Rumani sa Dios

Ano an Hinahagad sa Sato ni Jehova?

Deuteronomio 10:12, 13

MAKUYOG o dai makuyog—an desisyon bako pirmeng pasil. Kun an sarong tawo na mas halangkaw an ranggo maisog o sobra kaestrikto, an mga nasasakopan nia puedeng mapiritan sanang sumunod sa saiya. Minsan siring, si Jehova Dios gikan sa boot na kinukuyog kan mga nagsasamba sa saiya. Taano? Tanganing masimbag iyan, siyasaton niato an mga tataramon ni Moises na nasa Deuteronomio 10:12, 13.a

Kan si Moises nagtataram manongod sa mga kahagadan nin Dios, sia nagpalataw nin interesanteng hapot: “Ano an hinahagad sa saimo ni Jehova na saimong Dios?” (Bersikulo 12) An Dios may deretso na hagadon sa sato an ano man na gusto nia. Total, sia an Soberanong Kagurangnan saka an Burabod asin Parasustenir nin buhay. (Salmo 36:9; Isaias 33:22) Si Jehova may deretso na hagadon sa sato na kuyogon sia. Pero, habo nia nin napipiritan na pagkuyog. Ano an hinahagad nia sa sato? Na kita magin “makinuyog gikan sa puso.”—Roma 6:17.

Ano an puedeng magmotibar sa sato na gikan sa boot na kuyogon an Dios? Sinambit ni Moises an sarong bagay, na nagsasabi: “Matakot ka ki Jehova na saimong Dios.”b (Bersikulo 12) Ini bakong an makangingiring takot sa puedeng magin maraot na mga resulta kundi, imbes, an tama asin hararom na paggalang sa Dios saka sa saiyang mga ginigibo. Kun kita igwa nanggad nin hararom na paggalang sa Dios, lilikayan niato na mapaanggot sia.

Pero, ano an maninigong magin pangenot na motibo niato sa pagkuyog sa Dios? Si Moises nagsabi: “Kamotan sia [si Jehova] patin maglingkod ki Jehova na saimong Dios sa bilog mong puso asin sa bilog mong kalag.” (Bersikulo 12) Bako sanang mga pagmate an kalabot sa pagkamoot sa Dios. An sarong reperensia nagpapaliwanag: “Kun beses, an Hebreong mga berbo (verb) para sa mga pagmate nanonongod man sa mga paggawe na resulta kaiyan.” An reperensia man sanang ini nagsasabi na an pagkamoot sa Dios nangangahulogan na “gumawe na may pagkamoot” sa saiya. Sa ibang pagtaram, kun talagang namomotan niato an Dios, magawe kita sa paagi na aram niato na nakakapaogma sa saiya.—Talinhaga 27:11.

Sagkod saen maninigo niatong kuyogon an Dios? Si Moises nagsabi: ‘Maglakaw sa gabos na dalan’ nin Dios. (Bersikulo 12) Gusto ni Jehova na gibohon niato an gabos na hinahagad nia sa sato. An siring daw na lubos na pagkuyog magigin bakong para sa pinakaikakarahay niato? Imposible iyan.

An gikan sa boot na pagkuyog niato magbubunga nin mga bendisyon. Si Moises nagsurat: “Kuyogon an mga pagboot . . . na ipinagboboot ko sa saimo ngonyan, para sa saimong ikakarahay.” (Bersikulo 13) Iyo, an gabos na pagboot ni Jehova—an gabos na hinahagad nia sa sato—para sa satong ikakarahay. Paanong dai magigin arog kaiyan? “An Dios pagkamoot,” an sabi kan Biblia. (1 Juan 4:8) Huli kaini, an itinatao nia sanang mga pagboot iyo an para sa satong nagdadanay na ikakarahay. (Isaias 48:17) An paggibo kan gabos na hinahagad sa sato ni Jehova ikakalikay kita sa dakol na pagkadesganar ngonyan asin gigiyahan kita sa daing katapusan na mga bendisyon sa ngapit sa pamamahala kan saiyang Kahadean.c

Makuyog o dai makuyog—kun dapit sa hinahagad sa sato ni Jehova, saro sana an madonong na desisyon. An lubos asin gikan sa boot na pagkuyog iyo an pirmeng pinakamarahay. An siring na kaimbodan orog pang magpapadayupot sa sato ki Jehova, an mamomoton na Dios na pirmeng nasa puso an pinakaikakarahay niato.

[Mga Nota sa Ibaba]