Pagpauswag kan Satong Kakayahan sa Ministeryo—Pagigin Maaasahan na Kapartner

Kun Taano ta Mahalaga: Aram ni Jesus na mahalaga an may kaibanan pag naghuhulit. Kaya kan pinainot niya an 70 sa saiyang mga disipulo para maghulit, isinugo niya sinda nin manduwa-duwa. (Luc. 10:1) An kaibanan puwedeng magtao nin kinakaipuhan na tabang pag an kapwa niya parahayag mapaatubang sa dipisil na sitwasyon o dai sigurado kun paano masimbag sa kagharong. (Par. 4:9, 10) Puwede siyang mag-istorya nin eksperyensiya niya asin paminsan-minsan magtao nin suhestiyon na makakatabang sa kaibanan niya na magin mas epektibong ebanghelisador. (Tal. 27:17) Mantang pasiring sa sunod na harong, puwede man siyang makapakusog kun an ipapakipag-ulay niya nakakapakusog na mga bagay.—Fil. 4:8.

Kun Paano Gigibuhon:

Magin atentibo pag nagpapatotoo an kapartner mo. (Sant. 1:19) Pag nagbabasa nin teksto, sundan iyan sa saimong Bibliya. Sa paaging ini, magigin mas handa kang tabangan siya kun kaipuhan.
Maingat na turutimbangon kun baga kaipuhan kang makiayon sa urulay asin kun nuarin iyan gigibuhon. (Tal. 25:11) Kun may iniibanan ka sa pagkondukta nin pag-adal sa Bibliya, papasalamatan an paminsan-minsan mong pagkomento. Pero pag naghaharong-harong, tibaad mas gusto kan kapartner mo na siya an magtaram kun turno na niya. Siyempre, kun siya baguhan o dai sigurado kun paano masimbag sa sarong hapot o pagkontra, posibleng marhay na aapresyaron niya an tabang mo. Pero kun may iniibanan ka—sa pagharong-harong, pagdalaw liwat, o pag-Bible study—dai magsaliot, ibahon an urulay, o iyo na an makipag-ulay.
Iistorya an saimong eksperyensiya. Paminsan-minsan, kun makakapagtao ka nin suhestiyon sa kapartner mo para matabangan siya na magin mas epektibo sa ministeryo, dai mag-alangan. (Tal. 3:27) Sa angay na panahon, puwede kang magpuon paagi sa pagsabing: “Ano an masasabi mo duman?” o “Puwede akong magtao nin suhestiyon?” o kaya “Arog kaini an pighihinguwa kong gibuhon.” Tandaan na dawa inaapresyar kan iba an paminsan-minsan tang pagtao nin suhestiyon, madidisganar man sinda kun pagpaparamangnuhon ta an sala ninda.

Purbaran Ini Ngunyan na Bulan:

Pakatapos na maghulit sa ministeryo, sabihon sa kapartner mo an sinabi o ginibo niya na dahil diyan nagin siyang maaasahan na kapartner.