SA BILOG na kinaban, namimibi an mga tawo ano man an saindang kultura asin relihion. Namimibi sinda nin solo; namimibi man sinda bilang grupo. Namimibi sinda sa mga simbahan, templo, sinagoga, moske, asin altar. Naggagamit sinda nin mga alpombra (rug) na linuluhodan kun namimibi, rosaryo, bumbong (wheel) na may nakasurat na pamibi, ladawan, libro nin pamibi, o pamibi na nasa saradit na tabla na isinasabit sa iba-ibang lugar.

Huli sa pamibi napapalaen an mga tawo sa ibang bagay na may buhay digdi sa daga. Totoo, dakol an pagkakapareho niato sa mga hayop. Arog ninda, kaipuhan niato nin kakanon, aire, asin tubig. Arog man ninda, kita namumundag, nabubuhay, asin nagagadan. (Eclesiastes 3:19) Alagad mga tawo sana an namimibi. Taano?

Tibaad an pinakasimpleng simbag iyo na kaipuhan tang mamibi. Total, an pamibi sa pangkagabsan minamansay na sarong paagi na an mga tawo makakomunikar sa lugar nin mga espiritu, na minamansay ninda na banal, o sagrado, asin daing sagkod. Ipinapaheling kan Biblia na kita linalang na may pagmawot sa siring na mga bagay. (Eclesiastes 3:11) Sinabi kaidto ni Jesu-Cristo: “Maogma an mga nakakamate kan saindang espirituwal na pangangaipo.”—Mateo 5:3.

“Espirituwal na pangangaipo”—ano pa man an dahelan kun taano ta kadakol an edipisyo asin suanoy na bagay na pangrelihion, patin kadakol an oras na ginagamit sa pamimibi? Siempre, may mga tawo na nagdedepende sa saindang sadiri o sa kapwa tanganing mapanigoan an espirituwal na mga pangangaipo ninda. Pero, dai mo daw naririsa na limitado nanggad an kakayahan nin mga tawo na tumabang nin igo? Kita maluya nanggad, halipot an buhay, asin limitado an pagmansay. An makakatao sana kan kaipuhan niato saro na mas madonong nanggad, mas makapangyarihan, mas nagdadanay kisa sa sato. Asin ano man nanggad an espirituwal na mga pangangaipong ini na nagpapahiro sa sato na mamibi?

Isip-isipa: Namatean mo na daw na kaipuhan mong marhay nin paggiya, kadonongan, o simbag sa mga hapot na garo baga dai kayang itao kan kaaraman nin tawo? Namatean mo na man daw na kaipuhan mo nin pagranga kan ika makaeksperyensia nin grabeng kawaran, o nin paggiya kan ika mapaatubang sa depisilon na pagdesisyon, o nin kapatawadan kan ika biyong pangluyahan nin boot huling ika nakokonsensia?

Segun sa Biblia, iyan gabos rasonableng dahelan na mamibi. An Biblia iyo an pinakamasasarigan na libro dapit sa temang ini, asin nakasurat dian an pamibi nin dakol na maimbod na lalaki asin babae. Paagi sa pamibi, sinda naghagad nin pagranga, paggiya, kapatawadan, asin simbag sa pinakadepisil na mga hapot.—Salmo 23:3; 71:21; Daniel 9:4, 5, 19; Habacuc 1:3.

Minsan ngani laen-laen an siring na mga pamibi, may pagkakaagid iyan. Aram kan lambang namibi an sarong bagay na mahalagang marhay sa mapangganang pamimibi, na parateng mayo o binabaliwala sa kinaban ngonyan. Aram ninda kun kiisay dapat mamibi.

AN GABOS daw na pamibi saro sana an pinapadumanan, dawa siisay an pamibian? Iyan an parateng hinohona nin kadaklan sa kinaban ngonyan. An ideyang iyan nasusunoan nin dakol na pabor sa iribang pagsamba nin laen-laen na relihion asin na gustong akoon an gabos na relihion, dawa may mga pagkakalaen iyan. Pero, posible daw na bakong totoo an ideyang iyan?

Sa katunayan, itinotokdo kan Biblia na kadakol na pamibi an dai nakakaabot sa Dios. Kan isinusurat an Biblia, kaugalean na nin mga tawo kaidto na mamibi sa inukit na mga imahen. Pero, paorootrong nagpatanid an Dios tumang dian. Halimbawa, an Salmo 115:4-6 nagsasabi manongod sa mga imahen: “May mga talinga sinda, alagad dai sinda nakakadangog.” Malinaw an boot sabihon kaiyan. Taano ta mamimibi ka sa sarong dios na dai ka noarin man madadangog?

An puntong ini orog pang idinoon nin sarong malinaw na estorya sa Biblia. Inangat kan tunay na propetang si Elias an mga propeta ni Baal na mamibi sa saindang dios, dangan mamimibi man sia sa saiyang Dios. Sinabi ni Elias na masimbag an tunay na Dios alagad an falsong dios dai. Bilang pag-ako sa angat na iyan, namibi an mga propeta ni Baal nin halawig asin maigot, na may pagkurahaw pa ngani—alagad iyan sayang sana! An estorya nagsasabi: “Mayo nin nagsisimbag, patin mayo nin nagtataong atension.” (1 Hade 18:29) Pero, kumusta kan mamibi si Elias?

Pagkapamibi ni Elias, nagsimbag tolos an saiyang Dios paagi sa pagpadara nin kalayo hale sa langit tanganing tumtomon an idinolot ni Elias. Ano an kalaenan kaiyan? May sarong bagay na mahalagang marhay sa pamibi ni Elias, na nasa 1 Hade 18:36, 37. Halipoton na pamibi iyan—mga 30 sanang tataramon sa orihinal na Hebreo. Pero, sa pira sanang tataramon na iyan, tolong beses na inapod ni Elias an Dios sa saiyang personal na ngaran na Jehova.

Si Baal, na nangangahulogan na “kagsadiri” o “kagurangnan,” iyo an dios kan mga Cananeo, asin sa laen-laen na lugar sa Canaan dakol na dios an inaapod man na Baal. Minsan siring, an Jehova napapalaen na ngaran, na nanonongod sa saro sanang Persona sa bilog na uniberso. An Dios na ini nagsabi sa banwaan nia: “Ako si Jehova. Iyan an sakong ngaran; asin dai ko itatao sa iba an sakong kamurawayan.”—Isaias 42:8.

Saro sana daw an pinadumanan kan pamibi ni Elias asin kan mga propeta ni Baal? An mga tawo rinaot kan pagsamba ki Baal paagi sa ritual na prostitusyon asin pag-atang pa ngani nin tawo. Sa kabaliktaran, an pagsamba ki Jehova nagtaong dignidad sa saiyang banwaan na Israel, na nagpatalingkas sa sainda sa siring na nakakaraot na mga kaugalean. Kaya, pag-isipan ini: Kun nagpadara ka nin surat na espesipikong nakangaran sa sarong iginagalang na marhay na amigo o amiga, aasahan mo daw na iyan mapapaduman sa saro na laen man an ngaran asin may labi-labi karaot na reputasyon na kabaliktaran kan gabos na pinaniniwalaan kan amigo o amiga mo? Siertong dai!

Kun ika namimibi ki Jehova, ika namimibi sa Kaglalang, an Ama nin katawohan.a “Ika, O Jehova, an Ama niamo,” an sabi ni propeta Isaias sa pamibi. (Isaias 63:16) Kun siring, ini mismo an Saro na pinanonongdan ni Jesu-Cristo kan sabihon nia sa saiyang mga parasunod: “Ako masakat sa sakong Ama asin sa saindong Ama asin sa sakong Dios asin sa saindong Dios.” (Juan 20:17) Si Jehova iyo an Ama ni Jesus. Sia an Dios na pinamibian ni Jesus asin an itinokdo ni Jesus sa saiyang mga parasunod na dapat pamibian ninda.—Mateo 6:9.

Pinagbobotan daw kita kan Biblia na mamibi ki Jesus, ki Maria, sa mga santo, o sa mga anghel? Dai—ki Jehova sana. Isip-isipa an duwang dahelan kun taano. Enot, an pamibi sarong klase nin pagsamba, asin sinasabi kan Biblia na an pagsamba dapat ki Jehova sana. (Exodo 20:5) Ikaduwa, ihinahayag kan Biblia na sia an may titulong “Paradangog nin pamibi.” (Salmo 65:2) Minsan ngani dakol na paninimbagan an ipinagkakatiwala ni Jehova sa iba, an pagdangog sa pamibi sarong paninimbagan na nungka niang itinao sa kiisay man. Sia an Dios na nanunuga na personalmenteng magdadangog sa satong mga pamibi.

Kaya, kun gusto mong dangogon nin Dios an pamibi mo, girumdomon an konsehong ini sa Biblia: “An gabos na nag-aapod sa ngaran ni Jehova maliligtas.” (Gibo 2:21) Alagad, an gabos daw na pamibi dinadangog ni Jehova na mayong kondisyon? O may iba pa daw na bagay na kaipuhan niatong maaraman kun gusto tang dangogon ni Jehova an satong pamibi?

KUN dapit sa pamimibi, idinodoon sa dakol na tradisyon sa relihion an pisikal na mga aspekto kaiyan, arog baga nin posisyon, mga tataramon, asin ritual. Minsan siring, tinatabangan kita kan Biblia na bako dian magkonsentrar kundi sa mas mahalagang mga aspekto kan hapot na, “Paano kita maninigong mamibi?”

Sinasabi sa Biblia na an maimbod na mga lingkod nin Dios namibi sa laen-laen na lugar asin posisyon. Sinda namibi nin silensio o makosog an boses depende sa kamugtakan. Sinda namibi man mantang nakatingag sa langit o nakaduko. Imbes na maggamit nin mga imahen, rosaryo, o libro nin mga pamibi bilang pantabang, sinda namibi hale sa puso asin sa sadiri nindang tataramon. Taano ta dinangog nin Dios an pamibi ninda?

Arog kan nasambit sa sinundan na artikulo, sinda namibi sa saro sanang Dios—si Jehova. May saro pang mahalagang bagay. Mababasa niato sa 1 Juan 5:14: “Iyo ini an satong mapapanarigan mapadapit sa saiya, na, minsan ano an satong hagadon segun sa saiyang kabotan, kita dinadangog nia.” An satong pamibi kaipuhan na kaoyon kan kabotan nin Dios. Ano an boot sabihon kaiyan?

Tanganing makapamibi kaoyon kan kabotan nin Dios, kaipuhan tang maaraman kun ano an kabotan nia. Kun siring, an pag-adal sa Biblia mahalagang marhay sa pamimibi. An boot daw sabihon kaini dai kita dadangogon nin Dios kun bako kitang iskolar sa Biblia? Dai man, alagad inaasahan nin Dios na pag-aadalan niato an kabotan nia, na hinihingoang saboton iyan asin humiro oyon dian. (Mateo 7:21-23) Kaipuhan tang mamibi kaoyon kan nanonodan niato.

Mantang kita nakakanood manongod ki Jehova asin dapit sa kabotan nia, minakosog an satong pagtubod—saro pang bagay na mahalagang marhay sa pamimibi. Si Jesus nagsabi: “An gabos na bagay na hagadon nindo sa pamibi, na may pagtubod, aakoon nindo.” (Mateo 21:22) An pagtubod dai nangangahulogan nin pagigin madaling maniwala. Imbes, nangangahulogan iyan nin pagtubod sa sarong bagay na dawa dai naheheling pero pinapatunayan nin makosogon na ebidensia. (Hebreo 11:1) An Biblia pano nin ebidensia na si Jehova, na dai niato naheheling, tunay, masasarigan, asin andam na magsimbag sa pamibi kan mga may pagtubod sa saiya. Apuera kaini, pirme kitang makakapamibi na logod dugangan an satong pagtubod, asin gustong-gusto ni Jehova na itao sa sato an kaipuhan niato.—Lucas 17:5; Santiago 1:17.

Uni an saro pang bagay na mahalagang marhay kun paano mamimibi. Si Jesus nagsabi: “Mayo nin makakaduman sa Ama kun bakong paagi sa sako.” (Juan 14:6) Kaya, si Jesus an satong paagi sa pagdolok sa Ama na si Jehova. Huli kaini, sinabihan ni Jesus an mga parasunod nia na mamibi sa ngaran nia. (Juan 14:13; 15:16) Dai iyan nangangahulogan na kita maninigong mamibi ki Jesus. Imbes, kita namimibi sa ngaran ni Jesus, na ginigirumdom na sia an dahelan na kita nakakadolok sa satong sangkap asin banal na Ama.

An pinakaharaning mga parasunod ni Jesus naghapot sa saiya kaidto: “Kagurangnan, tokdoi kami kun paano mamibi.” (Lucas 11:1) Minalataw na dai sinda naghahapot manongod sa pundamental na mga bagay na ipinaliwanag pa sana sa enotan. An gusto talaga nindang maaraman iyo an manongod sa laog kan pamibi—na garo man sana nagsasabi, ‘Ano an maninigo ming ipamibi?’

MAY mga nagsasabi na an modelong pamibi ni Jesus an pinakaparateng inoorootro sa gabos na Kristianong pamibi. Totoo man iyan o bako, an modelong pamibi—na kun beses inaapod na Pamibi kan Kagurangnan o Ama Niamo—kaiba nanggad sa dai nasasabotan nin kadaklan. Minilyon an paorootrong namimibi kaiyan aroaldaw, na tibaad dakol na beses durante kan aldaw. Alagad bako nanggad arog kaini an katuyohan ni Jesus kun dapit sa pagpamibi kaiyan. Paano niato iyan naaraman?

Bago itao an pamibing iyan, si Jesus nagsabi: “Kun namimibi, dai pagparaorootrohon an iyo man sanang mga bagay.” (Mateo 6:7) Dangan, kinontra daw ni Jesus an sadiri nia paagi sa pagpahayag nin mga tataramon na dapat tuomon asin orootrohon? Dai nanggad! Imbes, itinotokdo sa sato ni Jesus kun ano an dapat tang ipamibi, asin itinatao nia sa sato an malinaw na mga prioridad na dapat girumdomon kun namimibi. Orog pa niatong siyasaton an sinabi nia. An pamibing iyan nasa Mateo 6:9-13.

Kun siring, ipinagirumdom ni Jesus sa saiyang mga parasunod na an gabos na pamibi maninigong ipaabot sa saiyang Ama, si Jehova. Alagad aram mo daw kun taano ta mahalagang marhay an ngaran nin Dios asin kun taano ta kaipuhan iyan na pakangbanalon?

Poon pa sa kapinonan kan kasaysayan nin tawo, pinapakaraot na an sagradong ngaran nin Dios. An kaiwal nin Dios, si Satanas, inapod si Jehova na putikon, makasadiring Tagapamahala na mayo nin tunay na deretsong pamahalaan an Saiyang mga linalang. (Genesis 3:1-6) Dakol an kuminampi ki Satanas, asin nagtotokdo na an Dios mayong pakiaram, maringis, asin mapamalos o dai talaga naniniwala na may Kaglalang. Isinikwal pa ngani nin iba an mismong ngaran nia na Jehova, na hinahale iyan sa mga traduksion kan Biblia asin ipinagbabawal an paggamit kaiyan.

Ipinapaheling kan Biblia na itatanos nin Dios an gabos na inhustisyang ini. (Ezequiel 39:7) Sa paggibo kaiyan, itatao nia an gabos mong pangangaipo asin sosolusyonan man an gabos mong problema. Paano? An simbag yaon sa sunod na sinabi sa pamibi ni Jesus.

Ngonyan, an Kahadean nin Dios dai nanggad nasasabotan nin mga paratokdo sa relihion. Alagad arog kan aram kan mga nagdadangog kaidto ki Jesus, haloy nang ihinula kan mga propeta nin Dios na pamamahalaan kan Mesiyas—an Paraligtas na pinili nin Dios—an sarong Kahadean na mabago kan kinaban. (Isaias 9:6, 7; Daniel 2:44) Papakangbanalon kaiyan an ngaran nin Dios paagi sa paghayag kan mga kaputikan ni Satanas asin paghale sa saiya saka sa gabos na ginibo nia. Tataposon kan Kahadean nin Dios an guerra, helang, gutom—patin kagadanan. (Salmo 46:9; 72:12-16; Isaias 25:8; 33:24) Kun ika namimibi na dumatong logod an Kahadean nin Dios, ika namimibi na mangyari logod an gabos na panugang iyan.

Ipinapaheling kan sinabi ni Jesus na an kabotan nin Dios seguradong mangyayari sa daga kun paano sa langit, na istaran nin Dios. Mayong nakaolang sa kabotan nin Dios sa langit; duman, an Aki nin Dios nakiguerra ki Satanas asin sa mga alipores kaini, dangan inapon sinda sa daga. (Kapahayagan 12:9-12) An ikatolong kahagadan sa modelong pamibi, arog kan enot na duwa, nakakatabang sa sato na danay na magkonsentrar sa mga bagay na pinakamahalaga—bakong an kabotan niato kundi an sa Dios. An kabotan nia an pirmeng nagtatao kan pinakaikakarahay kan gabos na linalang. Huli kaini, dawa an sangkap na tawong si Jesus nagsabi sa saiyang Ama: “Mangyari logod, bakong an kabotan ko, kundi an kabotan mo.”—Lucas 22:42.

Sunod, ipinaheling ni Jesus na puede man niatong hagadon sa pamibi an mga pangangaipo niato. Bako man sala na hagadon sa Dios an talagang mga pangangaipo niato sa aroaldaw. Sa katunayan, an paggibo kaiyan nagpapagirumdom sa sato na si Jehova an “nagtatao sa gabos na tawo nin buhay asin hinangos patin gabos na bagay.” (Gibo 17:25) Ihinahayag kan Biblia na sia mamomoton na magurang na naoogmang itao sa saiyang mga aki an kaipuhan ninda. Pero, siring sa sarong marahay na magurang, dai nia itatao an hinahagad ninda na bakong kapakipakinabang sa sainda.

Talaga daw na may utang ka sa Dios? Kaipuhan mo daw an kapatawadan nia? Dakol ngonyan an dai na nakakasabot sa kun ano an kasalan asin kun gurano iyan kaseryoso. Alagad itinotokdo kan Biblia na an kasalan an dahelan kan satong pinakagrabeng mga problema, huling iyan an pangenot na dahelan kan kagadanan nin mga tawo. Huling kita namundag na makasalan, kita gabos parateng nagkakasala, asin nakadepende sana sa kapatawadan nin Dios an paglaom niato na magkamit nin daing sagkod na futuro. (Roma 3:23; 5:12; 6:23) Nakakaginhawang maaraman na an Biblia nagsasabi: “Ika, O Jehova, marahay asin andam na magpatawad.”—Salmo 86:5.

Aram mo daw kun taano ta kaipuhan mo nanggad an proteksion nin Dios? Dakol an habong maniwala na talagang may “saro na maraot,” si Satanas. Alagad itinokdo ni Jesus na talagang may Satanas, na inapod pa ngani nia na “namamahala sa kinaban na ini.” (Juan 12:31; 16:11) Rinaraot ni Satanas an kinaban na ini na kontrolado nia, asin gustong-gusto man niang raoton ka, tanganing dai ka magin harani sa saimong Ama, si Jehova. (1 Pedro 5:8) Minsan siring, si Jehova mas makosog nanggad kisa ki Satanas asin naoogmang proteksionan an mga namomoot sa Saiya.

An gabos na temang angay na ipamibi dai sinasambit sa halipot na sumaryong iyan kan pangenot na mga punto sa modelong pamibi ni Jesus. Girumdoma, an 1 Juan 5:14 nagsasabi sa sato manongod sa Dios: “Minsan ano an satong hagadon segun sa saiyang kabotan, kita dinadangog nia.” Kaya, ipamibi mo dawa an mga problema na sa heling mo dai na kaipuhan irani sa Dios.—1 Pedro 5:7.

Pero, saen asin noarin kita mamimibi? Mahalaga daw iyan?

MAYONG duda na naririsa mo na sa kadaklan na establisadong relihion, mahalaga an magarbong mga harong na pamibian asin may ipinapaotob na espesipikong mga oras kun noarin maninigong mamibi. Sinasabi daw kan Biblia na may espesipiko sanang mga lugar asin oras na kita dapat mamibi?

Ipinapaheling talaga kan Biblia na may mga panahon na angay mamibi. Halimbawa, bago magkakan si Jesus kaiba kan saiyang mga parasunod, sia nagpasalamat sa Dios sa pamibi. (Lucas 22:17) Asin kan an mga disipulo magtiripon sa pagsamba, sinda iribang namibi. Kun siring, ipinadagos ninda an haloy nang kaugalean sa Judiong mga sinagoga asin sa templo sa Jerusalem. Katuyohan nin Dios na an templo magin “harong na pamibian para sa gabos na nasyon.”—Marcos 11:17.

Kun an mga lingkod nin Dios iribang nagtitiripon asin namimibi, puedeng dangogon an mga kahagadan ninda. Naoogma an Dios kun nagkakasararo an kaisipan kan grupo asin kun an pamibi para sa grupo kaoyon kan mga prinsipyo sa Biblia. An pamibi tibaad magpahiro pa ngani sa saiya na gibohon an dai nia kutana gigibohon. (Hebreo 13:18, 19) Regular na namimibi an Mga Saksi ni Jehova sa mga pagtiripon ninda. Maogma kang iniimbitaran na magbisita sa Kingdom Hall na harani sa saindo tanganing madangog mo mismo an siring na mga pamibi.

Minsan siring, dai sinasabi kan Biblia na may espesipiko sanang oras o lugar na dapat mamibi. Mababasa niato sa Biblia an dapit sa mga lingkod nin Dios na namibi ano man na oras, asin saen man na lugar. Si Jesus nagsabi: “Kun ika namimibi, lumaog ka sa saimong pribadong kuarto asin, pagkapinto mo kaiyan, mamibi ka sa saimong Ama na nasa hilom; dangan an saimong Ama na nagheheling sa hilom an matao nin balos sa saimo.”—Mateo 6:6.

Bako daw na nakakaengganyo iyan? Talagang makakadolok ka sa Soberano kan uniberso ano man na oras, na biyong pribado, asin makakasierto ka na dadangogon ka nia. Kun siring, bako nanggad makangangalas na parateng naghingoa si Jesus na magsolo tanganing mamibi! Sarong beses, magdamlag siang namibi sa Dios, na malinaw na naghahagad nin paggiya dapit sa sarong mahalagang marhay na desisyon.—Lucas 6:12, 13.

Namibi an ibang mga lalaki asin babae na sinambit sa Biblia kan kaipuhan nindang magdesisyon nin magabat o kan sinda may masakiton na mga problema. Kun beses, sinda namimibi nin makosog asin silensio; sinda namimibi man bilang grupo asin kun solo. An mahalaga namibi sinda. Dinagka pa ngani nin Dios an mga lingkod nia: “Mamibi nin daing pondo.” (1 Tesalonica 5:17) Sia andam na magdangog nin daing pondo sa mga naggigibo kan kabotan nia. Bako daw na mamomoton an pagdagkang iyan?

Siempre, sa mapagtuyang kinaban ngonyan, dakol an nag-iisip manongod sa praktikal na halaga nin pamibi. Tibaad ihapot mo, ‘Talaga daw na makakatabang iyan sa sako?’

NAKAKATABANG daw sa sato an pamibi? Ipinapaheling kan Biblia na iyo; an pamibi kan maimbod na mga lingkod nin Dios talagang nakatabang sa sainda. (Lucas 22:40; Santiago 5:13) An totoo, an pamimibi puedeng makatabang nanggad sa sato sa espirituwal, emosyonal, asin pisikal na paagi. Paano?

Ipamugtak ta na ika may aki na tinawan nin regalo. Totokdoan mo daw sia na igo nang makamate nin pagpahalaga? O totokdoan mo daw siang ipahayag an pasasalamat nia? Kun itinataram niato an tunay na namamatean niato, tinatawan niato iyan nin atension asin mas napapakosog pa ngani iyan. Totoo man daw iyan kun kinakaolay niato an Dios? Iyo nanggad! Helinga an nagkapirang halimbawa.

Pamibi nin pagpasalamat. Kun kita nagpapasalamat sa satong Ama sa marahay na mga nangyayari sa sato, tinatawan niato nin atension an mga bendisyon sa sato. Bilang resulta, kita nagigin mas mapagpasalamat, mas maogma, asin mas positibo.—Filipos 4:6.

Halimbawa: Ipinahayag ni Jesus an pasasalamat nia huling dinangog asin sinimbag kan saiyang Ama an mga pamibi nia.—Juan 11:41.

Pamibi para sa kapatawadan. Kun kita naghahagad nin kapatawadan sa Dios, mas napapakosog niato an satong konsensia, mas napapararom an satong pagsolsol, asin mas nasasabotan niato an pagigin seryoso nin kasalan. Kita nagiginhawahan man huling dai kita riniribok kan satong konsensia.

Halimbawa: Namibi si David tanganing ipahayag an pagsolsol asin kamondoan.—Salmo 51.

Pamibi para sa paggiya asin kadonongan. An paghagad ki Jehova nin paggiya o kadonongan na kaipuhan niato tanganing makagibo nin marahay na desisyon makakatabang sa sato na magin tunay na mapakumbaba. Iyan puedeng magpagirumdom sa sato kan mga limitasyon niato asin magpakosog kan pagtitiwala niato sa satong langitnon na Ama.—Talinhaga 3:5, 6.

Halimbawa: Si Salomon mapakumbabang naghagad nin paggiya asin kadonongan sa pamamahala sa Israel.—1 Hade 3:5-12.

Pamibi dapit sa kasakitan. Kun biyo niatong ipapahayag sa Dios an nasa puso niato mantang grabe an pagsakit kan satong boot, kita magiginhawahan asin magtitiwala ki Jehova imbes na sa satong sadiri.—Salmo 62:8.

Halimbawa: Si Hadeng Asa namibi kan sia mapaatubang sa makosogon na kalaban.—2 Cronica 14:11.

Pamibi sa kapakanan kan mga nangangaipo. An siring na pamibi nakakatabang sa sato na likayan an pagigin makasadiri, asin magin mas mapagmalasakit saka maduminamay.

Halimbawa: Si Jesus namibi sa kapakanan kan mga parasunod nia.—Juan 17:9-17.

Pamibi nin pag-omaw. Kun inoomaw niato si Jehova huli sa saiyang magayonon na mga ginibo asin kualidad, mararom an satong paggalang saka pagpahalaga sa saiya. An siring na pamibi puede man na makatabang sa sato na magin mas harani sa satong Dios asin Ama.

Halimbawa: Si David maogmang nag-omaw sa Dios huli sa saiyang mga linalang.—Salmo 8.

An saro pang bendisyon na konektado sa pamibi iyo “an katoninongan nin Dios na labi sa gabos na kaisipan.” (Filipos 4:7) An pagigin trangkilo sa maribok na kinaban na ini pambihirang bendisyon nanggad. May mga pakinabang pa ngani iyan sa pisikal. (Talinhaga 14:30) Alagad iyan daw makakamtan sana niato huli sa sadiri tang paghihingoa? O may kalabot daw iyan na mas mahalaga?

INTERESADO nanggad kitang maaraman an simbag sa hapot na iyan. Ipinapaheling kan Biblia na talagang dinadangog ni Jehova an mga pamibi ngonyan. Sa pangenot, nakadepende sa sato kun baga kita dadangogon nia o dai.

Kinondenar ni Jesus kan panahon nia an mga lider nin relihion na mapagsaginsagin na namimibi; gusto sana nindang magin banal sa pagheling kan publiko. Sinabi nia na ‘makakamtan kan mga tawong iyan an bilog na balos sa sainda,’ na nangangahulogan na an makukua sana ninda iyo an pinakagusto ninda—an atension nin mga tawo; alagad dai ninda makukua an kaipuhan ninda—an dangogon nin Dios. (Mateo 6:5) Dakol man ngonyan an namimibi segun sa kagustohan ninda, bakong segun sa kabotan nin Dios. Huling binabaliwala an mga prinsipyo sa Biblia na ipinaliwanag sa enotan, sinda dai dinadangog nin Dios.

Pero, kumusta ka man? Dadangogon daw asin sisimbagon nin Dios an pamibi mo? An simbag dai nakadepende sa saimong rasa, nasyonalidad, o kamugtakan sa buhay. Sinisierto sa sato kan Biblia: “An Dios mayong ipinapaorog, kundi sa lambang nasyon an tawo na natatakot sa saiya asin naggigibo nin katanosan inaako nia.” (Gibo 10:34, 35) Arog ka daw kan ilinaladawan dian? Kun natatakot ka sa Dios, dakulaon an paggalang mo sa saiya kaya habo mong mapamondo sia. Kun ika naggigibo nin katanosan, naghihingoa kang gibohon an mga bagay na sinasabi nin Dios na tama, imbes na sunodon an kagustohan mo o kan saimong kapwa. Talaga daw na gusto mong dangogon nin Dios an pamibi mo? Tatabangan ka kan Biblia na magibo iyan.a

Siempre, gusto nin dakol na an pamibi ninda simbagon nin Dios paagi sa milagro. Pero, dawa kaidtong mga panahon kan Biblia, an Dios bihirang gumibo nin mga ngangalasan. Kun beses, ginatos na taon an minaagi bago masundan an sarong milagro na nakasurat sa Biblia. Apuera kaiyan, ipinaparisa kan Biblia na natapos na an panahon nin mga milagro pakalihis kan panahon kan mga apostol. (1 Corinto 13:8-10) Kun siring, nangangahulogan daw ini na dai sinisimbag nin Dios an mga pamibi ngonyan? Bako nanggad totoo iyan! Helinga an nagkapirang pamibi na sinisimbag nia.

An Dios nagtatao nin kadonongan. Si Jehova an Pinakagikanan nin gabos na tunay na kadonongan. Buka an palad na itinatao nia iyan sa mga gusto kan saiyang paggiya asin nagmamaigot na mamuhay oyon dian.—Santiago 1:5.

An Dios nagtatao nin banal na espiritu asin kan gabos na pakinabang na bunga kaiyan. An banal na espiritu iyo an aktibong puersa nin Dios. Mayo nang ibang puersa na mas makosog pa. Makakatabang iyan sa sato na tagalan an kasakitan. Tinatawan kita kaiyan nin katoninongan kun kita may problema. Makakatabang man iyan sa sato na magkaigwa nin iba pang marahay asin kawiliwiling mga kualidad. (Galacia 5:22, 23) Sinierto ni Jesus sa saiyang mga parasunod na buka an palad nin Dios sa pagtao kan regalong ini.—Lucas 11:13.

An Dios nagtatao nin kaaraman sa mga maigot na naghahanap sa saiya. (Gibo 17:26, 27) Sa bilog na kinaban, may mga tawo na sinserong naghahanap kan katotoohan. Gusto nindang maaraman an manongod sa Dios—kun ano an ngaran nia, kun ano an katuyohan nia sa daga asin sa katawohan, saka kun paano sinda magigin harani sa saiya. (Santiago 4:8) An mga Saksi ni Jehova parateng nakakanompong nin mga tawong arog kaiyan asin naoogmang marhay na sabihon an simbag kan Biblia sa siring na mga hapot.

Iyan daw an dahelan kaya inako mo an magasin na ini? Hinahanap mo daw an Dios? Puedeng ini an simbag nia sa pamibi mo.