Si Juan Bautista—Sarong Leksiyon Dapit sa Pagpadanay nin Kagaya-gayahan

GUSTONG-GUSTO mo daw an sarong pribilehiyo sa kongregasyon na dai puwede sa saimo ngunyan? Tibaad an pribilehiyong iyan yaon sa iba. O tibaad saimo dati an asignasyon o pribilehiyong iyan. Alagad huli sa edad, maluyang salud, kasakitan sa pagbuhay, o responsabilidad sa pamilya, limitado na an kaya mong gibuhon ngunyan. O tibaad huli sa mga pagbabago sa organisasyon kinaipuhan mong butasan an sarong paninimbagan na haloy nang nasa saimo. Ano man an dahilan, tibaad mamatian mong dai mo nagigibo an gabos na gusto mong gibuhon sa paglilingkod sa Diyos. Sa arog kaiyan na mga sitwasyon, natural sana na tibaad madisganar ka kun minsan. Dawa siring, paano mo malilikayan an negatibong mga sabuot arog baga kan pagkadisganar, pagkaanggot, o paghinanakit? Paano mo mapagdadanay an saimong kagaya-gayahan?

May manunudan kitang leksiyon dapit sa pagpadanay nin kagaya-gayahan sa halimbawa ni Juan Bautista. Nagkaigwa nin marahayon na mga pribilehiyo si Juan, pero posibleng marhay na iba sa inaasahan niya an nangyari sa buhay niya sa paglilingkod ki Jehova. Tibaad dai niya lamang naisip na an panahon na mapepreso siya mas halawig kisa sa panahon kan pagmiministeryo niya. Sa ibong kaiyan, padagos na nagin magaya-gaya si Juan, asin napagdanay niya an sabuot na iyan sa bilog niyang buhay. Ano an nakatabang sa saiya? Asin paano niyato mapagdadanay an satong kagaya-gayahan dawa mapaatubang kita sa mga pagkadisganar?

Kan tigsuli nin 29 C.E., pinunan ni Juan an saiyang asignasyon na iandam an mga tawo sa pagdatong kan Mesiyas, na sinasabi: “Magsurulsol kamo, huli ta an Kahadian kan kalangitan harani na.” (Mat. 3:2; Luc. 1:12-17) Dakul an naghimati. Sa katunayan, dakul na tawo hali sa hararayong lugar an nagbaklay tanganing magdangog sa saiyang mensahe, asin dakul an napahirong magsulsol asin magpabawtismo. Kusog-buot man na pinatanidan ni Juan an mga nagpapakangmatanos na mga lider nin relihiyon dapit sa magigin hatol sa sainda kun dai sinda mabago. (Mat. 3:5-12) Ginibo ni Juan an pinakamahalagang parte kan saiyang ministeryo kan bawtismuhan niya si Jesus kan tigrakdag nin 29 C.E. Puon kaiyan, sinabi ni Juan sa mga tawo na magsunod ki Jesus, an ipinanugang Mesiyas.—Juan 1:32-37.

Dapit sa daing kaagid na papel ni Juan, sinabi ni Jesus: “Sa mga ipinangaki nin mga babayi, dai pa nin siisay man na nakakalabi ki Juan Bautista.” (Mat. 11:11) Siguradong naggaya-gaya si Juan sa mga inako niyang bendisyon. Arog ni Juan, dakul ngunyan an nag-ako nin marahayon na mga bendisyon. Hilingon an halimbawa nin sarong brother na si Terry. Siya asin an agom niyang si Sandra labing 50 taon na sa bilog na panahon na paglilingkod. Sinabi ni Terry: “Nagkaigwa ako nin dakul na marahayon na pribilehiyo. Naglingkod ako bilang payunir, Bethelite, espesyal payunir, paraataman nin sirkito, paraataman nin distrito, asin ngunyan espesyal payunir giraray ako.” Maugma kita pag tinatawan nin teokratikong mga pribilehiyo, pero arog kan manunudan ta sa halimbawa ni Juan, kaipuhan nin paghihinguwa tanganing mapagdanay niyato an satong kagaya-gayahan pag nagbago an satong kamugtakan.

Napagdanay ni Juan Bautista an saiyang kagaya-gayahan huling padagos siyang nagin mapagpasalamat sa asignasyon na itinao sa saiya. Isipa an sarong halimbawa. Pagkatapos mabawtismuhan si Jesus, nagpuon na mabawasan an mga parasunod ni Juan mantang an ki Jesus nagpuon na magdakul. Nahadit an mga disipulo ni Juan huli kaiyan asin sinabi ninda saiya: “Nagbabawtismo siya, asin gabos nagduduman sa saiya.” (Juan 3:26) Nagsimbag si Juan: “An nobya para sa nobyo. Alagad an amigo kan nobyo, pag nagtindog siya asin nadangog niya an nobyo, dakulaon an saiyang kaugmahan dahil sa boses kan nobyo. Kaya an sakuyang kaugmahan nagin lubos na.” (Juan 3:29) Si Juan dai nakikumpetensiya ki Jesus; dai man inisip ni Juan na nabawasan an halaga kan saiyang pribilehiyo huli sa mas dakulang papel ni Jesus. Imbes, nagdanay na magaya-gaya si Juan huling ipinagpapasalamat niyang marhay an saiyang papel bilang “amigo kan nobyo.”

Nakatabang ki Juan an saiyang sabuot tanganing magdanay na kontento dawa dai nagin madali an saiyang asignasyon. Halimbawa, Nazareo si Juan puon kan mamundag siya, kaya bawal saiyang mag-inom nin arak. (Luc. 1:15) “Nag-abot si Juan na dai nagkakakan asin dai nag-iinom,” an sabi ni Jesus, na pinapanungdan an simpleng pamumuhay ni Juan. Sa ibong na lado, mayo nin siring na restriksiyon si Jesus asin an saiyang mga disipulo asin puwede sindang mamuhay nin, sabi ngani, mas normal na buhay. (Mat. 11:18, 19) Dugang pa, dai naggibo nin ano man na milagro si Juan, pero aram niya na tinawan nin kapangyarihan na gumibo nin milagro an mga disipulo ni Jesus, kaiba na diyan an dating mga parasunod niya. (Mat. 10:1; Juan 10:41) Imbes na magpadisturbo sa mga pagkakalain na iyan, maigot na nagpadagos si Juan sa asignasyon na itinao sa saiya ni Jehova.

Kun papahalagahan ta man na marhay an satong asignasyon ngunyan sa paglilingkod ki Jehova, mapagdadanay niyato an satong kagaya-gayahan. Si Terry na nasambitan kasubago, nagsabi, “Nagpokus ako sa lambang asignasyon na itinao sa sako.” Mantang ginigirumdom niya an saiyang buhay sa bilog na panahon na paglilingkod, sinabi niya, “Mayo ako nin ano man na pinagbabasulan. Marahayon an nagin mga eksperyensiya ko.”

Urog kitang magigin magaya-gaya sa paglilingkod sa Diyos paagi sa paghurop-hurop sa kun ano talaga an nagtatao nin halaga sa satong teokratikong asignasyon, o responsabilidad. Iyan an pribilehiyo na magin “mga kapwa trabahador nin Diyos.” (1 Cor. 3:9) Kun paanong an pagpakintab sa sarong iniingatan na marhay na pamana makakatabang na mapagdanay an kintab kaiyan, an paghurop-hurop sa dakulaon na onra na paglingkudan an Diyos makakatabang sa sato na malikayan na mabawasan an satong kagaya-gayahan huli sa salang mga pananaw. Malilikayan man niyatong ikumparar an satong mga pagsasakripisyo sa mga pagsasakripisyo kan iba. Dai mababawasan an pagpapahalaga niyato sa satong mga pribilehiyo huli sa mga pribilehiyong inaako kan iba.—Gal. 6:4.

Posibleng aram ni Juan na dai maghahaloy an saiyang ministeryo, pero tibaad dai niya inaasahan na bigla na sanang matatapos iyan. (Juan 3:30) Kan 30 C.E., mga anom na bulan pagkabawtismo ki Jesus, iprineso si Juan ni Hading Herodes. Pero, padagos na nagpatotoo si Juan sa abot kan saiyang makakaya. (Mar. 6:17-20) Ano an nakatabang sa saiya na magdanay na magaya-gaya sa ibong nin mga pagbabagong ini? Padagos siyang nagpokus sa espirituwal na mga bagay.

Mantang nakapreso si Juan, nababaretaan niya an dapit sa naghihiwas na ministeryo ni Jesus. (Mat. 11:2; Luc. 7:18) Kumbinsido si Juan na si Jesus an Mesiyas pero posibleng inisip-isip niya kun paano uutubon ni Jesus an gabos na sinabi kan Kasuratan na gigibuhon kan Mesiyas. Huling itatao sa Mesiyas an pagkahadi, madali na daw kayang mamahala si Jesus? Dahil daw kaiyan makakalibre na sa presuhan si Juan? Huling gusto niyang mas malinaw na masabutan an papel ni Jesus, sinugo ni Juan an duwa sa saiyang mga disipulo tanganing ihapot ki Jesus: “Ika an Saro na maabot, o may hahalaton kaming iba?” (Luc. 7:19) Kan magbalik sinda, siguradong nagdangog na marhay si Juan mantang isinasaysay ninda sa saiya na naggibo si Jesus nin milagrosong mga pagpaumay asin sinabihan sinda na sabihon ki Juan: “An mga buta nakakahiling na, an mga pilay nagraralakaw, an mga may leproso nagigin malinig, an mga bungog nakakadangog, an mga gadan ibinabangon, asin an mga dukha pinapahayagan kan maugmang bareta.”—Luc. 7:20-22.

Siguradong napakusog si Juan kan saindang ibinareta. Nakumpirmar niya na inuutob ni Jesus an mga propesiya dapit sa Mesiyas. Dawa an pag-abot ni Jesus dai magigin dahilan na makalibre si Juan sa presuhan, aram ni Juan na dai nasayang an ginibo niyang paglilingkod. Sa ibong kan saiyang kamugtakan, may dahilan siyang magin maugma.

Arog ni Juan, kun mapokus kita sa espirituwal na mga bagay, makakatagal kita na may kaugmahan asin pakatios. (Col. 1:9-11) Magigibo niyato iyan paagi sa pagbasa nin Bibliya asin paghurop-hurop diyan, na makakatabang sa sato na pirming isaisip na an paglilingkod ta sa Diyos bako nanggad sayang. (1 Cor. 15:58) Sinabi ni Sandra: “An pagbasa nin sarong kapitulo sa Bibliya aroaldaw nakatabang sa sako na mas maparani ki Jehova. Nakakatabang iyan sako na magpokus sa saiya asin bako sa sadiri ko.” Puwede man kitang magpokus sa mga report dapit sa mga aktibidad kan Kahadian, na makakatabang sa sato na bako sanang sadiri an pagparaisipon asin magpokus sa mga ginigibo ni Jehova. “An mga programa sa JW Broadcasting^® kada bulan nakakatabang sa samo na urog na maparani sa organisasyon,” an sabi ni Sandra, “asin natatabangan kami kaiyan na mapagdanay an kagaya-gayahan mi sa samong asignasyon.”

Sa halipot na panahon nin ministeryo ni Juan Bautista, naghulit siya na may “espiritu asin kapangyarihan ni Elias,” asin arog ni Elias, siya “tawo man na an mga pagmati kapareho niyato.” (Luc. 1:17; Sant. 5:17) Kun aarugon niyato an saiyang pagigin mapagpasalamat asin pagpokus sa espirituwal na mga bagay, mapagdadanay man niyato an satong kagaya-gayahan sa paglilingkod ki Jehova, ano man an mangyari.