Mga Ina—Makanuod sa Halimbawa ni Eunice

1-2. (a) Siisay si Eunice, asin anong kadipisilan an napaatubang saiya bilang ina? (b) Komentuhan an ritrato sa cover.

DAWA ngani mayong sinasabi an Bibliya manungod sa pagbawtismo ki Timoteo, maiimahinar ta an kaugmahan na namatian kan saiyang inang si Eunice kan aldaw na idto. (Tal. 23:25) Isipa na sana siya na proud na nakahiling ki Timoteo mantang nakatindog ini sa tubig na pahabayan. Nakangirit siya mantang si Loida, na lola ni Timoteo, nasa may kataid niya asin nakakapot sa abaga niya. Napahangos sa kaugmahan si Eunice kaidtong ilinubog na sa tubig si Timoteo. Pagbutwa ni Timoteo na nakangirit sa kaugmahan, dai na napugulan ni Eunice na mapaluha. Nagibo ni Eunice na matukduan an saiyang aki na kamutan si Jehova asin an Saiyang Aki na si Jesu-Cristo. Anong mga kadipisilan an kinaipuhan niyang mapangganahan para magibo iyan?

² Nagdakula si Timoteo sa pamilya na bakong pareho an relihiyon kan mga magurang. An saiyang ama Griego, pero an saiyang ina saka lola mga Judio. (Gibo 16:1) Posibleng marhay na tin-edyer kaidto si Timoteo kan magin Kristiyano si Eunice asin Loida. Pero an saiyang ama dai nagin Kristiyano. Ano an pipilion ni Timoteo? Posibleng marhay na nasa tamang edad na siya para gumibo nin sadiring desisyon. Pipilion niya daw an relihiyon kan saiyang ama? Susunudon niya daw an mga Judiong tradisyon na itinukdo saiya puon kan aki pa siya? O aakuon niya daw an bagong relihiyon kan saiyang ina saka lola asin magigin parasunod ni Jesu-Cristo?

3. Sigun sa Talinhaga 1:8, 9, ano an pagmansay ni Jehova sa ginigibo kan mga ina para tabangan an saindang mga aki na magin amigo niya?

³ An Kristiyanong mga ina ngunyan namumutan man an saindang pamilya. Urog kisa ano pa man, gusto nindang tabangan an saindang mga aki na magkaigwa nin dayupot na relasyon ki Jehova. Asin pinapahalagahan na marhay kan satong Diyos an saindang mga paghihinguwa. (Basahon an Talinhaga 1:8, 9.) Dakulon na ina an giniyahan ni Jehova mantang tinatabangan ninda an saindang mga aki na akuon an katotoohan.

4. Anong mga kadipisilan an napapaatubang sa mga ina ngunyan?

⁴ Natural sana na tibaad maisip kun minsan nin sarong ina kun baga pipilion kan saiyang mga aki na maglingkod ki Jehova, arog kan ginibo ni Timoteo. Aram kaya kan mga magurang na napapaatubang an saindang mga aki sa grabeng panggigipit kan kinaban ni Satanas. (1 Ped. 5:8) Apuwera kaiyan, dakul na ina an nadidipisilan sa pagpadakula kan saindang mga aki dahil nagsosolo sindang magurang o bakong lingkod ni Jehova an agom ninda. Halimbawa, an sister na si Christineb nagsabi: “Marahay na ama saka padre de-pamilya si agom, pero kontra siyang marhay sa pagpadakula ko sa mga aki bilang Saksi ni Jehova. Dakul na beses akong naghibi, na iniisip kun baga maabot an panahon na masamba ki Jehova an mga aki ko.”

5. Ano an pag-uulayan ta sa artikulong ini?

⁵ Kun ika sarong Kristiyanong ina, puwede kang magin mapanggana arog ni Eunice. Sa artikulong ini, pag-uulayan ta kun paano mo maaarog an saiyang halimbawa sa pagtukdo mo sa saimong mga aki paagi sa tataramon asin gibo. Aaramon ta man kun paano ka tatabangan ni Jehova.

6. Arog kan ipinaparisa kan 2 Timoteo 3:14, 15, paano nagin Kristiyano si Timoteo?

⁶ Kan aki pa si Timoteo, ginibo kan saiyang inang si Eunice an pinakamakakaya kaini para tukduan siya kan “banal na mga kasuratan,” sigun sa pakasabot diyan kan mga Judio. Siyempre, limitado sana an kaaraman ni Eunice huling mayo siyang aram manungod ki Jesu-Cristo. Dawa arog kaiyan, an mga nanudan ni Timoteo sa Kasuratan nagtao saiya nin marahay na basehan para akuon an Kristiyanismo. Pero pipilion niya daw na magin Kristiyano? Bilang hoben, may deretso siyang pumili kun baga mamumuhay siya bilang Kristiyano. Mayong duda na saro sa mga dahilan kaya “nakumbinsir [si Timoteo] na paniwalaan” an katotoohan manungod ki Jesus iyo an mga paghihinguwa kan saiyang ina. (Basahon an 2 Timoteo 3:14, 15.) Siguradong grabe an pasasalamat ni Eunice dahil nagin mapanggana siya sa pagtukdo sa saiyang aki manungod ki Jehova! Talagang pinatunayan ni Eunice an kahulugan kan saiyang pangaran, na hali sa tataramon na an buot sabihon “mandaog.”

7. Paano matatabangan ni Eunice an saiyang aki na umuswag pagkatapos kaining mabawtismuhan?

⁷ Kan mabawtismuhan na si Timoteo, mahalagang pasuhan iyan na naabot niya sa saiyang buhay. Pero may ikinakahadit pa man giraray si Eunice. Pagkabawtismo, paano na kaya gagamiton kan aki niya an buhay kaini? Makikipag-amigo daw siya sa mga maraot an impluwensiya saiya? Maeskuwela daw siya sa Atenas asin aakuon an katukduan kan paganong mga pilosopo diyan? Mapauripon daw siya sa kayamanan asin uubuson diyan an saiyang panahon, kusog, saka pagkahoben? Dai puwedeng si Eunice an magdesisyon para ki Timoteo, pero matatabangan niya ini. Paano? Puwede siyang padagos na magmaigot para tukduan an saiyang aki na mamutan na marhay si Jehova asin magin mapagpasalamat sa Saiyang Aki. Bako sanang an mga pamilyang may mga magurang na magkaiba nin relihiyon an nadidipisilan. Dawa pag parehong nasa katotoohan an mga magurang, puwedeng madipisilan sinda na abuton an puso kan saindang mga aki para magin maimbod na mga lingkod ni Jehova an mga ini. Ano an manunudan kan mga magurang sa halimbawa ni Eunice?

8. Paano matatabangan nin sarong ina an saiyang kapagtubod na agom sa pag-asikaso kan espirituwal na mga pangangaipo kan saindang mga aki?

⁸ Pag-adalan an Bibliya kaiba an saimong mga aki. Kun pareho kamong nasa katotoohan kan saimong agom, gusto ni Jehova na tabangan mo siya sa pag-asikaso sa espirituwal na mga pangangaipo kan saindong mga aki. An sarong paagi na magigibo mo ini iyo an regular na pagsuportar sa areglo na Pampamilyang Pagsamba. Magtaram nin positibo manungod diyan, saka pag-isipan an mga puwede mong gibuhon para magin relaks saka nakakaugma iyan. Tibaad puwede mong tabangan an saimong agom sa pagplano nin sarong espesyal na proyekto o aktibidad sa pag-adal sa Bibliya. Apuwera kaiyan, kun may mga aki kamo na nasa tamang edad na para konduktahan nin pag-adal sa Bibliya gamit an librong Mabuhay nin Maugma Sagkod Pa Man!, tibaad puwede kang makipagtabangan sa saimong agom sa pagtao kan kinakaipuhan na suporta.

9. Sain makakakua nin tabang an sarong ina na may bakong kapagtubod na agom?

⁹ May mga ina na kaipuhan na iyo an manginot sa pagkondukta nin pag-adal sa Bibliya sa saindang mga aki, tibaad dahil ta nagsosolo sindang magurang o bakong kapagtubod an saindang agom. Kun arog kaiyan an sitwasyon mo, dai maghadit na marhay. Tatabangan ka ni Jehova. Gamiton an epektibong mga pantabang sa pagtutukdo na itinao niya paagi kan saiyang organisasyon para sa pag-Bible study sa mga aki mo. Puwede ka man maghagad sa ibang eksperyensiyadong magurang nin bagong mga ideya kun paano gagamiton an mga pantabang na ini sa saindong pampamilyang pagsamba.c (Tal. 11:14) Matatabangan ka man ni Jehova pag-abot sa komunikasyon nindo kan mga aki mo. Hagadon saiya na tabangan kang mapaluwas kun ano an nasa isip asin puso kan saimong mga aki. (Tal. 20:5) An simpleng hapot na arog kan ‘Sa ano ka pinakanasasakitan sa eskuwelahan?’ puwedeng makapuon nin pag-uulay na makakatabang saimo na magibo iyan.

10. Paano mo pa matatabangan an saimong mga aki na makanuod manungod ki Jehova?

¹⁰ Maghanap nin mga oportunidad para tukduan an saimong mga aki manungod ki Jehova. Mag-istorya manungod ki Jehova asin sa dakul na marahay na bagay na ginibo niya para saimo. (Deu. 6:6, 7; Isa. 63:7) Mahalaga ini lalo na kun dai kamo regular na nakakapag-Bible study kan saimong mga aki sa saindong harong. Si Christine, na sinambit kasubago, nagsabi: “Dikiton sana an oportunidad para pag-ulayan an espirituwal na mga bagay kaya inaaprobetsaran ko an ano man na pagkakataon na magkaibanan kami. Naglalakaw-lakaw kami o nagbabangka harani sa baybayon para pag-ulayan an manungod sa makangangalas na mga linalang ni Jehova saka an dakul na espirituwal na bagay. Kan nasa tamang edad na an mga aki ko, dinagka ko sinda na personal na pag-adalan an Bibliya.” Dugang pa, magtaram nin positibo manungod sa organisasyon ni Jehova asin sa mga tugang. Dai pagkritikaron an mga elder. An mga sinasabi mo manungod sa mga elder may epekto sa kun baga madulok sa sainda an mga aki mo pag kaipuhan kan mga ini nin tabang.

11. Sigun sa Santiago 3:18, taano ta mahalaga na tumabang na magkaigwa nin katuninungan sa harong?

¹¹ Tumabang na magkaigwa nin katuninungan sa harong. Pirming ipahiling an pagkamuot mo sa saimong agom saka mga aki. Magtaram nin may kabuutan asin paggalang manungod sa saimong agom, saka sanayon an mga aki na iyan man an gibuhon. Pag ginigibo mo iyan, nagigin matuninong an pamilya kaya mas pasil para sa mga aki na makanuod manungod ki Jehova. (Basahon an Santiago 3:18.) Pag-isipan an halimbawa ni Jozsef, na espesyal payunir sa Romania. Kaidtong nagdadakula siya, ginibo kan saiyang ama na magin dipisilon para sa saiya, sa saiyang ina, saka mga tugang na maglingkod ki Jehova. Sinabi ni Jozsef: “Pinagmaigutan na marhay ni Mama na magin matuninong an pamilya mi para samo. Mantang nagigin mas maringis si Papa, diyan man nagigin mas mabuot si Mama. Pag naririsa niya na nasasakitan kaming igalang saka sunudon si Papa, ipinapakipag-ulay niya samo an Efeso 6:1-3. Dangan maistorya na siya samo manungod sa magagayon na kuwalidad ni Papa saka tatabangan kaming masabutan kun taano ta dapat mi siyang padabaon. Napakalma niya an dakul na nakakatensiyon na sitwasyon paagi kaiyan.”

12. Uyon sa 2 Timoteo 1:5, ano an nagin epekto ki Timoteo kan halimbawa ni Eunice?

¹² Basahon an 2 Timoteo 1:5. Nagtao si Eunice nin marahay na halimbawa ki Timoteo. Posibleng marhay na itinukdo niya digdi na an tunay na pagtubod may kaibang gibo. (Sant. 2:26) Mayong duda na nahiling ni Timoteo na an dahilan kan mga ginigibo kan saiyang ina iyo an makusog na pagkamuot kaini ki Jehova. Siguradong nahiling ni Timoteo na an paglilingkod ki Jehova nakapaugma sa saiyang ina. Ano an nagin epekto ki Timoteo kan halimbawa ni Eunice? Sinambit ni apostol Pablo na arog kan saiyang ina, makusog man an pagtubod ni Timoteo. Dai iyan nagkataon lang. Nahiling ni Timoteo an halimbawa kan saiyang ina asin napahiro siyang arugon iyan. Kaagid kaiyan, dakul na ina ngunyan an naabot an puso kan saindang mga kapamilya “maski mayong tataramon.” (1 Ped. 3:1, 2) Magigibo mo man iyan. Paano?

13. Taano ta dapat na ipriyoridad nin sarong ina an relasyon niya ki Jehova?

¹³ Ipriyoridad an relasyon mo ki Jehova. (Deu. 6:5, 6) Arog kan kadaklan na ina, dakul na pagsasakripisyo an ginigibo mo. Isinasakripisyo mo an saimong panahon, kuwarta, turog, asin iba pang bagay para maitao an pisikal na mga pangangaipo kan mga aki mo. Pero dai ka nanggad dapat magin sibot-sibot diyan na marhay na naisasakripisyo mo na lugod an relasyon mo ki Jehova. Regular na magtagama nin panahon para sa personal na pagpamibi, personal na pag-adal sa Bibliya, saka mga pagtiripon kan kongregasyon. Paagi kaiyan, mapapakusog mo an espirituwalidad mo saka makakatao ka nin marahay na halimbawa sa saimong pamilya pati man sa iba.

14-15. Ano an nanudan mo sa halimbawa ni Leanne, Maria, saka João?

¹⁴ Pag-isipan an pirang halimbawa nin mga hoben na nakanuod na mamutan si Jehova saka magtiwala saiya paagi sa pag-obserbar sa saindang ina. An aki ni Christine na si Leanne nagsabi: “Dai kami nakakapag-Bible study pag yaon si Papa. Pero dai lamang talaga nagpapalta si Mama sa mga pagtiripon. Dawa dikit lang an aram mi sa Bibliya, nabawi man iyan kan halimbawa saka kumbiksiyon niya. Kaya bago pa man kami makaatender sa mga pagtiripon, aram mi nang ini talaga an katotoohan.”

¹⁵ Si Maria, na an ama pinapadusahan sinda kun minsan dahil sa pag-atender sa mga pagtiripon, nagsabi: “Saro si Mama sa mga pinakamakusog an buot na sister na bisto ko. Kan aki pa ako, nagsasayuma ako kun minsan na gibuhon an mga bagay-bagay dahil natatakot ako sa sasabihon kan iba. Pero dahil sa nahihiling ko kun gurano kakusog kan buot ni Mama saka kun paano niya pirming iniinot si Jehova sa buhay niya, nakatabang iyan sako na madaog an pagkatakot sa tawo.” Si João, na an ama pinagbawalan an pamilya na mag-ulay sa harong manungod sa espirituwal na mga bagay, nagsabi: “Siguro an pinakanakapahiro sako iyo an pagigin andam ni Mama na isakripisyo gabos—apuwera na sana sa pagkamuot niya ki Jehova—tangani na mapaugma si Papa.”

16. Ano an puwedeng magin epekto sa iba kan halimbawa nin sarong ina?

¹⁶ Mga ina, tandaan na may epekto sa iba an saindong halimbawa. Paano? Pag-isipan an nagin epekto kan halimbawa ni Eunice ki apostol Pablo. Sinabi niya na an mayong pagsagin-sagin na pagtubod ni Timoteo “inot na nahiling [ki] Eunice.” (2 Tim. 1:5) Kasuarin inot na nahiling ni Pablo an pagtubod ni Eunice? Posibleng marhay na nabisto niya si Loida asin Eunice kaidtong inot na pagbiyahe niya bilang misyonero sa Listra, asin posibleng tinabangan niya sinda na magin Kristiyano. (Gibo 14:4-18) Isip-isipon: Kan magsurat si Pablo ki Timoteo—pakalihis nin mga 15 taon—nagigirumduman pa man giraray ni Pablo an kaimbudan ni Eunice asin ginamit ini bilang halimbawa na angay arugon! Malinaw na napakusog niya an apostol saka posibleng marhay na pati man an dakul na iba pang Kristiyano kan inot na siglo. Kun solo mong pinapadakula an mga aki mo o kun bakong kapagtubod an agom mo, makakasigurado ka na an saimong halimbawa nin kaimbudan makakapakusog saka makakadagka sa mga nasa palibot mo.

17. Ano an dapat mong gibuhon kun garo baga mayong epekto sa aki mo an pagsasanay mo saiya?

¹⁷ Paano kun garo baga mayong epekto sa aki mo an saimong mga paghihinguwa? Tandaan na an pagsasanay sa aki nangangaipo nin panahon. Arog kan ipinapahiling sa ritrato, pag nagtanom ka nin banhi, tibaad maisip mo kun minsan kun baga matalubo iyan dangan magigin mabungang tinanom. Dawa ngani dai mo man makokontrol an magigin resulta, padagos mo man giraray iyan na binabaribian tangani na matawan iyan kan pinakamarahay na oportunidad para magtubo. (Mar. 4:26-29) Kaagid kaiyan, bilang ina, tibaad maisip mo man kun minsan kun baga naaabot mo an puso kan saimong mga aki. Dai mo makokontrol an magigin resulta. Pero kun padagos mong gigibuhon an gabos mong makakaya para sanayon sinda, matatawan mo sinda kan pinakamarahay na oportunidad na mapupuwede para magtalubo sa espirituwal.—Tal. 22:6.

18. Paano puwedeng tabangan ni Jehova an saimong mga aki na magtalubo sa espirituwal?

¹⁸ Puon pa kan mga panahon kan Bibliya, dakulon nang aki an tinabangan ni Jehova na magin amigo niya. (Sal. 22:9, 10) Puwede man na tabangan ni Jehova an saimong mga aki na magtalubo sa espirituwal kun iyan an mawot ninda. (1 Cor. 3:6, 7) Dawa kun garo baga bakong seryoso sa paglilingkod ki Jehova an mga aki mo, padagos pa man giraray niya sindang mamumuton na susubaybayan. (Sal. 11:4) Pag nagpahiling sinda nin maski dikit na senyales na igwa sindang “pusong nasa tamang kamugtakan,” andam nanggad siya na tabangan sindang magin amigo niya. (Gibo 13:48; 2 Cron. 16:9) Puwede ka niyang tabangan na sabihon an tamang mga tataramon sa tamang panahon—sa panahon na pinakakaipuhan iyan na madangog kan saimong mga aki. (Tal. 15:23) O tibaad pahiruon niya an sarong mapagmakulog na brother o sister sa kongregasyon na pahilingan sinda nin personal na interes. Dawa pag magin adulto na an mga aki mo, puwedeng ipagirumdom sainda ni Jehova an sarong bagay na itinukdo mo sainda kaidto. (Juan 14:26) Pag padagos mong sinasanay an mga aki mo paagi sa tataramon asin gibo, tinatawan mo si Jehova nin dakul na dahilan para bendisyunan ka.

19. Paano mo masisigurado na inuuyunan ka ni Jehova?

¹⁹ An pagkamuot saimo ni Jehova dai nakadepende sa kun ano an pipilion kan saimong mga aki. Namumutan ka niya dahil namumutan mo siya. Kun ika sarong nagsosolong magurang, nanunuga si Jehova na magigin siyang Ama sa saimong mga aki asin Paraprotektar sa saimo. (Sal. 68:5) Dai mo makokontrol kun ano an magigin desisyon kan mga aki mo. Pero kun padagos kang masarig sa tabang ni Jehova asin gigibuhon an pinakamakakaya mo, makakamtan mo an saiyang pag-uyon.