Pakaisipon Kun Anong Klaseng Tawo Kamo Dapat na Magin

1, 2. ‘Anong klaseng tawo kita dapat na magin’ tanganing makamtan an pag-uyon nin Diyos?

NATURAL sana sa sato na mag-isip kun ano an paghiling sa sato kan iba. Pero, bilang mga Kristiyano, bako daw na maninigo kitang magin mas interesado sa kun ano an paghiling sa sato ni Jehova? Tutal, siya an pinakadakulang Persona sa uniberso, asin yaon sa saiya an “burabod nin buhay.”—Sal. 36:9.

² Sa pagduduon kun ‘anong klaseng tawo kita dapat na magin’ sa paghiling ni Jehova, sinasadol kita ni apostol Pedro na magkaigwa nin ‘banal asin maki-Diyos na pamumuhay.’ (2 Ped. 3:11, An Banal na Biblia) Tanganing makamtan ta an pag-uyon nin Diyos, kita dapat na igwa nin ‘banal na pamumuhay,’ an buot sabihon, an satong mga gawi dapat na magin banal, o malinig—sa moral, mental, asin espirituwal. Dugang pa, kaipuhan na kita igwa nin ‘maki-Diyos na pamumuhay,’ o mga gibo nin diyosnon na debosyon, na may hararom na paggalang sa Diyos asin kaimbudan sa saiya. Kun siring, bako sana an satong paggawi an kalabot sa pagkamit kan pag-uyon niya kundi an satong pang-laog na pagkatawo man. Mantang si Jehova ‘nakakaladop kan puso,’ aram niya kun baga an satong paggawi banal asin kun baga sa saiya sana an debosyon ta.—1 Cron. 29:17.

 3. Mapadapit sa satong relasyon sa Diyos, anong mga hapot an maninigo tang pag-isipan?

³ Habo ni Satanas na Diyablo na makamtan ta an pag-uyon nin Diyos. Sa katunayan, ginigibo niya an gabos niyang makakaya tanganing bayaan ta an satong relasyon ki Jehova. Dai nag-aalangan si Satanas na gumamit nin kaputikan asin pandadaya tanganing kita akiton asin irayo sa sinasamba niyatong Diyos. (Juan 8:44; 2 Cor. 11:13-15) Kaya, madunong na haputon ta an sadiri: ‘Paano dinadaya ni Satanas an mga tawo? Ano an puwede kong gibuhon tanganing maingatan an sakong relasyon ki Jehova?’

 4. Sa paghihinguwang rauton an satong relasyon sa Diyos, ano an pinupunteriya ni Satanas, asin taano?

⁴ ‘An lambang saro sinusugutan kan sadiri niyang kamawutan, kun naaakit asin napapaunan,’ an isinurat kan disipulong si Santiago. ‘Dangan an kamawutan nangingidam asin nangangaki nin kasalan; an kasalan man nagmumundag nin kagadanan.’ (Sant. 1:14, 15, An Banal na Biblia) Sa paghihinguwang rauton an satong relasyon sa Diyos, pinupunteriya ni Satanas an gikanan kan satong mga pagmawot—an satong puso.

 5, 6. (a) Paano kita pinupunteriya ni Satanas? (b) Anong mga pang-akit an ginagamit ni Satanas sa paghihinguwang magin maraot an mga pagmawot kan satong puso, asin gurano siya kaeksperyensiyado sa paggamit kaiyan?

⁵ Paano pinupunteriya ni Satanas an satong puso? ‘An bilog na kinaban namumugtak [sa kapangyarihan kan saro na] maraot,’ an sabi kan Bibliya. (1 Juan 5:19) Kaiba sa mga ginagamit ni Satanas an “mga bagay na nasa kinaban.” (Basahon an 1 Juan 2:15, 16.)a Sa laog nin rinibong taon, may katusuhan na minamaniobra kan Diyablo an palibot ta. Huling nabubuhay kita sa kinaban na ini, kaipuhan kitang mag-ingat sa saiyang tusong mga taktika.—Juan 17:15.

⁶ Naggagamit si Satanas nin mga paagi na dinisenyo tanganing magin maraot an mga pagmawot kan satong puso. Sinambit ni apostol Juan an tulong pang-akit na ginagamit ni Satanas: (1) “an mawot kan laman,” (2) “an mawot kan mga mata,” asin (3) “an pagpaabaw-abaw kan kaya sa buhay.” Ginamit iyan ni Satanas tanganing tentaran si Jesus sa kaawagan. Huling dakulon nang taon na ginagamit ni Satanas an siring na mga silo, eksperto na siya sa paggamit kaiyan, na ibinabagay an saiyang pamamaagi depende sa mga tendensiya kan lambang indibidwal. Bago niyato pag-ulayan kun ano an mga puwede tang gibuhon tanganing maprotektaran an satong sadiri mapadapit sa bagay na ini, hilingon niyato kun paano nagin mapanggana an Diyablo sa paggamit nin pirang pang-akit ki Eva alagad dai nagin mapanggana sa Aki nin Diyos.

 7. Paano ginamit ni Satanas “an mawot kan laman” tanganing tentaran si Eva?

⁷ An tawo igwa nin pundamental na pangangaipo tanganing masusteniran an hawak—an magkakan. Dinisenyo kan Kaglalang an daga na magprodusir nin abundang kakanon. Puwedeng pagmaigutan ni Satanas na pukawon an satong natural na pagmawot na kumakan tanganing dai ta gibuhon an kabutan nin Diyos. Hilingon ta kun paano niya iyan ginibo ki Eva. (Basahon an Genesis 3:1-6.) Sinabi ni Satanas ki Eva na dai siya magagadan kun siya magkakan nin bunga kan “kahoy nin pakamidbid kan marahay asin maraot” asin na sa aldaw na siya magkakan kaiyan, siya magigin arog nin Diyos. (Gen. 2:9) Sa sinabi niyang iyan, pinalataw kan Diyablo na dai kaipuhan ni Eva na magin makinuyog sa Diyos tanganing mabuhay. Grabe nanggad na kaputikan! Kan maitanom sa isip ni Eva an ideyang iyan, may duwa siyang pagpipilian: Puwede niyang halion iyan sa isip, o puwede niyang pagparaisipon iyan, na tinutugutan na tumalubo an saiyang pagmawot sa bunga. Dawa ngani puwede siyang kumakan nin bunga kan gabos na iba pang kahoy sa hardin, pinili niyang pagparaisipon an sinabi ni Satanas manungod sa kahoy na nasa tahaw kan hardin, asin siya ‘kuminua nin bunga kaiyan asin kuminakan.’ Sa siring, nagibo ni Satanas na si Eva magkaigwa nin pagmawot sa sarong bagay na ipinagbabawal kan saiyang Kaglalang.

 8. Paagi sa paggamit kan “mawot kan laman,” paano pinurbaran ni Satanas na sugutan si Jesus, asin taano ta dai ini nagin mapanggana?

⁸ Ginamit ni Satanas an kaparehong taktika kan purbaran niyang tentaran si Jesus sa kaawagan. Pagkatapos kan pag-ayuno ni Jesus nin 40 aldaw asin 40 banggi, pinurbaran ni Satanas na pukawon an pagmawot niya na magkakan. ‘Kun ika an Aki nin Diyos,’ an sabi ni Satanas, ‘magbuot ka na ining gapo magin tinapay.’ (Luc. 4:1-3) Si Jesus may duwang pagpipilian: Puwede niyang pilion na dai gamiton an saiyang kapangyarihan na mapaniguan an pangangaipong kumakan, o puwede niyang pilion na gamiton iyan. Aram ni Jesus na dai niya maninigong gamiton an kapangyarihan na iyan sa makasadiring katuyuhan. Dawa ngani gutom siya, ininot niya an pagpadanay kan saiyang relasyon ki Jehova kisa sa pagpanigo sa pangangaipong kumakan. “Nasusurat,” an simbag ni Jesus, ‘An tawo dai mabubuhay sa tinapay sana kundi sa gabos na tataramon na minaluwas sa nguso nin Diyos.’—Mat. 4:4.

 9. Ano an ipinaparisa kan pananaram na “an mawot kan mga mata,” asin paano pinukaw ni Satanas ki Eva an pagmawot na ini?

⁹ An saro pang pang-akit na sinambit ni Juan iyo “an mawot kan mga mata.” Ipinaparisa kan pananaram na iyan na an saro puwedeng magkaigwa nin pagmawot sa sarong bagay paagi sa paghiling sana diyan. Sa nangyari ki Eva, pinukaw ni Satanas an pagmawot na ini paagi sa pagsabi: ‘Mabubuklat an saindong mga mata.’ Miyentras na pigpaparahiling ni Eva an ipinagbabawal na bunga, nagigin mas kaakit-akit iyan sa saiya. Nahiling ni Eva na iyan ‘makauugma sa mata.’

10. Paano ginamit ni Satanas “an mawot kan mga mata” tanganing tentaran si Jesus, asin paano suminimbag si Jesus?

¹⁰ Kumusta man an pagsugot ki Jesus? ‘Ipinahiling [ni Satanas ki Jesus] an gabos na kahadian kan kinaban sa kadikit na panahon. Asin an Diyablo nagsabi saiya, “Sa saimo itatao ko ini gabos na kapangyarihan asin an kamurawayan ninda.”’ (Luc. 4:5, 6) Dai mahihiling ni Jesus nin madalian an gabos na kahadian paagi sa saiyang literal na mga mata, pero siguradong inisip ni Satanas na maski paano puwedeng makaakit ki Jesus an kamurawayan kan mga kahadian na iyan kun mahihiling niya iyan paagi sa sarong bisyon. Daing supog na nagsabi si Satanas: “Kun ika sumamba sa atubang ko, iyan gabos [magigin] saimo.” (Luc. 4:7) Sa ano man na paagi, habo ni Jesus na siya magin an klase nin tawo na gusto ni Satanas. Tulos-tulos siyang nagsimbag: ‘Nasusurat, “Ika sumamba sa Kagurangnan na saimong Diyos, asin saiya sana maglingkod ka.”’—Luc. 4:8.

11. Paano si Eva nadaya ni Satanas?

¹¹ Kan sambiton ni Juan an mga bagay na nasa kinaban, iiniba niya “an pagpaabaw-abaw kan kaya sa buhay.” Kan si Adan asin Eva pa sana an tawo digdi sa daga, siyempre dai man sinda ‘makakapagpaabaw-abaw [sa ibang tawo] kan saindang kaya sa buhay.’ Pero, nahiling sa sainda an kapalangkawan. Kan tinetentaran si Eva, pinalataw ni Satanas na may marahayon na bagay na ipinapanguri sa saiya an Diyos. Sinabi sa saiya kan Diyablo na sa aldaw mismo na kumakan siya nin bunga kan ‘kahoy nin pakamidbid kan karahayan asin karatan,’ siya ‘magigin garo diyos na tatao kan marahay asin kan maraot.’ (Gen. 2:17; 3:5) Sa paaging iyan, pinaluwas ni Satanas na si Eva puwedeng magin independiyente ki Jehova. Minalataw na kapalangkawan an sarong dahilan kaya naniwala siya sa kaputikan na iyan. Kuminakan siya kan ipinagbabawal na bunga sa paniniwalang dai talaga siya magagadan. Salá nanggad siya!

12. Ano an saro pang paagi na pinurbaran ni Satanas na tentaran si Jesus, asin ano an ginibo ni Jesus?

¹² Bakong arog ni Eva, marahayon nanggad na halimbawa nin kapakumbabaan an ipinahiling ni Jesus! Pinurbaran ni Satanas na tentaran siya sa saro pang paagi, pero sinayumahan niya dawa an mismong ideya na gumibo nin sarong bagay na talagang nakakabigla na mabugtak sa Diyos sa pagbalo. Saro kutana iyan na akto nin kapalangkawan! Imbes na gibuhon iyan, malinaw asin direkta an simbag ni Jesus: “Sinasabi, ‘Dai mo pagbaluon si Jehova na saimong Diyos.’”—Basahon an Lucas 4:9-12.b

13, 14. Ipaliwanag kun paano ginagamit ngunyan ni Satanas an pirang pang-akit.

¹³ Ngunyan, naggagamit si Satanas nin mga pang-akit na kapareho kan ginamit niya ki Eva asin ki Jesus. Sa pagpukaw sa “mawot kan laman,” ginagamit kan Diyablo an saiyang kinaban tanganing palakupon an imoralidad asin pagpangana sa pagkakan saka pag-inom. Paagi sa pornograpiya, nangurugna sa Internet, nakukua niya an atensiyon kan mga dai nagmamangno asin napupukaw niya “an mawot kan mga mata.” Asin makusog nanggad an pang-akit nin materyalismo, kapangyarihan, asin kabantugan sa mga tawong mapalangkaw asin sa mga gustong ‘magpaabaw-abaw kan saindang kaya sa buhay’!

¹⁴ An “mga bagay na nasa kinaban” puwedeng iagid sa mga paon na ginagamit nin parasira. Nakakaakit iyan, pero may nakakabit na banwit sa kada saro kaiyan. Sa kaagid na paagi, ginagamit ni Satanas an mga bagay na tibaad mansayon nin mga tawo na normal sanang pangangaipo sa aroaldaw tangani na magmawot sinda na gibuhon an mga bagay na kontra sa mga ley nin Diyos. Pero, an siring na tusong mga pang-akit dinisenyo tanganing impluwensiyahan an satong mga pagmawot asin gibuhon na maraot an satong puso. Ginagamit nanggad iyan ni Satanas sa pagmamaigot na patubudon kita na an pag-asikaso kan satong personal na mga pangangaipo asin kaginhawahan mas mahalaga kisa sa paggibo kan kabutan nin Diyos. Mapadara daw kita sa siring na mga pang-akit?

15. Paano ta maaarog si Jesus sa paglaban sa mga sugot ni Satanas?

¹⁵ Si Eva nagpadaog sa mga sugot ni Satanas, pero mapangganang linabanan iyan ni Jesus. Sa kada pagkakataon, siya nagsimbag suno sa Kasuratan, na nagsasabi: “Nasusurat” o, “Sinasabi.” Kun kita maigot na nag-aadal kan Bibliya, magigin pamilyar kitang marhay sa Kasuratan asin magigirumduman ta an mga teksto na makakatabang sa sato na magdanay na tultol an isip kun napapaatubang sa sugot. (Sal. 1:1, 2) Kun gigirumdumon ta an halimbawa nin mga indibidwal sa Kasuratan na maimbod sa Diyos, matatabangan kita na arugon sinda. (Roma 15:4) An pagkaigwa nin hararom na paggalang ki Jehova, an buot sabihon, pagkamuot sa kun ano an namumutan niya asin pagkaungis sa kun ano an ikinakaungis niya, matao sa sato nin proteksiyon.—Sal. 97:10

16, 17. Ano an puwedeng magin epekto kan satong “kakayahan na mangatanusan” sa kun anong klaseng tawo kita?

¹⁶ Dinadagka kita ni apostol Pablo na gamiton an satong “kakayahan na mangatanusan” tanganing magin an klase nin tawo na an kaisipan kauyon kan kaisipan nin Diyos, bako kan sa kinaban. (Roma 12:1, 2, NW) Sa pagduduon na kaipuhan kontrolado tang marhay kun anong mga bagay an maninigo tang isip-isipon, sinabi ni Pablo: ‘Rinurumpag mi an mga putik na argumento; ginagaba mi an lambang kapaabaw-abawan na nakakaulang sa pakamidbid sa Diyos; binibihag mi an gabos na pag-iisip tanganing magkuyog ki Cristo.’ (2 Cor. 10:5, BPV)c An satong mga iniisip igwa nin mapuwersang epekto sa kun anong klaseng tawo kita, kaya kaipuhan kitang padagos na ‘maghurop-hurop’ kan mga bagay na nakakapakusog.—Fil. 4:8.

¹⁷ Dai kita makakaasa na kita magigin banal kun an ilinalaog ta sa satong puso bakong marahay na mga kaisipan asin pagmawot. Dapat na mamutan ta si Jehova nin may “malinig na puso.” (1 Tim. 1:5) Pero an puso madaya, asin tibaad dai ta ngani narerealisar kun gurano kita naaapektaran kan “mga bagay na nasa kinaban.” (Jer. 17:9) Kun siring, bako daw na maninigo na ‘padagos tang baluon kun baga kita nasa pagtubod asin padagos na patunayan kun ano man nanggad kita’ paagi sa sadiyosan na pagsiyasat sa sadiri basado sa kun ano an pinag-aadalan ta sa Bibliya?—2 Cor. 13:5, NW.

18, 19. Taano ta maninigo na magin determinado kita na magin an klase nin tawo na gusto ni Jehova?

¹⁸ An saro pang bagay na makakatabang sa sato na malabanan an “mga bagay na nasa kinaban” iyo an paggirumdom sa ipinasabong na mga tataramon ni Juan: ‘An kinaban naagi sana asin an saiyang mga hurot [o mawot]; alagad an naggigibo kan buot nin Diyos nagdadanay sagkod lamang.’ (1 Juan 2:17) An sistema ni Satanas garo baga permanente asin tunay. Pero, maabot an panahon na matatapos iyan. Mayo nin permanente sa gabos na iinaalok kan kinaban ni Satanas. Kun gigirumdumon niyato an katunayan na iyan, matatabangan kita na dai madara kan mga pang-akit kan Diyablo.

¹⁹ Sinasadol kita ni apostol Pedro na magin an klase nin tawo na inuuyunan nin Diyos mantang satong ‘hinahalat asin minamawot nin maigot an pagdatong kan aldaw nin Diyos, na huli kaiyan an kalangitan na maglalaad matutunaw, asin an mga elemento tutunawon kan naglalaad na kalayo.’ (2 Ped. 3:12) Dai na nanggad mahahaloy, maabot na an aldaw na iyan, asin lalaglagon ni Jehova an gabos na kabtang kan kinaban ni Satanas. Sagkod na dai pa iyan nag-aabot, padagos na gagamiton ni Satanas an “mga bagay na nasa kinaban” tanganing tentaran kita, kun paanong tinentaran niya si Eva asin si Jesus. Dai kita dapat magin arog ni Eva asin maghinguwang paniguan an sadiring mga pagmawot. Kun gigibuhon niyato iyan, garo ta man sana minimidbid na diyos niyato si Satanas. Kaipuhan tang arugon si Jesus asin labanan an siring na mga pang-akit, gurano man kagayon asin kanakakaakit an pagkagibo kaiyan. Lugod na magin determinado an lambang saro sa sato na magin an klase nin tawo na gusto ni Jehova.