Mga Dahilan na Magkaigwa nin Paglaom Para sa 2023—Ano an Sinasabi kan Bibliya?

Sa pagpuon kan taon 2023, gabos kita naglalaom na marahay na mga bagay an mangyayari sa sato asin sa satong pamilya. Taano ta makakalaom kita nin arog kaiyan?

Sinasabi kan Bibliya an maugmang bareta na temporaryo sana an mga problemang inaagihan ta ngunyan asin na madali nang masolusyunan iyan. Sa katunayan, an Bibliya “isinurat para sa pagtukdo sa sato, tanganing paagi. . . sa karangahan hali sa Kasuratan magkaigwa kita nin paglaom.”—Roma 15:4.

• Para makanuod pa manungod sa mga panuga kan Bibliya, basahon an artikulong “Makakaasa Ka sa Isang Magandang Kinabukasan.”

An paglaom na nasa Bibliya puwedeng iagid sa “angkla para sa satuyang buhay.” (Hebreo 6:19, nota sa ibaba) An paglaom na iyan makakaparigon sa sato. Makakatabang iyan sato na makayanan an mga problema ta ngunyan, magin positibo, asin magkaigwa nin nagdadanay na kaugmahan. Halimbawa:

• Aramon kun paano natabangan kan paglaom na nasa Bibliya an sarong lalaki na nasakitan huli sa saiyang adiksiyon. Hilingon an video na Sawa Na Ako sa Buhay Ko.

• Aramon kun paano makakatabang sa sato an paglaom na nasa Bibliya pag nagadanan kita nin mahal sa buhay. Hilingon an video na Karangahan Para sa mga Nagmumundo.

Dakul na tawo an naglalaom na mangyari an marahay na mga bagay, pero dai sinda makakasigurado na mangyayari an mga linalauman ninda. Pero iba an mga panuga na nasa Bibliya. Taano man? Huling an mga panuga na nasa Bibliya hali mismo sa Diyos na Jehovaa “na dai makakapagputik.” (Tito 1:2) Si Jehova sana an may kapangyarihan na utubon an gabos niyang panuga; kaya niyang gibuhon “an gabos na gustuhon niya.”—Salmo 135:5, 6.

Maugma mi kamong inaagda na makinabang sa mapagtitiwalaan na paglaom na nasa Bibliya. Mapapakusog mo an pagtitiwala mo diyan paagi sa ‘maingat na pagsiyasat kan Kasuratan.’ (Gibo 17:11) Aramon mo mismo paagi sa pagpurbar sa samong libreng pag-adal sa Bibliya, na diyan igwa nin matabang saimo. Punan an 2023 na pano nin paglaom para sa puturo!