Dai Paglimitaran an Saimong Sadiri—Dawa Garo Dai Mo Kaya

1. Taano ta linilikayan nin nagkapira na mag-alok nin pag-adal sa Biblia?

¹ Linilikayan mo daw na mag-alok nin pag-adal sa Biblia huling mayo ka nin kompiansa sa kakayahan mo na magkondukta nin epektibo? Kun beses an maimbod na mga lingkod kan nakaagi, arog ni Moises asin Jeremias, nagsaboot na dai sinda kualipikado sa asignasyon sa sainda. (Ex. 3:10, 11; 4:10; Jer. 1:4-6) Kun siring, bakong bihira an saboot na iyan. Paano iyan puedeng madaog?

2. Taano ta dai kita maninigong makontento na sana sa pagharongharong asin iba na sana an magkondukta nin pag-adal sa Biblia?

² Maninigo niatong tandaan na dai noarin man hinahagad sa sato ni Jehova na gibohon an dai niato kaya. (Sal. 103:14) Kun siring, kaya niatong gibohon an sugo sa sato na ‘gumibo nin mga disipulo’ asin ‘tokdoan sinda.’ (Mat. 28:19, 20) Iyan bako sarong pribilehio na itinatao ni Jehova sa mga pinakaeksperyensiado o pinakamatibay sana sa sato. (1 Cor. 1:26, 27) Kun siring, dai kita maninigong makontento na sana sa pagharongharong asin iba na sana an magkondukta nin pag-adal sa Biblia.

3. Paano kita tinatabangan ni Jehova na magin kualipikado sa pagkondukta nin pag-adal sa Biblia?

³ Tinatabangan Kita ni Jehova na Magin Kualipikado: Hali ki Jehova an satong kualipikasyon na gumibo nin mga disipulo. (2 Cor. 3:5) Paagi sa saiyang organisasyon, tinotokdoan nia kita kan mga katotoohan sa Biblia na dai aram dawa kan pinakaedukadong mga tawo sa kinaban na ini. (1 Cor. 2:7, 8) Iningatan nia an sarong rekord kan mga pamamaagi nin pagtotokdo kan Dakulang Paratokdo na si Jesus tanganing arogon niato, asin tinatawan nia kita nin padagos na pagsasanay sa kongregasyon. Dugang pa, dai kita tinogotan ni Jehova na gumibo nin sadiri tang kurikulum sa pagtotokdo kan Biblia. Tinawan nia kita nin mga gamit, arog kan librong Itinotokdo kan Biblia, na nagtotokdo kan katotoohan sa lohiko asin pasil saboton na paagi. An pagkondukta nin pag-adal sa Biblia bako man gayong depisil arog kan iniisip niato.

4. Taano ta puede kitang magkaigwa nin kompiansa na tatabangan kita ni Jehova?

⁴ Sa tabang ni Jehova, naotob ni Moises asin Jeremias an mga asignasyon ninda. (Ex. 4:11, 12; Jer. 1:7, 8) Puede man niatong hagadon ki Jehova na tabangan kita. Tutal, kun may kinokonduktahan kitang pag-adal sa Biblia, tinotokdoan niato sia kan katotoohan dapit ki Jehova, na kawiliwili sa paghiling nin Dios. (1 Juan 3:22) Kun siring, gibohon mong pasohan na makapagkondukta nin pag-adal sa Biblia, sarong pinakamagayagaya asin pinakanakakakontentong kabtang kan ministeryo.