Dai Pabayaan na Maglipot an Saindong Pagkamuot

1, 2. (a) Sairisay an inot na pinapanungdan kan sinabi ni Jesus sa Mateo 24:12? (b) Paano ipinahiling kan libro nin Mga Gibo na an kadaklan sa mga Kristiyano kan inot na siglo padagos na nagpahiling nin pagkamuot? (Hilingon an ritrato sa itaas.)

AN SARONG kabtang kan tanda na itinao ni Jesus mapadapit sa “pagtatapos kan sistema nin mga bagay” iyo na “magigin malipot an pagkamuot kan kadaklan.” (Mat. 24:3, 12) Kan inot na siglo, pinabayaan kan mga Judio, na naghihingakong banwaan sinda nin Diyos, na maglipot an pagkamuot ninda ki Jehova.

² Sa ibong na lado, an kadaklan na Kristiyano kan panahon na idto padagos na nagin sibot sa “pagpahayag kan maugmang bareta manungod sa Cristo” asin sa pagpahiling nin pagkamuot sa Diyos, sa kapwa ninda mga Kristiyano, asin sa mga bakong kapagtubod. (Gibo 2:44-47; 5:42) Pero talagang may mga parasunod si Jesus kan inot na siglo na pinabayaan na lumipot an saindang pagkamuot.

 3. Ano an posibleng dahilan kaya naglipot an pagkamuot kan ibang mga Kristiyano?

³ Sinabi kan binuhay liwat na si Jesu-Cristo sa mga Kristiyano kan inot na siglo sa Efeso: “May sarong bagay ako laban sa saimo, na binayaan mo an pagkamuot na yaon sa saimo kan primero.” (Kap. 2:4) Ano an sarong posibleng dahilan kaya nangyari iyan? An mga disipulong ini ni Cristo posibleng naimpluwensiyahan kan makalaman na kaisipan kan kinaban. (Efe. 2:2, 3) Arog kan dakul na siyudad ngunyan, pano nin kalayawan an Efeso kan inot na siglo. Mayamanon na siyudad iyan na diyan mas mahalaga sa mga tawo an luho, paglilibang, saka komportableng buhay. Mas gusto ninda an makasadiring mga kaugmahan kisa magpahiling nin bakong makasadiring pagkamuot. Lakop man na marhay duman an daing pakundangan na paggawi asin grabeng imoralidad.

 4. (a) Taano ta naglilipot an pagkamuot kan mga tawo sa satong panahon? (b) Ano an tulong bagay na diyan kaipuhan niyatong pakusugon an satong pagkamuot?

⁴ Nauutob sagkod sa panahon ta an hula ni Jesus dapit sa paglipot nin pagkamuot. An mga tawo ngunyan luway-luway na nagluluya an pagkamuot sa Diyos. Tinatalikdan siya kan minilyon asin nagdedepende sinda sa mga institusyon nin tawo tanganing resolberan an mga problema kan katawuhan. Kaya padagos na naglilipot an pagkamuot kan mga dai nagsasamba sa Diyos na Jehova. Saka arog kan nangyari kaidto sa kongregasyon sa Efeso, puwede man na magin kampante an tunay na mga Kristiyano ngunyan asin mapabayaan na maglipot an saindang pagkamuot. Pag-uulayan niyato ngunyan an tulong bagay na diyan kaipuhan niyatong pakusugon an satong pagkamuot: (1) Pagkamuot ki Jehova, (2) pagkamuot o pagpapahalaga sa katotoohan sa Bibliya, (3) asin pagkamuot sa mga tugang.

 5. Taano ta dapat niyatong kamutan an Diyos?

⁵ Kan aldaw man sanang idto bago magpatanid si Jesus dapit sa pagluya nin pagkamuot, idinuon niya an pinakaimportanteng pagkamuot sa gabos. Sinabi niya: “‘Kamutan mo si Jehova na saimong Diyos sa bilog mong puso asin sa bilog mong kalag saka sa bilog mong isip.’ Iyo ini an pinakaimportante asin panginot na tugon.” (Mat. 22:37, 38) Makakatabang sa sato an makusog na pagkamuot ki Jehova na kuyugon an mga pagbuot Niya, na magtagal, asin kaungisan an maraot. (Basahon an Salmo 97:10.) Pero, hinihinguwang marhay ni Satanas asin kan saiyang kinaban na paluyahon an satong pagkamuot sa Diyos.

 6. Ano an nangyayari huli sa pagkawara nin pagkamuot sa Diyos kan mga tawo?

⁶ Biribid an pagmansay kan kinaban ngunyan sa pagkamuot. Imbes na mamutan an Kaglalang, an mga tawo “interesado na sana sa sadiri nindang kapakanan.” (2 Tim. 3:2) Pinapalakop kan kinaban na ini na pinamamahalaan ni Satanas “an kamawutan kan laman asin an kamawutan kan mga mata saka an pagpasikat nin saro kan mga bagay na igwa siya.” (1 Juan 2:16) Pinatanidan ni apostol Pablo an kapwa niya mga Kristiyano dapit sa pag-inot sa sadiring kaugmahan. Sinabi niya: “An pagsentro kan isip sa laman nangangahulugan nin kagadanan . . . huli ta an pagsentro kan isip sa laman nangangahulugan nin pakikiiwal sa Diyos.” (Roma 8:6, 7) Grabeng pagkadisganar asin kulog an sinasapar kan mga tawong itinao an gabos nindang kusog asin panahon sa paghanap nin materyal na mga bagay o sa pagpanigo sa saindang mga kamawutan sa sekso.—1 Cor. 6:18; 1 Tim. 6:9, 10.

 7. Anong mga peligro an inaatubang kan mga parasunod ni Cristo ngunyan?

⁷ Sa nagkapirang nasyon, pinapalakop kan mga ateista, agnostiko, asin mga ebolusyonista an mga ideyang dinisenyo tanganing rauton bako sana an pagkamuot sa Diyos kundi pati an pagtubod sa saiya. Dakul an nakumbinsir ninda na an saro ignorante o bakong madunong kun nagtutubod siya na may Kaglalang. Asin halangkawon man an paghiling kan mga tawo sa mga siyentista kaya nairarayo kaiyan an atensiyon kan mga tawo sa satong Kaglalang. (Roma 1:25) Kun tatawan ta nin atensiyon an mga iyan, puwede kita kaiyan na irayo ki Jehova asin maglipot an pagkamuot ta sa saiya.—Heb. 3:12.

 8. (a) Anong nakakapangluya sa buot na mga sitwasyon an inaatubang kan dakul na lingkod ni Jehova? (b) Anong pampakusog sa buot an yaon sa Salmo 136?

⁸ Puwede man na magluya an satong pagtubod asin maglipot an satong pagkamuot sa Diyos kun mapadaog kita sa pangluluya nin buot. Sa maraot na sistemang ini na kontrolado ni Satanas, gabos kita napapaatubang kun minsan sa mga sitwasyon na nakakapangluya sa buot. (1 Juan 5:19) Tibaad may mga inaagihan kita ngunyan na mga problema huli sa paggurang, hilang, o pinansiyal na mga kasakitan. Tibaad namumundo kita huling pagmati ta kulang an satong kakayahan. O tibaad nadidisganar kita huli sa mga linalauman tang dai nautob, o huli sa satong mga kaluyahan. Minsan siring, dai niyato dapat pagtugutan an arog kaiyan na mga dahilan na isipon na pinapabayaan na kita ni Jehova. Imbes, dapat niyatong hurop-hurupon an nakakapakusog na mga tataramon dapit sa nagdadanay na pagkamuot ni Jehova sa sato. Mababasa ta iyan sa Salmo 136:23 na nagsasabi: ‘Siya nakakagirumdom sa satuya sa satuyang mga kasakitan; huli ta sagkod lamang magdadanay an saiyang pagkahirak [o maimbod na pagkamuot].’ Iyo, si Jehova pirming mapahiling nin maimbod na pagkamuot sa saiyang mga lingkod. Kaya, makakasigurado kita na dinadangog niya an satong mga ‘pagngayo-ngayo’ o pakimahirak para sa tabang asin sinisimbag niya iyan.—Sal. 116:1; 136:24-26.

 9. Paano napagdanay ni Pablo an saiyang pagkamuot sa Diyos?

⁹ Arog kan salmista, napakusog si Pablo paagi sa paghurop-hurop sa padagos na pagtabang ni Jehova sa saiya. Si Pablo nagsurat: “Si Jehova an sakuyang paratabang; dai ako matatakot. Ano an magigibo nin tawo sa sako?” (Heb. 13:6) An makusog na pagtitiwalang iyan sa mamumuton na pag-ataman ni Jehova nakatabang ki Pablo na makayanan an mga kadipisilan sa buhay. Sa katunayan, mantang nakapreso, naggibo si Pablo nin nagkapirang nakakapakusog na surat. (Efe. 4:1; Fil. 1:7; Filem. 1) Iyo, dawa sa masakit na mga panahon, napagdanay ni Pablo an saiyang pagkamuot sa Diyos. Paano niya iyan nagibo? Padagos siyang nagsarig sa “Diyos nin gabos na karangahan, na nagraranga sa sato sa gabos tang kasakitan.” (2 Cor. 1:3, 4) Paano ta maaarog si Pablo asin mapagdadanay na makusog an satong pagkamuot ki Jehova?

10. Paano niyato mapagdadanay na makusog an satong pagkamuot ki Jehova?

¹⁰ Sinambit mismo ni Pablo an sarong panginot na paagi tanganing mapagdanay niyatong makusog an satong pagkamuot ki Jehova. Ini an isinurat niya sa saiyang mga kapagtubod: “Danay na mamibi.” Kan huri isinurat man niya: “Magin matiyaga sa pagpamibi.” (1 Tes. 5:17; Roma 12:12) Paagi sa pakikikomunikar ki Jehova sa pamibi, puwede kitang magkaigwa nin haraning relasyon sa Saiya. (Sal. 86:3) Pag ipinapahayag ta ki Jehova an kauruirarumi niyatong mga kaisipan asin pagmati, talagang mapaparani kita sa satong Ama sa langit, an “Paradangog nin pamibi.” (Sal. 65:2, NW) Saro pa, mantang nahihiling tang sinisimbag ni Jehova an satong mga pamibi, mas nagkukusog man an satong pagkamuot sa saiya. Mas lalo man niyatong napapatunayan na ‘si Jehova harani sa gabos na nag-aarang sa saiya.’ (Sal. 145:18) An pagtitiwalang iyan sa mamumuton na pagsuporta ni Jehova makakatabang sa sato na makayanan an mga maabot pang pagbalo sa satong pagtubod.

11, 12. Paano niyato mas mapapararom an satong pagpapahalaga sa katotoohan sa Bibliya?

¹¹ Bilang mga Kristiyano, gustong-gusto asin pinapahalagahan tang marhay an katotoohan. An Tataramon nin Diyos an pinakagikanan nin katotoohan. Sa pamibi niya sa saiyang Ama, sinabi ni Jesus: “An saimong tataramon katotoohan.” (Juan 17:17) Tanganing mapahalagahan niyato an katotoohan, dapat na kumua kita nin tamang kaaraman sa Tataramon nin Diyos. (Col. 1:10) Pero bako sana iyan an kaipuhan. Makakatabang sa sato an sinabi kan pinasabngan na kagsurat kan Salmo 119 tanganing masabutan ta kun ano pa an kaipuhan niyatong gibuhon. (Basahon an Salmo 119:97-100.) Nagtatagama daw kita nin panahon tanganing hurop-hurupon, o pag-isipan na marhay, an mga teksto sa Bibliya sa bilog na aldaw? Mas mapapararom niyato an satong pagpapahalaga sa katotoohan sa Bibliya kun huhurop-hurupon ta an mga pakinabang kan pag-aplikar niyato kaiyan sa satong buhay.

¹² Sinabi pa kan salmista: ‘Abang hamis sa pagnamit kan saimong [mga tataramon], urog kisa tangguli sa sakong nguso!’ (Sal. 119:103, An Banal na Biblia) Kaagid kaiyan, gusto niyatong namnamon asin dai maghidali sa pagkakan kan masisiram na espirituwal na kakanon na basado sa Bibliya na inaandam kan organisasyon nin Diyos. Paagi kaiyan, ikakaugma asin mas matatandaan niyato an mga ‘kawili-wiling tataramon’ nin katotoohan saka magagamit niyato iyan tanganing tabangan an iba.—Par. 12:10.

13. Ano an nakatabang ki Jeremias na pahalagahan na marhay an katotoohan sa Kasuratan, asin ano an nagin epekto kaiyan sa saiya?

¹³ Pinahalagahan na marhay ni propeta Jeremias an katotoohan sa Kasuratan. Risaha an nagin epekto kan mga tataramon nin Diyos sa saiyang puso. ‘Nakua an saimong mga tataramon, asin ta kinarakan ko iyan; asin ta si saimong tataramon nagin sa sakuya kagaya-gayahan asin kaugmahan nin sakuyang puso, huli ta inapod [ako sa] saimong ngaran, O Jehova nin mga hukbo.’ (Jer. 15:16) Sa piguratibong paagi, kinakan asin ninamnam ni Jeremias an mahalagang marhay na mga tataramon nin Diyos paagi sa paghurop-hurop sa mga iyan. Paagi kaiyan, nagkaigwa siya nin udok sa pusong pagpapahalaga sa pribilehiyo niyang apudon sa pangaran nin Diyos. Kun pinapahalagahan niyato an katotoohan sa Bibliya, mahihiling ta kun gurano kadakula kan satong pribilehiyo na darahon an pangaran nin Diyos asin ipahayag an saiyang Kahadian sa panahon na ini kan katapusan.

14. Paano niyato mas mapapararom an satong pagpapahalaga sa katotoohan sa Bibliya?

¹⁴ Apuwera sa pagbasa nin Bibliya asin kan satong mga publikasyon, paano pa niyato mapapararom an satong pagpapahalaga sa katotoohan sa Bibliya? Makakatabang sa sato an regular na pag-atender sa mga pagtiripon. An pag-adal sa Bibliya gamit an Torrengbantayan kada semana an panginot na paagi na tinutukduan kita. Tanganing lubos na makinabang sa temang pinag-uulayan diyan, kaipuhan niyatong mag-andam na marhay para sa kada Pag-adal sa Torrengbantayan. An sarong paagi na magigibo ta iyan iyo an pagbasa sa kada sitadong teksto. Ngunyan, mada-download na an Torrengbantayan sa jw.org website asin mababasa man sa JW Library app sa dakul na lengguwahe. May mga electronic format iyan na madaling nabubuksan an sitadong mga teksto sa kada pag-aadalan na artikulo. Pero ano man an ginagamit niyato, kun babasahon asin huhurop-hurupon niyato an mga tekstong iyan, mas mararom an satong pagpapahalaga sa katotoohan sa Bibliya.—Basahon an Salmo 1:2.

15, 16. (a) Uyon sa Juan 13:34, 35, igwa kita nin anong obligasyon? (b) Paano an pagkamuot ta sa satong mga tugang konektado sa satong pagkamuot sa Diyos asin sa Bibliya?

¹⁵ Kan huring banggi niya sa daga, sinabi ni Jesus sa saiyang mga disipulo: “Tinatawan ko kamo nin sarong bagong tugon, na kamutan nindo an lambang saro; kun paanong namutan ko kamo, kamutan man nindo an lambang saro. Paagi kaini maaaraman kan gabos na kamo sakuyang mga disipulo—kun igwa kamo nin pagkamuot sa lambang saro.”—Juan 13:34, 35.

¹⁶ An pagkamuot niyato sa satong mga tugang konektado sa pagkamuot niyato ki Jehova. Kaya kun dai ta namumutan an Diyos, dai ta man mamumutan an satong tugang; kun dai ta namumutan an satong tugang, dai ta man mamumutan an Diyos. Isinurat ni apostol Juan: “Kun an saro dai namumuot sa saiyang tugang, na nahihiling niya, dai man niya magigibong mamuot sa Diyos, na dai niya nahihiling.” (1 Juan 4:20) An pagkamuot ki Jehova asin sa satong mga tugang konektado man sa satong pagkamuot o pagpapahalaga sa Bibliya. Taano? Huling pinapahiro kita kan pagpapahalaga sa katotoohan sa Bibliya na udok sa pusong kuyugon an pagbuot na kamutan an Diyos asin an satong mga tugang.—1 Ped. 1:22; 1 Juan 4:21.

17. Ano an nagkapirang paagi na maipapahiling ta an satong pagkamuot?

¹⁷ Basahon an 1 Tesalonica 4:9, 10. Ano an nagkapirang praktikal na paagi na maipapahiling ta an satong pagkamuot sa kongregasyon? Tibaad igwang sarong tugang na may edad na asin kaipuhan alalayan para makaatender sa mga pagtiripon. O tibaad may kaipuhan na hirahayon sa harong nin sarong balo. (Sant. 1:27) Kaipuhan man niyatong tawan nin atensiyon, pakusugon an buot, asin rangahon an satong mga tugang na nangluluya an buot o nagmumundo nin makuri, hoben man sinda o may edad na. (Tal. 12:25; Col. 4:11) Paagi sa satong mga tataramon asin gibo, talagang napapatunayan niyato na namumutan tang marhay an “satuyang mga tugang sa pagtubod.”—Gal. 6:10.

18. Ano an makakatabang sa sato para maresolberan an dikit na dai pagkasinabutan niyato asin kan satong mga kapagtubod?

¹⁸ Ihinula kan Bibliya na sa “huring mga aldaw” kan maraot na sistemang ini nin mga bagay dakul an magigin makasadiri asin mahanab. (2 Tim. 3:1, 2) Kaya bilang mga Kristiyano, dapat niyatong hinguwahon na marhay na mapakusog an satong pagkamuot sa Diyos, sa katotoohan sa Bibliya, asin sa lambang saro. Totoo, puwedeng magkaigwa kita asin an satong mga kapagtubod nin dikit na dai pagkasinabutan paminsan-minsan. Pero, bendisyon nanggad para sa gabos na miyembro kan kongregasyon kun an lambang saro pinapahiro nin pagkamuot na husayon an ano man na problema sa mamumuton na paagi! (Efe. 4:32; Col. 3:14) Kaya, dai lugod niyato tugutan na maglipot an satong pagkamuot! Imbes, lugod na padagos kitang magkaigwa nin makusog na pagkamuot ki Jehova, sa saiyang tataramon, asin sa satong mga tugang.