Pagpapadanay kan Katuninungan Asin Kalinigan kan Kongregasyon

BILANG kautuban kan propesiya sa Bibliya, ribo-ribo kada taon an nagraralaog sa harong ni Jehova para sa dalisay na pagsamba. (Miq. 4:1, 2) Nauugma nanggad kitang akuon sinda sa “kongregasyon nin Diyos”! (Gibo 20:28) Pinapahalagahan ninda an oportunidad na maglingkod ki Jehova kaiba ta asin maeksperyensiyahan an malinig saka matuninong na kamugtakan sa satong espirituwal na paraiso. Sa tabang kan banal na espiritu nin Diyos asin kan madunong na konseho na yaon sa saiyang Tataramon, napapagdanay ta an katuninungan saka kalinigan kan kongregasyon.—Sal. 119:105; Zac. 4:6.

² Paagi sa pag-aplikar kan mga prinsipyo sa Bibliya, naisusulot ta “an bagong personalidad.” (Col. 3:10) Pinapalampas ta an saradit na dai pagkaintindihan asin kulog nin buot. Huli sa pag-arog niyato sa kaisipan ni Jehova, nalalabanan ta an mga impluwensiya kan kinaban na nagkakawsa nin pagkabaranga asin nakakapaglingkod kita na may pagkasararo bilang internasyonal na magturugang.—Gibo 10:34, 35.

³ Pero kun minsan, nagkakaigwa pa man giraray nin mga problema na nakakaapektar sa katuninungan asin pagkasararo kan kongregasyon. Ano an dahilan? Sa parati, huli sa dai pag-aplikar kan sadol kan Bibliya. Pinaglalabanan ta pa an satong pagigin bakong perpekto. Gabos kita nagkakasala. (1 Juan 1:10) Tibaad may makagibo nin kasalan na puwedeng magdara nin moral o espirituwal na kaatian sa kongregasyon. Tibaad may makulgan kita huli sa satong pabigla-biglang pagtaram o paghiro, o tibaad kita an makulgan dahil sa sinabi o ginibo nin iba. (Roma 3:23) Pag may mangyaring arog kaiyan, ano an magigibo ta para maitanos an mga bagay-bagay?

⁴ Namumutan kita ni Jehova kaya kinokonsiderar niya an gabos na iyan. Sinasabi kan saiyang Tataramon kun ano an gigibuhon pag magkaigwa nin problema. Handang magtabang an mamumuton na espirituwal na mga pastor, an mga elder. Pag sinusunod ta an saindang konseho na hali sa Kasuratan, maibabalik ta an marahay na relasyon sa iba asin mapapagdanay ta an satong marahay na relasyon ki Jehova. Kun kita dinisiplina o sinagwi dahil nagkasala kita, makakasiyerto kita na an siring na pagtatanos ekspresyon nin pagkamuot kan satong Ama sa langit.—Tal. 3:11, 12; Heb. 12:6.

⁵ Paminsan-minsan, tibaad nagkakaigwa nin dai pagkairintindihan o saradit na problema an mga tugang sa kongregasyon. Dapat ining husayon tulos sa mamumuton na paagi. (Efe. 4:26; Fil. 2:2-4; Col. 3:12-14) Posibleng marhay na mauyon ka na an arog kaiyan na problema nareresolberan man kun susunudon an konseho ni apostol Pedro na “magkaigwa nin makusog na pagkamuot sa lambang saro, huli ta an pagkamuot nakakatahob sa dakul na kasalan.” (1 Ped. 4:8) Sinasabi kan Bibliya: “Gabos . . . kita napapasala nin dakul na beses.” (Sant. 3:2) Kun susunudon ta an Bantog na Pamantayan sa Paggawi o Golden Rule, na gibuhon sa iba an ano man na gusto niyatong gibuhon ninda sa sato, sa parati mapapatawad asin malilingawan ta an saradit na sala sa sato kan iba.—Mat. 6:14, 15; 7:12.

⁶ Kun marisa mo na may nakulgan nin buot huli sa sinabi o ginibo mo, mag-inot ka nang humiro tulos para makipagkatuninungan. Tandaan, apektado man kaiyan an relasyon mo ki Jehova. Sinabihan ni Jesus an mga disipulo niya: “Pag dinadara mo sa altar an saimong dulot asin nagirumduman mo duman na may kulog nin buot sa saimo an tugang mo, bayaan mo sa atubangan kan altar an saimong dulot, asin maghali ka. Makipagkatuninungan ka nguna sa tugang mo, dangan magbalik ka tapos idulot mo an saimong dulot.” (Mat. 5:23, 24) Tibaad dai lang kamo nagkasinabutan. Kaya makipag-ulay ka sa saiya. Pag an gabos sa kongregasyon may marahay na komunikasyon, dakula an naitatabang kaiyan para malikayan an mga dai pagkasinabutan asin maresolberan an mga problema na dara nin pagigin bakong perpekto.

⁷ Kun beses, tibaad mahiling kan mga paraataman na kaipuhan na magtao nin konseho para itanos an kaisipan nin saro. Bako ini pirming pasil. Sa surat ni apostol Pablo sa mga Kristiyano sa Galacia, sinabi niya: “Mga tugang, enkaso an saro napapasala na asin dai niya iyan narerealisar, kamo na igwang espirituwal na mga kuwalipikasyon maghinguwa na itanos an siring na tawo sa mahuyong paagi.”—Gal. 6:1.

⁸ Paagi sa pagpastor sa aripumpon, mapoproteksiyunan kan mga paraataman an kongregasyon sa dakul na peligro sa espirituwal asin malilikayan na maggrabe pa an mga problema. Sa paglilingkod sa kongregasyon, pinagmamaigutan kan mga elder na magin arog sa ipinanuga ni Jehova paagi ki Isaias: “An lambang saro magigin siring sa sarong lugar na pahiplian sa duros, sarong lugar na taguan sa makusugon na uran, siring sa mga sapa nin tubig sa dagang mayong tubig, siring sa lindong nin dakulaon na gapo sa alang na daga.”—Isa. 32:2.

⁹ Nagpatanid si Pablo manungod sa mga indibidwal na puwedeng magin maraot na impluwensiya sa kongregasyon. Sabi niya: “Tinatawan mi kamo nin mga instruksiyon . . . na likayan an lambang tugang na naglalakaw na bakong husay asin bakong kauyon kan tradisyon na inako nindo sa samuya.” Para linawon pa iyan, isinurat niya: “Kun may siisay man na habong magsunod sa mga sinabi mi sa surat na ini, markahan an sarong ini asin ipundo an pakikiiba-iba sa saiya, tanganing masupog siya. Pero dai nindo siya ibilang na sarong kaiwal, kundi padagos siyang sadulon bilang tugang.”—2 Tes. 3:6, 14, 15.

¹⁰ Kun minsan, may indibidwal na tibaad dai man naggigibo nin magabat na kasalan na ikakatiwalag niya pero talagang binabaliwala niya an pamantayan nin Diyos na dapat sunudon nin mga Kristiyano. Puwedeng kaiba digdi an grabeng kahugakan, pagigin sobra kamapagkritika, o sobrang kabaglaan. Tibaad ‘nakikiaram siya sa mga bagay na dai man nin labot sa saiya.’ (2 Tes. 3:11) O tibaad nagpapakana siya para aprobetsaran an iba sa materyal na paagi o nagpapangana sa maraot na libangan. An arog kaiyan na paggawi makakaraot nanggad sa reputasyon kan kongregasyon, asin puwede iyan makaimpluwensiya sa ibang mga Kristiyano.

¹¹ Pagmamaigutan nguna kan mga elder na tabangan an sarong bakong husay an paggawi paagi sa pagtao sa saiya nin sadol na basado sa Bibliya. Pero kun padagos niyang binabaliwala an mga prinsipyo sa Bibliya sa ibong nin pauruutrong patanid saiya, puwedeng magdesisyon an mga elder na magtao nin nagpapatanid na pahayag sa kongregasyon. Eestudyaran na marhay kan mga elder kun baga an partikular na sitwasyon talagang seryoso asin nakakaapektar sa iba kun kaya kaipuhan na magtao nin nagpapatanid na pahayag. Matao an ispiker nin angay na konseho may koneksiyon sa bakong husay na paggawi, pero dai niya sasambiton an pangaran kan naggigibo kaiyan. Paagi kaiyan, an mga nakakaaram kan sitwasyon na sinasabi sa pahayag malikay na sa pakiiba-iba sa siring na indibidwal maski ngani makikiasosyar pa man giraray sinda sa saiya sa espirituwal na mga gibuhon, na ‘sinasadol siya bilang tugang.’

¹² Linalauman na dahil sa makusog na paninindugan kan maimbod na mga Kristiyano, matatabangan an sarong bakong husay an paggawi na masupog huli sa mga ginigibo niya asin mapahiro na magbago. Kun malinaw nang nahihiling na binayaan na niya an bakong husay na paggawi, dai na siya kaipuhan na tratuhon bilang markadong indibidwal.

¹³ An satong pagigin handang palampason an mga pagkakasala asin magpatawad dai nangangahulugan na binabaliwala ta sana an maraot na gibo o na inuuyunan ta iyan. Bakong gabos na pagkakasala puwedeng ibasol sa minanang pagigin bakong perpekto, saka bako man tamang palampason sana an magabat na mga kasalan. (Lev. 19:17; Sal. 141:5) Ipinahiling kan tipan na Katugunan na may mga kasalan na mas magabat kisa sa iba, asin totoo man iyan sa areglo kan Kristiyanong kongregasyon.—1 Juan 5:16, 17.

¹⁴ Sinabi ni Jesus kun ano an espesipikong gigibuhon para maresolberan an magabat na mga problema na tibaad maglataw sa tahaw nin mga Kristiyano. Mangnuhon an mga lakdang na sinabi niya: “Kun makagibo nin kasalan an saimong tugang, [1] magduman ka asin ihayag mo an sála niya na kamo sana. Kun magdangog siya sa saimo, nabawi mo an saimong tugang. Pero kun dai siya magdangog, [2] mag-iba ka nin saro o duwa pa, tanganing sa patotoo nin duwa o tulong testigo makumpirmar an lambang bagay. Kun dai siya magdangog sa sainda, [3] sabihon mo sa kongregasyon. Kun dai siya magdangog dawa sa kongregasyon, ibilang mo siya na siring sa tawo kan mga nasyon asin siring sa parasingil nin buhis.”—Mat. 18:15-17.

¹⁵ Base sa kasunod na ilustrasyon na sinambit ni Jesus sa Mateo 18:23-35, minalataw na an saro sa mga kasalan na pinapanungdan sa Mateo 18:15-17 igwa nin koneksiyon sa kuwarta o mga pagsadiri, arog kan dai pagbayad nin utang o pandadaya. O an pagkakasala posibleng pagpakaraot, na talagang makakaapektar sa reputasyon nin saro.

¹⁶ Kun may ebidensiya ka na nakagibo saimo nin siring kaiyan na kasalan an sarong tugang sa kongregasyon, dai tulos-tulos magdulok sa mga elder para pakiulayan sinda na mangultanan sa saindong duwa. Arog kan sinabi ni Jesus, kaulayon mo nguna an tawong may reklamo ka. Hinguwahon na husayon an problema na kamo sanang duwa asin dai ilabot an iba. Tandaan man na dai sinabi ni Jesus na ‘magduman ka nin saro sanang beses asin ihayag mo an sála niya.’ Kaya, kun dai niya akuon an saiyang pagkakasala asin dai siya maghagad nin tawad, tibaad marahay na kaulayon mo giraray siya sa ibang pagkakataon. Kun maresolberan an problema sa paaging ini, magpapasalamat nanggad an nagkasala na dai mo sinabi sa iba an manungod sa kasalan niya o na dai mo naraot an saiyang reputasyon sa kongregasyon. Sa siring, “nabawi mo an saimong tugang.”

¹⁷ Kun akuon niyang nagkasala siya, naghagad nin tawad, asin itinanos niya an pagkakasala, dai na kaipuhan gibuhon an iba pang lakdang. Dawa ngani magabat an arog kaiyan na kasalan, puwedeng maresolberan iyan kan imbuweltong mga indibidwal.

¹⁸ Kun dai mo nabawi an saimong tugang paagi sa paghayag kan sala niya na “kamo sana,” puwede mo nang gibuhon an sinabi ni Jesus, “mag-iba ka nin saro o duwa pa,” asin kaulayon mo giraray an saimong tugang. An mga iiiba mo dapat may katuyuhan man na mabawi an saimong tugang. Mas marahay kun sinda mga testigo sa subuot pagkakasala. Pero kun mayong mga testigo, puwede kang mag-iba nin saro o duwa na magigin mga testigo sa pag-uulay nindo. Tibaad may eksperyensiya na sinda sa kaparehong problema asin puwede nindang mapatunayan kun baga talagang igwa nin sala. Kun mga elder an pinakiulayan na magin testigo, dai sinda nagrerepresentar sa kongregasyon huling bako man an grupo nin kamagurangan an nag-asignar sainda na gibuhon iyan.

¹⁹ Kun dai pa naresolberan an problema pagkatapos nin pauruutrong mga paghihinguwa—kinaulay mo na siya na kamo sana tapos kinaulay mo na siya kaiba nin saro o duwang testigo—asin pagmati mo dai mo kayang palampason an problema, kun siring dapat mo nang sabihon iyan sa mga elder sa kongregasyon. Tandaan na an katuyuhan ninda iyo na mapagdanay an katuninungan asin kalinigan kan kongregasyon. Kun nagdulok ka na sa mga elder, ipabaya mo na an problema sa sainda asin magtiwala ki Jehova. Dai nuarin man pagtugutan na masingkog ka o mawaran nin kaugmahan sa paglilingkod ki Jehova dahil sa paggawi kan iba.—Sal. 119:165.

²⁰ Maimbestigar an mga pastor kan aripumpon manungod sa problema. Kun magin malinaw na talagang may nagibong magabat na pagkakasala sa saimo an sarong indibidwal pero dai siya nagsusulsol asin habong gumibo nin makatanusan asin angay na mga lakdang para itanos an ginibo niya, tibaad kaipuhanon nin komite nin mga paraataman na itiwalag sa kongregasyon an nagkasala. Paagi kaiyan napoproteksiyunan ninda an aripumpon asin naiingatan an kalinigan kan kongregasyon.—Mat. 18:17.

²¹ May magabat na mga pagkakasala, arog baga nin seksuwal na imoralidad, pagsambay, homoseksuwalidad, paglanghad, apostasya, idolatriya, asin iba pang kaagid kaiyan na grabeng mga kasalan, na bako sanang pagpapatawad kan pinagkasalaan na indibidwal an kaipuhan. (1 Cor. 6:9, 10; Gal. 5:19-21) Namemeligro an espirituwal asin moral na kalinigan kan kongregasyon sa arog kaiyan na magabat na mga kasalan kaya dapat na isumbong iyan sa mga elder para maasikaso ninda. (1 Cor. 5:6; Sant. 5:14, 15) May mga indibidwal na tibaad dumulok sa mga elder para ituga an sadiri nindang kasalan o isumbong an nahiling nindang pagkakasala nin iba. (Lev. 5:1; Sant. 5:16) Sa ano man na paagi inot na naaraman kan mga elder an mga sumbong manungod sa magabat na pagkakasala nin sarong bawtisadong Saksi, iimbestigaran nguna iyan nin duwang elder. Kun mapatunayan na may basehan an sumbong asin igwang ebidensiya na nagpapatunay na may nagibong magabat na kasalan, maasignar an grupo nin kamagurangan nin sarong hudisyal na komite na kompuwesto nin tulong elder o labi pa na maasikaso kaiyan.

²² Mamumuton na binabantayan kan mga elder an aripumpon asin pinoprotektaran iyan sa ano man na espirituwal na peligro. Naghihinguwa man sinda na gamiton an Tataramon nin Diyos sa mahusay na paagi para sagwion an siisay man na napasala asin ibalik an saindang marahay na relasyon sa Diyos. (Jud. 21-23) Kauyon ini kan instruksiyon na itinao ni Pablo ki Timoteo: “Seryoso takang tinutugon sa atubangan nin Diyos asin ni Cristo Jesus, na iyo an mahukom sa mga buhay asin mga gadan, . . . Magsagwi ka, magsaway, magsadol, na ginigibo iyan na may dakulang pagpapasensiya asin mahusay na paagi nin pagtutukdo.” (2 Tim. 4:1, 2) Puwedeng mangaipo iyan nin dakul na panahon, pero kaiba iyan sa magabat na paninimbagan kan mga elder. Pinapahalagahan kan kongregasyon an paghihinguwa ninda asin ibinibilang sinda na “maninigo sa dobleng onra.”—1 Tim. 5:17.

²³ Kun mapatunayan na nagkasala an sarong indibidwal, an panginot na pagmamaigutan kan mga elder iyo na tabangan an nagkasala na maibalik an marahay na relasyon kaini sa Diyos. Kun tunay an saiyang pagsulsol asin inako niya an tabang kan mga elder, an itataong pagsagwi—sa pribado man o sa atubangan nin siisay man na nagtestigo sa panahon kan hudisyal na pagbista—magseserbing disiplina sa saiya asin patanid sa iba. (2 Sam. 12:13; 1 Tim. 5:20) Sa gabos na kaso nin hudisyal na pagsagwi, may itinataong mga restriksiyon sa nagkasala. Paagi kaiyan, matatabangan an nagkasala na ‘maitanos an saiyang dalan.’ (Heb. 12:13) Sa tamang panahon, hinahali an mga restriksiyon pag nahihiling na nakakabangon na sa espirituwal an indibidwal.

²⁴ Kun madeterminaran kan hudisyal na komite na nagsusulsol an sarong indibidwal pero dakula an posibilidad na maaraman kan kongregasyon o kan komunidad an manungod sa kaso, o kun kaipuhan na mag-ingat an kongregasyon mapadapit sa nagsusulsol na nagkasala, sarong simpleng paisi an itatao sa Pagtiripon na Pamumuhay Asin Ministeryo. Ini an dapat sabihon: “Si [pangaran kan indibidwal] sinagwi.”

²⁵ Sa nagkapirang kaso, an nagkasala tibaad dai na nakokonsiyensiya sa saiyang makasalan na paggawi kaya dai na siya nagdadangog sa mga elder na naghihinguwang tabangan siya. Sa panahon kan hudisyal na pagbista, tibaad mayo nin nahihiling sa saiya na igong ‘mga gibo na angay sa pagsulsol.’ (Gibo 26:20) Ano ngunyan an dapat gibuhon? Kaipuhan na halion sa kongregasyon an nagkasala na dai nagsusulsol asin dai na siya puwedeng makiasosyar sa malinig na banwaan ni Jehova. Sa siring, nahahali sa kongregasyon an maraot na impluwensiya kan nagkasala asin naiingatan an moral saka espirituwal na kalinigan kan kongregasyon pati na an marahay na reputasyon kaiyan. (Deut. 21:20, 21; 22:23, 24) Kan maaraman ni Pablo an makasusupog na paggawi nin sarong indibidwal sa kongregasyon sa Corinto, sinabihan niya an kamagurangan na “itao ki Satanas an siring na tawo tanganing . . .  mailigtas an espiritu kan kongregasyon.” (1 Cor. 5:5, 11-13) Ibinareta man niya an pagtitiwalag sa iba pang indibidwal na nagrebelde sa katotoohan kan inot na siglo.—1 Tim. 1:20.

²⁶ Kun an desisyon itiwalag an nagkasala na dai nagsusulsol, sasabihon ini saiya kan hudisyal na komite, na malinaw na ipinapaliwanag an suno sa Kasuratan na (mga) dahilan kan pagtitiwalag. Pag ipinapaaram sa nagkasala an manungod sa nagin desisyon, sasabihon sa saiya kan hudisyal na komite na kun sa hiling niya igwa nin seryosong sala sa nagin paghusgar sa saiya asin gusto niyang iapelar an desisyon, dapat niyang gibuhon iyan paagi sa pagsurat, na malinaw na ipinapaliwanag an mga dahilan kan pag-apelar niya. Puon sa oras na ipaisi sa saiya an desisyon kan komite, tatawan siya nin pitong aldaw para mag-apelar. Kun makaresibi nin apelasyon, kokontakon kan grupo nin kamagurangan an paraataman nin sirkito na iyo an mapili nin kuwalipikadong mga elder na magigin miyembro kan komite sa apelasyon para dangugon giraray an kaso. Sa laog nin sarong semana pagkaresibi kan surat, hihinguwahon nanggad ninda na magibo an pagdangog sa apelasyon. Pag may apelasyon, dai nguna ipapaisi an pagtitiwalag. Miyentras tanto, dai tutugutan an akusado na magkomento asin manginot sa pamibi sa mga pagtiripon saka dai siya puwede sa espesyal na mga pribilehiyo nin paglilingkod.

²⁷ Itinutugot an pag-apelar bilang pagpahiling nin kabuutan sa akusado asin tanganing matawan siya nin urog pang pagkakataon na madangog an mga gusto niyang sabihon. Kaya kun tinuyo kan nagkasala na dai magtunga sa pagdangog kan apelasyon, ipapaisi an pagtitiwalag pagkatapos nin rasonableng mga paghihinguwa na makontak siya.

²⁸ Kun dai maapelar an nagkasala, ipapaliwanag sa saiya kan hudisyal na komite na kaipuhan niyang magsulsol saka kun ano an mga puwede niyang gibuhon para makabalik pag-abot nin panahon. Saro ining mamumuton na tabang asin dapat na gibuhon sa paglaom na mabakli siya asin makakabalik sa organisasyon ni Jehova pag-abot nin panahon.—2 Cor. 2:6, 7.

²⁹ Kun kaipuhan itiwalag sa kongregasyon an nagkasala na dai nagsusulsol, itatao an halipot na paising ini: “Si [pangaran kan indibidwal] bako nang Saksi ni Jehova.” Magseserbing patanid ini sa maimbod na mga indibidwal sa kongregasyon na pumundo na sa pakikiasosyar sa saiya.—1 Cor. 5:11.

³⁰ An terminong “pagdis-asosyar” nanunungod sa aksiyon na ginibo nin sarong bawtisadong Saksi na tuyong tinalikdan an saiyang pagigin Kristiyano paagi sa pagsabing habo na niyang apudon, o mamidbid, bilang Saksi ni Jehova. O puwedeng tinatalikdan niya an pagigin kabilang niya sa Kristiyanong kongregasyon paagi sa saiyang mga gibo, arog baga nin paglaog sa sarong sekular na organisasyon na an katuyuhan kontra sa katukduan kan Bibliya asin hinuhukuman ni Jehova Diyos.—Isa. 2:4; Kap. 19:17-21.

³¹ Mapadapit sa mga nagtalikod sa Kristiyanong pagtubod kan panahon ni apostol Juan, siya nagsurat: “Nagruluwas sinda hali sa sato, alagad bako sindang kabilang sa grupo niyato; ta kun kabilang sinda sa grupo niyato, nagdanay kuta sindang kaiba ta.”—1 Juan 2:19.

³² Pag an saro nagdis-asosyar, an sitwasyon niya sa atubangan ni Jehova lain na marhay kumpara sa sarong inaktibong Kristiyano na dai na nagpapartisipar sa pagmiministeryo. An saro tibaad nagin inaktibo huli ta dai siya regular na nag-aadal kan Tataramon nin Diyos. O tibaad nakaeksperyensiya siya nin personal na mga problema o pagpersegir kaya nawara an kaigutan niya sa paglilingkod ki Jehova. An mga elder saka an iba pa sa kongregasyon padagos na matao nin angay na espirituwal na tabang sa sarong inaktibong Kristiyano.—Roma 15:1; 1 Tes. 5:14; Heb. 12:12.

³³ Sa kabaliktaran, kun ginusto nin sarong Kristiyano na magdis-asosyar, itatao an halipot na paising ini sa kongregasyon: “Si [pangaran kan indibidwal] bako nang Saksi ni Jehova.” An pagtratar sa siring na tawo kapareho sa sarong tiwalag.

³⁴ An sarong tiwalag o nagdis-asosyar sa kongregasyon puwedeng ibalik kun malinaw na niyang ipinapahiling na nagsusulsol na siya asin binayaan na niya an saiyang makasalan na paggawi sa laog nin rasonableng lawig nin panahon. Ipinapahiling niya na gusto niyang magkaigwa nin marahay na relasyon ki Jehova. Magigin maingat an mga elder; papalihison ninda an supisyenteng panahon—dakul na bulan, sarong taon, o mas halawig pa ngani, depende sa mga kamugtakan—para mapatunayan kan indibidwal na tunay an pagsulsol niya. Kun makaresibi an grupo nin kamagurangan nin surat hali sa sarong indibidwal na nakikiulay na ibalik na siya, mabilog nin sarong komite sa pagbabalik na makikipag-ulay sa saiya. Pagtuturutimbangon kan komite an ebidensiya kan saiyang “mga gibong angay sa pagsulsol,” asin madesisyon sinda kun baga ibabalik na siya o dai pa.—Gibo 26:20.

³⁵ Kun sa ibang kongregasyon natiwalag an indibidwal na gusto nang makabalik, sarong lokal na komite sa pagbabalik an makikipag-ulay sa saiya para tawan nin atensiyon an pakiulay niya. Kun naniniwala an mga miyembro kan lokal na komite sa pagbabalik na dapat nang ibalik an indibidwal, ipapadara ninda an saindang rekomendasyon sa grupo nin kamagurangan kan kongregasyon na orihinal na nagkapot kan kaso. Magtitinabangan an duwang komite tanganing masigurado na matipon an gabos na impormasyon para makagibo nin makatanusan na desisyon. Pero, an madesisyon kun baga ibabalik an indibidwal iyo an komite sa pagbabalik kan kongregasyon na orihinal na nagkapot kan kaso.

³⁶ Kun kumbinsido an komite sa pagbabalik na an tiwalag o nagdis-asosyar talagang nagsusulsol asin dapat nang ibalik, an pagbabalik ipapaisi sa kongregasyon na orihinal na nagkapot kan kaso. Kun naglipat na siya nin kongregasyon, ipapaisi man iyan duman. An dapat sanang sabihon: “Si [pangaran kan indibidwal] ibinalik na bilang Saksi ni Jehova.”

³⁷ Dapat isumbong sa mga elder an magabat na pagkakasala nin bawtisadong menor de-edad. Pag inaasikaso kan mga elder an kaso nin magabat na kasalan nin sarong menor de-edad, mas marahay na yaon an bawtisadong mga magurang kaini. Makikikooperar sinda sa hudisyal na komite asin dai maghihinguwang ilikay an nagkasalang aki sa kinakaipuhan na disiplina. Arog kan pagtrato sa mga nagkasalang adulto, hihinguwahon kan hudisyal na komite na sagwion asin itanos an nagkasala. Pero kun dai siya nagsusulsol, dapat siyang itiwalag.

³⁸ Ano an dapat gibuhon kun dai pa bawtisadong mga parahayag an nakagibo nin magabat na pagkakasala? Huling bako man sindang bawtisadong Saksi, dai sinda puwedeng itiwalag. Pero, tibaad dai pa ninda lubos na nasasabutan an mga pamantayan kan Bibliya, asin tibaad makatabang sa sainda an mabuot na sadol para ‘maitanos an dalan’ ninda.—Heb. 12:13.

³⁹ Kun an dai pa bawtisadong nagkasala dai nagsusulsol pagkatapos na siya kaulayon asin hinguwahon na tabangan nin duwang elder, kaipuhan na impormaran an kongregasyon. Itatao an halipot na paising ini: “Si [pangaran kan indibidwal] dai na ibinibilang na dai pa bawtisadong parahayag.” Para sa kongregasyon, an nagkasala siring na sa sarong kinabanon. Dawa ngani bako man tiwalag an nagkasala, mag-iingat an mga Kristiyano na makiasosyar sa saiya sa ano man na paagi. (1 Cor. 15:33) Dai aakuon an saiyang report nin paglilingkod sa langtad.

⁴⁰ Pag-abot nin panahon, an sarong dai pa bawtisado na hinali sa pagigin parahayag tibaad gusto na giraray na magin parahayag. Sa sitwasyon na iyan, duwang elder an makikipag-ulay sa saiya asin aaramon kun talagang nag-uswag na siya sa espirituwal. Kun siya makuwalipikar, itatao an halipot na paising ini: “Si [pangaran kan indibidwal] minimidbid na giraray bilang dai pa bawtisadong parahayag.”

⁴¹ An gabos na kabilang sa kongregasyon nin Diyos ngunyan nauugma sa abundang espirituwal na bendisyon na itinatao ni Jehova sa mga lingkod niya. Talagang kadakul kitang espirituwal na kakanon, asin abunda kita sa nakakarepreskong tubig nin katotoohan. Pinoproteksiyunan man kita ni Jehova paagi sa saiyang teokratikong areglo sa irarom kan pamamayo ni Cristo. (Sal. 23; Isa. 32:1, 2) Yaon kita sa espirituwal na paraiso sa masakit na mga huring aldaw na ini kaya nakakamati kita nin katiwasayan.

⁴² Pag pinapagdanay niyato an katuninungan asin kalinigan kan kongregasyon, padagos tang pinapaliwanag an satong ilaw nin katotoohan kan Kahadian. (Mat. 5:16; Sant. 3:18) Paagi sa bendisyon nin Diyos, mauugma kitang mahiling an dakul pang tawo na makakamidbid ki Jehova asin maglilingkod kaiba ta sa paggibo kan kabutan niya.