Kun Paano Mapagdadanay an Pakikiamigo Niyato sa Satong mga Kapagtubod

1. Sain kita makakahanap nin tunay na mga amigo?

“BUHAY ngunyan talagang masakit. Aram iyan ni Jah. Kaya itinao niya sato amigong makakaiba.” Uyon ka daw sa mga linyang iyan kan orihinal na kantang “Amigong Tunay”? Sarong bendisyon nanggad na makahanap nin tunay na mga amigo sa mga lingkod ni Jehova! (Sal. 119:63) Parte kita nin sarong pamilya na nagsasamba ki Jehova asin nagkakasararo huli sa pagkamuot.

2. Gusto tang magkaigwa nin anong klaseng pakikipag-amigo sa satong mga kapagtubod?

² Habo niyatong hababaw sana an pakabisto ta sa satong mga kapagtubod. Gusto niyatong mabistong marhay sinda asin magin dayupot sindang amigo. Parte kita nin sarong pamilya na namumutan si Jehova saka si Jesus, asin an pagkamuot na iyan an nagbubugkos sa sato. (Juan 13:35) Dai ta basta na sana nagigin dayupot na amigo an satong mga kapagtubod. Kaipuhan niyatong maghinguwa. Asin may mga puwedeng makaraot sa pagigin mag-aramigo ta huling bako kitang perpekto.

3. Taano ta puwedeng magin dipisil na mapagdanay an pagigin mag-amigo?

³ An totoo, huli sa pagkakapareho nin mga gusto o ugali, tibaad mas dayupot kita sa nagkapirang kapagtubod kisa sa iba. Pero tibaad madipisilan kitang magin dayupot sa ibang mga tugang. Kun minsan kaya, tibaad may mga dai kita pagkakauyon sa lambang saro na puwedeng makaapektar sa relasyon ta sa sainda. Huli sa pagkakaiba nin ugali, tibaad maisip niyato na garo imposibleng magin dayupot kita sa ibang mga tugang. Asin kun minsan, pag nagkaigwa nin grabeng hilang o may inaagihan an satong amigo, tibaad madipisilan kitang magdanay na dayupot sa saiya. Sa artikulong ini, pag-uulayan ta kun paano makakatabang sa sato an halimbawa ni Jesus tanganing magdanay an satong pakikiamigo sa satong mga tugang pag may mga kadipisilan. Pero, pag-ulayan ta nguna kun paano makakatabang sa sato an diyosnon na mga kuwalidad para magdanay kitang dayupot sa sainda.

AN DIYOSNON NA MGA KUWALIDAD NAKAKATABANG SA SATO NA MAPAGDANAY AN PAKIKIAMIGO SA IBA

4. Paano kita magigin mas dayupot sa satong mga tugang?

⁴ Para magin mas dayupot kita sa mga tugang, kaipuhan tang magmaigot na hilingon an marahay na mga kuwalidad ninda. Para magibo iyan, kaipuhan tang magtao nin panahon na makaibanan sinda. Gustong-gusto ni apostol Pablo na makaibanan an mga tugang. Nagsurat siya sa mga taga Tesalonica: “Ginibo mi an gabos na paghihinguwa para mahiling kamo.” (1 Tes. 2:17) Para sa dakul, an personal na makaibanan asin makaulay-ulay an mga tugang an pinakamarahay na paagi para magin mas dayupot sa sainda. Dakul kitang pagkakataon na magibo iyan mantang nakikikabtang kita sa ministeryo asin pag nag-aatender kita sa mga pagtiripon, asembleya, saka kumbensiyon. Pero dawa pa personal tang nakakaibanan an mga tugang, bako iyan garantiya na dai na magkakaigwa nin mga problema na puwedeng makaraot sa pakikiamigo ta sa sainda.

5. Ano an makakatabang sa sato kun namemeligrong maraot an pakikiamigo ta sa satong tugang? Iilustrar. (Colosas 3:12)

⁵ An diyosnon na mga kuwalidad makakatabang sa sato kun namemeligrong maraot an pakikiamigo ta sa satong tugang. (Basahon an Colosas 3:12.) Pag hinihinguwa tang mas ipahiling an kapakumbabaan, pagigin mapasensiya, kabuutan, asin pagmalasakit, mapapangganahan ta an mga puwedeng makaraot sa satong pakikiamigo. Para iilustrar, kaipuhan kan makina nin awto nin asayte para magin magayon an dalagan kaiyan. Sa kaparehong paagi, kaipuhan man an diyosnon na mga kuwalidad para malikayan an ano man na problema asin magin magayon an relasyon ta sa iba. Pag-ulayan ta na ngunyan an tulong bagay na puwedeng makapadipisil sa sato na magdanay na dayupot sa satong mga tugang. Sa kada saro kaiyan, pag-uulayan ta man kun paanong an pag-arog sa pagigin mapakumbaba, mapasensiya, mabuot, asin mapagmalasakit ni Jesus makakatabang sa sato na magin tunay na amigo sa iba.

PAG MAY DAI KAMO PAGKAKAUYON

6. Paano puwedeng maraot kan dai pagkakauyon an pagigin mag-amigo?

⁶ Paano kaiyan puwedeng maapektaran an pagigin mag-amigo? Pag may mga dai pagkakauyon, tibaad isipon kan kada saro na an opinyon niya an tama. Halimbawa, duwang brother an dai nagkauyon huling magkaiba an opinyon ninda sa gigibuhon na areglo sa paghuhulit kan grupo ninda. Iniisip kaya kan kada saro sa sainda na an ideya niya an pinakamarahay. Bako daw na kun papabayaan nindang maggrabe pa an dai ninda pagkakauyon, posibleng maraot kaiyan an pagigin mag-amigo ninda? Tibaad mas mahalaga na sa sainda an pride ninda. Kun dai ninda pag-uulayan asin huhusayon an problema, puwedeng maghinanakit na sinda sa lambang saro. Paglihis nin mga aldaw, tibaad mas magrayo na an buot ninda sa kada saro sagkod na umabot sa punto na bako na sindang mag-amigo—huli sana sa sadit na bagay.

7. Paano itinukdo ni Jesus sa saiyang mga disipulo na kaipuhan an kapakumbabaan para maresolberan an mga dai pagkakauyon?

⁷ Makanuod sa kapakumbabaan ni Jesus. Itinukdo niya sa saiyang mga disipulo kun ano an kaipuhan para maresolberan an mga dai pagkakauyon—kapakumbabaan. May mga pagkakataon na nagdidiriskutiran an mga disipulo kun siisay an pinakaurog sa sainda. Para tabangan sindang mabago an ugaling iyan na nakagamot nang marhay sa sainda, ipinaliwanag sa sainda ni Jesus na kaipuhan nindang ibilang an iba na mas urog kisa sainda. (Mat. 20:​25-28) Iyo, tinukduan niya sindang magin mapakumbaba. Dawa ngani kan banggi bago gadanon si Jesus, “nagtao [siya sa sainda] nin arugan” paagi sa mapakumbabang paggibo nin gibuhon nin sarong suruguon—an paghanaw kan saindang mga bitis. (Juan 13:​3-5, 12-16) Sa ginibong iyan ni Jesus, ipinahiling niya sa sainda kun paano ninda maiingatan an saindang pagigin mag-aramigo. Kun ibibilang ninda an iba na mas urog kisa sainda, magigin mas madali sainda na magpahunod pag may mga dai pagkakauyon. Magigin mas pasil man sa sainda na magdanay na dayupot sa kada saro dawa pa sa mga pagkakataon na magkakaiba an saindang opinyon.

8. Pag may dai kamo pagkakauyon nin sarong tugang, paano makakatabang sa saimo an kapakumbabaan para magdanay kamong mag-amigo? (Colosas 3:13) (Hilingon man an mga ritrato.)

⁸ Paano mo maiingatan an pagigin mag-amigo nindo? Makakatabang sa saimo an kapakumbabaan na palampason na sana an saradit na dai pagkakauyon asin lubos na patawadon an iba. (Basahon an Colosas 3:13.) Kun mapakumbaba ka, mas pipilion mong kontrulon an saimong reaksiyon para maingatan an marahay na relasyon mo sa iba. (Sal. 4:4) Dawa pa kun may nasabi kamong makulog na mga tataramon sa kada saro, girumdumon na gabos kita nakakapagtaram nin mga bagay na pinagbabasulan ta sa huri. (Ecl. 7:​21, 22) Haputon an sadiri: ‘Ano an mas importante sako, an patunayan na tama ako o an pagigin mag-amigo mi?’ Puwede mong pilion na magpahunod na sana. Para magkaigwa ka nin matuninong na isip, dai na pagparaisipon an dai pagkakauyon asin dai na iyan pagparaungkaton.

9. Paano makakatabang sa saimo an kapakumbabaan kun dai nareresolberan an dai pagkakauyon? (Talinhaga 17:9)

⁹ Makakatabang man sa saimo an kapakumbabaan pag dai nareresolberan an dai pagkakauyon. Dai makiargumento para lang patunayan na tama ka. (Basahon an Talinhaga 17:9; 1 Cor. 6:7) Marahay kun an pasuhan mo iyo na magdanay kamong mag-amigo. Dakul na tugang an nagibo iyan; sinda na mismo an nagdulok asin mabuot na nakipag-ulay sa amigo ninda para husayon an problema. (Sal. 34:14) Puwede mong sabihon: ‘Habo kong mawara an pagigin mag-amigo ta. Puwede ta daw pag-ulayan an nangyari?’ Magin andam na admitiron na may nagibo ka man na sala sa nangyari, na nakulgan man siya, dangan maghagad nin dispensa. Asin kun maghagad man siya nin dispensa, mapakumbabang akuon iyan. (Luc. 17:​3, 4) Tandaan na an pasuhan mo, bako na patunayan kun siisay an tama o kun siisay an sala, kundi maresolberan an dai nindo pagkakauyon asin magdanay kamong mag-amigo.​—Tal. 18:24.

PAG MAGKAIBA KAMO NIN UGALI

10. Taano ta tibaad dipisil na mapagdanay an pakikiamigo niyato sa iba?

¹⁰ Paano kaiyan puwedeng maapektaran an pagigin mag-amigo? Puwedeng masakitan kitang magin amigo asin magdanay na dayupot sa mga tugang na iba man sa sato an personalidad. Tibaad may mga ugali sinda na nakakairitar sa sato. Tibaad may mga ginigibo sinda na sa hiling ta dai dapat o dai angay sa sitwasyon. An paggawi ninda tibaad resulta nin maraot na inagihan sa buhay. Posible man na huli sa dinakulaan na kultura, dai sinda nagpaparagirong o kaya mainistorya sindang maray. O tibaad magkaiba lang talaga kita nin personalidad—posibleng mainamigo kita mantang sinda masusupgon.

11. Paano nagibo ni Jesus na mapagdanay an pakikiamigo niya sa mga amigo niyang ibang-iba an ugali sa saiya?

¹¹ Makanuod sa pagigin mapasensiya ni Jesus. Napagdanay ni Jesus an pakikiamigo niya sa mga amigo niyang ibang-iba an ugali sa saiya. Halimbawa, mahihiling an pagigin ambisyoso ni apostol Santiago asin Juan kan makiulay sinda ki Jesus na tawan sinda nin prominenteng posisyon sa Kahadian. (Mar. 10:​35-37) Kabaliktaran kan sabuot ninda, mapakumbabang binayaan ni Jesus an saiyang halangkaw na posisyon saka mga pribilehiyo sa langit para magdigdi sa daga. (Fil. 2:​5-8) Talagang magkaibang marhay an sabuot ninda. Pero, nagin mapasensiya pa man giraray si Jesus ki Santiago saka ki Juan pati man sa iba.

12. Ano an nakatabang ki Jesus na magin mapasensiya sa saiyang mga amigo?

¹² Realistiko si Jesus sa mga inaasahan niya sa saiyang mga amigo. Aram niya na, arog ni Santiago asin Juan, dakul man sa mga disipulo an sobra an pagpapahalaga sa katungdan. (Mar. 9:34) Nasasabutan ni Jesus an sabuot ninda. Parareho lang kaya an dinakulaan nindang kultura na grabe an pagpapahalaga sa pagigin prominente asin sa katungdan. Minsan siring, mapasensiya si Jesus sa sainda. Tinawan niya sinda nin panahon na baguhon an saindang pagigin mapalangkaw asin ambisyoso na nagin ugali na ninda sa laog nin dakul na taon.​—Mar. 10:​42-45.

13. Paano makakatabang sa sato an pagigin mapasensiya para mapagdanay an pagigin mag-amigo? (Efeso 4:2)

¹³ Paano mo maiingatan an pagigin mag-amigo nindo? Padagos na kultibaron an pagkamapasensiya paagi sa paghihinguwang akuon an mga ugali kan iba na nakakairitar sa saimo. (Tal. 14:29) Kita gabos may kanya-kanyang ugali, asin kadaklan sa mga ugaling iyan bako man talaga sala kundi parte lang iyan kan personalidad ta. Kaya naaapresyar niyatong marhay pag inaako kan iba an mga aspektong iyan kan satong personalidad. (Basahon an Efeso 4:2.) Importante man na magin realistiko kita paagi sa pagsabot sa ugali kan iba. Halimbawa, isip-isipa na sana an grabeng paghihinguwa nin sarong masusupgon para makiiba-iba asin makipag-ulay sa iba. Pero kaipuhan ta man na magin mapasensiya sa mga mainamigong marhay asin mainistorya. Siyempre, dai ta man talaga magigin best friend an gabos, pero tandaan na maski an mga Kristiyano na magkaibang marhay an ugali puwedeng magin mag-amigo.

14. Pag mapasensiya kita sa mga amigo ta, sain kita mapokus?

¹⁴ Pag mapasensiya kita sa mga amigo ta, mapokus kita sa marahay na mga kuwalidad ninda. Pag ginigibo ta iyan, an pagkakaiba nin mga ugali dai makakaulang sa sato na magin amigo sinda. Halimbawa, nagpahiling nin pagkamakasadiri si Santiago asin Juan sa pagmawot ninda na magin prominente; pero, mahihiling man sa sabuot ninda na talagang totoo sa sainda an Kahadian. Nagpokus si Jesus sa pagtubod ninda asin inapresyar niya iyan. Pag nagpopokus kita sa marahay na mga kuwalidad kan satong mga amigo, inaarog ta si Jesus saka an saiyang Ama, si Jehova.

15. Kiisay kita puwedeng magpatabang para mapagdanay ta an satong pakikiamigo sa mga ibang-iba an ugali sa sato?

¹⁵ Urog sa gabos, puwede niyatong hagadon sa pamibi an tabang ni Jehova para mapagdanay an pakikiamigo ta sa mga ibang-iba an ugali sa sato. Isipon an mga sitwasyon na puwedeng mairitar ka kan amigo mo, asin patiinot nang mamibi para magin kalmado ka pag nangyari iyan. Tandaan na si Jehova an satong Kaglalang, asin aram niya na bako man talaga kita parareho. Kaya pag namibi ka, makakapagtiwala ka na aram ni Jehova saka itatao niya an kaipuhan mong tabang. Asin pag natetesting an pasensiya mo, hagadon ki Jehova an banal na espiritu para tabangan kang makontrol an reaksiyon mo.​—Luc. 11:13; Gal. 5:​22, 23.

PAG MAY INAAGIHAN NA PROBLEMA AN SATONG MGA TUGANG

16. Pag may inaagihan na problema an satong mga tugang, anong mga kadipisilan an puwedeng mapaatubang sa sato?

¹⁶ Paano kaiyan puwedeng maapektaran an pagigin mag-amigo? Pag may problema an satong mga tugang—iyan man sa pisikal o sa emosyon—tibaad may masabi o magibo sinda na puwedeng makairitar o makakulog sa sato. Halimbawa, tibaad gusto niya na sanang magparasolo-solo pirmi, magin na siyang iritable, o kaya may magibo siya na dai ta lamang hunaon na magigibo niya. Posibleng may masabi o magibo siya na makakulog sa sato. (Job 6:​2, 3) Dahil dai ta aram an inaagihan kan satong mga kapagtubod, tibaad bako na palan posible para sa sainda na magibo an inaasahan ta sa sainda.

17. Ano ano nanudan mo sa kun paano trinatar ni Jesus an lalaking buta na si Bartimeo?

¹⁷ Makanuod sa pagigin mabuot asin mapagmalasakit ni Jesus. Mabuot siya saka mapagmalasakit sa mga nagsasakit, dawa pa duman sa mga dai niya bisto. Halimbawa, isip-isipon kun paano niya trinatar an lalaking buta na si Bartimeo. Kan madangog ni Bartimeo na yaon si Jesus, nagparakurahaw siya para makua an atensiyon ni Jesus. May mga nagsaway ki Bartimeo asin sinabihan siyang magsilensiyo. Pero desperado siyang mapaumayan ni Jesus, kaya lalo pa siyang nagparakurahaw. May mga nairitar daw sa ginibo niya? Posibleng igwa. Alagad, iba an nagin reaksiyon ni Jesus; siya “nahirak na marhay,” sarong ekspresyon na naglaladawan kan namati niyang grabeng pagmalasakit. (Mat. 20:34; Mar. 10:​46-52) Mabuot niyang kinaulay si Bartimeo asin pinahalagahan an ipinahiling niyang pagtubod. Asin milagrosong ibinalik ni Jesus an saiyang paghiling.

18. Paano mo dapat trataron an mga amigo mong may inaagihan na problema? (1 Tesalonica 5:14)

¹⁸ Paano mo maiingatan an pagigin mag-amigo nindo? Magin mabuot asin mapagmalasakit. An mamumuton na mga kuwalidad na iyan makakatabang sa saimo na “magtaram na may pagranga” sa mga tugang na may inaagihan na problema, sa pisikal man o sa emosyon. (Basahon an 1 Tesalonica 5:14.) Tandaan na an tunay na amigo andam na magtabang, lalo na “sa mga panahon nin kasakitan.” (Tal. 17:17) An siring na amigo dai lang nasasabutan an inaagihan kan saiyang amigo kundi ginigibo niya man an saiyang pinakamakakaya para mapamugtak an buot kan saiyang amigo, na mapakusog siya, asin na magtao nin praktikal na tabang.

19. Paano niyato maipapahiling an kabuutan asin malasakit? (Hilingon man an mga ritrato.)

¹⁹ Paano niyato maipapahiling an kabuutan asin malasakit? Siyempre, dai mo man kayang halion an kulog na namamatian sa pisikal o sa emosyon kan saimong tugang. Pero puwede mong gibuhon an saimong pinakamakakaya na sabuton an inaagihan niya. (Mat. 7:12; 1 Ped. 3:8) Pag nag-istorya siya kan inaagihan niya, magdangog na marhay. Kun angay sa kamugtakan, hinguwahon na pumili nin mga tataramon na makakaranga sa saiya. (Tal. 12:25) Likayan na magkongklusyon sa sitwasyon niya. (Tal. 18:13) Hinguwahon na magin mapasensiya asin magin realistiko sa mga inaasahan mo sa saiya.​—Efe. 4:32.

20. Gusto mong magin anong klase nin amigo?

²⁰ Pinapahalagahan niyato gabos an pakikiamigo ta sa satong mga kapagtubod. Pero marahay na isaisip pirmi na huling bako kitang perpekto, nakakagibo kita kun minsan nin mga bagay na habo ta man talagang gibuhon. Posibleng dakula kaya an epekto sa satong personalidad kan maraot na mga nangyari sa buhay ta. Kaya, lalo tang naaapresyar an mga amigo ta sa organisasyon ni Jehova na nagdadanay na dayupot sa sato. Mapakumbaba sinda, mapasensiya, mabuot, saka mapagmalasakit. Lugod na gibuhon niyato an satong pinakamakakaya na magin arog man kaiyan na amigo.