Ano an Ralaban nin Armagedon?

An ralaban nin Armagedon iyo an pangultimong giyera kan mga gobyerno nin tawo asin kan Diyos. An mga gobyernong ini asin an saindang mga suportador kinokontra an Diyos dawa ngunyan paagi sa pagsayumang magpasakop sa saiyang pamamahala. (Salmo 2:2) An ralaban nin Armagedon an matapos sa pamamahala nin tawo.—Daniel 2:44.

An tataramon na “Armagedon” sarong beses sanang mababasa sa Bibliya, sa Kapahayagan 16:16. Bilang propesiya, ipinapahiling kan Kapahayagan na “sa lugar na sa Hebreo inaapod na Armagedon,” “an mga hadi sa bilog na daga” titiripunon “sa giyera kan dakulang aldaw kan Diyos na Makakamhan sa Gabos.”—Kapahayagan 16:14.

Sairisay an malabanan sa Armagedon? Sa panginginot ni Jesu-Cristo, kaiba an sarong langitnon na hukbo, manggagana sinda laban sa mga kaiwal nin Diyos. (Kapahayagan 19:11-16, 19-21) Kaiba sa mga kaiwal na ini idtong mga nagkokontra sa awtoridad nin Diyos asin idtong mga naglalapastangan sa Diyos.—Ezekiel 39:7.

An Armagedon daw literal na mangyayari sa Middle East? Dai. Bakong sa sarong lugar sana mangyayari an ralaban nin Armagedon kundi sa bilog na daga.—Jeremias 25:32-34; Ezekiel 39:17-20.

Kun minsan, itinatradusir an Armagedon na “Har–Magedon” (sa Hebreo Har Meghiddohnʹ), na nangangahulugan na “Bukid nin Megido.” An Megido sarong siyudad kaidto sa teritoryo kan suanoy na Israel. Sa kasaysayan, may mahalagang mga ralaban na nangyari sa lugar na iyan, kaiba na an pira na nakarekord sa Bibliya. (Hukom 5:19, 20; 2 Hadi 9:27; 23:29) Pero an Armagedon dai puwedeng nanunungod sa literal na lugar harani sa suanoy na Megido. Mayo nin dakulang bukid duman, asin dawa pa iiba an bilog na Hababang Kapatagan nin Jezreel na kataid kaiyan dai magkakaigo duman an gabos na malaban sa Diyos. Imbes, an Armagedon sarong pangyayari sa bilog na kinaban na diyan matarabangan an mga nasyon sa huring pakikipaglaban ninda sa pamamahala nin Diyos.

Ano an magigin sitwasyon sa ralaban nin Armagedon? Dawa ngani dai ta aram kun paano gagamiton nin Diyos an saiyang kapangyarihan, puwede niyang gamiton an mga armas na ginamit niya kaidto—graniso, linog, grabeng pag-uran, kalayo saka asupre, kikilat, asin hilang. (Job 38:22, 23; Ezekiel 38:19, 22; Habakuk 3:10, 11; Zacarias 14:12) Magkakariribong an nagkapira sa mga kaiwal nin Diyos kaya maggagaradanan sinda, pero sa huri, marerealisar ninda na an Diyos talaga an kalaban ninda.—Ezekiel 38:21, 23; Zacarias 14:13.

An Armagedon daw an magigin katapusan kan kinaban? Bako iyan an magigin katapusan kan satong planeta, huling an daga iyo an permanenteng istaran kan mga tawo. (Salmo 37:29; 96:10; Eclesiastes 1:4) Imbes na puhuon an katawuhan, an totoo, ililigtas iyan kan Armagedon huling sarong “dakulang kadaklan” nin mga lingkod nin Diyos an makakaligtas.—Kapahayagan 7:9, 14; Salmo 37:34.

Sa Bibliya, an tataramon na “kinaban” dai lang nanunungod sa daga, kundi kun minsan pati man sa maraot na sosyedad nin tawo na kontra sa Diyos. (1 Juan 2:15-17) Kaya puwede man sabihon na an Armagedon iyo an mapaabot kan “katapusan nin kinaban.”—Mateo 24:3, Magna Banal na Kasuratan (BIC).

Nuarin mangyayari an Armagedon? Kan ipinapakipag-ulay ni Jesus an “dakulang kasakitan” na matatapos sa ralaban nin Armagedon, sinabi niya: “Mapadapit sa aldaw asin oras na iyan, daing siisay man na nakakaaram, maski an mga anghel sa kalangitan o maski an Aki, kundi an Ama sana.” (Mateo 24:21, 36) Pero, ipinapahiling kan Bibliya na an Armagedon mangyayari sa panahon kan dai nahihiling na presensiya ni Jesus, na nagpuon kan 1914.—Mateo 24:37-39.