Paano Niato Maninigong Mansayon an mga Tawo Mantang Nagdadangadang an Aldaw ni Jehova?

“Si Jehova bakong maluway kun dapit sa saiyang panuga, . . . kundi sia mapasensia sa saindo huli ta dai nia mawot na an siisay man malaglag kundi mawot nia na an gabos makapagsolsol.”—2 PEDRO 3:9.

1, 2. (a) Paano minamansay ni Jehova an mga tawo ngonyan? (b) Anong mga hapot an puede niatong ihapot sa satong sadiri?

AN MGA lingkod ni Jehova isinugo na ‘gumibo nin mga disipulo sa mga tawo kan gabos na nasyon.’ (Mateo 28:19) Mantang inootob niato an asignasyon na ini asin hinahalat “an dakulang aldaw ni Jehova,” kaipuhan na mansayon niato an mga tawo nin siring kan pagmansay nia. (Sofonias 1:14) Asin ano an pagmansay nia? Si apostol Pedro nagsasabi: “Si Jehova bakong maluway kun dapit sa saiyang panuga, siring sa paghona nin nagkapira sa kaluwayan, kundi sia mapasensia sa saindo huli ta dai nia mawot na an siisay man malaglag kundi mawot nia na an gabos makapagsolsol.” (2 Pedro 3:9) Minamansay nin Dios an mga tawo bilang mga indibiduwal na may potensial na makapagsolsol. “Kabotan [nia] na an gabos na klase nin tawo makaligtas asin makaabot sa tamang kaaraman sa katotoohan.” (1 Timoteo 2:4) Tara, naoogmang marhay si Jehova kun “an sarong maraot minatalikod sa saiyang dalan asin talagang magdanay na mabuhay”!​—Ezequiel 33:11.

² An pagmansay daw niato kapareho kan pagmansay ni Jehova sa mga tawo? Arog nia, kinokonsiderar daw niato an mga indibiduwal sa gabos na rasa asin nasyon bilang potensial na “mga karnero kan saiyang pasabsaban”? (Salmo 100:3; Gibo 10:​34, 35) Estudyaran niato an duwang halimbawa na nagpapaheling kan kahalagahan kan pagigin kapareho nin pagmansay nin Dios. Sa duwang kasong iyan, madali na kaidto an kalaglagan, asin an mga lingkod ni Jehova pinaaram na antes pa kan bagay na ini. An mga halimbawang ini nangorognang mahalaga mantang hinahalat niato an dakulang aldaw ni Jehova.

Kapareho ni Abraham an Pagmansay ni Jehova

 3. Ano an pagmansay ni Jehova sa mga nag-eerok sa Sodoma asin Gomorra?

³ An enot na halimbawa may labot sa fiel na patriarkang si Abraham asin sa maraot na mga siudad nin Sodoma asin Gomorra. Kan madangog ni Jehova “an kurahaw nin reklamo dapit sa Sodoma asin Gomorra,” dai nia ensegidang linaglag an mga siudad na iyan asin an gabos na nag-eerok dian. Nag-imbestigar nguna sia. (Genesis 18:​20, 21) Duwang anghel an isinugo sa Sodoma, kun saen nakiistar sinda sa harong kan matanos na tawong si Lot. Kan bangging nag-abot an mga anghel, ‘an harong pinalibotan kan kalalakihan kan siudad, magpoon sa aking lalaki sagkod sa gurang na lalaki, an bilog na banwaan bilang sarong grupo nin pagsururog,’ na nagmamawot na gumibo nin homoseksuwal na pakikidorog sa mga anghel. Malinaw nanggad, an marigsok na kamugtakan kan mga nag-eerok sa siudad nagpatunay na iyan maninigong laglagon. Pero, sinabihan kan mga anghel si Lot: “Igwa ka pa digdi nin iba? An manugang mo asin mga aki mong lalaki asin mga aki mong babae patin gabos na sadiri mo na yaon sa siudad, iluwas mo digdi!” Binuksan ni Jehova an dalan tanganing iligtas an nagkapirang nag-eerok sa siudad na iyan, alagad sa katapustapusi, solamente si Lot asin an duwa niang aking babae an nakaligtas sa kalaglagan.​—Genesis 19:​4, 5, 12, 16, 23-26.

4, 5. Taano ta nakimaherak si Abraham para sa kapakanan kan mga nag-eerok sa Sodoma, asin kaoyon daw kan pagmansay ni Jehova an pagmansay nia sa mga tawong iyan?

⁴ Ngonyan, balikan niato an panahon na ihinayag ni Jehova an saiyang intension na inspeksionon an mga siudad nin Sodoma asin Gomorra. Idto an panahon na nakimaherak si Abraham: “Ipamugtak ta baga na igwa nin limang polong matanos sa tahaw kan siudad. Kun siring, paparaon mo daw sinda asin dai mo patatawadon an lugar huli sa limang polong matanos na nasa laog kaiyan? Dai ko man lamang pinaghona dapit sa saimo na ika naghihiro sa paaging ini na gadanon an matanos na tawo kaiba kan maraot tanganing an mangyayari sa matanos na tawo kapareho kan nangyayari sa maraot! Iyan dai ko man lamang pinaghona dapit sa saimo. Dai daw magibo kan tama an Hokom sa bilog na daga?” Duwang beses na ginamit ni Abraham an pananaram na “dai ko man lamang pinaghona dapit sa saimo.” Base sa eksperyensia nia, aram ni Abraham na dai lalaglagon ni Jehova an mga matanos kaiba kan mga maraot. Kan sabihon ni Jehova na dai nia lalaglagon an Sodoma kun igwa nin “limang polong matanos sa tahaw kan siudad,” gradwal na ininaan ni Abraham an bilang sagkod na iyan magin sampulo na sana.​—Genesis 18:22-33.

⁵ Dadangogon daw kutana ni Jehova an mga pakiolay ni Abraham kun iyan bakong kaoyon kan saiya mismong pagmansay? Malinaw na dai. Bilang “katood ni Jehova,” minalataw na aram ni Abraham an Saiyang pagmansay asin arog man kaiyan an pagmansay nia. (Santiago 2:23) Kan itao ni Jehova an saiyang atension sa Sodoma asin Gomorra, andam sia na konsideraron an mga pakimaherak ni Abraham. Taano? Huli ta ‘dai mawot kan satong langitnon na Ama na an siisay man malaglag kundi mawot nia na an gabos makapagsolsol.’

An Pagmansay ni Jonas sa mga Tawo​—Kabaliktaran na Marhay

 6. Ano an nagin reaksion kan mga taga Ninive sa pagbalangibog ni Jonas?

⁶ Estudyare ngonyan an ikaduwang halimbawa​—an halimbawa ni Jonas. An siudad na itinalaga ngonyan para sa kalaglagan iyo an Ninive. Si propeta Jonas pinagbotan na ibalangibog na an karatan kan siudad na iyan ‘napasa atubangan ni Jehova.’ (Jonas 1:2) Kabale an gilid-gilid na mga lugar kaiyan, an Ninive sarong dakulang siudad, “na tolong aldaw na linalakaw.” Kan sa katapustapusi si Jonas kumuyog asin lumaog sa Ninive, sia padagos na nagpapahayag: “Apat na polong aldaw na sana, asin an Ninive magagaba.” Sa puntong iyan, “an mga tawo sa Ninive nagturubod sa Dios, asin nagbalangibog sinda nin pag-ayuno asin nagsulot nin telang sako.” Pati an hade sa Ninive nagsolsol.​—Jonas 3:1-6.

 7. Paano minansay ni Jehova an may pagsolsol na aktitud kan mga taga Ninive?

⁷ Kabaliktaran nanggad iyan sa nagin reaksion kan Sodoma! Paano minansay ni Jehova an nagsosolsol na mga taga Ninive? An Jonas 3:10 nagsasabi: “An tunay na Dios nagbasol sa kapahamakan na sinabi niang ipaaabot sainda; asin dai nia iyan pinapangyari.” Si Jehova “nagbasol” sa sentido na liniwat nia an saiyang mga pagtratar sa mga taga Ninive huli ta nagbago an saindang ugale. An mga pamantayan nin Dios dai nagliwat, kundi liniwat ni Jehova an saiyang desisyon kan maheling nia na nagsolsol an mga taga Ninive.​—Malaquias 3:6.

 8. Taano ta namondo si Jonas?

⁸ Kan maaraman ni Jonas na dai lalaglagon an Ninive, minansay daw nia an mga bagay-bagay basado sa punto de vista ni Jehova? Dai, huli ta sinasabi sa sato: “Pero para ki Jonas, idto dai nanggad nia nagustohan, asin sia nag-init sa kaanggotan.” Ano pa an ginibo ni Jonas? An pagkasaysay nagsasabi: “Namibi sia ki Jehova asin nagsabi: ‘A, ngonyan, O Jehova, bako daw na ini an sinabi ko, mantang ako idtoon sa sakuyang sadiring daga? Iyan an dahelan na ako napaduman asin duminulag pasiring sa Tarsis; huli ta aram ko na ika Dios na maugayon asin maheherakon, maluway sa pagkaanggot asin abunda sa mamomoton na kabootan, asin pinagbabasolan an kalamidad.’” (Jonas 4:​1, 2) Aram ni Jonas an manongod sa mga kualidad ni Jehova. Minsan siring, sa puntong iyan an propeta namondo asin bakong kapareho nin Dios an nagin pagmansay nia sa nagsosolsol na mga nag-eerok sa Ninive.

9, 10. (a) Anong leksion an itinao ni Jehova ki Jonas? (b) Taano ta puede niatong isipon na sa katapustapusi an pagmansay ni Jonas arog na man kan pagmansay ni Jehova sa mga taga Ninive?

⁹ Luminuwas si Jonas sa Ninive, naggibo nin payag-payag, asin tuminukaw sa lindong kaiyan “sagkod na maheling nia kun ano an mangyayari sa siudad.” Pinangyari ni Jehova na tumubo an sarong barantiong tanganing malimpoyan kaiyan si Jonas. Minsan siring, kan sumunod na aldaw naluyos an tanom. Kan maanggot si Jonas manongod kaiyan, si Jehova nagsabi: “Ika naherak sa barantiong . . . Asin, kun para sa sako, dai daw ako dapat na maherak sa Ninive na dakulang siudad, na dian igwa nin labi sa sarong gatos may duwang polong ribo katawo na dai man lamang nakaaaram kan pagkakalaen kan saindang toong kamot sa saindang wala, laen pa sa dakol na hayop?” (Jonas 4:5-11) Kanigoan na leksion para ki Jonas mapadapit sa pagmansay ni Jehova sa mga tawo!

¹⁰ Dai isinurat an reaksion ni Jonas sa sinabi nin Dios manongod sa pagkaherak sa mga taga Ninive. Pero, risang-risa na binago kan propeta an saiyang pagmansay sa nagsosolsol na mga taga Ninive. Iyan an konklusyon niato basado sa katunayan na ginamit sia ni Jehova na isurat an ipinasabong na pagkasaysay na ini.

Arin Kaiyan an Aktitud Nindo?

11. Paano daw kutana posibleng mamansayon ni Abraham an mga tawong nabubuhay ngonyan?

¹¹ Ngonyan, kita napapaatubang sa saro pang kalaglagan​—an kalaglagan kan presenteng maraot na sistema nin mga bagay durante kan dakulang aldaw ni Jehova. (Lucas 17:26-30; Galacia 1:4; 2 Pedro 3:10) Paano daw kutana mamansayon ni Abraham an mga tawong nabubuhay sa kinaban na ini na madali nang laglagon? Posibleng marhay na magmamakolog sia sa mga dai pa nakadangog kan ‘maogmang bareta kan kahadean.’ (Mateo 24:14) Si Abraham paorootrong nakimaherak sa Dios mapadapit sa posibleng mga matanos na nasa Sodoma. Kita daw mismo nagmamakolog man sa mga tawong hahaboan an mga paagi nin paghiro kan kinaban na ini na kontrolado ni Satanas kun tatawan nin oportunidad na magsolsol asin maglingkod sa Dios?​—1 Juan 5:19; Kapahayagan 18:2-4.

12. Taano ta pasil na magkaigwa kan aktitud na arog kan ki Jonas dapit sa mga tawong nanunuparan niato sa satong ministeryo, asin ano an puede niatong gibohon manongod kaini?

¹² Tama sanang himuyawoton an katapusan nin karatan. (Habacuc 1:​2, 3) Pero, pasil na marhay na magkaigwa kan aktitud na arog kan ki Jonas, an pagigin daing pagmakolog sa kapakanan kan mga tawo na tibaad magsolsol. Nangorognang totoo ini kun padagos kitang nakakanupar nin mga indibiduwal na indiperente, nagkokontra, o nakikiiwal pa ngani kun nagsosongko kita sa saindang harong na ipinapaabot an mensahe kan Kahadean. Tibaad mawara sa isip niato an mga titiponon pa ni Jehova hale sa maraot na sistemang ini nin mga bagay. (Roma 2:4) Kun mahayag paagi sa seryosong pagsiyasat sa sadiri na kita igwa nin dawa kadikit na arog kan naenot na aktitud ni Jonas sa mga taga Ninive, puede kitang mamibi na logod tabangan na ioyon an satong pagmansay sa pagmansay ni Jehova.

13. Taano ta masasabi niato na si Jehova may pagmakolog sa mga tawo ngonyan?

¹³ May pagmakolog si Jehova sa mga dai pa naglilingkod sa saiya, asin hinihinanyog nia an mga pakimaherak kan saiyang nagdusay na banwaan. (Mateo 10:11) Halimbawa, “saiyang papangyayarihon na marikas na magibo an hustisya” bilang simbag sa mga pamibi ninda. (Lucas 18:​7, 8) Dugang pa, ootobon ni Jehova an gabos niang panuga asin katuyohan sa saiya mismong itinalaan na panahon. (Habacuc 2:3) Kabale digdi an paghale kan gabos na karatan sa daga, arog ngani kan paglaglag nia sa Ninive pakatapos na bumalik sa karatan an mga nag-eerok dian.​—Nahum 3:5-7.

14. Ano an maninigo na ginigibo niato mantang hinahalat an dakulang aldaw ni Jehova?

¹⁴ Sagkod na pohoon an maraot na sistemang ini nin mga bagay durante kan dakulang aldaw ni Jehova, kita daw mapasensiang maghahalat, na sibot sa paggibo kan saiyang kabotan? Dai niato aram an mga detalye manongod sa kun sagkod saen makakaabot an paghuhulit na gigibohon bago dumatong an aldaw ni Jehova, alagad aram nanggad niato na bago dumatong an katapusan an maogmang bareta kan Kahadean ihuhulit sa bilog na ineerokan na daga sa paaging kontento na an Dios. Asin maninigo nanggad kitang magmakolog sa “kawiliwiling mga bagay” na ilalaog pa mantang padagos na pinapano ni Jehova nin kamurawayan an saiyang harong.​—Haggeo 2:7.

An Satong Pagmansay Naheheling sa Satong mga Paghiro

15. Ano an puedeng magpaorog sa satong apresasyon sa paghuhulit?

¹⁵ Tibaad nag-iistar kita sa sarong komunidad kun saen daing gayong naghihimate sa paghuhulit asin mayo kita sa kamugtakan na bumalyo kun saen mas dakula an pangangaipo para sa mga parabalangibog kan Kahadean. Ipamugtak ta baga na may sampulong makukua sa satong teritoryo bago dumatong an katapusan. Sa paghona daw niato may pakinabang na hanapon an sampulong iyan? “Naherak” si Jesus sa mga kadaklan “huli ta sinda naanitan asin nagkakaralagalag siring sa mga karnero na mayong pastor.” (Mateo 9:36) Paagi sa pag-adal sa Biblia asin maingat na pagbasa kan mga artikulo sa An Torrengbantayan asin Awake!, orog niatong marororop an mamondong kamugtakan kan kinaban na ini. Dangan, puede man ining magpaorog kan satong apresasyon sa pangangaipo na ihulit an maogmang bareta. Dugang pa, an mapag-apresyar na paggamit kan materyal na basado sa Biblia na itinatao paagi sa “fiel asin may diskresion na oripon” puedeng makadagdag sa tibay niato sa pangongombensir sa teritoryo na parateng ginigibo.​—Mateo 24:45-47; 2 Timoteo 3:14-17.

16. Paano niato magigibong magin mas epektibo an satong ministeryo?

¹⁶ An pagmakolog niato sa mga tibaad mahimate pa sa nagtatao nin buhay na mensahe kan Biblia nagpapahiro sa sato na estudyaran an laen-laen na oras asin pamamaagi nin pagdolok sa mga kagharong sa satong ministeryo. Naheheling daw niato na dakol an mayo sa harong kun kita nagsosongko? Kun iyo, magigibo niatong magin mas epektibo an satong ministeryo paagi sa pagliwatliwat kan mga oras asin lugar kan satong pagpapatotoo. An mga parasira naninira sa panahon na sinda makakadakop nin sira. May magigibo daw kitang kaagid kaiyan sa satong espirituwal na paninira? (Marcos 1:16-18) Taano ta dai probaran an pagpapatotoo sa banggi asin an pagpapatotoo paagi sa telepono, kun iyan itinotogot nin ley? Nanompongan nin nagkapira na mabungang ‘lugar nin paninira’ an mga paradahan, pondohan nin mga trak, gasolinahan, asin tindahan. An pagkaigwa niato nin arog kan ki Abraham na aktitud dapit sa mga tawo naheheling man kun inaaprobetsaran niato an mga oportunidad na magpatotoo nin impormal.

17. Sa anong mga paagi niato maparirigon an boot kan mga misyonero asin kan iba pang naglilingkod sa ibang kadagaan?

¹⁷ Minilyon an dai pa nakadangog kan mensahe kan Kahadean. Apuera sa paghuhulit niato, puede daw niatong ipaheling an pagmakolog sa siring na mga tawo dawa dai na kita magluwas sa harong? Bueno, may midbid daw kitang mga misyonero o bilog na panahon na mga ministro na naglilingkod sa ibang nasyon? Kun iyo, puede man niato sindang suratan na nagpapaheling kan satong apresasyon sa saindang gibohon. Paano iyan nagpapaheling nin pagmakolog sa mga tawo sa pankagabsan? An satong mga surat nin pagparigon sa boot asin komendasyon puedeng makapakosog sa mga misyonero na magdanay sa saindang asignasyon, sa siring natatabangan an dakol pang tawo na makaaram kan katotoohan. (Hokom 11:40) Puede man niatong ipamibi an mga misyonero asin an mga nagugutom sa katotoohan sa ibang kadagaan. (Efeso 6:18-20) An saro pang paagi nin pagpaheling nin pagmakolog iyo an pagtao nin pinansial na donasyon sa pambilog na kinaban na gibohon kan Mga Saksi ni Jehova.​—2 Corinto 8:​13, 14; 9:​6, 7.

Puede daw Kamong Bumalyo?

18. Ano an ginibo nin nagkapirang Kristiano tanganing palakopon an intereses kan Kahadean sa ineerokan nindang nasyon?

¹⁸ An mga nagbalyo sa mga lugar na mas dakula an pangangaipo para sa mga parabalangibog kan Kahadean binendisyonan huli sa saindang mapagsakripisyong mga paghihingoa. Minsan siring, mantang nagdadanay sa saindang sadiring lugar, an ibang mga Saksi ni Jehova nag-adal nin ibang lenguahe tanganing matabangan sa espirituwal an mga dayo. An siring na mga paghihingoa tunay nanggad na nagin nakakokontento. Halimbawa, an pitong Saksi na nagtatabang sa mga Intsik sa sarong siudad sa Texas, E.U.A., maogmang inako an 114 indibiduwal na nag-atender sa selebrasyon kan Pamanggihan kan Kagurangnan kan 2001. Nanompongan kan mga nagtatabang sa siring na mga grupo na andam nang anihon an saindang mga oma.​—Mateo 9:​37, 38.

19. Ano an marahay na gibohon kun kamo nagpaplanong bumalyo sa ibang nasyon tanganing palakopon an paghuhulit kan Kahadean duman?

¹⁹ Tibaad iniisip nindo asin kan saindong pamilya na nasa kamugtakan kamo na bumalyo sa lugar na mas dakula an pangangaipo para sa mga parahulit kan Kahadean. Siempre, madonong na ‘tumukaw [nguna] asin kuentahon an gastos.’ (Lucas 14:28) Nangorognang totoo ini kun an saro nagpaplanong bumalyo sa ibang nasyon. An siisay man na nag-iisip kan siring na posibilidad tibaad marahay na ihapot sa saiyang sadiri an arog kaini: ‘Masusustentohan ko daw an sakong pamilya? Makakukua daw ako nin tamang visa? Tatao na daw ako kan tataramon sa nasyon na iyan, o andam daw akong pag-adalan iyan? Pinag-isipan ko na daw an klima asin kultura? Puede daw talaga akong magin “tabang na nagpapakosog” asin dai magin pagabat sa mga kapagtubod sa nasyon na iyan?’ (Colosas 4:​10, 11) Tanganing maaraman kun gurano an pangangaipo sa nasyon na iniisip nindong bumalyo, pirmeng angay na sumurat sa sangang opisina kan Mga Saksi ni Jehova na nagdidirehir sa paghuhulit sa lugar na iyan.a

20. Paano ginamit nin sarong hoben na Kristiano an saiyang makakaya para sa kapakinabangan nin mga kapagtubod asin kan iba pa sa ibang nasyon?

²⁰ Naaraman nin sarong Kristiano na kabale sa pagtogdok nin mga Kingdom Hall sa Hapon na kaipuhan an may kakayahan na mga trabahador sa pagtogdok nin sarong lugar nin pagsamba sa Paraguay. Huling daing agom asin igwa nin kabagsikan nin pagkahoben, buminalyo sia sa nasyon na iyan asin walong bulan na nagtrabaho bilang an solamenteng bilog na panahon na trabahador sa proyekto. Kan yaon sia duman, nag-adal sia nin Kastila asin namayo nin mga pag-adal sa Biblia sa harong. Naheling nia an pangangaipo para sa mga parabalangibog kan Kahadean sa nasyon na iyan. Minsan ngani nagbalik sia sa Hapon, tolos siang nagbalik sa Paraguay asin nagtabang na tiponon an mga tawo sa mismong Kingdom Hall na iyan.

21. Ano an maninigo na satong pangenot na iniisip asin punto de vista mantang hinahalat niato an dakulang aldaw ni Jehova?

²¹ Seseguradohon nin Dios na lubos na ginigibo an paghuhulit, kaoyon kan saiyang kabotan. Ngonyan, pinaririkas nia an pangultimong espirituwal na pag-ani. (Isaias 60:22) Kun siring, mantang hinahalat niato an aldaw ni Jehova, makikabtang kita nin maigot sa pag-ani asin mansayon an mga tawo siring kan pagmansay sa sainda kan satong mamomoton na Dios.

[Nota sa Ibaba]

Nagigirumdoman daw Nindo?

• Mantang hinahalat niato an aldaw ni Jehova, paano niato maninigong mansayon an mga tawo?

• Ano an nagin pagmansay ni Abraham sa mga matanos na tibaad nag-eerok kaidto sa Sodoma?

• Paano minansay ni Jonas an nagsosolsol na mga taga Ninive?

• Paano niato ikapaheheling na kapareho niato an pagmansay ni Jehova sa mga tawo na dai pa nakadangog kan maogmang bareta?

[Ritrato sa pahina 16]

Minansay ni Abraham an mga tawo nin siring kan pagmansay ni Jehova

[Ritrato sa pahina 17]

An pagmansay ni Jonas nagin siring kan pagmansay ni Jehova sa nagsosolsol na mga taga Ninive

[Mga Ritrato sa pahina 18]

An pagmakolog sa mga tawo nagpapahiro sa sato na estudyaran an laen-laen na oras asin pamamaagi nin paghulit kan maogmang bareta