Gibuhon na Arugan an mga Propeta—Si Miqueas

1. Anong hapot an tibaad hinurop-hurop ni Miqueas, alagad taano ta bakong sayang an saiyang paghuhulit?

¹ ‘Nuarin maabot an katapusan kan maraot na sistemang ini nin mga bagay?’ An hapot na iyan tibaad hinurop-hurop man ni propeta Miqueas kan ipinapahayag niya an mga mensahe nin paghukom ni Jehova sa mga kahadian nin Israel asin Juda. Alagad, an saiyang paghuhulit bakong sayang. Kan 740 B.C.E., kaidtong nabubuhay pa si Miqueas, nautob an sinabi ni Jehova na mangyayari sa Samaria. (Miq. 1:6, 7) Paghaloy-haloy, nalaglag an Jerusalem kan 607 B.C.E. (Miq. 3:12) Paano niyato maaarog si Miqueas mantang hinahalat ta an pagsagibo kan mga paghukom ni Jehova sa satong panahon?

2. Paano niyato ipapahiling an pagigin mapasensiya mantang hinahalat an aldaw ni Jehova, asin taano ta dapat tang gibuhon iyan?

² Magin Mapasensiya: Si Miqueas nagsurat: “Kun para sa sako, ki Jehova ako padagos na maghahalat. Mapahiling ako nin pagigin mapaghalat sa Diyos nin sakong kaligtasan.” (Miq 7:7, NW) Siyempre, si Miqueas dai sana basta naghalat kan katapusan na mayong ginigibo. Nagdanay siyang sibot bilang propeta ni Jehova. Mantang hinahalat ta an aldaw ni Jehova, dapat man kitang makikabtang sa “banal na mga gawi asin gibo nin diyosnon na debosyon.” (2 Ped. 3:11, 12, NW) An pagigin mapasensiya ni Jehova nagtatao sa mga indibidwal nin panahon na magsulsol. (2 Ped. 3:9) Kun siring, isapuso ta an konseho nin Diyos na arugon an pagigin mapasensiya kan mga propeta.—Sant. 5:10.

3. Taano ta dapat kitang makimahirak ki Jehova na tawan kita kan saiyang banal na espiritu?

³ Manarig sa Kusog ni Jehova: Maski ngani masakit an asignasyon ni Miqueas, naglaom siya sa itataong kusog ni Jehova tanganing magibo iyan. (Miq. 3:8) Kaya sinasadol nanggad kita kan Tataramon ni Jehova na manarig sa Diyos para sa kusog na itatao niya. Bukas-palad niyang itinatao iyan sa mga napapagal para magibo ninda an saindang teokratikong mga paninimbagan. (Sal. 84:5, 7; Isa. 40:28-31) Personal mo na daw na namatian ini sa saimong buhay nin sagradong paglilingkod? Regular ka daw na nakikimahirak ki Jehova na tabangan ka paagi kan saiyang makapangyarihan na banal na espiritu?—Luc. 11:13.

4. Nagtatao nin anong marahayon na halimbawa para sa sato ngunyan an paagi nin pamumuhay ni Miqueas?

⁴ Sa bilog na buhay niya, nagin priyoridad ni Miqueas an paggibo kan kabutan nin Diyos. Determinado siyang magdanay na maimbod sa ibong kan lakop na karatan sa moral. Siring man, nababalo an satong integridad sa aroaldaw. Kaya dapat niyatong pakusugon an satong determinasyon na ‘maglakaw sa ngaran ni Jehova na satuyang Diyos sagkod nuarin pa man.’—Miq. 4:5.