Mga Hapot Hale sa mga Parabasa

Ano an boot sabihon ni apostol Pablo kan sabihon nia na an mga babae maninigong “magdanay na daing girong sa mga kongregasyon”?

Si Pablo nagsurat sa Kristianong kongregasyon sa Corinto: “Arog kan sa gabos na kongregasyon kan mga banal, an mga babae magdanay na daing girong sa mga kongregasyon, huli ta dai itinotogot na sinda magtaram.” (1 Corinto 14:​33, 34) Tanganing masabotan niato ini nin tama, makakatabang na estudyaran niato an konteksto kan hatol ni Pablo.

Sa 1 Corinto kapitulo 14, tinokar ni Pablo an mga bagay na may koneksion sa mga pagtiripon kan Kristianong kongregasyon. Isinabi nia kun ano an maninigong tokaron sa arog kaiyan na mga pagtiripon asin irinekomendar nia kun paano iyan maninigong pamayohan. (1 Corinto 14:1-6, 26-34) Dugang pa, idinoon nia an obheto kan Kristianong mga pagtiripon​—“tanganing an kongregasyon mag-ako nin pamparigon.”​—1 Corinto 14:​4, 5, 12, 26.

An instruksion ni Pablo na “magdanay na daing girong” minalataw nin tolong beses sa 1 Corinto kapitulo 14. Sa kada paglataw kaiyan, ipinapanongod iyan sa laen na grupo sa kongregasyon, alagad sa gabos na pangyayari, itinatao iyan sa iyo man sanang dahelan​—tanganing “an gabos na bagay mangyari sa disente asin aregladong paagi.”​—1 Corinto 14:40.

Enot, si Pablo nagsabi: “Kun may nagtataram sa ibang tataramon, magkaigwa sana nin duwa o dai lumabi sa tolo, asin turno-turno; asin may magtradusir. Alagad kun mayo nin paratradusir, magdanay siang daing girong sa kongregasyon asin magtaram sa sadiri nia asin sa Dios.” (1 Corinto 14:​27, 28) Dai iyan nangangahulogan na an siring kaiyan na tawo dai noarin man mataram sa mga pagtiripon kundi may mga panahon na maninigo siang dai maggirong. Ta an obheto kan mga pagtiripon​—na magpakinorosogkosogan​—​dai makakamit kun sia mataram sa lenguahe na mayo nin siisay man na nakakasabot.

Ikaduwa, si Pablo nagsabi: “Pabayaan an duwa o tolong propeta na magtaram, asin saboton kan iba an kahulogan. Alagad kun igwa nin kapahayagan sa saro pa mantang nagtutukaw duman, an naenot magdanay na daing girong.” An kahulogan kaini, bako na an naenot na propeta dai na mataram sa mga pagtiripon, kundi may mga panahon na sia dai magirong. Sa siring, an saro na igwa nin milagrosong kapahayagan makakapagtaram sa kongregasyon, asin magigibo an obheto kan pagtiripon​—na “an gabos maparigon an boot.”​—1 Corinto 14:​26, 29-31.

Ikatolo, an mga Kristiana sana an kinaolay ni Pablo, na nagsasabi: “An mga babae magdanay na daing girong sa mga kongregasyon, huli ta dai itinotogot na sinda magtaram, alagad magpasakop sinda.” (1 Corinto 14:34) Taano ta itinao ni Pablo an pagboot na ini sa mga tugang na babae? Tanganing mapagdanay an areglo sa kongregasyon. Sia nagsasabi: “Kun siring, kun may boot sindang maaraman, hapoton ninda an saindang agom na lalaki sa harong, huli ta makasusupog sa sarong babae na magtaram sa kongregasyon.”​—1 Corinto 14:35.

Tibaad may mga tugang na babae na kinukuestion an sinasabi sa kongregasyon. An hatol ni Pablo nakatabang sa mga tugang na babae na likayan an arog kaiyan na bakong toltol na aktitud asin mapakumbabang akoon an saindang posisyon sa laog kan areglo ni Jehova sa pagkapayo, partikularmente mapadapit sa saindang mga agom na lalaki. (1 Corinto 11:3) Dugang pa, paagi sa pagdadanay na daing girong, ipinapaheling kan mga tugang na babae na dai sinda nagmamawot na magin mga paratokdo sa kongregasyon. Kan sia magsurat ki Timoteo, ipinaheling ni Pablo na bakong tama na an sarong babae magkapot nin katongdan nin paratokdo: “Dai ako minatogot na an babae magtokdo, o magkapot nin autoridad sa lalaki, kundi dai maggirong.”​—1 Timoteo 2:12.

Nangangahulogan daw iyan na an sarong Kristiana dai noarin man dapat na magtaram durante nin sarong pagtiripon kan kongregasyon? Dai. Kan kaaldawan ni Pablo, may mga okasyon na an mga Kristiana, na tibaad pinahiro kan banal na espiritu, namibi o naghula sa kongregasyon. Sa arog kaiyan na mga okasyon, rinerekonoser ninda an saindang posisyon paagi sa pagkolbong.a (1 Corinto 11:5) Dugang pa, kan kaaldawan ni Pablo asin ngonyan, an mga tugang na babae kaiba kan mga tugang na lalaki sinasadol na ipahayag sa publiko an saindang paglaom. (Hebreo 10:23-25) Apuera sa paggibo kaini sa ministeryo sa langtad, ipinapahayag kan mga tugang na babae an saindang paglaom asin pinaparigon an boot kan iba sa mga pagtiripon kan kongregasyon paagi sa pagtao nin inandam na marhay na mga komento kun hinahagad na gibohon ninda iyan asin paagi sa pag-ako nin mga asignasyon na makikabtang sa mga demonstrasyon o pahayag nin estudyante.

Kun siring, an mga Kristiana ‘nagdadanay na daing girong’ paagi sa dai pagprobar na kuanon an katongdan nin lalaki asin magtokdo sa kongregasyon. Dai sinda nagpapalataw nin nakikidiskutir na mga hapot na magkukuestion sa autoridad kan mga nagtotokdo. Paagi sa pag-otob kan saindang angay na kabtang sa kongregasyon, an mga tugang na Kristiana nakakatabang na marhay sa pagkaigwa nin matoninong na kamugtakan kun saen “an gabos [sa mga pagtiripon kan kongregasyon] nangyayari para sa pagpakosog.”​—1 Corinto 14:​26, 33.

[Nota sa Ibaba]