Maglingkod ki Jehova, an Diyos nin Katalingkasan

1, 2. (a) Taano ta pig-uurulayan kan mga tawo kan panahon ni Pablo an dapit sa kauripnan asin katalingkasan? (b) Tanganing magkamit nin tunay na katalingkasan an mga tawo, giniyahan sinda ni Pablo pasiring kiisay?

IPINAG-OORGULYO kan mga siyudadano kan Imperyo nin Roma, na diyan man nakaistar an inot na mga Kristiyano kaidto, na sinda maigot na mga parasuportar nin ley, hustisya, asin katalingkasan. Pero, nagin makapangyarihan asin mamuraway an Imperyo nin Roma huli sa mga uripon kaiyan. May panahon kaidto na mga 30 porsiyento kan populasyon kaiyan mga uripon. Kaya siguradong pinag-uurulayan kaidto kan mga tawo, pati na kan mga Kristiyano, an dapit sa kauripnan asin katalingkasan.

² Sa mga surat ni apostol Pablo, dakul kitang mababasa mapadapit sa katalingkasan. Pero an obheto kan saiyang ministeryo bako man para sa repormasyon, na iyo an gustong makamtan kan mga tawo kan panahon na iyan. Imbes na magsarig sa mga tagapamahalang tawo o sa mga organisasyon para magtao nin katalingkasan, nagmaigot si Pablo asin an mga kapwa niya Kristiyano na tabangan an mga tawo na maaraman an maugmang bareta kan Kahadian nin Diyos asin an daing kaagid na halaga kan atang na pantubos ni Cristo Jesus. Giniyahan ni Pablo an mga kapagtubod niya pasiring sa Gikanan nin tunay na katalingkasan. Halimbawa, sa ikaduwa niyang surat sa mga Kristiyano sa Corinto, malinaw niyang sinabi: “Si Jehova an Espiritu, asin kun sain yaon an espiritu ni Jehova, yaon an katalingkasan.”—2 Cor. 3:17.

3, 4. (a) Sa anong pangyayari konektado an sinabi ni Pablo sa 2 Corinto 3:17? (b) Ano an dapat niyatong gibuhon tanganing magkaigwa kan katalingkasan na hali ki Jehova?

³ Sa nainot na parte kan surat na ini sa mga Kristiyano sa Corinto, sinambit ni Pablo an mapadapit sa kamurawayan ni Moises pagbaba kaini sa Bukid nin Sinai pagkatapos na maeksperyensiyahan an presensiya kan anghel ni Jehova. Pakahiling ki Moises, natakot an mga tawo, kaya linagan ni Moises nin tahob an lalawgon niya. (Ex. 34:29, 30, 33; 2 Cor. 3:7, 13) “Alagad,” an sabi ni Pablo, “pag an saro magbakli tanganing sumamba ki Jehova, an tahob na iyan nahahali.” (2 Cor. 3:16) Ano an buot sabihon ni Pablo?

⁴ Arog kan pinag-ulayan ta sa sinundan na artikulo, si Jehova, na Kaglalang kan gabos na bagay, an solamenteng Persona na igwa nin lubos asin mayong limitasyon na katalingkasan. Kaya base diyan, kun sain yaon an presensiya ni Jehova asin “kun sain yaon an espiritu ni Jehova,” yaon an katalingkasan. Pero tanganing magkaigwa nin katalingkasan asin makinabang diyan, dapat kitang “magbakli tanganing sumamba ki Jehova,” o magkaigwa nin dayupot na relasyon sa saiya. Dai hiniling sa espirituwal na paagi kan mga Israelita sa kaawagan an mga pagtratar sa sainda ni Jehova. An puso saka isip ninda garo man sana may tahob asin matagas; nakapokus sana iyan sa kun paano gagamiton sa pisikal o makalaman na paagi an nakamtan pa sana nindang katalingkasan huli kan pagpatalingkas sa sainda hali sa Ehipto.—Heb. 3:8-10.

 5. (a) Anong klaseng katalingkasan an itinatao kan espiritu ni Jehova? (b) Taano ta masasabi niyatong dai man naiinaan kan pagkapreso o pisikal na pagkauripon an katalingkasan na itinatao ni Jehova? (c) Anong mga hapot an kaipuhan niyatong masimbag?

⁵ Pero an katalingkasan na itinatao kan espiritu ni Jehova labi pa sa pagigin talingkas sa pisikal na pagkauripon. Dawa anong pagmamaigot kan mga tawo, dai ninda maitatao an katalingkasan na naitatao kan espiritu ni Jehova—an katalingkasan sa pagkauripon sa kasalan asin kagadanan pati sa pagkauripon sa palsong relihiyon asin sa mga gibo kaiyan. (Roma 6:23; 8:2) Pambihirang katalingkasan nanggad iyan! Puwedeng makinabang sa katalingkasan na iyan an saro dawa pa siya nakapreso o uripon. (Gen. 39:20-23) Iyan nanggad an naeksperyensiyahan ni Sister Nancy Yuen asin ni Brother Harold King, na parehong nagtagal nin dakul na taon na pagkapreso huli sa saindang pagtubod. Mahihiling asin madadangog mo sindang nag-iistorya kan mga eksperyensiya ninda sa JW Broadcasting. (Hilingon sa MGA INTERBYU AT KARANASAN > PAGBABATA NG PAGSUBOK.) Alagad, kaipuhan niyatong pag-isipan an minasunod na hapot: Paano ta maipapahiling na pinapahalagahan tang marhay an satong katalingkasan? Asin paano niyato magagamit sa madunong na paagi an katalingkasan na ini?

 6. Paano ipinahiling kan mga Israelita na dai ninda pinahalagahan an katalingkasan na itinao ni Jehova sa sainda?

⁶ Pag naaraman ta na an halaga nin sarong mamahalon na regalo, napapahiro kitang ipahiling an satong pasasalamat sa nagtao kaiyan. Dai pinahalagahan kan mga Israelita an katalingkasan na itinao sa sainda ni Jehova kan kaldahon niya sinda sa pagkauripon sa Ehipto. Mga pirang bulan sana pagkakalda sa sainda, hinihidaw na ninda an mga kinakakan asin iniinom ninda kaidto sa Ehipto asin nagreklamo dapit sa mga probisyon ni Jehova, saka gusto pa ngani nindang magbalik na sa Ehipto. Isipa na sana, mas ininot ninda an mga ‘sira, pipino, melon, puwero, sibulyas, asin bawang’ kisa sa itinao sa sainda nin Diyos na katalingkasan na sambahon an tunay na Diyos, si Jehova. Kaya, dai na kita mangalas kun taano ta naanggot na marhay si Jehova sa saiyang banwaan. (Bil. 11:5, 6, 10; 14:3, 4) Panalmingan nanggad iyan para sa sato!

 7. Paano naghiro si Pablo kauyon kan sadol niya na nasa 2 Corinto 6:1, asin paano ta siya maaarog?

⁷ Dinagka ni apostol Pablo an gabos na Kristiyano na dai pagbaliwalaon an katalingkasan na mabuot na itinao sa sato ni Jehova paagi sa saiyang Aki, si Jesu-Cristo. (Basahon an 2 Corinto 6:1.) Girumdumon an grabeng kapurisawan asin pagkakonsiyensiya ni Pablo huli sa pakamati niyang uripon siya nin kasalan asin kagadanan. Pero mapagpasalamat niyang sinabi: “Salamat sa Diyos paagi ki Jesu-Cristo na satuyang Kagurangnan!” Taano? Ipinaliwanag niya sa mga kapwa niya Kristiyano: “Huli ta an katugunan kan espiritu na nagtatao nin buhay bilang kasaro ni Cristo Jesus nagpatalingkas sa saindo sa katugunan nin kasalan asin nin kagadanan.” (Roma 7:24, 25; 8:2) Arog ni Pablo, dapat na nungka man niyatong pagbaliwalaon an pagpatalingkas sa sato ni Jehova sa pagkauripon sa kasalan asin kagadanan. Paagi sa pantubos, puwede kitang makapaglingkod sa Diyos na may malinig na konsiyensiya asin magin tunay na maugma sa paggibo kaiyan.—Sal. 40:8.

8, 9. (a) Ano an ipinatanid ni apostol Pedro mapadapit sa paggamit kan satong katalingkasan? (b) Anong mga peligro an napapaatubang sa sato ngunyan?

⁸ Pero apuwera sa pagpahiling nin pasasalamat, dapat na pirmi kitang mag-ingat na nungka tang magamit sa salang paagi an satong mahalagang marhay na katalingkasan na pumili. Nagpatanid si apostol Pedro dapit sa paggamit kan satong katalingkasan bilang sarahutan sa pagpanigo kan satong makalaman na mga pagmawot. (Basahon an 1 Pedro 2:16.) Bako daw na ipinapagirumdom sa saimo kan patanid na iyan an nangyari sa mga Israelita sa kaawagan? Yaon pa man giraray ngunyan an peligro, asin tibaad mas grabe pa ngani. Mas lalong ginigibong kaakit-akit ni Satanas asin kan saiyang kinaban an mga pagpipilian sa pagbado saka pagpakarhay sa sadiri, kakanon saka inumon, paglilibang, asin dakul pang ibang bagay. Parating itinatampok sa mapandayang mga advertisement an mga guwapo asin magagayon na tawo tanganing paluwason na kaipuhan niyato an mga bagay na dai ta man talaga kaipuhan. An tusong mga taktikang ini puwedeng madali sanang makabiktima sa sato asin magamit ta sa salang paagi an satong katalingkasan!

⁹ Aplikado man an sadol ni Pedro sa mas mahalagang mga aspekto nin buhay, arog kan pagpili nin edukasyon, trabaho, o karera. Halimbawa, grabe an pang-eengganyar ngunyan sa nag-eeskuwelang mga hoben na makalaog sa prestihiyosong mga eskuwelahan tanganing kumua nin halangkaw na edukasyon. Pinapaniwala sinda na kun nagtapos sinda sa halangkaw na kurso, makakakua sinda nin marahay na trabahong may halangkaw na suweldo, saka parating ipinapahiling sa mga estadistika na mas halangkaw nanggad an ginaganar kan mga naggradwar sa mga eskuwelahan na iyan kumpara sa mga nakatapos lang nin pundamental na edukasyon. An mga desisyon na gigibuhon ninda magkakaigwa nin dakulang epekto sa bilog nindang buhay kaya tibaad maakit na marhay kan gabos na alok na ini an mga hoben. Ano an dapat nindang isaisip asin kan saindang mga magurang?

10. Ano an dapat niyatong tandaan kun dapit sa paggamit kan satong katalingkasan na gumibo nin personal na mga desisyon?

¹⁰ Tibaad iniisip nin iba na huling personal na mga desisyon iyan, dapat na libre sindang pumili kan gusto ninda sagkod na itinutugot iyan kan saindang konsiyensiya. Posibleng nasa isip ninda an sinabi ni Pablo sa mga Kristiyano sa Corinto mapadapit sa kakanon: “Libre akong gibuhon an mga bagay na gusto ko, ano man ta papabayaan kong makuwestiyon iyan kan konsiyensiya nin ibang tawo?” (1 Cor. 10:29) Totoo na may katalingkasan kitang gumibo nin personal na desisyon pag-abot sa satong edukasyon asin karera, pero kaipuhan tang tandaan na relatibo an satong katalingkasan asin na may epekto an gabos na desisyon niyato. Iyan an dahilan kaya inot ngunang sinabi ni Pablo: “An gabos na bagay libreng gibuhon, pero bako gabos na bagay kapaki-pakinabang. An gabos na bagay libreng gibuhon, pero bako gabos na bagay nakakapakusog.” (1 Cor. 10:23) Nakakatabang nanggad ini sa sato na marealisar na pag-abot sa paggamit kan satong katalingkasan sa paggibo nin personal na desisyon sa gabos na aspekto kan satong buhay, may mas mahalagang marhay na mga bagay na dapat ikonsiderar kisa sa mga kagustuhan ta.

11. Ano an katuyuhan kaya pinatalingkas kita?

¹¹ Sa patanid ni Pedro mapadapit sa salang paggamit kan katalingkasan, sinambit man niya an katuyuhan kaiyan. Dinagka niya kita na gamiton an satong katalingkasan “bilang mga uripon nin Diyos.” Kaya, an talagang katuyuhan kan pagpatalingkas sa sato ni Jehova, paagi ki Jesus, sa katugunan nin kasalan asin nin kagadanan iyo na makapaglingkod kita “bilang mga uripon nin Diyos” sa bilog niyatong buhay.

12. Anong halimbawa an itinao sa sato ni Noe asin kan saiyang pamilya?

¹² An pinakaepektibong paagi tanganing malikayan na magamit sa salang paagi an satong katalingkasan asin dai magin uripon giraray kan kinabanon na mga ambisyon asin pagmawot iyo na lubos kitang makikabtang sa espirituwal na mga aktibidad. (Gal. 5:16) Pag-isipan bilang halimbawa an patriyarkang si Noe asin an saiyang pamilya. Nabuhay sinda sa madahas asin imoral na kinaban. Pero, dai ninda tinugutan na maulang sinda kan mga pagmawot asin gibo-gibo kan mga tawo sa palibot ninda. Paano ninda nagibo iyan? Pinili nindang magin sibot sa gabos na asignasyon na itinao sa sainda ni Jehova—paggibo kan arka, pagtipon nin kakanon para sa sainda asin para sa mga hayop, saka pagpatanid sa mga tawo. “Ginibo ni Noe an gabos na ipinagbuot sa saiya nin Diyos. Iyan nanggad an saiyang ginibo.” (Gen. 6:22, NW) Ano an resulta? Nakaligtas si Noe asin an saiyang pamilya kan laglagon an kinaban na iyan.—Heb. 11:7.

13. Anong sugo an itinao ki Jesus na iyo man an itinao niya sa saiyang mga parasunod?

¹³ Ano an ipinapagibo sa sato ni Jehova ngunyan? Bilang mga disipulo ni Jesus, pamilyar kitang marhay sa sugo na itinao sa sato nin Diyos. (Basahon an Lucas 4:18, 19.) An mayoriya kan mga tawo ngunyan binuta kan diyos kan sistemang ini nin mga bagay asin nasa kauripnan nin relihiyon, komersiyo, asin kan sistema nin sosyedad ngunyan. (2 Cor. 4:4) Pribilehiyo niyato na arugon an halimbawa ni Jesus sa pagtabang sa mga tawo na mamidbid asin sambahon si Jehova, an Diyos nin katalingkasan. (Mat. 28:19, 20) Bakong madali an gibuhon na iyan, asin dakul an kadipisilan. Sa ibang kadagaan, lalong nawawaran nin interes an mga tawo, naaanggot pa ngani an iba. Kaya an hapot na dapat na isaisip kan kada saro, ‘Gagamiton ko daw an sakong katalingkasan tanganing mas makasuportar sa gibuhon na pang-Kahadian?’

14, 15. Anong sabuot manungod sa paghuhulit an mahihiling sa mga lingkod ni Jehova? (Hilingon an ritrato sa kapinunan kan artikulo.)

¹⁴ Nakakapakusog nanggad maaraman na dakul an nakakamati kan pagkaapurado kan panahon niyato kaya pinapasimple ninda an saindang buhay tanganing maglaog sa bilog na panahon na paglilingkod. (1 Cor. 9:19, 23) An iba sa sainda naglilingkod sa sadiri nindang lugar; an iba man nagbabalyo kun sain mas dakula an pangangaipo. Ipinapahiling kan mga rekord na sa nakaaging limang taon, labing 250,000 an nadagdag sa bilang kan mga regular payunir, asin an average na bilang kan mga regular payunir uminabot na sa labing 1,100,000. Marahayon na resulta nanggad iyan nin madunong na paggamit kan katalingkasan tanganing makapaglingkod ki Jehova!—Sal. 110:3.

¹⁵ Ano an nakatabang sa mga tugang na ini na magamit sa madunong na paagi an saindang katalingkasan? Pag-isipan an halimbawa ni John asin Judith, na naglingkod sa nagkapirang nasyon sa nakaaging 30 taon. Inistorya ninda na kan magpuon an Paadalan sa Paglilingkod Bilang Payunir kan 1977, an pokus kaiyan nasa pagigin andam na bumalyo asin maglingkod kun sain mas dakula an pangangaipo. Tanganing mapagdanay an pokus sa pasuhan na ini, sinabi ni John na dakul na beses siyang nagbago nin trabaho tanganing mapagdanay na simple an pamumuhay. Pag-abot nin panahon, kan makabalyo na sinda sa ibang nasyon, nahiling ninda na nakatabang sa sainda an pagpamibi asin pagsarig ki Jehova na makayanan an mga kadipisilan arog kan pag-adal nin bagong lengguwahe, pag-adjust sa bagong kultura, asin pagtagal sa bakong magayon na klima. Ano an epekto sa sainda kan paglilingkod ninda kaidto? “Namatian ko na lubos akong nakikikabtang sa pinakamarahay na gibuhon na naaraman o naeksperyensiyahan ko,” an sabi ni John. “Nagin mas totoo sa sako si Jehova, arog nin sarong mamumuton na ama. Ngunyan mas nasasabutan ko na an kahulugan kan Santiago 4:8: ‘Rumani kamo sa Diyos, asin marani siya sa saindo.’ Aram kong nahiling ko na an hinahanap ko, an nakakakontentong katuyuhan nin buhay.”

16. Paano ginamit kan ribo-ribong tugang sa madunong na paagi an saindang katalingkasan dawa limitado an saindang kamugtakan?

¹⁶ Bakong arog ki John asin Judith, an iba makakapaglingkod lang nin bilog na panahon sa halipot sanang panahon huli sa saindang kamugtakan. Dawa arog kaiyan, inaaprobetsaran kan dakul an oportunidad na magboluntaryo sa mga proyekto nin pagtugdok kan organisasyon sa manlain-lain na parte kan kinaban. Halimbawa, kan itinutugdok an headquarters sa Warwick, New York, mga 27,000 na tugang an nagboluntaryo nin puon sa duwang semana o sagkod sa sarong taon o labi pa. Binayaan nguna kan dakul sa sainda an normal na rutina kan saindang buhay tanganing makapaglingkod duman. Marahayon na halimbawa nanggad sinda kan paggamit kan katalingkasan na itinao nin Diyos tanganing umawon asin tawan nin onra si Jehova, an Diyos nin katalingkasan!

17. Anong magayunon na puturo an naghahalat sa mga tawong ginagamit ngunyan sa madunong na paagi an katalingkasan na itinao nin Diyos?

¹⁷ Nagpapasalamat kita huling namidbid ta si Jehova asin naeeksperyensiyahan ta an katalingkasan na dara kan tunay na pagsamba. Lugod na ipahiling ta sa satong mga desisyon na pinapahalagahan tang marhay an katalingkasan na iyan. Imbes na sayangon iyan o gamiton sa salang paagi, lugod na gamiton ta an satong katalingkasan asin an mga oportunidad na dara kaiyan tanganing makapaglingkod ki Jehova sa pinakalubos na paaging posible. Kun gigibuhon ta iyan, makakalaom kitang maeksperyensiyahan an mga bendisyon na ipinanuga ni Jehova pag nautob na an hulang ini: “An mga linalang mismo mapapatalingkas man sa pagkauripon sa kalapaan asin magkakaigwa man kan mamuraway na katalingkasan bilang mga aki nin Diyos.”—Roma 8:21.