“Gusto Nindang Aramon Ko Mismo an Katotoohan”

Ipinangaki ako sa Santo Domingo, Dominican Republic. Ako an kangudhan sa apat na aki. Halangkaw an inadalan kan mga magurang ko asin gusto nindang padakulaon an mga aki ninda na napapalibutan nin marahay na mga tawo. Apat na taon bago ako ipangaki, nakamidbid kan mga magurang ko an mga misyonerong Mormon. Napahanga sindang marhay sa pagigin disente asin sa marahay na ugali kan mga hoben na lalaking idto. Kaya, dai nahaloy nagdesisyon sindang magin saro sa inot na mga pamilya sa isla na magin miyembro kan Church of Jesus Christ of Latter-day Saints, o Mormon Church.

Mantang nagdadakula ako, nauugma ako sa mga pagtiripon-tipon mi sa simbahan asin nirerespeto ko an pagpokus kan Mormon sa buhay pampamilya saka sa mga pamantayan sa moral. Ipinag-orgulyo ko an pagigin Mormon asin nangarap akong magin misyonero.

Kan ako 18 anyos na, buminalyo an samong pamilya sa Estados Unidos tanganing makapagkolehiyo ako sa marahay na unibersidad. Pakalihis nin mga sangtaon, binisita kami sa Florida kan tiya asin tiyo ko na Mga Saksi ni Jehova. Inimbitaran ninda kaming mag-atender sa sarong kumbensiyon kaiba ninda. Napahanga ako kan mahiling ko na an gabos nagbabasa kan mga teksto sa Bibliya asin nagsusurat nin nota. Kaya naghagad man ako nin bolpen saka papel asin iyan man an ginibo ko.

Pagkatapos kan kumbensiyon, sinabi kan tiya asin tiyo ko na mantang interesado akong magin misyonero, tatabangan ninda akong makanuod manungod sa Bibliya. Inisip kong marahay na ideya idto, ta kaidto mas dakul an aram ko sa Book of Mormon kisa sa Bibliya.

Sa mga pag-uulay mi dapit sa Bibliya gamit an telepono, pirmi akong dinadagka kan tiya asin tiyo ko na ikumparar an sakong mga paniniwala sa mga itinutukdo kan Bibliya. Gusto nindang aramon ko mismo an katotoohan.

Dakul na paniniwala kan Mormon an inako ko, pero dai ako sigurado kun kauyon iyan kan Bibliya. Ipinadara sa sako ni tiya an Nobyembre 8, 1995 isyu kan magasin na Awake! na ipinublikar kan Mga Saksi ni Jehova. Igwa iyan nin nagkapirang artikulo manungod sa paniniwala nin Mormon. Nabigla ako ta dai ko aram an dakul sa mga katukduan kan Mormon. Nakapahiro iyan sa sako na hilingon an opisyal na Web site kan mga Mormon tanganing makumpirmar kun totoo an mga sinasabi sa Awake! Totoo iyan, asin mas nakumpirmar ko iyan kan magbisita ako sa mga museo kan Mormon sa Utah.

Kaidto, naniniwala ako na bakong magkakontra an Book of Mormon asin an Bibliya. Pero kan punan ko nang basahon nin mas maingat an Bibliya, narisa ko an mga kontradiksiyon kan mga katukduan kan Mormon asin kan mga sinasabi sa Bibliya. Halimbawa, sa Ezequiel 18:4, an Bibliya nagsasabi na an kalag nagagadan. Minsan siring, sa Alma 42:9, an Book of Mormon nagsasabi: “An kalag dai nuarin man magagadan.”

Apuwera sa mga kontradiksiyon sa doktrina, napurisaw ako kan nasyonalistikong kaisipan na itinutukdo kan mga Mormon. Halimbawa, itinutukdo sa mga Mormon na an hardin nin Eden yaon sa Jackson County, Missouri, U.S.A. Asin an mga propeta kan simbahan nagsasabi na pag “namahala na an Kahadian nin Diyos, an bandera kan Estados Unidos may pag-orgulyong malupad-lupad na mayo nin digta sa palo kan bandera (flag staff) nin katalingkasan asin pantay-pantay na deretso nin tawo.”

Napaisip ako kun anong mangyayari sa nasyon na namundagan ko patin sa iba pang mga nasyon. Sarong banggi, kan inapudan ako nin sarong hoben na Mormon na sinasanay na magin misyonero, nasambitan ko ini sa saiya. Hinapot ko siya kun andam siyang makipaglaban sa kapwa niya Mormon kun an nasyon kaini makipaggiyera sa nasyon ninda. Nabigla ako kan sabihon niyang iyo! Mas siniyasat ko pa an sakong mga paniniwala asin kinonsulta ko man an may katungdan na mga lider sa Mormon Church. Sinabi ninda sa sako na an simbag sa mga hapot ko misteryo asin iyan masisimbag mantang nag-uurog an liwanag.

Nadisganar ako sa paliwanag ninda, kaya siniyasat ko an sakong sadiri asin an dahilan ko kun taano ta gusto kong magin misyonero nin Mormon. Narealisar ko na an sarong dahilan iyo na gusto kong magtabang sa ibang tawo. Naakit man ako sa ideya na pag misyonero ka irerespeto ka kan mga tawo. Pero kun manungod sa Diyos, mayo akong gayong aram dapit sa saiya. Minsan ngani dakul na beses na akong nagbasa nin Bibliya, dai ko talaga iyan napahalagahan. Mayo akong ideya sa katuyuhan nin Diyos para sa daga o sa mga tawo.

Sa pakikipag-adal ko nin Bibliya sa Mga Saksi ni Jehova, kaiba sa mga nanudan ko an pangaran nin Diyos, an nangyayari pag nagadan an saro, asin an papel ni Jesus sa kautuban kan katuyuhan nin Diyos. Nagigin pamilyar na ako ngunyan sa marahayon na librong ini, asin nauugma akong sabihon sa iba an mga nanunudan ko. Haloy ko nang aram na nag-eeksister an Diyos, pero ngunyan puwede ko na siyang kaulayon sa pamibi bilang an pinakadayupot kong Amigo. Nabawtismuhan ako bilang saro sa Mga Saksi ni Jehova kan Hulyo 12, 2004, asin pakalihis nin anom na bulan nagpuon ako sa bilog na panahon na paglilingkod sa Kristiyanong ministeryo.

Sa laog na nin limang taon, naglilingkod ako sa pambilog na kinaban na opisina kan Mga Saksi ni Jehova sa Brooklyn, New York. Lubos akong nauugma na makatabang sa pagprodusir nin mga Bibliya asin mga babasahon na basado sa Bibliya na nakakatabang sa minilyon na tawo sa bilog na daga. Padagos man akong nauugma sa pagtabang sa iba na makanuod manungod sa Diyos.