May Edad Nang mga Kristiyano​—Pinapahalagahan na Marhay ni Jehova an Saindong Kaimbudan

SA BILOG na kinaban, pinapahalagahan na marhay kan mga elder an saindang mga pribilehiyo nin paglilingkod sa banwaan nin Diyos. Bendisyon nanggad sinda sa sato gabos! Pero dai pa sana nahahaloy, may ginibong pagbabago. Sinabi sa may edad nang mga elder na ipasa sa mas nguhod o mas hoben sa edad na mga elder an pira nindang magagabat na responsabilidad. Sa anong paagi?

An bagong areglo iyo na pag mag-70 anyos na an mga paraataman nin sirkito asin mga instruktor sa teokratikong mga paadalan, mapundo na sinda sa asignasyon nindang iyan. Ipapasa man kan mga elder na 80 anyos na sa mas nguhod na mga elder an dakul na iba pang asignasyon, arog kan pagigin koordineytor kan Komite kan Sangay o kan pagigin koordineytor kan grupo nin kamagurangan kan kongregasyon. Ano an nagin reaksiyon digdi kan namumutan niyatong may edad nang mga elder? Ipinahiling nanggad ninda na maimbod sinda ki Jehova asin sa saiyang organisasyon!

“Uyon nanggad ako sa desisyon,” an sabi ni Ken, na naglingkod bilang koordineytor nin sarong Komite kan Sangay sa laog nin haros 49 taon. “Sa katunayan, kan mismong agang maaraman ko iyan, namibi ako ki Jehova na lugod makahanap nin sarong mas nguhod na brother na maglilingkod bilang koordineytor.” An reaksiyon ni Ken kapareho kan sa dakul na maimbod na may edad na sa bilog na kinaban. Siyempre sa primero, medyo namundo sinda huling gustong-gusto nindang naglilingkod sa saindang mga tugang.

“Medyo ikinamundo ko iyan,” an sabi ni Esperandio, na dating koordineytor kan grupo nin kamagurangan sa saiyang kongregasyon. Pero inadmitir niya: “Kaipuhan ko nin mas dakul na panahon para maasikaso an nagluluya kong salud.” Arog kan inaasahan ta, padagos na maimbod na naglilingkod si Esperandio ki Jehova asin padagos na nagigin bendisyon sa saiyang kongregasyon.

Kumusta an haloy nang panahon na nagbibiyaheng mga paraataman na nagbalyo sa ibang paagi nin paglilingkod? Inadmitir ni Allan, na naglingkod bilang nagbibiyaheng paraataman sa laog nin 38 taon: “Kan maaraman ko, nabigla talaga ako.” Pero, aram niya an mga pakinabang kan pagsasanay sa mas nguhod na mga lalaki para sa gibuhon, asin padagos siyang maimbod na naglilingkod.

Si Russell, na naglingkod bilang nagbibiyaheng paraataman asin bilang instruktor sa teokratikong mga paadalan sa laog nin 40 taon, nagsabi na sa primero namundo sinda kan agom niya. “Gustong-gusto mi an samong pribilehiyo saka inisip ming kaya mi pa man kutang magpadagos.” Ginagamit ni Russell asin kan saiyang agom an mga pagsasanay sa sainda asin eksperyensiya para tabangan an saindang kongregasyon, kaya ugmahon an mga parahayag na naglilingkod kaiba ninda.

Dawa kun dai mo personal na naeksperyensiyahan an sitwasyon ninda, makakatabang sa saimo an istorya sa 2 Samuel na masabutan an mga nakakaeksperyensiya kaiyan.

Girumdumon kan panahon kan rebelyon ni Absalom na aki ni Hading David. Haling Jerusalem, nagdulag si David pasiring sa Mahanaim, sa sirangan kan Salog nin Jordan. Kan yaon na sinda duman, kinaipuhan ni David asin kan mga kairiba niya nin panginot na mga pangangaipo sa buhay. Ano an sunod na mga nangyari?

May tulong lalaki sa lugar na bukas-palad na nagtao nin mga higdaan, manlain-lain na kakanon, asin mga gamit. Saro sa sainda si Barzilai. (2 Sam. 17:27-29) Kan mapundo na an rebelyon ni Absalom, makakapuli na si David sa Jerusalem, asin ihinatod siya ni Barzilai sa Jordan. Inagda siya ni David na mag-iba sa Jerusalem. Dangan sinabi kan hadi na tatawan niya si Barzilai nin suplay nin kakanon, dawa ngani ‘mayaman na marhay’ si Barzilai asin dai na man niya kuta kaipuhan an kakanon na iinaalok sa saiya. (2 Sam. 19:31-33, An Banal na Biblia) Posibleng marhay na gusto ni David na iiba si Barzilai huli sa marahay na mga kuwalidad asin suhestiyon kaini. Daing duda na marahayon na pribilehiyo kuta an mag-istar asin magtrabaho sa palasyo!

Huling realistiko asin hababa an buot, sinabi ni Barzilai na 80 anyos na siya. Dangan sinabi niya: “Tatao pa daw [akong] magmidbid kan [marahay] asin maraot?” Ano an buot niyang sabihon? Siguradong nagkaigwa siya nin kadunungan huli sa dakul na eksperyensiya niya sa halawig niyang buhay. Asin makakatao pa man siya nin marahay na mga suhestiyon, arog kan ginibo kan “mga gurang” na lalaki para ki Hading Rehoboam pag-abot nin panahon. (1 Ha. 12:6, 7, An Banal na Biblia; Sal. 92:12-14; Tal. 16:31) Kaya an sinabi ni Barzilai dapit sa pagmidbid sa kun ano an marahay asin maraot posibleng nanunungod sa mga epekto sa saiyang hawak kan paggurang o sa mga limitasyon na dara kaiyan. Inadmitir niya na naapektaran na kan paggurang an saiyang pagnamit asin pagdangog. (Par. 12:4, 5) Kaya si Barzilai na mismo an nagsabi ki David na iiba an mas nguhod na lalaking si Kimham, na posibleng marhay na aki ni Barzilai.—2 Sam. 19:35-40, An Banal na Biblia.

Sinayumahan ni Barzilai an pribilehiyo huli sa edad niya, asin ipinapahiling kaini na realistiko siya. An pagbabago na sinambit sa inutan ginibo sa kaagid na dahilan. Kaya masasabutan niyato na sa satong panahon bako sana an mga kamugtakan asin kakayahan nin sarong indibidwal an dapat na isaisip, arog sa sitwasyon ni Barzilai. Kaipuhan man na realistikong pag-isipan kun ano an pinakamarahay para sa maimbod na mga elder na naglilingkod sa manlain-lain na parte kan kinaban.

Narerealisar tulos kan mapakumbabang may edad nang mga Kristiyanong lalaking ini na makakakontribwir sa pag-uswag kan organisasyon ni Jehova kun mas nguhod na mga brother na an magsaabaga kan mga responsabilidad na haloy na nindang kinaputan. Sa kadaklan na kaso, an may edad nang mga brother an nagsanay sa mas hoben na mga brother, kun paanong posibleng marhay na sinanay ni Barzilai an saiyang aki asin ni apostol Pablo si Timoteo. (1 Cor. 4:17; Fil. 2:20-22) Pinapatunayan kan mas hoben na mga brother na ini na “mga balaog na tawo” na sinda ngunyan, na makakatabang para “pakusugon an hawak kan Cristo.”—Efe. 4:8-12; ikumparar an Bilang 11:16, 17, 29.

Dakul sa mga lingkod nin Diyos sa bilog na kinaban an nakakapakikabtang na sa bago o sa dakul pang oportunidad sa gibuhon ni Jehova huling ipinasa ninda an pira nindang mga paninimbagan.

“Huli sa bago kong kamugtakan, nagigibo ko nang matabangan an bakong kapagtubod na agom kan mga sister sa samong kongregasyon,” an sabi ni Marco, na naglingkod bilang nagbibiyaheng paraataman sa laog nin 19 taon.

“Kaiba sa bago ming mga pasuhan an matabangan an mga inaktibo asin makapagkondukta nin dakul pang Bible study,” an sabi ni Geraldo na naglingkod bilang nagbibiyaheng paraataman sa laog nin 28 taon. Sinabi niya na sa ngunyan igwa sinda kan agom niya nin 15 tinutukduan sa Bibliya asin dakul na man na inaktibo an nag-aatender sa mga pagtiripon.

Si Allan, na sinambit kasubago, nagsabi: “May oportunidad na kami ngunyan na lubos na makikabtang sa paghuhulit. Gustong-gusto mi an pagpapatotoo sa publiko, sa mga lugar nin negosyo, asin sa samong mga pagtaraid, na an duwa nakaatender na sa Kingdom Hall.”

Kun ika sarong may kakayahan asin maimbod na brother asin tinawan ka nin bagong asignasyon sa banwaan nin Diyos, may saro pang espesyal na paagi na puwede kang makakontribwir. Puwede mong suportaran an gibuhon ni Jehova paagi sa paghiras kan saimong mahalagang marhay na eksperyensiya sa mas hoben na mga brother sa kongregasyon. “Sinasanay asin ginagamit ni Jehova an marahayon asin may abilidad na mga mas hoben,” an sabi ni Russell, na sinambit kasubago. “Talagang nakikinabang an mga tugang sa saindang entusiyasmo asin kaigutan sa pagtutukdo asin pagpastor!”—Hilingon an kahon na “Tabangan an Mas Hoben na mga Lalaki na Mailuwas an Bilog Nindang Potensiyal.”

Kun kakalaog mo pa lang sa ibang paagi nin paglilingkod, magdanay na positibo. Napahiro mo na an puso nin kadakul na tawo huli sa saimong udok sa pusong paglilingkod, asin puwede mo iyan padagos na magibo. Namumutan ka asin siguradong padagos na mamumutan.

An mas mahalaga, an mga ginibo mo permanenteng nakatatak sa puso ni Jehova. Dai niya ‘malilingawan an saimong ginibo asin an pagkamuot mo para sa saiyang ngaran, na ipinahiling mo paagi sa paglilingkod sa mga banal asin padagos pang paglilingkod sa sainda.’ (Heb. 6:10) Sinisigurado sa sato gabos kan ipinasabong na tekstong iyan na an saiyang panuga dai lang nakadepende sa mga naginibuhan niyato. Harayong mangyari na lingawan ka ni Jehova huling mahalagang marhay ka sa saiya dahil sa mga ginibo mo asin padagos na mga paghihinguwa na mapaugma siya!

Paano kun bako kang kabilang sa mga nagbago an asignasyon arog kan sinambit sa itaas? Puwede pa man giraray ining magkaigwa nin direktang epekto sa saimo. Paano?

Kun may kakongregasyon o kabisto kang sarong maimbod na mas may edad na brother na nagbago an asignasyon, puwede kang makinabang sa saiyang pagkamaygurang asin dakul na eksperyensiya. Maghagad sa saiya nin sadol asin suhestiyon. Asin obserbaran kun paano niya maimbod na ginagamit an saiyang eksperyensiya sa asignasyon niya ngunyan.

Ika man sarong may edad nang naglilingkod sa bagong asignasyon o sarong brother o sister na puwedeng makinabang sa kadunungan kan mga may edad nang ini, tandaan na pinapahalagahan na marhay ni Jehova an kaimbudan kan mga haloy nang naglilingkod sa saiya asin kan mga padagos na naggigibo kaiyan.