Lubos daw Kamong Nakakanood ki Jehova?

1. Ano an pagmansay ni Jehova manongod sa pagtotokdo?

¹ Gusto ni Jehova, an satong “Kaharohalangkaweng Instruktor,” na kita matokdoan. (Isa. 30:20, NW) Nagpoon siang magtokdo pagkalalang nia sa saiyang panganay na Aki. (Juan 8:28) Pagkatapos kan pagrebelde ni Adan, si Jehova dai nagpondo sa pagtotokdo, kundi sia mamomoton na nagtao nin instruksion sa bakong perpektong mga tawo.—Isa. 48:17, 18; 2 Tim. 3:14, 15.

2. Anong kampanya nin pagtotokdo an isinasagibo ngonyan?

² Ngonyan, dinidirehiran ni Jehova an pinakadakulang kampanya nin pagtotokdo sa kasaysayan. Arog kan ihinula ni Isaias, minilyon na tawo sa bilog na kinaban an mapasiring sa piguratibong “bukid kan harong ni Jehova.” (Isa. 2:2) Taano ta maninigo kitang magduman? Tanganing matokdoan sa mga dalan nin Dios, iyo, tanganing matokdoan ni Jehova! (Isa. 2:3) Durante kan 2010 na taon nin paglilingkod, an Mga Saksi ni Jehova naggamit nin labing 1.6 bilyon na oras sa paghuhulit asin pagtotokdo sa mga tawo kan katotoohan sa Biblia. Dugang pa, may espirituwal na pagtotokdo kada semana sa labing 105,000 na kongregasyon sa bilog na daga, asin an maimbod asin mapagmansay na oripon nagpupublikar nin nakakapagtokdong Kristianong mga publikasyon sa labi nang 500 na lenguahe.

3. Paano kamo personalmenteng nakinabang sa pagtotokdo ni Jehova?

³ Lubos na Makinabang: Talagang nakikinabang kita sa pagtotokdo nin Dios! Nanodan niato na an Dios may ngaran asin na sia nagmamakolog sa sato. (Sal. 83:18; 1 Ped. 5:6, 7) Nanodan niato an mga simbag sa nagkapira sa pinakamahalagang mga hapot sa buhay: Taano ta nagsasakit asin nagagadan an mga tawo? Paano ako makakanompong nin tunay na kaogmahan? Ano an katuyohan nin buhay? Tinawan man kita ni Jehova nin paggiya sa moral tanganing magin mapanggana o ‘mapakarahay an satong dalan.’—Jos. 1:8.

4. Kun dapit sa pag-ako nin pagtotokdo, anong mga oportunidad an bukas sa mga lingkod nin Dios, asin taano ta maninigo na lubos kitang makanood ki Jehova?

⁴ Dugang pa, nagtatao si Jehova nin espesyal na pagtotokdo tanganing tabangan an dakol na lingkod nia na mapahiwas an saindang paglilingkod sa saiya. Nakalista sa pahina 4-6 an mga oportunidad na bukas sa nagkapira. Dawa kun mayo kita sa kamugtakan na mag-ako kan pagsasanay na yaon sa lista, lubos daw niatong inaaprobetsaran an pagtotokdo nin Dios na bukas sa sato? Imbes na an mga hoben magpadara sa parateng pang-iimpluwensia kan mga maestra asin iba pa na aboton an halangkaw na edukasyon kan kinaban, dinadagka daw niato sinda na magkaigwa nin espirituwal na mga pasohan asin pagmaigotan na aboton an pinakahalangkaw na edukasyon—an edukasyon, o pagtotokdo, na hale sa Dios? An lubos niatong pakanood ki Jehova matabang sa sato na magkaigwa nin maogmang buhay ngonyan asin nin buhay na daing katapusan sa maabot.—Sal. 119:105; Juan 17:3.

Mga Pagtotokdo na Bukas Paagi sa Organisasyon ni Jehova

Klase Para sa Pagbasa Asin Pagsurat

Katuyohan: Tokdoan an mga tawo kun paano magbasa asin magsurat tanganing personal nindang mapag-adalan an Biblia asin ikatokdo ninda sa iba an katotoohan.
Lawig: Segun sa pangangaipo.
Lugar: Lokal na Kingdom Hall.
Kun Siisay an Puedeng Mag-atender: An gabos na parahayag asin interesadong tawo.
Kun Paano Mag-aplay: An mga elder sa kongregasyon nag-oorganisar nin klase para sa pagbasa asin pagsurat segun sa lokal na pangangaipo, asin dinadagka nindang umatender an gabos na puedeng makinabang.

Teokratikong Paadalan sa Pagmiministro

Katuyohan: Sanayon an mga parahayag na magin epektibong mga parahulit asin paratokdo kan maogmang bareta.
Lawig: Dagos-dagos.
Lugar: Lokal na Kingdom Hall.
Kun Siisay an Puedeng Magpalista: An gabos na parahayag. Siring man, an iba na aktibong nakikiasosyar sa kongregasyon, na minaoyon sa mga katokdoan kan Biblia, asin an buhay kaoyon nin Kristianong mga prinsipyo.
Kun Paano Mag-aplay: Makipag-olay sa paraataman kan Teokratikong Paadalan sa Pagmiministro.

Klase Para sa Pag-adal nin Ibang Lenguahe

Katuyohan: Tokdoan an mga parahayag kun paano ihulit an maogmang bareta sa ibang lenguahe.
Lawig: Apat o limang bulan. Sa parate, ginigibo an klase kada Sabado nin aga sa laog nin saro o duwang oras.
Lugar: Sa parate, ginigibo iyan sa sarong haraning Kingdom Hall.
Kun Siisay an Puedeng Magpalista: Mga parahayag na marahay an kamugtakan sa espirituwal asin nagmamawot na maghulit sa ibang lenguahe.
Kun Paano Mag-aplay: Iinaareglo kan sangang opisina an mga klase segun sa pangangaipo.

Pagtogdok nin Kingdom Hall

Katuyohan: Magtogdok asin maghirahay nin mga Kingdom Hall. Bako ining paadalan, alagad sa areglong ini an mga boluntaryo tinotokdoan nin manlaenlaen na kakayahan tanganing makatabang sinda sa mga proyekto nin pagtogdok.
Lawig: Segun sa kamugtakan kan boluntaryo.
Lugar: Saen man na lugar na sakop kan Regional Office kan Kingdom Hall Construction Desk. An nagkapirang boluntaryo tibaad imbitaran na magtabang sa pag-ayuda sa mas harayong lugar na naapektaran nin kalamidad.
Kualipikasyon: Bautisadong mga lalaki asin babae na inaprobaran kan grupo nin kamagurangan. Puedeng igwa o mayo nin kakayahan sa pagtogdok.
Kun Paano Mag-aplay: Isurat an hinahagad na impormasyon sa form na Application for Kingdom Hall Construction Volunteer Program (A-25) na itinatao kan paraataman nin sirkito o puedeng hagadon sa sangang opisina.

Paadalan sa Paglilingkod Bilang Payunir

Katuyohan: Tabangan an mga payunir na ‘lubos na otobon an saindang ministeryo.’—2 Tim. 4:5, NW.
Lawig: Duwang semana.
Lugar: An sangang opisina an nagdedesisyon; sa parate, ginigibo iyan sa haraning Kingdom Hall.
Kualipikasyon: Nakapagregular payunir na nin kisiera sarong taon.
Kun Paano Magpalista: An kualipikadong mga payunir automatikong ilinilista asin iniimpormaran kan saindang paraataman nin sirkito.

Paadalan Para sa mga Bagong Laog sa Bethel

Katuyohan: An paadalan na ini dinisenyo tanganing tabangan an mga bagong laog sa Bethel na magin mapanggana sa saindang paglilingkod sa Bethel.
Lawig: Sarong oras kada semana sa laog nin desisais na semana.
Lugar: Bethel.
Kualipikasyon: Permanenteng miembro kan pamilyang Bethel o panghaloyan na temporary volunteer (sarong taon o labi pa).
Kun Paano Magpalista: An kualipikadong mga miembro kan pamilyang Bethel automatikong ilinilista.

Pang-Kahadean na Paadalan sa Pagmiministro

Katuyohan: Sanayon an mga elder asin ministeryal na lingkod na asikasohon an saindang pinangangatamanan asin mga paninimbagan sa organisasyon. (Gui. 20:28, NW) Ginigibo an paadalan na ini kada pirang taon segun sa desisyon kan Namamahalang Grupo.
Lawig: Kan nakaaging mga taon, iyan ginigibo nin saro may kabangang aldaw para sa mga elder asin sarong aldaw para sa mga ministeryal na lingkod.
Lugar: Sa parate, ginigibo iyan sa haraning Kingdom Hall o Assembly Hall.
Kualipikasyon: Elder o ministeryal na lingkod.
Kun Paano Magpalista: An kualipikadong mga elder asin ministeryal na lingkod iniimbitaran kan paraataman nin sirkito.

Paadalan Para sa mga Magurang sa Kongregasyona

Lawig: Limang aldaw.
Lugar: An sangang opisina an nagdedesisyon; sa parate, ginigibo iyan sa haraning Kingdom Hall o Assembly Hall.
Kualipikasyon: Elder.
Kun Paano Magpalista: An kualipikadong mga elder iniimbitaran kan sangang opisina.

School for Traveling Overseers and Their Wivesb

Katuyohan: Tabangan an mga paraataman nin sirkito asin distrito na magin mas epektibo sa paglilingkod sa mga kongregasyon asin na ‘magpagal sa tataramon asin pagtokdo’ saka pastoran an mga nasa pangangataman ninda.—1 Tim. 5:17; 1 Ped. 5:2, 3.
Lawig: Duwang bulan.
Lugar: An sangang opisina an nagdedesisyon.
Kualipikasyon: Paraataman nin sirkito o distrito.
Kun Paano Magpalista: An kualipikadong nagbibiaheng mga paraataman asin an saindang agom iniimbitaran kan sangang opisina.

Bible School for Single Brothersc

Katuyohan: Andamon an mga elder asin ministeryal na lingkod na mayong agom para sa dugang pang mga paninimbagan. An kadaklan sa mga naggradwar iaasignar sa mga lugar sa saindang nasyon na igwa nin pangangaipo. An nagkapira puedeng tawan nin asignasyon sa ibang nasyon kun sasabihon ninda sa sangang opisina na sinda andam na maglingkod duman.
Lawig: Duwang bulan.
Lugar: An sangang opisina an nagdedesisyon; sa parate, ginigibo iyan sa haraning Assembly Hall o Kingdom Hall.
Kualipikasyon: Mayong agom na mga brother na an edad nasa pag-oltanan nin 23 asin 62 anyos, asin igwa nin marahay na salud saka nagmamawot na maglingkod sa mga tugang patin paoswagon an intereses kan Kahadean saen man may pangangaipo. (Mar. 10:29, 30) Dapat na naglilingkod sinda sa saindang nombradong katongdan nin dai mababa sa duwang magkasunod na taon.
Kun Paano Mag-aplay: Kun igwa nin paadalan na ini sa teritoryo kan saindong sangang opisina, sarong miting para sa mga interesadong magpalista an ginigibo sa pansirkitong asamblea. Igwa nin dugang pang impormasyon na itinatao sa miting na ini.

Bible School for Christian Couplesd

Katuyohan: Tawan an mga mag-agom nin espesyal na pagsasanay tanganing mas lubos sindang magamit ni Jehova asin kan saiyang organisasyon. An kadaklan sa mga naggradwar iaasignar sa mga lugar sa saindang nasyon na igwa nin pangangaipo. An nagkapira puedeng tawan nin asignasyon sa ibang nasyon kun sasabihon ninda sa sangang opisina na sinda andam na maglingkod duman.
Lawig: Duwang bulan.
Lugar: An enot na pirang klase ginigibo ngonyan sa Watchtower Educational Center sa Patterson, New York, U.S.A. Pagkatapos kaiyan, gigibohon an klaseng ini sa mga lugar na pipilion kan sangang opisina, sa parate, sa sarong Assembly Hall o Kingdom Hall.
Kualipikasyon: Mga mag-agom na an edad nasa pag-oltanan nin 25 asin 50 anyos, asin may marahay na salud saka nasa kamugtakan na maglingkod saen man may pangangaipo patin igwa kan saboot na: “Uya ako, sogoa ako.” (Isa. 6:8) Dugang pa, sinda dapat kisiera duwang taon nang mag-agom asin sa presente nasa bilog na panahon na paglilingkod nin dai mababa sa duwang magkasunod na taon.
Kun Paano Mag-aplay: Kun igwa nin paadalan na ini sa teritoryo kan saindong sangang opisina, sarong miting para sa mga interesadong magpalista an gigibohon sa aldaw nin espesyal na asamblea. Igwa nin dugang pang impormasyon na itinatao sa miting na ini.

Paadalan sa Biblia kan Watchtower sa Gilead

Katuyohan: Sanayon an mga payunir asin an iba pang bilog na panahon na mga lingkod para sa pagmimisyonero.
Lawig: Limang bulan.
Lugar: Watchtower Educational Center, Patterson, New York, U.S.A.
Kualipikasyon: Mga mag-agom na tolong taon nang bautisado asin an edad nasa pag-oltanan nin 21 asin 38 anyos sa panahon na isumitir ninda an enot nindang aplikasyon. Sinda dapat na nakakataram nin Ingles, kisiera duwang taon nang mag-agom, asin sa presente nasa bilog na panahon na paglilingkod nin dai mababa sa duwang magkasunod na taon. An mga aplikante dapat may marahay na salud. An mga payunir na naglilingkod sa ibang nasyon (pati an mga may missionary status); nagbibiaheng mga paraataman; mga miembro kan pamilyang Bethel; asin an mga naggradwar sa Paadalan sa Ministeryal na Pagsasanay, Bible School for Single Brothers, saka Bible School for Christian Couples puede man mag-aplay kun naabot ninda an mga kualipikasyon.
Kun Paano Mag-aplay: Sa piling mga sangay, may miting para sa mga interesado sa paadalan na ini sa pandistritong kombension. Igwa nin dugang pang impormasyon na itinatao sa miting na ini. Kun mayo nin miting sa mga kombension sa saindong nasyon asin mawot nindong mag-aplay, puede kamong magsurat sa sangang opisina para sa dugang pang impormasyon.

School for Branch Committee Members and Their Wives

Katuyohan: Tabangan an mga naglilingkod sa Komite kan Sangay na maasikaso nin mas marahay an pagmanehar sa mga erokan na Bethel, pagtao nin atension sa mga bagay dapit sa paglilingkod na kalabot an mga kongregasyon, asin pangangataman sa mga sirkito asin distrito sa kanya-kanya nindang teritoryo, saka an pagtradusir, pag-imprenta, asin pagpaktora nin mga literatura asin pangangataman sa manlaenlaen na departamento.—Luc. 12:48b.
Lawig: Duwang bulan.
Lugar: Watchtower Educational Center, Patterson, New York, U.S.A.
Kualipikasyon: Miembro nin Komite kan Sangay o Komite kan Nasyon o inasignaran na magin siring.
Kun Paano Mag-aplay: An kualipikadong mga brother asin an saindang agom iniimbitaran kan Namamahalang Grupo.

a Sa presente, an paadalan na ini bakong bukas sa gabos na nasyon.

b Sa presente, an paadalan na ini bakong bukas sa gabos na nasyon.

c Sa presente, an paadalan na ini bakong bukas sa gabos na nasyon.

d Sa presente, an paadalan na ini bakong bukas sa gabos na nasyon.