Magin Bilog na Kalag!

¹ Kadakol kitang dahelan na magpasalamat ki Jehova. Kabale digdi an mga bagay na ginibo nia kan nakaagi, ginigibo ngonyan mismo, asin gigibohon pa para sa sato sa ngapit. Maninigong pahiroon kita kan satong pasasalamat na gumibo nin ano? Minasimbag si David: “Oomawon ko si Jehova sa gabos na panahon; an pag-omaw sa saiya perming yaon sa sakong ngoso.”​—Sal. 34:1.

² Kan magdusay kita ki Jehova, pinaindahan niato an satong sadiri asin pinasan an satong hariging pasakitan bilang mga disipulo ni Jesus. (Mat. 16:24) Ano an boot sabihon kaiyan? An saro na nagpainda sa saiyang sadiri ginigibo an pag-otob sa kabotan nin Dios na pinakaimportanteng aktibidad sa buhay. Kabotan ni Jehova na an saiyang ngaran maninigong ipamidbid sa bilog na daga.​—Sal. 83:18.

³ Malinaw na ipinaheheling kan Biblia na pinagbobotan kitang maghulit. Ini gibohon na ginigibo niato nin “bilog na kalag na siring baga kun para ki Jehova.” (Col. 3:23) Gurano kadakol kan gigibohon niato sa ministeryo kun talagang bilog na puso kita? Kun pinaghohorophorop niato an pagkamoot ni Jehova para sa sato, siertong pinahihiro kita kan satong puso na magkaigwa nin lubos na pakikikabtang sa pagsabi sa iba dapit sa saiya asin sa saiyang mga katuyohan!

⁴ An saro na bilog na puso boot na papagdanayon na nakasentro an saiyang atension sa banal na paglilingkod. Ipinahayag kan salmista: “Makapito sa laog kan aldaw inomaw taka.” (Sal. 119:164) An mga may kaparehong saboot kan sa salmista nag-aaprobetsar kan gabos na oportunidad na omawon si Jehova.

⁵ Napalilibotan Kita nin mga Oportunidad na Omawon si Jehova: Dai na kita dapat pang maghalat sagkod na makikabtang kita sa pagharongharong tangani na makapaghulit kan maogmang bareta. An satong mga katrabaho, kaeskuela, paryente, asin kamidbid gabos nangangaipong makadangog kan mensahe nin Kahadean. Kun nagbibiahe, puede kitang pumoon nin pakipag-olay sa mga kapwa pasahero, nagtatrabaho sa restawran, katabang sa gasolinahan, o drayber nin taksi. Mantang nasa harong, puede kitang magpatotoo sa mga kataed o naghahatod. Kun kita nasa ospital, igwa nin mga nars, doktor, asin iba pang pasyente na mahuhulitan niato sa impormal na paagi.

⁶ Nagbubunga an Impormal na Pagpatotoo: Duwang Saksi an naglalakaw sa sarong parke sarong aldaw asin nagpoon na makipag-olay sa sarong hoben pang lalaki na naglalakawlakaw kaiba kan saiyang aki. Pag-abot nin panahon, sia asin an saiyang agom inako an katotoohan. An hoben pang lalaki sa huri nagpahayag na kadikit sanang oras bago nia nanompongan sa kaenot-enote an duwang Saksi, namibi sia sa Dios, na naghahagad, ‘Kun nag-eeksister ka, tabi paarama sa sako.’ Ibinibilang nia an pagkatuparan sa parke na simbag ni Jehova sa saiyang pamibi.

⁷ Idtong mga bilog na puso nakaeeksperyensia nin pinakadakulang kagayagayahan. Aram ninda na an paglilingkod na “bilog na puso” nagpapaogma ki Jehova.​—1 Cron. 28:9.