An Kagaya-gayahan sa Pamumuhay nin Simple

IKINASAL si Daniel saka Miriam kan Setyembre 2000 asin nag-istar sa siyudad nin Barcelona sa Espanya. “Igwa kami kan inaapod kan dakul na normal na buhay,” an sabi ni Daniel. “Magayon an trabaho mi kaya nakakakakan kami sa mamahalon na mga restawran, nakakaduman sa ibang nasyon, saka may branded na mga bado. Regular man kaming nakakaiba sa pag-service.” Pero nagbago iyan.

Sa sarong kumbensiyon kan 2006, napahirong marhay si Daniel sa hapot na nadangog niya sa sarong pahayag: “Ginigibo ta daw an satong pinakamakakaya tanganing tabangan ‘an mga nagriripaydipay pasiring sa gadanan’ na maglakaw sa dalan pasiring sa buhay na daing katapusan?” (Tal. 24:11, NW) Idinuon kan pahayag na iyan an satong responsabilidad na ipaabot sa iba an nagliligtas-buhay na mensahe kan Bibliya. (Gibo 20:26, 27) Nagigirumduman ni Daniel, “Pagmati ko, ako an kinakaulay ni Jehova.” Sinabi man sa pahayag na mas nagigin maugma kita pag pinapahiwas ta an satong ministeryo. Kumbinsido diyan si Daniel huling payunir na kaidto si Miriam asin nahihiling niya na maugmahon ini.

“Naisip ko na panahon na idto para gumibo ako nin dakulang pagbabago,” an sabi ni Daniel. Asin talagang ginibo niya iyan. Binawasan niya an saiyang oras sa trabaho, nagpayunir, asin inisip-isip an kaugmahan na puwedeng mamatian ninda ni Miriam kun maboluntaryo sinda sa lugar na mas nangangaipo nin mga parahayag.

Kan Mayo 2007, nag-resign si Daniel asin Miriam sa trabaho asin naglipat sa Panama na nadumanan na ninda kaidto. Mga isla sa Bocas del Toro Archipelago na nasa Dagat nin Caribbean an nagin teritoryo ninda, na mga katutubong Ngabe an kadaklan sa nakaistar. Sa tantiya ni Daniel asin Miriam, igo an saindang natipon para makapagboluntaryo sa Panama nin mga walong bulan.

Baroto saka bisikleta an gamit ninda sa pagduman sa mga isla. Tandang-tanda pa ninda su inot na pagbisikleta ninda para maghulit. Mga 32 kilometros an binisikleta ninda sa patukad na mga bulod asin mainiton na aldaw. Haros madismayo na si Daniel sa kapagalan. Pero, mapagpadagos na marhay an mga pamilyang Ngabe na nadudumanan ninda, lalo na kan manudan na ninda an nagkapirang tataramon sa lengguwahe duman. Dai nahaloy, 23 na an tinutukduan ninda sa Bibliya.

Pero, kan maubos na an tipon kan mag-agom, namundo sindang marhay. Sabi ni Daniel: “Napapaluha kami mantang iniisip na kaipuhan mi nang magbalik sa Espanya. Maraot sa pagmati na babayaan mi na an mga Bible study mi.” Dangan, pakalihis nin sarong bulan, nakaresibi sinda nin magayon na bareta. “Inimbitaran kami na maglingkod bilang espesyal payunir,” an sabi ni Miriam. “Talagang ugmahon kami ta dai mi na kaipuhan maghali sa samong teritoryo!”

Huli sa mga pagbabago sa organisasyon, na-reassign si Daniel asin Miriam bilang regular payunir kan 2015. Ano na an gigibuhon ninda? Nagtiwala sinda sa panuga kan Bibliya: “Ipagkatiwala mo ki Jehova an saimong dalan; manarig ka sa saiya, asin siya mahiro para sa saimo.” (Sal. 37:5, NW) Nakakua sinda nin trabaho na makakasuportar sa pagpapayunir ninda, asin ngunyan naglilingkod sinda sa sarong kongregasyon sa Veraguas, Panama.

Sabi ni Daniel: “Bago kami maghali sa Espanya, dai mi sigurado kun kakayanon mi an simpleng buhay. Pero iyan na an buhay mi ngunyan. Saka dai man talaga kami nagkukulang sa mga pangangaipo mi.” Ano an talagang nakakapaugma sa sainda? Ini an sinabi ninda, “An pagtabang sa mahuyong mga tawo na mabisto si Jehova an talagang nagtatao sa samo nin daing kapantay na kagaya-gayahan!”