SIMBAG SA MGA HAPOT SA BIBLIYA
Taano ta dipisilon makamtan an katuninungan sa kinaban?
An gobyerno sana na makakapagpabago sa puso nin mga tawo an matao nin katuninungan sa bilog na kinaban
Itinutukdo kan Bibliya an duwang panginot na dahilan. Inot, dawa dakul na pambihirang bagay an nagibo nin tawo, dai sinda linalang na may kakayahan na giyahan an sadiri nindang lakad. Ikaduwa, dai nagin mapanggana an mga plano nin tawo huling ‘an bilog na kinaban namumugtak [sa kapangyarihan kan saro na] maraot,’ si Satanas na Diyablo. Kaya, an paghihinguwa kan mga tawo dai nakatao nin katuninungan sa kinaban.—Basahon an Jeremias 10:23; 1 Juan 5:19.
Nagin dipisil man makamtan an katuninungan huli sa ambisyon asin pagkamakasadiri nin tawo. An sarong pambilog na kinaban na gobyerno sana, na makakatukdo sa mga tawo na kamutan an tama asin pagmakulgan an lambang saro, an makakatao nin katuninungan sa bilog na kinaban.—Basahon an Isaias 32:17; 48:18, 22.
Siisay an mapangyari nin nagdadanay na katuninungan sa daga?
Nanuga an Diyos na Makakamhan sa Gabos na maestablisar siya nin saro sanang gobyerno na mamamahala sa bilog na katawuhan. Sasalidahan kaiyan an mga gobyerno nin tawo. (Daniel 2:44) An Aki nin Diyos, si Jesus, mamamahala bilang Prinsipe nin Katuninungan. Hahalion niya an karatan sa bilog na daga asin tutukduan niya an mga tawo na mamuhay nin may katuninungan.—Basahon an Isaias 9:6, 7; 11:4, 9.
Sa irarom kan paggiya ni Jesus, minilyon na sa bilog na kinaban an naggagamit kan Tataramon nin Diyos, an Bibliya, tanganing tukduan an mga tawo na makipagkatuninungan sa iba. Dai na mahahaloy, an katuninungan sa bilog na kinaban magkakatotoo na.—Basahon an Isaias 2:3, 4; 54:13.