Maimbod na Naglilingkod sa Hadeng si Cristo

“Sa saiya itinao an pamamahala asin dignidad patin kahadean, tanganing an mga banwaan, mga grupo nasyonal asin mga lenguahe gabos maglingkod sa saiya.”​—⁠DANIEL 7:14.

1, 2. Paano niato naaaraman na si Cristo dai nagkapot nin lubos na kapangyarihan sa Kahadean kan 33 C.E.?

SIISAY na namamahala an kayang itao an saiyang buhay para sa saiyang mga sakop pero mabuhay giraray tanganing mamahala bilang hade? Siisay na hade an kayang mabuhay sa daga, na pinapatalubo an pagtitiwala asin kaimbodan kan saiyang mga sakop, dangan mamahala hale sa langit? An solamenteng persona na makakagibo kaini​—⁠asin kan dakol na iba pa⁠​—⁠​iyo si Jesu-Cristo. (Lucas 1:​32, 33) Kan Pentecostes 33 C.⁠E., pakatapos na si Cristo magadan, buhayon liwat, asin magsakat sa langit, ‘ginibo sia nin Dios na payo kan gabos na bagay sa kongregasyon.’ (Efeso 1:20-22; Gibo 2:32-36) Sa siring, si Cristo nagpoon na mamahala alagad bakong lubos. An enot niang mga sakop mga Kristianong linahidan nin espiritu, na minakompuesto kan espirituwal na Israel, an “Israel nin Dios.”​—⁠Galacia 6:16; Colosas 1:13.

² Haros 30 taon pakatapos kan Pentecostes na iyan kan 33 C.⁠E., kinompirmar ni apostol Pablo na si Cristo dai pa nagkakapot nin lubos na kapangyarihan sa Kahadean, kundi sia yaon “sa too nin Dios, [na] poon kaidto naghahalat sagkod na an saiyang mga kaiwal ibugtak na magin tungtongan kan saiyang mga bitis.” (Hebreo 10:​12, 13) Dangan, sa paghinanapos kan enot na siglo C.⁠E., naheling antes pa kan gurang nang si apostol Juan sa sarong bisyon an Unibersal na Soberano, si Jehova, na pinapatukaw si Cristo Jesus bilang Hade kan bagong mamundag na langitnon na Kahadean. (Kapahayagan 11:15; 12:1-5) Mantang yaon na kita ngonyan sa puntong ini kan kasaysayan, puede na niatong repasohon an makosogon na ebidensia na nagpapatunay na si Cristo nagpoon na mamahala bilang Mesiyanikong Hade sa langit kan 1914.⁠a

 3. (a) Nagkaigwa nin anong bagong aspekto an maogmang bareta kan Kahadean poon kan 1914? (b) Ano an mga hapot na puede niatong ihapot sa satong sadiri?

³ Iyo, poon kan 1914 an maogmang bareta kan Kahadean nagkaigwa nin nakakapukaw sa boot na bagong aspekto. Si Cristo aktibo nang namamahala bilang Hade kan langitnon na Kahadean nin Dios, minsan ngani ‘sa tahaw kan saiyang mga kaiwal.’ (Salmo 110:​1, 2; Mateo 24:14; Kapahayagan 12:7-12) Dugang pa, sa bilog na daga, an saiyang maimbod na mga sakop galagang naghihimate sa saiyang autoridad paagi sa pakikikabtang sa sarong lakop sa globong programa nin pagtotokdo sa Biblia na daing kaagid sa kasaysayan nin tawo. (Daniel 7:​13, 14; Mateo 28:18) An linahidan nin espiritung mga Kristiano, “mga aki kan kahadean,” naglilingkod bilang “mga embahador na kasalida ni Cristo.” Sinda maimbod na sinusuportaran nin sarong maoswag na kaburunyogan nin “ibang karnero” ni Cristo, na nagseserbing mga sugo kan Kahadean nin Dios. (Mateo 13:38; 2 Corinto 5:20; Juan 10:16) Dawa siring, kaipuhan niatong analisaron kun baga talagang minimidbid niato bilang mga indibiduwal an autoridad ni Cristo. Kita daw may marigon na kaimbodan sa saiya? Paano niato ikakapaheling an kaimbodan sa sarong Hade na namamahala sa langit? Pero, tokaron nguna niato kun ano an mga dahelan niato sa pagigin maimbod ki Cristo.

Sarong Hade na Nakakapukaw nin Kaimbodan

 4. Ano an nagibo ni Jesus bilang Designadong Hade durante kan saiyang ministeryo sa daga?

⁴ An satong kaimbodan ki Cristo nakabasar sa pagpapahalaga sa mga ginibo nia patin sa saiyang marahayon na mga kualidad. (1 Pedro 1:8) Kan uya pa digdi sa daga, ipinaheling ni Jesus sa limitadong paagi bilang Designadong Hade kun ano an gigibohon nia sa bilog na globo bilang nagrereynar na Hade sa itinalaan na panahon nin Dios. Pinakakan nia an mga nagugutom. Pinaomayan nia an mga may helang, an mga buta, an mga biadi, an mga bungog, asin an mga pula. Binuhay liwat pa ngani nia an nagkapirang gadan. (Mateo 15:​30, 31; Lucas 7:11-16; Juan 6:5-13) Dugang pa, an pagkaigwa nin kaaraman manongod sa nagin buhay ni Jesus digdi sa daga nagpapangyari na manodan niato an saiyang mga kualidad bilang an magigin Namamahala sa daga​—⁠nangorogna an saiyang mapagsakripisyong pagkamoot. (Marcos 1:40-45) May koneksion digdi, si Napoleon Bonaparte nagsabi segun sa bareta: “Si Alejandro, Cesar, Carlomagno, asin ako nagpundar nin mga imperyo, alagad ano an pundasyon kan dakulang mga nagibo niamo? Kosog. Si Jesu-Cristo sana an may kahadean na an pundasyon pagkamoot, asin sa presente minilyon na tawo an andam na magadan para sa saiya.”

 5. Taano ta nakakaakit na marhay an personalidad ni Jesus?

⁵ Huling si Jesus mahoyo asin may kababaan an puso, an mga nagagabatan kaidto huli sa mga kasakitan asin pasan naginhawahan huli sa saiyang nakakapakosog na mga katokdoan asin maboot na personalidad. (Mateo 11:28-30) An mga aki pamugtak an boot sa saiya. An mapakumbaba, may pakabatid na mga tawo may pagkagalagang nagin mga disipulo nia. (Mateo 4:18-22; Marcos 10:13-16) Huli sa saiyang makonsiderasyon asin magalang na ugale nakamit nia an kaimbodan kan dakol na babaeng matatakton sa Dios, na an nagkapira sa sainda nagtao kan saindang panahon, paghihingoa, asin materyal na mga rogaring tanganing maasikaso sia mantang ginigibo nia an saiyang ministeryo.​—⁠Lucas 8:1-3.

 6. Anong mapagpadangat na mga emosyon an ipinaheling ni Jesus kan magadan si Lazaro?

⁶ Ipinaheling ni Cristo an nagkapira sa saiyang pinakamapagpadangat na mga saboot kan magadan an saiyang mahal na katood na si Lazaro. Napukaw na marhay an saiyang boot kan labi-labing kamondoan ni Maria asin Marta kaya dai na nia napogolan na mag-agrangay huli sa makuring pagmondo, asin sia “naghibi.” Sia “napurisaw” huli sa grabeng kamondoan asin kapungawan, minsan ngani aram nia na sa dai mahahaloy bubuhayon nia liwat si Lazaro. Dangan, huling napahiro nin pagkamoot asin pagmalasakit, ginamit ni Jesus an tao nin Dios na autoridad nia asin ibinangon si Lazaro hale sa mga gadan.​—⁠Juan 11:11-15, 33-35, 38-44.

 7. Taano si Jesus ta maninigo sa satong kaimbodan? (Helingon man an kahon sa pahina 31.)

⁷ Nagkakaigwa kita nin may pagkangirhat na paggalang sa makosog na pagkamoot ni Jesus sa kun ano an tama asin sa saiyang makuring pagkasurang sa pagsaginsagin asin karatan. Duwang beses siang naghiro nin pusoan tanganing palayason sa templo an mahanab na mga negosyante. (Mateo 21:​12, 13; Juan 2:14-17) Dugang pa, bilang tawo digdi sa daga, naeksperyensiahan nia an gabos na klase nin kasakitan, na nagtatao sa saiya nin direktang pakarorop sa mga kagipitan asin problema na napapaatubang sa sato. (Hebreo 5:7-9) Aram man ni Jesus kun paano an magin biktima nin pagkaongis asin inhustisya. (Juan 5:15-18; 11:​53, 54; 18:38⁠–​19:16) Sa katapustapusi, makosog an boot na inako nia an madahas na kagadanan tanganing maotob an kabotan kan saiyang Ama asin tawan nin buhay na daing katapusan an saiyang mga sakop. (Juan 3:16) Bako daw na an siring na mga kualidad ni Cristo nagpapahiro sa saindo na padagos na maglingkod sa saiya na may kaimbodan? (Hebreo 13:⁠8; Kapahayagan 5:6-10) Alagad ano an kahagadan tanganing magin sakop kan Hadeng si Cristo?

Pagigin Kualipikado na Magin Sakop

 8. Ano an kahagadan para sa mga sakop ni Cristo?

⁸ Isipon an komparasyon na ini: An pagigin siudadano nin ibang nasyon sa parate may kalabot na pag-abot sa nagkapirang pundamental na kualipikasyon. An mga naglalaom na magin siudadano tibaad hagadan na dapat marahay an reputasyon asin makaabot sa nagkapirang pamantayan sa salud. Kaagid kaiyan, an mga sakop ni Cristo kaipuhan na magpadanay nin halangkaw na mga pamantayan sa moralidad asin marahay na espirituwal na salud.​—⁠1 Corinto 6:9-11; Galacia 5:19-23.

 9. Paano niato ikakapaheling na kita maimbod ki Cristo?

⁹ Tama sanang hinahagad man ni Jesu-Cristo na an saiyang mga sakop dapat na maimbod sa saiya asin sa saiyang Kahadean. Ipinapaheling ninda an siring na kaimbodan paagi sa pamumuhay kaoyon kan saiyang itinokdo kan sia uya pa digdi sa daga bilang Designadong Hade. Halimbawa, ineenot ninda an intereses kan Kahadean asin an kabotan nin Dios kisa sa materyal na intereses. (Mateo 6:31-34) Odok man nindang hinihingoang ipaheling an arog-Cristong personalidad, dawa sa irarom kan pinakamasakit na mga kamugtakan. (1 Pedro 2:21-23) Dugang pa, an mga sakop ni Cristo nagsusunod sa saiyang halimbawa paagi sa boluntad na paggibo nin karahayan sa iba.​—⁠Mateo 7:12; Juan 13:3-17.

10. Paano ikakapaheling an kaimbodan ki Cristo sa (a) pamilya asin (b) kongregasyon?

¹⁰ Ipinapaheling man kan mga parasunod ni Jesus an saindang kaimbodan sa saiya paagi sa pagpabanaag kan saiyang mga kualidad sa laog kan pamilya. Halimbawa, ipinapaheling kan mga agom na lalaki an kaimbodan sa saindang langitnon na Hade paagi sa arog-Cristong pagtratar ninda sa saindang agom asin mga aki. (Efeso 5:​25, 28-30; 6:⁠4; 1 Pedro 3:7) Ipinapaheling kan mga agom na babae an kaimbodan ki Cristo paagi sa mabining gawe-gawe asin paagi sa pagpaheling “kan toninong asin mahoyong espiritu.” (1 Pedro 3:1-4; Efeso 5:22-24) An mga aki maimbod ki Cristo kun sinusunod ninda an saiyang halimbawa nin pagigin makinuyog. Bilang hoben, si Jesus danay na nagpasakop sa saiyang mga magurang, minsan ngani sinda bakong sangkap. (Lucas 2:​51, 52; Efeso 6:1) An mga sakop ni Cristo maimbod na naghihingoang arogon sia paagi sa ‘pagpaheling nin pakikipagkapwa, may kapadangatan na sa magturugang’ asin paagi sa pagigin “mapagmalasakit sa mapagpadangat na paagi.” Nagmamaigot sinda na magin arog ni Cristo, na “mapakumbaba sa isip, na dai nagbabalos nin maraot sa maraot o nin pagmuda sa pagmuda.”​—⁠1 Pedro 3:​8, 9; 1 Corinto 11:1.

Mga Sakop na Makinuyog sa Ley

11. Sa anong mga ley nagpapasakop an mga sakop ni Cristo?

¹¹ Kun paanong an mga naglalaom na magin siudadano nin sarong nasyon nagkukuyog sa mga ley kan saindang bagong nasyon, an mga sakop ni Cristo nagpapasakop sa “ley kan Cristo” paagi sa pamumuhay kaoyon kan gabos na itinokdo asin ipinagboot ni Jesus. (Galacia 6:2) Partikularmente, sinda maimbod na namumuhay sono sa “sa hadeng ley” nin pagkamoot. (Santiago 2:8) Ano an kalabot sa mga ley na ini?

12, 13. Paano kita maimbod na nagpapasakop sa “ley kan Cristo”?

¹² An mga sakop ni Cristo igwa nin mga pagkabakong sangkap asin depekto. (Roma 3:23) Huli kaini, kaipuhan nindang padagos na kultibaron an “bakong ipokritong kapadangatan na sa magturugang” tangani na sinda ‘magkaminorootmootan nin makosog gikan sa puso.’ (1 Pedro 1:22) “Kun an siisay man igwa nin sumbong tumang sa saro,” maimbod na iinaaplikar kan mga Kristiano an ley kan Cristo paagi sa ‘pagpatiriostios asin sueltong pagpatarawadtawadan.’ An pagkuyog sa ley na ini nakakatabang sa sainda na padagos na dai intindihon an mga pagkabakong sangkap asin humanap nin mga dahelan na magkaminorootmootan. Dai daw kamo nagpapasalamat na kamo nasa kaibanan nin mga indibiduwal na huli sa maimbod na pagpapasakop sa satong mamomoton na Hade nagsusulog nin pagkamoot, an “sangkap na bogkos nin pagkasararo”?​—⁠Colosas 3:​13, 14.

¹³ Dugang pa, ipinaliwanag ni Jesus na an pagkamoot na ipinaheling nia paagi sa halimbawa nakakalabi sa pagkamoot na ordinaryong ipinapaheling kan mga tawo sa lambang saro. (Juan 13:​34, 35) Kun an namomotan niato idto sanang namomoot sa sato, mayo kitang ginigibong ano man na “pambihirang bagay.” Sa siring na kamugtakan an satong pagkamoot kulang asin may depekto. Sinadol kita ni Jesus na arogon an pagkamoot kan saiyang Ama paagi sa pagkaigwa nin may prinsipyong pagkamoot dawa sa mga kaiwal na naoongis asin nanlalamag sa sato. (Mateo 5:46-48) An pagkamoot na ini nagpapahiro man sa mga sakop kan Kahadean na maimbod na magmaigot sa saindang pangenot na gibohon. Ano iyan?

Nababalo an Kaimbodan

14. Taano ta mahalagang marhay an paghuhulit?

¹⁴ An mga sakop kan Kahadean nin Dios ngonyan may importanteng gibohon na “pagtao nin lubos na patotoo may labot sa kahadean nin Dios.” (Gibo 28:23) Mahalagang marhay an paggibo kaiyan huli ta ibibindikar kan Mesiyanikong Kahadean an unibersal na soberaniya ni Jehova. (1 Corinto 15:24-28) Kun kita naghuhulit kan maogmang bareta, an mga nagdadangog nagkakaoportunidad na magin sakop kan Kahadean nin Dios. Dugang pa, an reaksion kan mga tawo sa mensaheng iyan nagseserbing gapong pangilatis, o pamantayan, na basado dian puedeng hokoman kan Hadeng si Cristo an katawohan. (Mateo 24:14; 2 Tesalonica 1:6-10) Huli kaini, an sarong pangenot na paagi na ipinapaheling niato an satong kaimbodan ki Cristo iyo an pagkuyog sa saiyang pagboot na sabihon sa iba an manongod sa Kahadean.​—⁠Mateo 28:18-20.

15. Taano ta nababalo an kaimbodan kan mga Kristiano?

¹⁵ Siempre, kinokontra ni Satanas an paghuhulit sa ano man na paaging mahihimo nia, asin dai rinerekonoser kan namamahalang mga tawo an tao nin Dios na autoridad ni Cristo. (Salmo 2:1-3, 6-8) Huli kaini, pinatanidan ni Jesus an saiyang mga disipulo: “An oripon bakong orog sa saiyang kagurangnan. Kun ako pinaglamag ninda, kamo man paglalamagon ninda.” (Juan 15:20) Kun siring, an mga parasunod ni Cristo napapalabot sa espirituwal na pakikilaban na minabalo kan saindang kaimbodan.​—⁠2 Corinto 10:3-5; Efeso 6:10-12.

16. Paano itinatao kan mga sakop kan Kahadean “sa Dios an mga bagay na sa Dios”?

¹⁶ Minsan siring, an mga sakop kan Kahadean nin Dios nagdadanay na maimbod sa saindang dai naheheling na Hade na dai man linalapastangan an mga autoridad na tawo. (Tito 3:​1, 2) Si Jesus nagsabi: “Itao nindo ki Cesar an mga bagay na ki Cesar, alagad sa Dios an mga bagay na sa Dios.” (Marcos 12:13-17) Kun siring, an mga sakop ni Cristo nagkukuyog sa mga ley nin gobyerno na bakong kontra sa mga ley nin Dios. (Roma 13:1-7) Minsan siring, kan dai intindihon kan korte suprema kan mga Judio an mga ley nin Dios paagi sa pagboot sa mga disipulo ni Jesus na pumondo sa paghuhulit, sinda marigon alagad magalang na nagsabi na dapat nindang “kuyogon . . . an Dios bilang namamahala imbes na mga tawo.”​—⁠Gibo 1:⁠8; 5:27-32.

17. Taano ta puede kitang umatubang sa mga pagbalo sa kaimbodan na may kosog nin boot?

¹⁷ Naturalmente, kaipuhan kan mga sakop ni Cristo an dakulang kosog nin boot tanganing magdanay na maimbod sa saindang Hade kun napapaatubang sa paglamag. Minsan siring, sinabi ni Jesus: “Maogma kamo kun an mga tawo pinag-oolog-olog kamo asin pinaglalamag kamo patin putik na nagtataram nin lambang klase nin maraot na bagay tumang sa saindo dahel sa sako. Maggayagaya kamo asin lumukso kamo huli sa kagayagayahan, huli ta dakula an saindong balos sa kalangitan.” (Mateo 5:​11, 12) Naeksperyensiahan kan enot na mga parasunod ni Cristo an pagigin totoo kan mga tataramon na iyan. Dawa kan sinda hampakon huli sa padagos na paghuhulit manongod sa Kahadean, sinda naggayagaya “huli ta pinapagkanigo sinda na magtios nin kasupganan huli sa saiyang ngaran. Asin aroaldaw sa templo asin sa harong-harong nagpadagos sinda na dai nin ontok sa pagtokdo asin pagpahayag kan maogmang bareta dapit ki Cristo, si Jesus.” (Gibo 5:​41, 42) Maninigo kamo sa komendasyon, mantang ipinapaheling nindo an iyo man sanang espiritu nin kaimbodan kun kamo nagtatagal nin kasakitan, helang, pagkagadan nin namomotan, o pagtumang.​—⁠Roma 5:3-5; Hebreo 13:6.

18. Ano an ipinaparisa kan mga tataramon ni Jesus ki Poncio Pilato?

¹⁸ Kan sia Designadong Hade pa, ipinaliwanag ni Jesus ki Gobernador Poncio Pilato nin Roma: “An sakong kahadean bakong kabtang kan kinaban na ini. Kun an sakong kahadean kabtang kan kinaban na ini, nakipaglaban kutana an sakuyang mga lingkod tanganing dai ako ikatao sa mga Judio. Kundi, sa katotoohan, an sakong kahadean bakong gikan digdi.” (Juan 18:36) Kun siring, an mga sakop kan langitnon na Kahadean dai nagkakapot nin armas tumang sa siisay man ni nagkakampi sa ano man na iriwal nin tawo. Huli sa saindang kaimbodan sa “Prinsipe nin Katoninongan,” nagdadanay sindang biyong neutral sa mga bagay-bagay na nakakabanga sa kinaban.​—⁠Isaias 2:2-4; 9:​6, 7.

Daing Katapusan na mga Balos Para sa Maimbod na mga Sakop

19. Taano an mga sakop ni Cristo ta puedeng magtanaw sa ngapit na may kompiansa?

¹⁹ An maimbod na mga sakop ni Cristo, an “Hade nin mga hade,” nagtatanaw sa ngapit na may kompiansa. Galaga nindang inaantisipar an saiyang pagpaheling nin lihis sa natural na kapangyarihan bilang hade sa dai na mahahaloy. (Kapahayagan 19:11⁠–​20:⁠3; Mateo 24:30) Inaantisipar kan natatada kan maimbod, linahidan nin espiritu na “mga aki kan kahadean” an saindang daing kaagid sa halagang pamana bilang mga hade sa langit kaiba ni Cristo. (Mateo 13:38; Lucas 12:32) Galagang hinahalat kan maimbod na “ibang karnero” ni Cristo an may pag-aprobar na kapahayagan kan saindang Hade: “Madia, kamong mga binendisyonan kan sakong Ama, manaha nindo an [daganon, Paraisong rona kan] kahadean na inandam para sa saindo poon pa kan pagtugdas kan kinaban.” (Juan 10:16; Mateo 25:34) Huli kaiyan, logod na an gabos na sakop kan Kahadean magin determinadong padagos na maglingkod na may kaimbodan sa Hadeng si Cristo.

[Nota sa ibaba]

Ikakapaliwanag daw Nindo?

• Taano si Cristo ta maninigo sa satong kaimbodan?

• Paano ipinapaheling kan mga sakop ni Cristo an saindang kaimbodan sa saiya?

• Taano ta gusto niatong magin maimbod sa Hadeng si Cristo?

[Kahon sa pahina 31]

IBA PANG MARAHAYON NA MGA KUALIDAD NI CRISTO

Dai pagpaorog​—⁠Juan 4:​7-​30.

Pagmalasakit​—⁠Mateo 9:​35-​38; 12:18-​21; Marcos 6:​30-​34.

Mapagsakripisyong pagkamoot​—⁠Juan 13:⁠1; 15:12-​15.

Kaimbodan​—⁠Mateo 4:​1-​11; 28:20; Marcos 11:15-​18.

Empatiya​—⁠Marcos 7:​32-​35; Lucas 7:​11-​15; Hebreo 4:​15, 16.

Pagkarasonable​—⁠Mateo 15:21-​28.

[Ritrato sa pahina 29]

Paagi sa pagpaheling nin pagkamoot sa lambang saro, maimbod kitang nagpapasakop sa “ley kan Cristo”

[Mga Ritrato sa pahina 31]

Napapahiro daw kamo kan mga kualidad ni Cristo na paglingkodan sia na may kaimbodan?