Pagtutukdo Gamit an Brosyur na Maogmang Bareta

1. Paano dinisenyo an brosyur na Maogmang Bareta?

¹ Siring kan tinukar sa An Satong Ministeryo sa Kahadian kan Hulyo, saro sa mahalagang kasangkapan sa satong toolbox sa pagtutukdo an brosyur na Maogmang Bareta Hale sa Dios! Dai kinotar an sitadong mga teksto para makanuod nin direkta sa Bibliya an kagharong. Baga man dakul sa publikasyon ta an isinurat sa paagi na makakanuod an nagbabasa dawa mayong magtukdo saiya, an brosyur na ini dinisenyo para pag-adalan na may matukdo. Kaya pag iinaalok ta iyan, dapat tang ipahiling kun paano iyan pinag-aadalan para mapukaw an interes niya na makanuod kan maugmang bareta sa Bibliya.—Mat. 13:44.

2. Paano ta magagamit an brosyur na Maogmang Bareta sa inot na pakikipag-ulay?

² Sa Inot na Pakikipag-ulay: Puwede mong sabihon: “Nagdigdi ako huli ta an mga tawo nahahadit dapit sa kaaabtan kan kinaban. Sa paghuna nindo, magigin marahay pa daw an mga kamugtakan? [Pasimbagon.] An Bibliya may maugmang bareta na nagtatao sato nin paglaom. Uni an nagkapira sa mga hapot na sinisimbag kan Bibliya.” Itao sa kagharong an brosyur, asin papilion siya nin hapot sa likod kaiyan. Dangan ipahiling kun paano ginigibo an pag-adal sa inot na parapo kan leksiyon. An saro pang paagi iyo na magbangon nin nakakapukaw nin interes na hapot basado sa leksiyon na napili mo dangan ipahiling kun paano siya matatabangan kan brosyur na mahanap an simbag kan Bibliya. Kun an leksiyon na iyan tinutukar sa sarong video sa jw.org, ipini-play iyan kan ibang parahayag sa saindang presentasyon.

3. Ipaliwanag kun paano an pagkondukta nin pag-adal gamit an brosyur na Maogmang Bareta.

³ Kun Paano an Pagkondukta nin Pag-adal: (1) Basahon an may numerong hapot na naka-bold para matabangan an kagharong na magpokus sa panginot na punto. (2) Basahon an kasunod na parapo. (3) Basahon an nakaitalikong mga teksto, asin gumamit nin mataktikang mga hapot para tabangan an kagharong na mahiling kun paano sinisimbag kan mga teksto an hapot. (4) Kun may saro pang parapo sa irarom kan hapot, utruhon an ginibo sa 2 asin 3. Kun may video na nagtutukar kan hapot na iyan asin dai mo pa iyan naipahiling sa kagharong, i-play an video sa saindong pag-adal. (5) Ultimo, aramon an simbag kan kagharong sa may numerong hapot para masiyerto na nasabutan niya iyan.

4. Paano kita magigin mahusay sa paggamit kan mahalagang kasangkapan na ini?

⁴ Magin pamilyar sa mahalagang kasangkapan na ini. Gamiton iyan sa lambang angay na pagkakataon. Bago an kada pag-adal, isipon an tinutukduan sa Bibliya asin an pinakamarahay na paagi na matukduan siya gamit an mga teksto sa leksiyon. (Tal. 15:28; Gui. 17:2, 3) Mantang nagigin eksperyensiyado asin mahusay ka sa paggamit kan brosyur, siguradong saro iyan sa mga kasangkapan na gustong-gusto mong gamiton sa pagtutukdo kan katotoohan sa mga tawo!