagi sa mahal na marhay na dugo, siring kan sa daing kaninan asin daing digtang kordero, an ki Cristo.”—1 Pedro 1:18, 19.

¹⁷ Daing duda na an mapulang arak na ubas an ginamit ni Jesus kan establisaron an Memorial. Minsan siring, dai puede an mga mapulang arak sa presenteng panahon huli ta pinaisog na iyan nin alkohol o brandi o dinagdagan nin sangkap nin tanom na pambolong asin espesya. Igo na an dugo ni Jesus, dai na nangangaipong dagdagan nin ano pa man. Huli kaini, bakong angay an mga arak na arog kan port, sherry, asin vermouth. An laog kan kopa sa Memorial maninigo na mapulang arak na dai pinahamis asin dai pinaisog. Puedeng gamiton an mapulang arak na ubas na gibo sa harong asin dai pinahamis, asin puede man an mga arak na arog kan mapulang burgundy asin claret.

18. Taano ta dai naggibo nin milagro si Jesus may koneksion sa tinapay asin arak sa Memorial?

¹⁸ Kan inestablisar an pamanggihan na ini, si Jesus dai naggibo nin milagro, na ginigibo an mga emblema na magin saiyang literal na laman asin dugo. An pagkakan nin laman nin tawo asin pag-inom nin dugo kanibalismo, sarong pagbalga sa ley nin Dios. (Genesis 9:​3, 4; Levitico 17:10) Yaon pa man giraray ki Jesus an saiyang enterong hawak na laman asin an gabos niang dugo. An saiyang hawak idinolot bilang sangkap na atang, asin an saiyang dugo pinabolos kan sumunod na hapon kan iyo man sanang Judiong aldaw na iyan, kan Nisan 14. Kun siring, an tinapay asin arak sa Memorial emblema sana, na nagrerepresentar sa laman asin dugo ni Cristo.a

An Memorial—Sarong Pagkakan Para sa Pakikikabtang

19. Taano ta puedeng gumamit nin labi sa sarong plato asin kopa sa selebrasyon kan Pamanggihan nin Kagurangnan?

¹⁹ Kan establisaron ni Jesus an Memorial, inimbitaran nia an saiyang fiel na mga apostol na uminom sa sasarong kopa. An Ebanghelyo ni Mateo nagsasabi: “Nagkua [si Jesus] nin sarong kopa asin, pakapagpasalamat, itinao nia iyan sa sainda, na an sabi: ‘Inom kamo kaiyan, kamo gabos.’” (Mateo 26:27) Bakong problema an paggamit nin ‘saro sanang kopa,’ bakong nagkapirang kopa, huling kan okasyon na iyan 11 sanang makikikabtang an minalataw na yaon sa sarong lamesa asin pasil sanang ikakapasapasa an kopa. Ngonyan na taon, minilyon an matiripon para sa Pamanggihan nin Kagurangnan sa labing 94,000 na kongregasyon kan Mga Saksi ni Jehova sa bilog na kinaban. Huling kadakol an matiripon para sa selebrasyon na ini sa iyo man sanang banggi na iyan, bakong posible na gumamit nin saro sanang kopa para sa gabos. Alagad pinagdadanay an prinsipyong iyan sa darakulang kongregasyon paagi sa paggamit nin nagkapirang kopa tanganing ikapasa iyan sa mga presente sa rasonableng lawig nin oras. Kaagid kaiyan, puedeng gumamit nin labi sa sarong plato para sa tinapay. Mayong nagpaparisa sa Kasuratan na an kopa o baso mismo maninigo na may sarong espesipikong disenyo. Minsan siring, iyan asin an plato maninigo na magpabanaag nin dignidad kan okasyon. Madonong na dai pagpanoon an kopa sagkod na delikado nang maula an arak kun ipinapasa.

20, 21. Taano ta masasabi niato na an Memorial sarong pagkakan para sa pakikikabtang?

²⁰ Minsan ngani puedeng gumamit nin labi sa sarong plato nin tinapay asin sarong kopa nin arak, an Memorial sarong pagkakan para sa pakikikabtang. Sa suanoy na Israel, an sarong lalaki puedeng magtao nin pagkakan para sa pakikikabtang paagi sa pagdara nin sarong hayop sa santuaryo nin Dios, na duman iyan binubuno. An sarong kabtang kan hayop tinototong sa altar, an sarong kabtang napapaduman sa saserdote na nangengenot sa seremonya asin an saro pang kabtang sa saserdoteng mga aki ni Aaron, na an nagdolot asin an saiyang kasararo sa harong kairiba na nagkakarakan. (Levitico 3:1-16; 7:28-36) An Memorial saro man na pagkakan para sa pakikikabtang huli ta may kalabot iyan na iribanan na pakikikabtang.

²¹ Kalabot si Jehova sa pagkakan na ini para sa pakikikabtang bilang an Autor kan areglong iyan. Si Jesus an atang, asin an linahidan na mga Kristiano nakikikabtang sa mga emblema bilang kairibang partisipante. An pagkakan sa lamesa ni Jehova nangangahulogan na an mga nakikikabtang may pakipagkatoninongan sa saiya. Huli kaiyan, si Pablo nagsurat: “An kopa nin kaomawan na satong inoomaw, bako daw na iyan pakikikabtang sa dugo kan Cristo? An tinapay na satong binabaraak, bako daw na iyan pakikikabtang sa hawak kan Cristo? Huli ta igwa nin sasarong tinapay, kita, minsan ngani dakol, sasarong hawak, ta kita gabos nakikikabtang sa sasarong tinapay na iyan.”—1 Corinto 10:16, 17.

akikikabtang.

22. Anong mga hapot manongod sa Memorial an eestudyaran pa niato?

²² An Pamanggihan nin Kagurangnan iyo an solamenteng taonan na relihiosong selebrasyon kan Mga Saksi ni Jehova. Angay ini huli ta pinagbotan ni Jesus an saiyang mga parasunod: “Padagos na gibohon nindo ini sa paggirumdom sa sako.” Sa Memorial, ginigirumdom niato an kagadanan ni Jesus, kagadanan na nagsuportar sa soberaniya ni Jehova. Siring kan natokar na niato, sa pagkakan na ini para sa pakikikabtang, an tinapay nangangahulogan kan iinatang na hawak ni Cristo bilang tawo asin an arak iyo an saiyang pinabolos na dugo. Pero, kakadikit an nakikikabtang sa emblemang tinapay asin arak. Taano man? Igwa daw nin tunay na kahulogan an Memorial para sa minilyon na dai nakikikabtang dian? Tunay nanggad, ano an maninigo na magin kahulogan sa saindo kan Pamanggihan nin Kagurangnan?

[Nota sa Ibaba]

Ano an Simbag Nindo?

• Taano ta inestablisar ni Jesus an Pamanggihan nin Kagurangnan?

• Gurano kaparate maninigo na selebraron an Memorial?

• Ano an kahulogan kan tinapay na daing lebadura na ginagamit sa Memorial?

• Ano an irinerepresentar kan arak sa Memorial?

[Ritrato sa pahina 15]

Inestablisar ni Jesus an Pamanggihan nin Kagurangnan