Tibaad pagmati mo dai ka pa handa na magdusay asin magpabawtismo. Tibaad kaipuhan mo pang gumibo nin mga pagbabago sa buhay mo tanganing magin kauyon iyan kan mga pamantayan ni Jehova, o tibaad kaipuhan mo pa nin panahon para pakusugon an pagtubod mo. (Col. 2:​6, 7) Bakong gabos na tinutukduan sa Bibliya parareho an rikas nin pag-uswag, asin bakong gabos na hoben andam nang magdusay saka magpabawtismo sa pararehong edad. Pag-isipan kun anong mga pag-uswag sa espirituwal an kaipuhan mong gibuhon base sa kun ano an makakaya mo, bako sa pagkumparar kan sadiri mo sa iba. (Gal. 6:​4, 5) Dawa pa marealisar mo na dai ka pa handa na idusay an sadiri mo ki Jehova, padagos man giraray na gibuhon iyan na pasuhan. Ipamibi ki Jehova na tabangan kang makagibo nin ano man na kinakaipuhan na mga pagbabago. (Fil. 2:13) Makakasigurado ka na dadangugon niya an pamibi mo asin tatabangan ka niya.​—1 Juan 5:14. w24.03 5 ¶9-10

Sa sarong pagkakataon, napurisaw na marhay si Sara asin sinabi niya sa agom niya kun gurano siya kadisganado, na binabasol pa ngani si Abraham. Aram ni Abraham na si Sara sarong mapagpasakop asin mapagsuportar na agom. Dinangog niya si Sara asin hininguwang maresolberan an problema. (Gen. 16:​5, 6) Ano an manunudan ta diyan? Mga agom na lalaki, may awtoridad kamo na gumibo nin mga desisyon para sa saindong pamilya. (1 Cor. 11:3) Alagad, pagpahiling nin pagkamuot kun madangog kamong marhay asin kokonsideraron an opinyon kan saimong agom bago magdesisyon, lalo na kun an desisyon may epekto sa saiya. (1 Cor. 13:​4, 5) Sa saro pang pagkakataon, nagdesisyon si Abraham na istimaron an dai inaasahan na mga bisita. Sinabihan niya si Sara na bayaan nguna an ginigibo niya asin magpreparar nin dakul na tinapay. (Gen. 18:6) Huminiro tulos si Sara asin sinuportaran an desisyon ni Abraham. Mga agom na babayi, puwede nindong maarog si Sara paagi sa pagsuportar sa mga desisyon kan saindong agom. Kun gigibuhon nindo iyan, mapapakusog nindo an saindong relasyon bilang mag-agom.​—1 Ped. 3:​5, 6. w23.05 24-25 ¶16-17

Pagkatapos na nombrahan si Gideon bilang hukom, nabalo an saiyang pagigin masinunod asin kusog nin buot. Tinawan siya nin delikadong asignasyon na gabaon an altar ni Baal na sadiri kan saiyang ama. (Huk. 6:​25, 26) Paghaloy-haloy, pagkatapos na magtipon nin sarong hukbo, duwang beses na ininstruksiyunan si Gideon na bawasan an bilang kaiyan. (Huk. 7:​2-7) Panghuri, sinabihan siya na atakihon an kampo kan kalaban sa kamatangaan nin banggi. (Huk. 7:​9-11) An mga elder dapat na magin “andam na magsunod.” An masinunod na elder nagsusunod tulos sa sinasabi kan Kasuratan asin sa instruksiyon kan organisasyon nin Diyos. Paagi kaini, nagpapahiling siya nin marahay na halimbawa sa iba. Pero, puwede pa man giraray mabalo an saiyang pagigin masinunod. Halimbawa, huli sa kadakul na instruksiyon o sa biglang mga pagbabago kaiyan, tibaad masakitan siya na sunudon o iaplikar iyan. Sa nagkapirang kamugtakan, tibaad maisip niya kun baga praktikal o madunong an sarong instruksiyon. O tibaad pakiulayan siya na gibuhon an sarong asignasyon na puwedeng magsapeligro kan saiyang katalingkasan. Paano maaarog kan mga elder an pagigin masinunod ni Gideon sa arog kaiyan na mga kamugtakan? Magdangog na marhay sa instruksiyon asin sunudon iyan. w23.06 4-5 ¶9-11