Hapot

◼ Ano an maninigo niatong girumdomon kun naggagamit nin mga cellular telephone asin electronic pager?

An siring na mga kasangkapan pinapangyayari kitang makontak an iba sa haros arin man na lugar na madumanan niato. Minsan ngani tibaad kapakipakinabang ini, dapat kitang mag-ingat na dai pagtogotan an paggamit nin mga cell phone asin pager sa bakong tamang mga oras na makadidisturbo sa satong ministeryo o Kristianong mga pagtiripon. Paano daw ini puedeng mangyari?

Isip-isipa an magigin epekto kun tumanog an satong cell phone o an satong pager mientras na kita nakikikabtang sa ministeryo sa langtad na nagpapatotoo. Ano daw an iisipon kan kagharong? Anong impresyon an tibaad ikatao niato kun pumondo kita tangani na simbagon an apod? Tunay nanggad na habo niatong gumibo nin ano man na makaoolang sa iba sa paghinanyog sa mensahe kan Kahadean. (2 Cor. 6:3) Huli kaini, kun may dara kitang cell phone o pager, maninigo niatong iprograma iyan tangani na dai iyan makaabala sa sato o sa iba mientras na kita nakikikabtang sa ministeryo sa langtad.

Kumusta man kun kita naghahalat mientras na an iba nagpapatotoo? Kun nagtagama kita nin panahon para sa paglilingkod sa langtad, bako daw na maninigo niatong ituruhok an satong isip sa aktibidad na iyan? Bilang paggalang sa satong sagradong paglilingkod, asikasohon tabi an dai kaipuhan na personal o sosyal na mga bagay-bagay sa ibang panahon. (Roma 12:7) Siempre, dai kaiba digdi an paggamit nin telepono tangani na magtao nin dugang pang patotoo o makipag-olay na maapod kamo tangani na magpatotoo pa.

Nangorogna na dapat kitang mag-ingat sa paggamit nin mga cell phone mantang nagmamaneho, huling ipinaheheling nin nagkapirang pagsiyasat na an paggibo kaiyan nakadadagdag na marhay sa peligro na maaksidente. Maninigo na estrikto niatong kuyogon an ano man na mga ley na nagbabawal sa paggamit nin mga cell phone mantang nagmamaneho.

Nagduduman kita sa Kristianong mga pagtiripon, asamblea, asin kombension tangani na sambahon si Jehova asin tokdoan nia. Bako daw na an pag-apresyar sa pagigin sagrado kan mga okasyon na ini maninigo na magpahiro sa sato na iprograma an mga cell phone asin pager tanganing dai iyan makadisturbo sa sato o sa iba? Kun may importanteng bagay na nangangaipo nin tolos-tolos na atension niato, maninigo niatong asikasohon iyan sa luwas kan lugar nin pagtiripon. O kun dai, maninigo niatong iareglo na asikasohon an personal asin sekular na mga bagay sa mga oras na bakong designado para sa pagsamba.​​—1 Cor. 10:24.

Logod na an paagi nin paggamit niato nin mga cellular phone o ano man na ibang elektronikong kasangkapan pirmeng magpaheling nin konsiderasyon sa iba asin hararom na pag-apresyar sa espirituwal na mga bagay.