Ano an Sinasabi kan Bibliya Manungod sa Aborsiyon?

Dai ginamit sa Bibliya an tataramon na “aborsiyon” para ipanungod sa tuyong pagpalaglag. Pero mahihiling sa dakul na teksto sa Bibliya an pagmansay nin Diyos sa buhay nin tawo pati na sa dai pa namumundag na aki.

An buhay regalo hali sa Diyos. (Genesis 9:6; Salmo 36:9) Para saiya, mahalaga an gabos na buhay pati na an buhay kan sarong aki na nasa tulak pa. Kaya kun tuyong ipapalaglag an sarong dai pa namumundag na aki, paggadan na iyan.

Sinasabi kan Katugunan nin Diyos sa mga Israelita: “Kun may mag-iwal asin makulgan ninda an sarong bados tapos napaaki ini na dai pa kabulanan pero mayo nin nagadan, papabayadon an nagkasala kan kantidad na hahagadon sa saiya kan agom kan babayi; asin dapat niyang bayadan an kantidad na itutugot kan mga hukom. Pero kun igwa nin magadan, dapat na magbayad nin buhay sa buhay.”—Exodo 21:22, 23.a

• Nuarin nagpupuon an buhay nin tawo?

• Mapapatawad daw nin Diyos an saro na nagpalaglag?

• Sala daw an aborsiyon kun an buhay kan ina o kan aki nasa peligro?

Para sa Diyos, an buhay nin tawo nagpupuon sa pangingidam. Sa saiyang Tataramon, an Bibliya, pirming ilinaladawan nin Diyos an dai pa namumundag na aki bilang saro nang persona. Pag-isipan an pirang halimbawa na nagpaparisa na para sa Diyos mayong pagkakaiba an buhay kan sarong aki na nasa tulak pa asin kan saro na namundag na.

• Paagi sa pagpasabong, sinabi ni Hading David sa Diyos: “Nahiling ako kan saimong mga mata dawa kan ako embrayo pa.” (Salmo 139:16) Para sa Diyos, buhay na si David dawa kan dai pa siya namumundag.

• Saro pa, aram nin Diyos na tatawan niya nin espesyal na gibuhon si propeta Jeremias bago pa ini ipangaki. Sinabi nin Diyos saiya: “Bago taka pa pinorma sa tulak midbid taka na, asin bago ka pa iminundag pinabanal taka na. Ginibo takang propeta sa mga nasyon.”—Jeremias 1:5.

• Ginamit kan kagsurat kan Bibliya na si Lucas, na sarong doktor, an parehong Griegong tataramon para sa dai pa namumundag na aki saka sa bagong mundag na umboy.—Lucas 1:41; 2:12, 16.

An mga nagpalaglag puwedeng mapatawad nin Diyos. Kun kapareho na ngunyan sa Diyos an pagmansay ninda sa buhay, dai na ninda kaipuhan na makonsiyensiyang marhay. “Si Jehova mahihirakon asin mapagmalasakit . . . Kun gurano kaharayo kan sirangan sa sulnupan, arog man niya kaiyan kaharayong ibinubugtak hali sa sato an satong mga paglapas.”b (Salmo 103:8-12) Papatawadon ni Jehova an gabos na sinserong nagsusulsol sa nagibo nindang mga kasalan, kaiba na an aborsiyon.—Salmo 86:5.

Basado sa sinasabi kan Bibliya manungod sa buhay kan dai pa namumundag na aki, bakong dahilan na magpalaglag an potensiyal na peligro sa salud kan ina o kan aki.

Sa sitwasyon na bihirang mangyari, paano kun sa aldaw nin pangangaki magkaigwa nin emerhensiya na diyan kaipuhan pumili kun kiisay na buhay an ililigtas—kan ina o kan aki? Sa arog kaiyan na sitwasyon, kaipuhan na gumibo nin personal na desisyon an mga imbuwelto kun kiisay na buhay an ililigtas.