Ano an Kahulugan Para Saimo kan Maimbod na Pagkamuot ni Jehova?

 1. Dinadagka kita ni Jehova na gibuhon an ano?

IKINAKAUGMA ni Jehova an maimbod na pagkamuot. (Os. 6:6) May pagkamuot na dinadagka niya an saiyang mga lingkod na ikaugma man iyan. Paagi ki propeta Mikas, sinasadol kita kan satong Diyos na “kamutan an maimbod na pagkamuot.” (Mik. 6:8, nota sa ibaba) Siyempre, bago ta iyan magibo, kaipuhan tang maaraman kun ano an maimbod na pagkamuot.

 2. Ano an maimbod na pagkamuot?

² Ano an maimbod na pagkamuot? An ekspresyon na “maimbod na pagkamuot” naglataw nin mga 230 beses sa Bagong Kinaban na Traduksiyon kan Banal na Kasuratan. Ano an kahulugan kaiyan? Sigun sa “Glosaryo nin mga Termino sa Bibliya” na yaon sa traduksiyon na iyan, nanunungod iyan sa “pagkamuot na pinapahiro nin dedikasyon, integridad, kaimbudan, asin udok na kapadangatan. Parati ining ginagamit may koneksiyon sa pagkamuot nin Diyos para sa mga tawo, pero ipinapahiling man nin mga tawo an pagkamuot na ini sa kapwa ninda tawo.” Si Jehova an pinakamarahay na halimbawa nin maimbod na pagkamuot. Sa artikulong ini, pag-uulayan ta kun paano ipinapahiling ni Jehova sa mga tawo an maimbod na pagkamuot. Sa masunod na artikulo, pag-uulayan ta kun paano niyato, bilang mga lingkod nin Diyos, maaarog si Jehova paagi sa pagpahiling nin maimbod na pagkamuot sa lambang saro.

 3. Paano ihinayag ni Jehova ki Moises an saiyang sadiri?

³ Dai nahaloy pagkahali kan Israel sa Ehipto, ihinayag ni Jehova an saiyang sadiri ki Moises paagi sa pagsabi kan Saiyang pangaran asin mga kuwalidad. Sinabi niya: “Si Jehova, si Jehova, sarong Diyos na mahihirakon asin mapagmalasakit, dai tulos naaanggot asin abunda sa maimbod na pagkamuot saka katotoohan, nagpapahiling nin maimbod na pagkamuot sa rinibo, nagpapatawad nin salang gibo asin paglapas saka kasalan.” (Exo. 34:6, 7) Paagi sa nakakaugmang mga tataramon na ini manungod sa Saiyang mga kuwalidad, ihinayag ni Jehova ki Moises an pambihirang karakteristiko kan Saiyang maimbod na pagkamuot. Ano iyan?

4-5. (a) Paano ilinadawan ni Jehova an saiyang sadiri? (b) Anong mga hapot an pag-uulayan ta?

⁴ Ilinadawan ni Jehova an saiyang sadiri bako sana bilang saro na igwa nin maimbod na pagkamuot kundi saro na “abunda sa maimbod na pagkamuot.” An paglaladawan na iyan nasambit nin anom pang beses sa Bibliya. (Bil. 14:18; Neh. 9:17; Sal. 86:15; 103:8; Joel 2:13; Jon. 4:2) Sa gabos na pagsambit na iyan, nanunungod sana ki Jehova an paglaladawan na iyan, bako sa mga tawo. Bako daw na pambihira nanggad na si Jehova mismo an nagduon kan saiyang kuwalidad na maimbod na pagkamuot? Daing duda na mahalaga sa saiya an maimbod na pagkamuot.b Kaya bakong makangangalas na napahiro si Hading David na magsabi: “O Jehova, abot sagkod sa kalangitan an saimong maimbod na pagkamuot . . . Mahalagang marhay an maimbod na pagkamuot mo, O Diyos! Sa lindong kan mga pakpak mo, nagpapaili an mga aki nin tawo.” (Sal. 36:5, 7) Arog ni David, inaapresyar ta daw na marhay an maimbod na pagkamuot nin Diyos?

⁵ Para mapararom an satong pakasabot manungod sa maimbod na pagkamuot, pag-ulayan ta an duwang hapot: Kiisay ipinapahiling ni Jehova an maimbod na pagkamuot? Asin paano kita makikinabang sa ipinapahiling na maimbod na pagkamuot ni Jehova?

 6. Kiisay ipinapahiling ni Jehova an maimbod na pagkamuot?

⁶ Kiisay ipinapahiling ni Jehova an maimbod na pagkamuot? Sinasabi kan Bibliya na puwede tang mamutan an dakul na bagay, arog kan “agrikultura,” “arak asin lana,” “disiplina,” “kaaraman,” “kadunungan”—asin kadakul pang iba. (2 Cron. 26:10; Tal. 12:1; 21:17; 29:3) Alagad, an maimbod na pagkamuot dai lamang ipinapahiling sa mga bagay o mga ideya; sa mga tawo sana iyan ipinapahiling. Pero dai ipinapahiling ni Jehova sa gabos an maimbod na pagkamuot. Ipinapahiling niya sana iyan sa mga igwa nin espesyal na relasyon sa saiya. An satuyang Diyos maimbod sa mga amigo niya. Igwa siya nin magayunon na katuyuhan para sa sainda, asin dai niya sinda babayaan.

 7. Paano nagpapahiling si Jehova nin pagkamuot sa gabos na tawo?

⁷ Nagpapahiling si Jehova nin pagkamuot sa gabos na tawo. Sinabi ni Jesus sa sarong lalaki na an pangaran Nicodemo: “An Diyos namuot na gayo sa kinaban kaya itinao niya an saiyang bugtong na Aki, tanganing an siisay man na nagtutubod sa saiya dai malaglag kundi magkaigwa nin buhay na daing katapusan.”—Juan 3:1, 16; Mat. 5:44, 45.

8-9. (a) Taano ta nagpapahiling si Jehova nin maimbod na pagkamuot sa mga lingkod niya? (b) Ano an sunod na pag-uulayan ta?

⁸ Arog kan nasambit kasubago, ipinapahiling ni Jehova an saiyang maimbod na pagkamuot solamente duman sa mga igwa kan pag-uyon niya—an mga lingkod niya. Risang-risa ini sa mga tataramon ni Hading David asin ni propeta Daniel. Halimbawa, sinabi ni David: “Padagos mong ipahiling an saimong maimbod na pagkamuot sa mga nakakamidbid sa saimo.” “Para sa bilog na panahon na daing sagkod an maimbod na pagkamuot ni Jehova para duman sa mga may pagkatakot sa saiya.” Asin sinabi ni Daniel: “O Jehova na tunay na Diyos, [na] nagpapahiling nin maimbod na pagkamuot sa mga namumuot sa saiya asin nag-uutob kan saiyang mga tugon.” (Sal. 36:10; 103:17; Dan. 9:4) Sigun sa ipinasabong na mga tataramon na ini, ipinapahiling ni Jehova an saiyang maimbod na pagkamuot sa saiyang mga lingkod huling midbid ninda siya, may pagkatakot sinda sa saiya, namumutan ninda siya, asin inuutob ninda an mga tugon niya. An maimbod na pagkamuot ni Jehova para sana sa saiyang banwaan, an tunay na mga parasamba niya.

⁹ Bago kita nagpuon na maglingkod ki Jehova, nag-ako kita kan pagkamuot na ipinapahiling nin Diyos sa gabos na tawo. (Sal. 104:14) Pero bilang saiyang mga parasamba, nakikinabang man kita sa saiyang maimbod na pagkamuot. Sa katunayan, inaasigurar ni Jehova an mga lingkod niya: “An sakong maimbod na pagkamuot dai hahalion sa saimo.” (Isa. 54:10) Iyo, arog kan naeksperyensiyahan mismo ni David, “espesyal an magigin pagtratar ni Jehova sa saro na maimbod sa saiya.” (Sal. 4:3) Ano an dapat tang gibuhon huli sa espesyal na pagtratar na ini ni Jehova sa sato? Sinabi kan salmista: “Pagmamasdan kan siisay man na madunong an mga bagay na ini asin maingat niyang iisip-isipon an mga ipinapahiling ni Jehova na maimbod na pagkamuot.” (Sal. 107:43) May koneksiyon sa ipinasabong na sadol na iyan, pag-ulayan ta an tulong paagi kun paano nakikinabang an mga lingkod ni Jehova sa pagpahiling niya nin maimbod na pagkamuot.

10. Paano nakakatabang sa sato an nagdadanay na maimbod na pagkamuot nin Diyos? (Salmo 31:7)

¹⁰ An maimbod na pagkamuot nin Diyos nagdadanay. An mahalagang aspektong ini kan maimbod na pagkamuot sinambit nin 26 na beses sa Salmo 136. Sa inot na bersikulo mababasa ta: “Magpasalamat kamo ki Jehova, huling marahay siya; nagdadanay sagkod lamang an maimbod na pagkamuot niya.” (Sal. 136:1) Sa kada bersikulo, puon bersikulo 2 sagkod 26, mababasa ta an mga tataramon na “huling nagdadanay sagkod lamang an maimbod na pagkamuot niya.” Mantang binabasa ta an mga bersikulo kan salmong ini, mapapahanga nanggad kita sa dakul na paagi na ipinapahiling ni Jehova an saiyang maimbod na pagkamuot, asin ipinapahiling niya iyan nin dagos-dagos. An pauruutrong pagsambit kan mga tataramon na “huling nagdadanay sagkod lamang an maimbod na pagkamuot niya” nag-aasigurar sa sato na an pagkamuot nin Diyos para sa saiyang banwaan bakong paburubago. Nakakapakusog nanggad sa buot na maaraman na dai tulos binabayaan ni Jehova an mga lingkod niya! Imbes, nagigin dayupot siya sa mga naglilingkod sa saiya asin nagdadanay siya sa sainda, lalong-lalo na sa mga panahon nin kasakitan. Kun paano kita nakikinabang: Dahil aram ta na si Jehova nagdadanay sa sato, nagtatao iyan sa sato kan kaugmahan asin kan kusog na kaipuhan ta para makayanan an mga kasakitan asin para padagos na makapaglakaw sa dalan pasiring sa buhay.—Basahon an Salmo 31:7.

11. Sigun sa Salmo 86:5, ano an nagpapahiro ki Jehova na magin mapagpatawad?

¹¹ An maimbod na pagkamuot nin Diyos nagpapahiro sa saiya na magin mapagpatawad. Pag nahihiling ni Jehova na an sarong parakasala nagsusulsol asin binabayaan an makasalan na mga gibo kaini, an maimbod na pagkamuot nagpapahiro sa Saiya na magin mapagpatawad. Manungod ki Jehova, an salmistang si David nagsabi: “Dai niya kita pinapadusahan sigun sa mga kasalan ta, ni sinisingil niya kita kan maninigo sa mga pagkakasala ta.” (Sal. 103:8-11) Huli sa mamundong eksperyensiya ni David, aram niya mismo kun gurano kagabat sa pagmati an pagkakonsiyensiya huli sa nagibong kasalan. Pero naaraman niya man na si Jehova “andam na magpatawad.” Ano an nagpapahiro ki Jehova na magin mapagpatawad? An simbag yaon sa Salmo 86:5. (Basahon.) Iyo, arog kan sinabi ni David sa pamibi, si Jehova nagpapatawad huling abunda siya sa maimbod na pagkamuot para sa gabos na nag-aapod sa saiya.

12-13. Kun nakakamati kita nin sobrang pagkakonsiyensiya huli sa nagibong mga pagkakasala, ano an makakatabang sa sato?

¹² Pag nagkasala kita, tama sana—nakakarahay pa ngani—na makamati kita nin grabeng pagbasol. Mapapahiro kita kaiyan na magsulsol asin gumibo nin mga lakdang para itanos an mga pagkakasala ta. Pero may mga lingkod nin Diyos na nakakamati nin sobrang pagkakonsiyensiya huli kan nagibo nindang mga pagkakasala. Iniisip pa man giraray ninda na dai sinda mapapatawad ni Jehova—dawa ngani naghagad na sinda nin kapatawadan asin nagpundo na sinda sa paggibo nin maraot. Kun arog kaiyan an namamatian mo, makakatabang sa saimo an pakaaram na an Diyos andam na magpahiling nin maimbod na pagkamuot sa mga lingkod niya.

¹³ Kun paano kita nakikinabang: Sa ibong kan satong pagkabakong perpekto, maugma kitang makakapaglingkod ki Jehova na may malinig na konsiyensiya. Posible ini huling “linilinig kita kan dugo ni Jesus na saiyang Aki sa gabos na kasalan.” (1 Juan 1:7) Pag pinangluluyahan ka nin buot huli sa saimong kaluyahan, girumdumon na si Jehova andam saka gusto nanggad na patawadon an nagsusulsol na parakasala. Risahon kun paano ikinonektar ni David an maimbod na pagkamuot sa pagpapatawad. Isinurat niya: “Kun paanong an kalangitan mas halangkaw kisa sa daga, arog man kaiyan kadakula an saiyang maimbod na pagkamuot sa mga may pagkatakot sa saiya. Kun gurano kaharayo kan sirangan sa sulnupan, arog man niya kaiyan kaharayong ibinubugtak hali sa sato an satong mga paglapas.” (Sal. 103:11, 12) Iyo, andam si Jehova na “bulaos na magpatawad.”—Isa. 55:7.

14. Paano ilinadawan ni David an pagtaong proteksiyon nin Diyos sa sato paagi sa saiyang maimbod na pagkamuot?

¹⁴ An maimbod na pagkamuot nin Diyos nagtatao nin espirituwal na proteksiyon. Sa pamibi ni David ki Jehova, sinabi niya: “Ika an sakuyang taguan; iingatan mo ako pag nasa kasakitan. Papalibutan mo ako nin maugmang mga kurahaw huli sa pagtao mo sa sako nin kaligtasan. . . . An saro na nagtitiwala ki Jehova napapalibutan kan Saiyang maimbod na pagkamuot.” (Sal. 32:7, 10) Kun paanong an mga pader na nakapalibot sa sarong suanoy na siyudad nagtataong proteksiyon sa mga nakaistar diyan, an mga pagpahiling ni Jehova nin maimbod na pagkamuot garo man mga pader na nakapalibot sa sato, na nagtatao nin espirituwal na proteksiyon sa mga peligro na puwedeng makabalo kan integridad ta. Apuwera kaiyan, an maimbod na pagkamuot ni Jehova nagpapahiro sa saiya na irani niya kita sa saiya.—Jer. 31:3.

15. Ano an koneksiyon kan maimbod na pagkamuot ni Jehova sa sarong pailihan asin sa sarong masarig na depensa?

¹⁵ Naggamit si David nin saro pang paglaladawan tanganing ipahiling kun paano pinoproteksiyunan nin Diyos an saiyang banwaan. Sinabi niya: “An Diyos iyo an sakong ligtas na pailihan, an Diyos na nagpapahiling nin maimbod na pagkamuot sa sako.” Sinabi pa ni David manungod ki Jehova: “Siya an sakong maimbod na pagkamuot asin an sakong masarig na depensa, an sakong ligtas na pailihan asin an sakong parasalbar, an sakong kalasag asin an Saro na sakong sinisirungan.” (Sal. 59:17; 144:2) Taano ta ikinumparar ni David an maimbod na pagkamuot ni Jehova sa sarong pailihan asin sa sarong masarig na depensa? Sain man kita nakaistar, basta naglilingkod kita ki Jehova, itatao niya sato an gabos na proteksiyon na kaipuhan ta tanganing maingatan an satong mahalagang marhay na relasyon sa saiya. An arog kaiyan na pag-asigurar mababasa man sa Salmo 91. An kagsurat kan salmong iyan nagsabi: “Sasabihon ko ki Jehova: ‘Ika an sakong pailihan asin an sakong masarig na depensa.’” (Sal. 91:1-3, 9, 14) Naggamit man si Moises nin kaparehong paglaladawan manungod sa sarong pailihan. (Sal. 90:1, nota sa ibaba) Saro pa, kan madali nang magadan si Moises, tinawan niya nin atensiyon an sarong nakakarangang pagkukumparar. Isinurat niya: “Puon pa kan suanoy na mga panahon, an Diyos sarong pailihan, inaalalayan ka kan saiyang mga takyag na daing katapusan.” (Deut. 33:27) Ano an sinasabi sato manungod ki Jehova kan mga tataramon na “inaalalayan ka kan saiyang mga takyag na daing katapusan”?

16. Dahil aram ta na pirmi tang maaasahan an suporta nin Diyos, ano an duwang pakinabang kaini? (Salmo 136:23)

¹⁶ Pag si Jehova an satong Pailihan, tiwasay kita. Pero, posibleng may mga aldaw na pinangluluyahan kita nin buot asin nasasakitan na makayanan iyan. Sa mga panahon na iyan, ano an gigibuhon ni Jehova para sa sato? (Basahon an Salmo 136:23.) Paagi kan saiyang mga takyag, luway-luway niya kitang aalsahon, asin tatabangan kitang makatindog giraray. (Sal. 28:9; 94:18) Kun paano kita nakikinabang: Dahil aram ta na pirmi tang maaasahan an suporta nin Diyos, makakatabang iyan sa satuya na isaisip an duwang bagay. Inot, sain man kita nakaistar, aram ta na igwa kita nin ligtas na pailihan. Ikaduwa, an satong mamumuton na ama sa langit nagmamakulog na marhay sa sato.

17. Huli sa maimbod na pagkamuot nin Diyos, sa ano kita makakapagtiwala? (Salmo 33:18-22)

¹⁷ Arog kan napag-ulayan ta, pag napapaatubang kita sa pagbalo, makakasigurado kita na tatabangan kita ni Jehova paagi sa pagtao sato kan suporta na kinakaipuhan ta tanganing mapagdanay an satong integridad. (2 Cor. 4:7-9) Si propeta Jeremias nagsabi: “Huli sa maimbod na pagkamuot ni Jehova kun kaya dai kita nagkagaradan, huling an saiyang mga pagkahirak daing katapusan.” (Lam. 3:22) Iyo, makakapagtiwala kita na an maimbod na pagkamuot ni Jehova magdadanay sa sato huling, arog kan pag-asigurar sa sato kan salmista, “an mata ni Jehova nakabantay sa mga may pagkatakot sa saiya, sa mga naghahalat kan maimbod na pagkamuot niya.”—Basahon an Salmo 33:18-22.

18-19. (a) Ano an gusto tang pirming isaisip? (b) Ano an pag-uulayan ta sa masunod na artikulo?

¹⁸ Ano an gusto tang pirming isaisip? Bago kita kaidto magpuon na maglingkod ki Jehova, inako ta an pagkamuot na ipinapahiling nin Diyos sa gabos na tawo. Pero bilang saiyang mga parasamba, nakikinabang man kita sa saiyang maimbod na pagkamuot. Huli sa pagkamuot na iyan, kinukugos kita ni Jehova kan saiyang mapagprotektar na mga takyag. Pirmi niya kitang papagdanayon na harani sa saiya, asin uutubon niya an saiyang katuyuhan para sa sato. Gusto niyang magin mapanggana kita! (Sal. 46:1, 2, 7) Kaya ano man na pagbalo na mapaatubang sa sato, itatao sato ni Jehova an kusog na kaipuhan ta tanganing mapagdanay an satong integridad.

¹⁹ Naaraman ta kun paano ipinapahiling ni Jehova an saiyang maimbod na pagkamuot sa mga lingkod niya. Kaya, inaasahan niya na mapahiling man kita nin maimbod na pagkamuot sa lambang saro. Paano? Pag-uulayan sa masunod na artikulo an mahalagang temang ini.