Suminirang an Liwanag sa Nasyon na Sinisirangan kan Saldang

KAN Setyembre 6, 1926, sarong Hapones na pilgrim (nagbibiyaheng paraataman) sa Estados Unidos an nagbalik sa Hapon bilang misyonero. Sinabat siya duman kan nagsosolong suskritor kan The Watch Tower, na nagbilog nin sarong grupo nin pag-adal sa Bibliya sa Kobe. Kan Enero 2, 1927, nagkaigwa kan inot nindang asembleya an Mga Estudyante sa Bibliya sa siyudad na iyan. May 36 na nag-atender, asin 8 an nabawtismuhan. Marahay na kapinunan iyan, pero paano maipapaabot kan sadit na grupong ini an liwanag kan katotoohan sa Bibliya sa 60 milyon na tawo sa Hapon?

Kan Mayo 1927, an mapamaaging Mga Estudyante sa Bibliya naglansar nin kampanya na magpatotoo sa publiko tanganing ipaisi an sarong serye nin mga pahayag sa Bibliya. Para sa inot na pahayag, na gigibuhon sa Osaka, nagbugtak an mga tugang nin mga karatula para sa bangketa asin nin darakulang billboard sa bilog na siyudad asin nagpadara nin 3,000 na imbitasyon sa prominenteng mga tawo. Nagdistribwir sinda nin 150,000 na handbill asin ipinaisi an pahayag sa panginot na mga diyaryo sa Osaka asin sa 400,000 na tiket sa tren. Sa aldaw kan pahayag, duwang eroplano an pinalayog sa bilog na siyudad, na naghuhulog nin 100,000 na handbill. Napano an Osaka Asahi Hall nin mga 2,300 na tawo na nagduruman tanganing magdangog kan pahayag na “An Kahadian nin Diyos Harani Na.” May mga sangribo pang dai napalaog. Pagkatapos kan pahayag, labing 600 an nagpawalat para sa hapot-simbagan. Sa mga sumunod na bulan, nagkaigwa nin pampublikong mga pahayag basado sa Bibliya sa Kyoto asin sa iba pang mga siyudad sa parteng sulnupan kan Hapon.

Kan Oktubre 1927, nag-areglar an Mga Estudyante sa Bibliya nin mga pahayag sa Tokyo. Tinawan giraray nin imbitasyon an prominenteng mga tawo—kaiba an primer ministro, mga miyembro kan parlamento, asin mga lider nin relihiyon saka mga namumuon sa militar. Naggamit nin mga poster, pag-anunsiyo sa diyaryo, saka nin 710,000 na handbill, asin may total na 4,800 an nag-atender sa tulong pahayag sa kabisera kan Hapon.

Mahalaga an papel kan mga colporteur (payunir) sa pagpaabot kan mensahe kan Kahadian sa kada harong. Napaabutan ni Matsue Ishii, saro sa mga inot na colporteur sa Hapon, asin kan saiyang agom na lalaking si Jizo, an tres-kuarto kan nasyon, puon sa Sapporo na nasa harayong amihanan sagkod sa Sendai, Tokyo, Yokohama, Nagoya, Osaka, Kyoto, Okayama, asin Tokushima. Nagsusulot nin pormal na kimono si Sister Ishii asin an saiyang matuang tugang na babayi na si Sakiko Tanaka kun nagbibisita sa halangkaw na mga opisyal kan gobyerno. Saro sa mga ini an nag-request nin 300 na set kan librong The Harp of God asin Deliverance tanganing ibugtak sa mga librarya kan bilangguan.

Nag-ako si Katsuo asin Hagino Miura nin mga libro hali ki Sister Ishii asin tulos nindang namidbid an katotoohan. Nabawtismuhan sinda kan 1931 asin nagin mga colporteur. Bago kan 1930, inako ni Haruichi asin Tane Yamada, pati kan dakul nindang paryente an mensahe kan Kahadian. Nag-colporteur an pamilyang Yamada, asin an saindang aking babayi na si Yukiko naglingkod sa Bethel sa Tokyo.

Kaidto, mahalon an mga awto asin bakong magayon an mga tinampo. Kaya naggamit si Kazuma Minoura asin an ibang hoben na mga colporteur nin mga harong na de ruweda na mayong makina. Inapod ninda an mga ini na Jehu hali sa sarong maigot na parakaruwahe na nagin saro sa mga hadi kan Israel. (2 Ha. 10:15, 16) An kada saro sa tulong Dakulang Jehu may labang 2.2 metros, may hiwas na 1.9 metros, saka may langkaw na 1.9 metros asin an kada saro magkakaigo an anom na payunir. Ginibo sa sangang opisina kan Hapon an 11 Baby Jehu na ginuguyod nin bisikleta asin igo an duwang tawo. Nagigirumduman ni Kiichi Iwasaki, na nagtabang sa paggibo nin mga Jehu, na an kada Jehu may tigsararong tent saka bateriya nin awto para sa mga ilaw. Pinasirang kan mga colporteur an liwanag kan katotoohan sa bilog na Hapon, paagi sa pagtulod asin pagbutong kan mga Jehu paitaas saka paibaba sa kabukidan asin pabalyo sa mga kababan puon sa amihanan na Hokkaido sagkod sa Kyushu sa timog.

Sinabi kan colporteur na si Ikumatsu Ota: “Pag-abot mi sa sarong banwaan, ipinupuwesto mi an samong Jehu sa pangpang nin salog o sa kapatagan. Binibisita mi nguna an prominenteng mga tawo sa banwaan, arog kan alkalde, dangan maharong-harong na kami tanganing ipahiling an mga literatura mi. Pag natapos na an teritoryo, minabalyo na kami sa sunod na banwaan.”

Saro idtong “aldaw kan saradit na kapinunan” kan an grupong idto nin 36 na Mga Estudyante sa Bibliya sa Kobe magkaigwa kan inot nindang asembleya. (Zac. 4:10, An Banal na Biblia) Pakalihis sana nin limang taon—kan 1932—103 na colporteur asin parahayag sa Hapon an nagreport kan nagibo ninda asin nakapasakamot nin 14,000 na libro. Ngunyan, igwang organisadong marhay na pagpapatotoo sa publiko na ginigibo sa darakulang siyudad sa Hapon, asin haros 220,000 na parahayag an nagpapasirang kan saindang liwanag sa bilog na Nasyon na Sinisirangan kan Saldang.—Hali sa samong archive sa Hapon.