Omawon si Jehova “sa Tahaw kan Kongregasyon”

AN Kristianong mga pagtiripon probisyon hale ki Jehova tanganing papagdanayon na makosog sa espirituwal an saiyang banwaan. Paagi sa regular na pag-atender sa mga pagtiripon, ipinaheheling niato an satong pag-apresyar sa mga probisyon ni Jehova. Dugang pa, pinapangyari kitang “mandagka [sa satong mga tugang] sa pagkamoot asin sa marahay na mga gibo,” na mahalagang paagi nin pagpaheling nin pagkamoot sa lambang saro. (Hebreo 10:24; Juan 13:35) Pero, paano niato madadagka an satong mga tugang sa mga pagtiripon?

Magpahayag sa Publiko

Si Hadeng David nagsurat manongod sa saiyang sadiri: “Ipapahayag ko an saimong ngaran sa sakong mga tugang; sa tahaw kan kongregasyon ika oomawon ko. Saimo hale an sakong pag-omaw sa dakulang kongregasyon.” “Pamumurawayon taka sa dakulang kongregasyon; sa tahaw kan dakulang banwaan oomawon taka.” “Isinabi ko an maogmang bareta nin katanosan sa dakulang kongregasyon. Uya! Dai ko pinopogolan an sakong mga ngabil.”​—Salmo 22:​22, 25; 35:18; 40:9.

Kan kaaldawan ni apostol Pablo, kun an mga Kristiano nagtitiripon para sa pagsamba, sinda nagpapahayag man kan saindang pagtubod ki Jehova asin manongod sa saiyang kamurawayan. Sa paaging ini sinda nagpaparinigonan nin boot asin nandadagka sa lambang saro sa pagkamoot asin sa marahay na mga gibo. Sa satong kaaldawan, dakol na siglo pakalihis ki David sagkod ki Pablo, talagang “naheheling [niato] na an aldaw [ni Jehova] harani na.” (Hebreo 10:​24, 25) An sistema nin mga bagay ni Satanas nagriripaydipay pasiring sa pagkalaglag, asin an mga problema padagos na nagdadakula. Orog kasuarin man kaidto, kita ‘nangangaipo nin pakatagal.’ (Hebreo 10:36) Kun bakong an satong mga tugang, siisay pa an puedeng makaenkaminar sa sato na magtagal?

Ngonyan, arog kan mas naenot na mga panahon, may ginigibong mga probisyon para sa mga indibiduwal na may pagtubod na ipahayag an saindang pagtubod “sa tahaw kan kongregasyon.” An sarong oportunidad na bukas sa gabos iyo an pagtao nin komento bilang simbag sa mga hapot sa mga nagdadangog sa mga pagtiripon kan kongregasyon. Nungkang menoson an pakinabang kaini. Halimbawa, an mga komento na nagpapaheling kun paano mapanggaganahan o malilikayan an mga problema nagpapakosog sa determinasyon kan satong mga tugang na sunodon an mga prinsipyo sa Biblia. An mga komento na nagpapaliwanag sa sitado alagad bakong kotadong mga teksto sa Biblia o na iiniiba an mga ideya na nanodan sa personal na pagsiyasat tibaad makaenkaminar sa iba na pataluboon an mas marahay na ugale sa pag-adal.

An pakaaram na kita asin an iba makikinabang kun kita makomento sa mga pagtiripon maninigong magmotibar sa gabos na Saksi ni Jehova na labanan an pagkamasusupgon asin pagduwaduwa. Espesyalmenteng mahalaga na magkomento sa mga pagtiripon an kamagurangan asin mga ministeryal na lingkod, mantang linalaoman na sinda an mangengenot sa pakikikabtang sa pagtiripon, saka sa pag-atender. Pero paano puedeng umoswag an sarong indibiduwal kun madiskobre nia na nadedepisilan sia sa partikular na aspektong ini kan saiyang Kristianong aktibidad?

Mga Suhestion sa Pag-oswag

Girumdomon na kalabot si Jehova. An sarong Kristiana na nag-iistar sa Alemania nagpapaliwanag kun paano nia minamansay an saiyang mga komento. “Iyan an sako mismong personal na simbag sa pagprobar ni Satanas na pogolan an banwaan nin Dios na ipahayag an saindang pagtubod.” An sarong bagong mabautismohan na tugang na lalaki na asosyado sa iyo man sanang kongregasyon nagsabi: “Kun mapadapit sa pagkomento, grabe an pamibi ko.”

Mag-andam na marhay. Kun an materyal dai nindo napag-adalan antes pa, manonompongan nindo na depisil magkomento asin an saindong mga komento daing gayo magigin epektibo. An mga suhestion sa pagkomento sa mga pagtiripon kan kongregasyon itinao sa publikasyon na Makinabang sa Edukasyon sa Teokratikong Paadalan sa Pagmiministro, pahina 70.a

Magbugtak nin pasohan na makatao nin kisuerra sarong komento sa kada pagtiripon. Nangangahulogan ini nin pag-andam nin nagkapirang simbag, huling kun mas parate kamong nag-iitaas nin kamot, mas may posibilidad na maaapod kamo kan tugang na nangengenot. Tibaad ngani gusto nindong sabihon sa saiya antes pa kun arin na mga hapot an inandam nindong simbagon. Ini partikularmenteng nakatatabang kun kamo nagpopoon pa sana. Huling tibaad nag-aalangan kamong mag-itaas nin kamot “sa dakulang kongregasyon,” maeenkaminar kamong magkomento huling aram nindo na ini na an parapo na may iinandam kamong simbag asin na hahanapon kan namamayo sa pagtiripon an saindong kamot.

Magkomento nin amay. An depisil na gigibohon dai nagigin mas pasil kun pahahaloyon iyan. An pagkomento nin amay sa pagtiripon puedeng makatabang. Masosorpresa kamo kun gurano kapasil nanggad na magkomento sa ikaduwa o ikatolong beses oras na matapos nindo an enot nindong komento.

Pumili nin angay na tukawan. Mas pasil para sa nagkapira na magkomento kun sinda nakatukaw sa may enotan kan Kingdom Hall. Mas dikit an disturbo, asin dikit an posibilidad na malipasan sinda kan namamayo. Kun poprobaran nindo ini, girumdomon na magtaram nin igo an kosog tanganing madangog kan gabos, nangorogna kun an kongregasyon dai naggagamit nin ipinapasang mikropono.

Maghinanyog nin maingat. Ini makatatabang saindo na malikayan an pag-otro kan sinabi pa sana kan iba. Siring man, an ikinomento kan iba tibaad magpagirumdom sa saindo nin sarong teksto o sarong punto na puedeng idugang sa ideyang ipinahayag pa sana. Kun minsan, an sarong halipot na eksperyensia tibaad ikailustrar an puntong pinag-oolayan. Nakatatabang na marhay an siring na mga komento.

Makanood na sumimbag sa sadiri nindong mga tataramon. An pagbasa kan komento hale sa pinag-aadalan tibaad magparisa na nakua nindo an tamang simbag, asin iyan tibaad marahay na paagi na makapoon sa pagkomento. Alagad an pag-oswag na makasimbag sa sadiri nindong mga tataramon nagpapaheling na nasasabotan nindo an punto. An satong mga publikasyon dai kaipuhan na kotaron nin termino por termino. An Mga Saksi ni Jehova dai inootro sana an sinasabi kan saindang mga publikasyon.

Magkomento na konektado sa tema. Bakong maninigo an mga komento na mayong koneksion sa tema o minarayo sa prinsipal na mga puntong tinotokar. Nangangahulogan ini na an saindong mga komento maninigong pertinente sa temang tinotokar. Kun siring makakokontribwir iyan sa nakapakokosog sa espirituwal na pagtokar kan temang pinag-oolayan.

Gibohon na obheto an magparigon nin boot. Mantang an sarong mahalagang dahelan sa pagkokomento iyo an maparigon an boot kan iba, dapat na pagmaigotan niatong likayan an pagsabi nin mga bagay na tibaad makadesganar sa sainda. Dugang pa, dai pag-uboson na komentohan an parapo kaya kakadikit o mayo nang natatadang ikokomento an iba. An halaba o komplikadong mga simbag puedeng magpalibog sa kahulogan. An haralipot na simbag na kompuesto nin pira sanang tataramon puedeng magin epektibong marhay, asin eenkaminaron kaiyan an mga bagohan na magtao kan halipot nindang mga simbag.

An Kabtang kan mga Namamayo sa mga Pagtiripon

Kun manongod sa pagigin nakaparirigon sa boot, may magabat na paninimbagan an namamayo sa pagtiripon. Sia nagpapaheling nin tunay na interes sa lambang itinataong komento paagi sa maingat na paghinanyog asin paagi sa magalang na pagheling sa nagkokomento imbes na magin sibot sa ibang bagay. Bako nanggad na angay kun sia dai naghinanyog nin maingat asin, bilang resulta, naotro nia nin dai man kuta kaipuhan an kasasabi pa sana o nagpalataw sia nin hapot na kasisimbag pa sana!

Nakapanluluya man sa boot kun an namamayo pirmeng inootro an ikinomento pa sana na sinasalidahan sana nin kadikit an mga tataramon, na garo baga nagsusuherir na maski paano kulang an ikinomento. Sa ibong na lado, nakaparirigon nanggad sa boot kun an mga komento nagkokontribwir sa dugang pang pagtokar sa mahalagang punto. ‘Paano niato ini ikakaaplikar sa satong kongregasyon?’ o, ‘Arin na teksto sa parapo an ikasusuportar sa isinabi pa sana?’ an klase nin mga hapot na nag-eenkaminar nin positibong mga komento, na kapakipakinabang na marhay.

Siempre, an mga bagohan o masusupgon maninigo na espesyalmenteng komendaran kun sinda nagkokomento. Puede ining gibohon nin personal pagkatapos kan pag-adal tanganing malikayan an tibaad pagkasupog asin tanganing magkaoportunidad an namamayo na magtao nin mga suhestion kun angay.

Sa ordinaryong pag-orolay, an tawong iyo na sanang nagpaparataram nagdedesganar nin komunikasyon. An mga nagdadangog sa saiya nakakamateng dai na ninda kaipuhan na ipahayag an saindang saboot. Daing kaganagana na sana sindang magdadangog kun talagang magdadangog sinda. Arog man kaiyan an tibaad mangyari kun an namamayo na sana an nagpaparataram paagi sa parateng marhay na pagkomento. Minsan siring, kun minsan puedeng enganyaron kan namamayo sa pagtiripon na magtaram an mga nag-aatender asin pukawon an saindang kaisipan sa pinag-oolayan paagi sa suplementaryong mga hapot. An siring na mga hapot maninigong gamiton nin tama sana.

Dai man pirmeng aapodon kan namamayo an enot na mag-itaas kan saiyang kamot. Ini puedeng makadesganar sa mga nangangaipo pa nin kadikit na panahon tanganing bilogon sa isip ninda an ikokomento. Paagi sa paghalat nin kadikit, matatawan nia nin oportunidad an dai pa nakapagkomento. Mapaheling man sia nin pakamansay paagi sa dai pag-apod sa saradit na aki na simbagon an mga hapot manongod sa mga temang dai ninda nasasabotan.

Paano kun sala an isinimbag? Maninigong likayan kan namamayo na supogon an nagsimbag. An mga komento, dawa kun sala, sa parate minsan paano may kadikit na tama. Paagi sa mataktikang pagpili nin sarong bagay na tibaad tama, paagi sa pagbago kan hapot, o paagi sa pagpalataw nin dugang pang hapot, ikakokorehir kan namamayo an simbag na mayo nin mapapasupog.

Tanganing makapag-enkaminar na magkomento, maninigong likayan kan namamayo sa pagtiripon an mga pankagabsan na mga hapot, arog kan, ‘Siisay pa an may komento?’ An hapot na, ‘Siisay an dai pa nagkokomento? Ini na an huring oportunidad nindo!’ tibaad may marahay na intension, alagad dai nanggad kaiyan eenkaminaron an saro na ipahayag an saiyang saboot. Maninigo na dai ipamate sa mga tugang na sinda may sala huli sa dai pagkomento sa kapinonan kan pag-adal. Imbes, maninigo na enkaminaron sindang ihiras an naaaraman ninda huli ta an paghiras kapahayagan nin pagkamoot. Dugang pa, pagkatapos apodon kan namamayo an saro na magkomento, mas marahay na dai magsabing, “Pagkatapos nia, dangogon niato an komento ni Tugang na Polano dangan an komento ni Tugang na Polana.” Maninigo ngunang dangogon kan namamayo an komento dangan determinaran kun kaipuhan an dugang pang komento.

An Pagkomento Sarong Pribilehio

An pag-atender sa Kristianong mga pagtiripon sarong espirituwal na pangangaipo; an pagkomento dian sarong pribilehio. Kun sagkod saen kita nakikikabtang sa daing kaagid na paaging ini nin pag-omaw ki Jehova “sa tahaw kan kongregasyon,” sagkod man dian niato sinusunod an halimbawa ni David asin sineseryoso an hatol ni Pablo. An satong pakikikabtang sa mga pagtiripon nagpapatunay na namomotan niato an satong mga tugang asin na kita kabtang kan dakulang kongregasyon ni Jehova. Saen pa nindo gustong dumuman mantang “naheheling nindo na an aldaw harani na”?​—Hebreo 10:25.

[Nota sa Ibaba]

[Mga Ritrato sa pahina 20]

An paghinanyog sagkod pagkomento mahalaga sa Kristianong mga pagtiripon

[Ritrato sa pahina 21]

An namamayo nagpapaheling nin tunay na interes sa lambang komento