Pagtabang sa Tinutukduan sa Bibliya na Umuswag Pasiring sa Pagdusay Asin Bawtismo

KUN TAANO TA MAHALAGA: Tanganing uyunan ni Jehova, dapat na idusay kan mga tinutukduan sa Bibliya an buhay ninda ki Jehova asin magpabawtismo. (1Pe 3:21) Dangan, kun uutubon ninda an saindang pagdusay, mapoproteksiyunan sinda sa espirituwal. (Sal 91:1, 2) An pagdusay nin sarong Kristiyano, pagdusay ki Jehova—bako sa tawo, sa trabaho, o sa sarong organisasyon. Kaya mahalagang patalubuon kan mga tinutukduan an saindang pagkamuot asin pag-apresyar sa Diyos.—Ro 14:7, 8.

KUN PAANO GIGIBUHON:

• Sa saindong pag-adal, ipahiling kun ano an itinutukdo kaiyan dapit ki Jehova. Iduon an halaga nin aroaldaw na pagbasa nin Bibliya asin padagos na pamimibi.—1Te 5:17; Sant 4:8

• Dagkahon an saindong mga tinutukduan na magin pasuhan an pagdusay asin pagpabawtismo. Tabangan man siyang abuton an iba pang pasuhan na madaling maabot, arog kan pagkomento sa mga pagtiripon o pagpapatotoo sa mga kataid asin katrabaho. Tandaan na dai pinipirit ni Jehova an siisay man na paglingkudan siya. An pagdusay sarong personal na desisyon.—De 30:19, 20

• Pakusugon an saimong tinutukduan na gumibo nin kinakaipuhan na mga pagbabago tanganing mapaugma si Jehova asin makuwalipikar sa bawtismo. (Tal 27:11) Huling may mga ugali asin paggawi na dipisil halion, tibaad kaipuhan kan tinutukduan sa Bibliya nin padagos na tabang tanganing mabago niya an saiyang personalidad. (Efe 4:22-24) Iistorya o ipabasa saiya an mga artikulo sa serye kan Torrengbantayan na “Binago kan Bibliya an Saindang Buhay”

• Iistorya saiya an naeeksperyensiyahan mong kaugmahan sa paglilingkod ki Jehova.—Isa 48:17, 18