Mga Hapot Hale sa mga Parabasa

Sa 2 Corinto 6:​14, siisay an pinapanongdan ni Pablo sa paggamit nia kan terminong “mga dai nagtutubod”?

Sa 2 Corinto 6:​14, mababasa niato: “Dai kamo makipagsakal na bakong timbang sa mga dai nagtutubod.” Kun hehelingon niato an konteksto, risang-risa na nagtataram si Pablo dapit sa mga indibiduwal na malinaw nanggad na bakong miembro kan Kristianong kongregasyon. An pakasabot na ini sinusuportaran kan ibang bersikulo sa Biblia na isinurat an paggamit ni Pablo kan terminong “dai nagtutubod” o “mga dai nagtutubod.”

Halimbawa, sinasagwe ni Pablo an mga Kristiano huli sa pagdolok sa hokoman ‘sa atubangan kan mga dai nagtutubod.’ (1 Corinto 6:6) Digdi, an mga dai nagtutubod iyo an mga huwes na naglilingkod sa sistema kan husgado sa Corinto. Sa ikaduwa niang surat, sinabi ni Pablo na ‘binuta ni Satanas an isip kan mga dai nagtutubod.’ An mga mata kan siring na mga dai nagtutubod ‘natatahoban’ sa maogmang bareta. An mga dai nagtutubod na ini dai nagpaheling nin interes sa paglilingkod ki Jehova, huli ta sa kapinonan ipinaliwanag ni Pablo: “Kun minadolok sinda ki Jehova, an tahob nahahale.”​—2 Corinto 3:16; 4:4.

An nagkapirang dai nagtutubod imbuelto sa paggibo nin katampalasanan o idolatriya. (2 Corinto 6:​15, 16) Minsan siring, bakong gabos nagkokontra sa mga lingkod ni Jehova. May mga nagpapaheling nin interes sa katotoohan. Dakol an may agom na Kristiano asin naoogmang magdanay sa kaibanan ninda. (1 Corinto 7:12-14; 10:27; 14:22-25; 1 Pedro 3:​1, 2) Minsan siring, pirmeng iinaaplikar ni Pablo an terminong “dai nagtutubod” sa mga indibiduwal na, arog kan nasambitan sa enotan, bakong kabtang kan Kristianong kongregasyon, na kompuesto nin “mga nagturubod sa Kagurangnan.”​—Gibo 2:41; 5:14; 8:​12, 13.

An prinsipyo na yaon sa 2 Corinto 6:14 mahalagang giya para sa mga Kristiano sa gabos na aspekto nin buhay asin parate nang kinokotar bilang nagtatao nin madonong na hatol para sa mga Kristiano na naghahanap nin magigin agom. (Mateo 19:4-6) An sarong nagdusay, bautisadong Kristiano may kadonongan na dai naghahanap nin magigin agom sa mga dai nagtutubod, huling an mga prinsipyo sa buhay, pasohan, asin paniniwala kan mga dai nagtutubod laen na marhay kan sa tunay na Kristiano.

Pero kumusta an mga indibiduwal na nag-aadal nin Biblia asin nakikiasosyar sa Kristianong kongregasyon? Kumusta an mga dai pa bautisadong parahayag? Sinda daw mga dai nagtutubod? Dai. An mga indibiduwal na nag-ako kan katotoohan kan maogmang bareta asin dagos-dagos na nag-ooswag pasiring sa pagpabautismo dai maninigong apodon na mga dai nagtutubod. (Roma 10:10; 2 Corinto 4:13) Bago sia mabautismohan si Cornelio inapod na “tawong deboto asin saro na natatakot sa Dios.”​—Gibo 10:2.

Kun siring, madonong daw para sa sarong nagdusay na Kristiano na mag-ilusyon asin mag-agom nin saro na inako na bilang dai pa bautisadong parahayag, huling, sa estriktong pagtaram, an hatol ni Pablo na nakasurat sa 2 Corinto 6:14 dai minaaplikar sa kamugtakan na iyan? Dai, bakong madonong iyan. Taano ta bako? Huli sa direktang hatol na itinao ni Pablo mapadapit sa mga Kristianang balo. Isinurat ni Pablo: “Sia libre nang magpakasal sa siisay man na boot nia, sanang dian sa Kagurangnan.” (1 Corinto 7:39) Kaoyon kan hatol na iyan, sinasadol an nagdusay na mga Kristiano na maghanap nin maaagom sa mga yaon sana “sa Kagurangnan.”

Ano an kahulogan kan pananaram na “sa Kagurangnan” asin kan konektadong pananaram na “ki Cristo”? Si Pablo nagtataram manongod sa mga indibiduwal na yaon “ki Cristo” o “sa Kagurangnan” sa Roma 16:8-10 asin Colosas 4:7. Kun babasahon nindo an mga bersikulong iyan, maheheling nindo na an mga iyan ‘mga kapwa trabahador,’ ‘mga inooyonan,’ ‘namomotan na mga tugang,’ ‘maimbod na mga ministro,’ asin ‘mga kapwa oripon.’

Noarin an saro nagigin “oripon sa Kagurangnan”? Nangyayari iyan kun gikan sa boot niang ginigibo an kaipuhan na gibohon nin sarong oripon asin pinapaindahan an sadiri nia. Si Jesus nagpaliwanag: “Kun an siisay man boot na maglakaw sa hudian ko, paindahan nia an saiyang sadiri asin pasanon an saiyang hariging pasakitan patin padagos na magsunod sa sako.” (Mateo 16:24) An sarong tawo minapoon na sumunod ki Cristo asin lubos na nagpapasakop sa kabotan nin Dios sa panahon na idusay nia an saiyang sadiri sa Dios. Pakatapos kaiyan, ipepresentar nia an saiyang sadiri para sa bautismo asin sia nagigin sarong ordenadong ministro na may inooyonan na kamugtakan sa atubangan ni Jehova Dios.a Kaya, kun siring, an ‘magpakasal dian sa Kagurangnan’ nangangahulogan na mag-agom nin saro na nagpatunay nang sia totoong nagtutubod, sarong nagdusay na “oripon nin Dios asin kan Kagurangnan na Jesu-Cristo.”​—Santiago 1:1.

Dapat na komendaran an sarong tawo na nakikipag-adal sa Biblia sa mga Saksi ni Jehova asin marahay an pag-oswag sa espirituwal. Minsan siring, dai pa sia nagdusay kan sadiri nia ki Jehova asin dai pa nia idinusay an sadiri nia sa sarong buhay nin paglilingkod asin pagsasakripisyo. Naggigibo pa sia nin kinakaipuhan na mga pagbabago. Kaipuhan niang taposon an dakulang mga pagbabago na kalabot sa pagigin nagdusay, bautisadong Kristiano bago nia planohon an saro pang dakulang pagbabago sa buhay, arog kan pag-agom.

Marahay daw na makipag-ilusyonan an sarong Kristiano sa saro na garo baga marahay an pag-oswag sa saiyang pag-adal sa Biblia—na tibaad an intension iyo na maghalat sagkod na mabautismohan ini bago sia magpakasal digdi? Bako. Puedeng maribaraw nanggad an motibo nin sarong inaadalan sa Biblia kun aram nia na an sarong nagdusay na Kristiano gusto siang pakasalan alagad dai iyan gigibohon sagkod na sia dai pa nababautismohan.

Sa parate, an sarong indibiduwal nagigin dai pa bautisadong parahayag sa laog sana nin limitadong lawig nin panahon, sagkod na sia umoswag sa pagpabautismo. Kaya rasonable an hatol na nasambitan sa enotan na mag-agom sana sa Kagurangnan. Pero kumusta an pag-ilusyon sa saro na nasa tama nang edad na mag-agom, nagdakula sa sarong Kristianong pamilya, nagin aktibo sa kongregasyon sa dakol na taon, asin naglilingkod bilang dai pa bautisadong parahayag? Bueno, ano an nakakapogol sa saiya na idusay an saiyang buhay ki Jehova? Taano ta nagduduwaduwa sia? Igwa daw sia nin mga pagduda? Minsan ngani bako siang dai nagtutubod, dai man sia masasabing yaon “sa Kagurangnan.”

Para sa satong kapakinabangan an hatol ni Pablo dapit sa pag-agom. (Isaias 48:17) Kun an magigin mag-agom parehong nagdusay na kan sadiri ninda ki Jehova, an kapanugaan ninda sa lambang saro sa pag-agom igwa nin masarig asin espirituwal na pundasyon. Igwa sinda nin parehong mga prinsipyo sa buhay asin parehong mga pasohan. Dakula an ikinakakontribwir kaini sa maogmang pag-agoman. Dugang pa, paagi sa ‘pagpakasal dian sa Kagurangnan,’ an saro nagpapaheling nin kaimbodan ki Jehova, asin iyan nagbubunga nin nagdadanay na mga bendisyon, huli ta “sa sarong maimbod [si Jehova] mahiro sa kaimbodan.”​—Salmo 18:25.

[Nota sa Ibaba]

[Ritrato sa pahina 31]

“Sa sarong maimbod [si Jehova] mahiro sa kaimbodan”