Naniniwala Daw ki Jesus an Mga Saksi ni Jehova?

Anthony: Tim, kumusta? Maray ta naabutan taka.

Tim: O, ika palan.

Anthony: Dinarhan taka nin bagong isyu nin Torrengbantayan saka Awake! Siguradong magugustuhan mo ini.

Tim: Uy, salamat. Maray ta nagdigdi ka ngunyan ta may ihahapot ako saimo.

Anthony: Sige, ano ‘to?

Tim: Kan sarong aldaw kaya, kaulay ko su katrabaho ko. Naistorya ko saiya su pigtatao mong mga babasahon. Sabi ko magayon ‘tong basa-basahon. Pero sabi niya dai daa ako magbasa kaidto ta dai man daa kamo naniniwala ki Jesus. Sabi ko saiya hahaputon taka pag nagbisita ka giraray. Ano, totoo i’to?

Anthony: Maray Tim ta kami mismong mga Saksi an hinapot mo. Tama an ginibo mo. Tutal kami an mas nakakaaram kan tinutubod mi, bako?

Tim: Iyan man ngani an naisip ko.

Anthony: An totoo, naniniwala talaga ki Jesus an Mga Saksi ni Jehova. Para samo, importante an pagtubod ki Jesus tanganing maligtas.

Tim: Iyan man an aram ko, pero kan sabihon kan katrabaho ko na dai kamo nagtutubod ki Jesus, napaisip lugod ako. Garo dai ta pa kaya talaga ‘yan napag-ulayan.

Anthony: Aram mo Tim, may mga bersikulo sa Bibliya na nagduduon kan kahalagahan nin pagtubod ki Jesus. Iyan an mga bersikulong pirming piggagamit kan mga Saksi pag naghaharong-harong sinda. Ano daw kun magbasa kita nin nagkapira?

Tim: Sige.

Anthony: Magayon na inuton ta ining sinabi mismo ni Jesus sa Juan 14:6. Kaiba ini sa mga sinabi ni Jesus kan kaulay niya su saro sa mga apostol niya. Sabi digdi: ‘Si Jesus nagsabi saiya: “Ako iyo an dalan, asin an katotoohan, patin an buhay. Dai nin siisay na makakadulok sa Ama kun bakong huli sako.”’ Sa binasa ta, paagi sana ngani kiisay kita makakarani sa Ama?

Tim: Paagi ki Jesus.

Anthony: Tama. Pinaniniwalaan iyan na marhay kan Mga Saksi ni Jehova. Haputon taka: Sa naaraman mo manungod sa mga kahagadan nin Diyos, pag an saro namimibi, paagi ngani sa ngaran niisay siya dapat mamibi?

Tim: Sa ngaran ni Jesus.

Anthony: Iyo. Kaya pag namimibi ako, pirming paagi iyan sa ngaran ni Jesus. Iyan man an ginigibo kan gabos na Saksi ni Jehova.

Tim: Ah, arog palan kaiyan saindo.

Anthony: Saro pang puwede tang basahon ining Juan 3:16. Importanteng marhay an bersikulong ini kaya inapod ining sadit na Ebanghelyo. Buot sabihon, pag ilinaog mo sa sarong bersikulo an bilog na ebanghelyo, ini na ‘to. Gusto mong ika na man an magbasa?

Tim: Sige. Sabi digdi: ‘Huli ta an Diyos namuot na gayo sa kinaban, na itinao niya an saiyang Aking bugtong, tanganing an siisay man na minatubod sa saiya dai mapahamak, kundi magkaigwa nin buhay na dai nin katapusan.’

Anthony: Salamat. Pamilyar ka digdi?

Tim: Iyo, pirmi ko man ‘yan nadadangog saka nakakahiling ako kaiyan minsan sa mga karatula.

Anthony: Dakul an nakakaaram kaini. Kun hihilingon mong maray, sinabi digdi ni Jesus na, dahil sa pagkamuot nin Diyos, nagin posible sa mga tawo an buhay na daing katapusan—pero ano daa an dapat tang gibuhon?

Tim: Magkaigwa nin pagtubod.

Anthony: Tama. Pagtubod partikular na sa Aking bugtong, ki Jesu-Cristo. An pagtubod na ini an nagbukas kan dalan pasiring sa buhay na daing katapusan. Ngunyan, hilinga baya an pahina 2 kan magasin na dinara ko saimo. Apuwera sa ibang katuyuhan kan magasin na An Torrengbantayan, sinabi digdi: “Dinadagka kaini an mga tawo na magtubod ki Jesu-Cristo, na nagadan tanganing magkamit kita nin buhay na daing katapusan asin namamahala na ngunyan bilang Hadi sa Kahadian nin Diyos.”

Tim: O, yaon palan diyan. Mismong magasin nindo an nagsasabi na naniniwala kamo ki Jesus.

Anthony: Iyo.

Tim: Pero, ta’no ta sinasabi ninda na dai kamo nagtutubod ki Jesus?

Anthony: May iba-iba gayod sindang dahilan. Iyan an sinasabi kan iba dahil ‘yan an nadangog ninda. O ‘baad ‘yan an itinukdo sainda kan ministro ninda.

Tim: O siguro, dahil ta inaapod kamong Saksi ni Jehova bakong Saksi ni Jesus.

Anthony: Posible man ‘yan.

Tim: Nata kaya ta pirming si Jehova an pigtutukdo nindo?

Anthony: Dahil arog ni Jesus na Aki nin Diyos, naniniwala kami na importanteng gamiton an personal na pangaran nin Diyos na Jehova. Hilingon mo an sinabi ni Jesus sa pamibi niya sa saiyang Ama. Puwedeng pakibasa mo ining Juan 17:26.

Tim: Sige. ‘Ipinamidbid ko sainda an saimong ngaran, asin ipapamidbid ko iyan; tanganing an pagkamuot na iminuot mo sako mapasainda, asin ako sa sainda.’

Anthony: Salamat. Sinabi diyan ni Jesus na ipinamidbid niya an pangaran nin Diyos. Sa hiling mo, ta’no ta ginibo niya ‘yan?

Tim: Ah. Nata man nanggad?

Anthony: Para mas malinaw, magbasa pa kita nin ibang teksto. Halimbawa ining nasa Joel 2:32. Sabi digdi: ‘An siisay man na mag-arang kan ngaran ni Jehova makakaligtas.’ Siguradong mauyon ka na kun kahagadan para sa kaligtasan an pag-arang o pag-apod sa pangaran ni Jehova, siguradong aram man ‘yan ni Jesus.

Tim: Siyempre.

Anthony: Kaya an kaligtasan kan mga parasunod niya an sarong dahilan kun ta’no ta importante para ki Jesus na maaraman ninda asin gamiton an pangaran nin Diyos. Iyan an saro sa pinakadahilan kun ta’no ta pirmi ming sinasabi sa iba si Jehova. Importante para samo na ipamidbid sa iba an personal na pangaran nin Diyos, asin tabangan sindang mag-apod man sa pangaran niya.

Tim: Pero dawa dai aram kan mga tawo an pangaran nin Diyos o dai man ninda iyan direktang gamiton, siya man giraray an nasa isip ninda pag nag-aapod sinda sa Diyos.

Anthony: Puwede. Pero dahil ipinamidbid nin Diyos sa sato an saiyang personal na pangaran, mas nagigin madali sa sato na maparani sa saiya.

Tim: Anong buot mong sabihon?

Anthony: Arog kaini: Kun iisipon dai ta man kaipuhan maaraman an pangaran ni Moises. Puwedeng sabihon lang na siya an lalaking nagbanga sa Dagat na Pula o an lalaking tinawan kan Sampulong Tugon. Si Noe​—taano ta sinabi pa su pangaran niya? Sinabi na lang kuta na siya an lalaking naggibo kan arka asin nagligtas kan pamilya niya saka kan mga hayop.O dawa si Jesu-Cristo. Puwede man bagang sabihon na siya an lalaking hali sa langit na nagadan para sa mga kasalan ta, bako?

Tim: Sabagay.

Anthony: Pero sinigurado nin Diyos na maaraman ta an pangaran ninda. Dahil diyan, mas nagigin totoo sato su mga istorya manungod sainda. Dawa dai ta personal na nabisto si Moises, Noe, saka Jesus, mas nagigin totoong-totoo sinda sato dahil aram ta an pangaran ninda.

Tim: Dai ko yan naisip a, pero may punto ka diyan!

Anthony: ‘Yan an saro pang dahilan kun ta’no ta pirmi ming ginagamit an personal na pangaran nin Diyos. Gusto ming tabangan an mga tawo na magkaigwa nin pagtubod sa Diyos na Jehova bilang sarong totoong Persona asin na puwede sindang magin harani sa saiya. Pero, dai mi binabaliwala an mahalagang papel ni Jesus sa samong kaligtasan. Magbasa pa lugod kita nin sarong teksto.

Tim: Sige.

Anthony: Kasubago binasa ta su Juan 14:6. Sinabi baga duman ni Jesus na siya an “dalan, asin an katotoohan, patin an buhay.” Mag-atras kita nin pirang bersikulo. Puwedeng pakibasa mo ining sinabi ni Jesus digdi sa huring parte kan Juan 14:1.

Tim: Okey. Sabi digdi: ‘Magturubod kamo sa Diyos, magturubod man kamo sa sako.’

Anthony: Salamat. Buot sabihon daw kaiyan, dawa sa saro ka sana magtubod​—arin man ki Jesus o ki Jehova—​tunay na an pagtubod mo, na garo baga pagtubod ki Jesus laban sa pagtubod ki Jehova?

Tim: Dai. Sabi ni Jesus kaipuhan an pagtubod sa Diyos asin sa saiya.

Anthony: Tama. Ngunyan, sigurado akong mauyon ka na bakong igo an pagsabi sana na nagtutubod kita sa Diyos saka ki Jesus. Dapat na mahiling iyan sa sato mismong pamumuhay.

Tim: Siyempre.

Anthony: Pero paano maipapahiling nin saro na tunay an pagtubod niya sa Diyos saka ki Jesus? Gusto mong pag-ulayan ta ‘yan sa sunod?a

Tim: Sige.