Dati daw Kamong May Pribilehio nin Paglingkod? Makakapaglingkod daw Giraray Kamo?

DATI daw kamong may responsableng katongdan sa Kristianong kongregasyon? Tibaad dati kamong ministeryal na lingkod o magurang sa kongregasyon. Posibleng dati kamong nasa bilog na panahon na paglilingkod. Daing duda na kaidto kamo naggagayagaya asin kontentong marhay sa saindong mga asignasyon, alagad pag-abot nin panahon kinaipuhan nindong butasan iyan huli sa sarong dahelan.

Tibaad binutasan nindo an saindong pribilehio tanganing asikasohon an mga miembro nin pamilya. Sa ibong na lado, tibaad an dahelan iyo an edad o pagluya nin salud. An siring na mga desisyon bakong tanda nin pagkasudya. (1 Tim. 5:8) Kan enot na siglo, si Felipe naglingkod bilang misyonero, alagad kan huri nag-istar sia sa Cesarea, na duman inasikaso nia an saiyang pamilya. (Gibo 21:8, 9) Kan gurang na si Hadeng David kan suanoy na Israel, iinareglo nia na an saiyang aking si Salomon an magin kasalihid nia sa trono. (1 Ha. 1:1, 32-35) Pero, si Felipe sagkod si David namomotan asin pinapahalagahan pa man giraray ni Jehova kaidto asin iginagalang sinda nin mga tawo sagkod ngonyan.

Minsan siring, tibaad hinale sa saindo an sarong pribilehio nin paglingkod. An dahelan daw iyo an bakong madonong na paggawe? O may kalabot daw na mga problema sa pamilya? (1 Tim. 3:2, 4, 10, 12) Tibaad dai ngani kamo oyon sa paghale sa saindo sa pribilehio, asin tibaad naghihinanakit pa kamo sagkod ngonyan.

Puede Nindong Hingoahon na Makapaglingkod Giraray

Dai na daw mababago an kawaran nin pribilehio? Sa kadaklan na kamugtakan dai na. Pero, tanganing makapaglingkod giraray, dapat na hingoahon nindong aboton iyan. (1 Tim. 3:1) Alagad, taano ta dapat na mawoton ini? Huli sa kaparehong dahelan kan pagdusay nindo sa Dios—pagkamoot ki Jehova asin sa mga naglilingkod sa saiya. Kun andam kamong ipaheling an pagkamoot na iyan paagi sa paglingkod giraray, gagamiton kamo ni Jehova huli sa eksperyensia nindo bago asin pagkatapos na mawara an saindong pribilehio.

Girumdomon an garantiya na itinao ni Jehova sa Israel pagkatapos na tama sanang haleon sa nasyon na iyan an mga pribilehio nin paglingkod. An saiyang Tataramon nagsasabi: “Ako si Jehova; dai ako nagliliwat. Asin kamo mga aki ni Jacob; dai pa kamo nakaabot sa saindong katapusan.” (Mal. 3:6) Namotan ni Jehova an mga Israelita asin gusto niang orog pang gamiton sinda. Interesado man si Jehova na gamiton kamo sa ngapit. Ano an puede nindong gibohon sa saindong presenteng mga kamugtakan? An paglingkod para sa teokratikong intereses mas nakadepende sa espirituwal na kamugtakan nin saro kisa sa natural na kakayahan nia. Huli kaini, mantang mayo kamong dagdag na mga paninimbagan sa kongregasyon, magkonsentrar sa pagpakosog kan saindong espirituwalidad.

Tanganing “magin makosog” sa pagtubod, dapat na ‘hanapon nindo si Jehova asin an saiyang kosog.’ (1 Cor. 16:13; Sal. 105:4) An sarong paagi na magigibo nindo ini iyo an odok sa pusong pamimibi. Kun ipinapakipag-olay nindo ki Jehova an saindong situwasyon, ipahayag nindo sa saiya an mga saboot nindo asin arangon an espiritu nia. Paagi sa paggibo kaini, mas mapapadayupot kamo ki Jehova, asin mapaparigon kaini an saindong boot. (Sal. 62:8; Fil. 4:6, 13) An saro pang paagi na mapakosog an saindong espirituwalidad iyo an mas marahay na pag-adal sa Tataramon nin Dios. Mantang mas dikit an mga paninimbagan, tibaad mas dakol an magigibo nindo kun dapit sa personal asin pampamilyang pag-adal, na tibaad ibinabalik sa dati an sarong rutina na depisil na papagdanayon kaidto.

Siempre, irinerepresentar pa man giraray nindo si Jehova bilang saro sa saiyang mga Saksi. (Isa. 43:10-12) An pinakamarahay na pribilehio na puedeng makamtan nin siisay man sa sato iyo an magin saro sa “mga kapwa trabahador nin Dios.” (1 Cor. 3:9) An nadugangan na aktibidad sa paglilingkod sa langtad sarong marahayon na paagi na mapakosog an espirituwalidad nindo mismo asin kan saindong mga kaibaiba sa ministeryo.

Kun Paano Mapaglalabanan an Saindong mga Saboot

An kawaran nin pribilehio nin paglingkod puedeng magin dahelan na masupog o magbasol kamo. Tibaad may tendensia kamo na patunayan na tama an mga ginibo nindo. Minsan siring, paano kun an responsableng mga tugang dinangog an saindong pagdepensa alagad naniniwala pa man giraray na dai kamo maninigong magdanay sa sarong pribilehio? Tibaad maraot pa an boot nindo, na nakakaolang sa saindo na maghingoang makapaglingkod giraray o nagpapadepisil pa ngani sa saindo na makanood sa eksperyensia. Estudyaran niato kun paano an mga eksperyensia ni Job, Manases, asin Jose makakatabang sa saro na mapaglabanan an negatibong mga saboot.

Si Job nagrepresentar sa atubangan ni Jehova para sa iba asin naglingkod bilang magurang na lalaki asin hokom sa sarong sosyedad nin mga patriarka. (Job 1:5; 29:7-17, 21-25) Dangan, kan sia nasa kabagsikan kan saiyang buhay, nawara ki Job an saiyang kayamanan, mga aki, asin marahay na salud. Huli kaini, nawara man an saiyang marahay na reputasyon sa pagheling nin iba. “Pinagngirisihan ninda ako,” an sabi ni Job, “an mga mas hoben kisa sa sako kun dapit sa mga aldaw.”—Job 30:1.

Naniwala si Job na sia biyong daing kasalan asin gusto niang idepensa an saiyang sadiri sa atubangan nin Dios. (Job 13:15) Pero, andam si Job na maghalat ki Jehova, asin marahay an nagin resulta kaini. Nanodan nia na talagang kaipuhan siang itanos, partikular na huli sa nagin reaksion nia sa pagbalong naeksperyensiahan nia. (Job 40:6-8; 42:3, 6) Pag-abot nin panahon, an kapakumbabaan ni Job nagresulta sa abundang bendisyon nin Dios sa saiya.—Job 42:10-13.

Kun an pagkahale nindo sa sarong pribilehio huli sa salang nagibo nindo, tibaad naiisip nindo kun baga si Jehova asin an saindong Kristianong mga tugang talagang mapapatawad pa kamo asin malilingawan an saindong ginibo. Bueno, estudyare an kamugtakan ni Hadeng Manases kan Juda. “Dakolon siang ginibong maraot sa pagheling ni Jehova, na ikinaanggot nia.” (2 Ha. 21:6) Pero, si Manases nagadan na maimbod, na namamahala kaidto bilang hade. Paano nangyari ini?

Sa kahurihurihi, si Manases naghimate sa disiplina. Pagkatapos na baliwalaon nia an mga patanid, ginamit ni Jehova tumang sa saiya an mga Asirio, na ikinadena asin idinistiero sia sa harayong Babilonya. Duman, “pinalomoy [ni Manases] an lalawgon ni Jehova na saiyang Dios asin padagos na nagpakumbabang marhay huli sa Dios kan saiyang mga apoon. Asin padagos siang namimibi sa Saiya.” An hale sa pusong pagsolsol ni Manases nagpahiro sa saiya na itanos an salang nagibo nia, asin pinatawad sia.—2 Cron. 33:12, 13.

An nawarang mga pribilehio bihirang ikabalik tolos-tolos. Minsan siring, sa pag-agi nin panahon, tibaad tawan kamo nin nagkapirang limitadong paninimbagan. An pag-ako kaini asin paggibo kan pinakamakakaya nindo sa parate maresulta sa dugang pang mga asignasyon. Dai boot sabihon kaini na magigin madali iyan. Puedeng magkaigwa nin mga pagkadesganar. Minsan siring, an pagigin andam asin pagmamaigot marahay an nagigin resulta.

An sarong halimbawa iyo an aki ni Jacob na si Jose. Sa edad na 17, si Jose bakong makatanosan na ipinabakal kan saiyang mga tugang bilang oripon. (Gen. 37:2, 26-28) Sierto nanggad na bako ini an klase nin pagtratar na inaasahan nia sa mga aki kan saiyang ama. Minsan siring, andam siang atubangon an mga kamugtakan na ini, asin paagi sa bendisyon ni Jehova sia “namahala sa harong kan saiyang kagurangnan.” (Gen. 39:2) Kan huri, ibinilanggo si Jose. Alagad sia nagin maimbod, asin nagin kaibanan nia si Jehova, kaya pag-abot nin panahon ipinamahala sa saiya an mga gibo-gibo sa bilanggoan.—Gen. 39:21-23.

Dai aram ni Jose na may katuyohan an gabos na ini. Padagos nia sanang ginibo an makakaya nia. Sa siring, ginamit sia ni Jehova tanganing ingatan an lahi na dian magikan an ipinanugang Banhi. (Gen. 3:15; 45:5-8) Mantang mayo sa sato an puedeng mag-asa na magkakaigwa kita nin mahalagang katongdan arog kan ki Jose, ipinapaheling kan ipinasabong na pagkasaysay na kalabot si Jehova sa mga pribilehiong nakakamtan kan Saiyang mga lingkod. Pirmeng magin andam para sa pribilehio paagi sa pag-arog ki Jose.

Pakanood sa Masakit na mga Eksperyensia

Si Job, Manases, asin Jose nagkaigwa nin nakakapangluya sa boot na mga eksperyensia. Inako kan tolong lalaking iyan an itinogot ni Jehova na mangyari, asin an lambang saro sa sainda nakanood nin mahalagang mga leksion. Ano an puede nindong manodan?

Isipon kun ano an boot na itokdo sa saindo ni Jehova. Mantang pinaglalabanan ni Job an kawaran nin paglaom, sadiri na sana nia an saiyang inintindi asin nalingawan na nia an mas darakulang isyu. Minsan siring, paagi sa mamomoton na pagtanos ni Jehova, sia nagin timbang giraray, na nag-admitir: “Ako nagtaram, alagad dai ko nasasabotan.” (Job 42:3) Kun nakolgan kamo huli sa kawaran nin mga pribilehio, ‘dai mag-isip dapit sa saindong sadiri nin orog kisa sa maninigong isipon, kundi mag-isip tanganing magkaigwa nin toltol na isip.’ (Roma 12:3) Tibaad boot ni Jehova na pakarhayon kamo sa paaging dai pa nindo lubos na nasasabotan.

Akoon an disiplina. Kan primero, tibaad an paghona ni Manases dai sia maninigo sa grabe nanggad na pagsagwe na itinao sa saiya. Pero, inako nia iyan, nagsolsol, asin binayaan an saiyang maraot na gibo. Ano man an saboot nindo sa disiplinang itinao sa saindo, “magpakumbaba kamo sa pagheling ni Jehova, asin ilalangkaw nia kamo.”—1 Ped. 5:6; Sant. 4:10.

Magin mapasensia asin andam. Huli sa mga eksperyensia ni Jose madali kutana sa saiya na magtanom sa boot nin pagkaongis asin magbalos. Imbes, pinatalubo nia an pakarorop asin pagkaherak. (Gen. 50:15-21) Kun nadesganar na kamo, magin mapasensia. Magin andam na sanayon ni Jehova.

Dati daw kamong may responsableng katongdan sa Kristianong kongregasyon? Togotan si Jehova na tawan kamo nin oportunidad na magkaigwa nin mga pribilehio sa ngapit. Pakosogon an saindong espirituwalidad. Magin man mapasensia asin mapakumbaba. Andam na akoon an ano man na mga asignasyon na puedeng bukas para sa saindo. Makakasierto kamo na “si Jehova mismo dai isasayuma an ano man na marahay sa mga naglalakaw na daing sala.”—Sal. 84:11.

[Blurb sa pahina 30]

Magin makosog sa pagtubod paagi sa odok sa pusong pamimibi

[Ritrato sa pahina 31]

An nadugangan na aktibidad sa paglilingkod sa langtad sarong marahayon na paagi na mapakosog an espirituwalidad nindo

[Ritrato sa pahina 32]

Togotan si Jehova na tawan kamo nin oportunidad na magkaigwa nin mga pribilehio sa ngapit