Puede daw Kamong Maglingkod sa Lugar na Mas Nangangaipo nin mga Parahayag kan Kahadean?

“Maginhawa an buhay mi sa Estados Unidos alagad naghahadit kami na sa katapustapusi an materyalistikong estilo nin pamumuhay duman magkaigwa nin negatibong impluwensia sa samo asin sa duwa ming aking lalaki. Kaming mag-agom nagmisyonero kaidto, asin gusto niamong maeksperyensiahan giraray an simple alagad maogmang buhay na iyan.”

HULING napahiro kan pagmawot na iyan, kan 1991, si Ralph asin Pam nagdesisyon na magsurat sa nagkapirang sangang opisina tanganing ipahayag na gusto nindang maglingkod sa lugar na mas nangangaipo nin mga parahayag kan Kahadean. An sangang opisina sa Mejico nagsimbag na kaipuhan nindang marhay nin mga parahayag kan Kahadean na makakapaghulit sa mga tawong nagtataram nin Ingles sa nasyon na iyan. Sa katunayan, an sangang opisina nagsabi na an langtad na iyan “maputi na tanganing anihon.” (Juan 4:35) Dai nahaloy, an imbitasyon inako ni Ralph asin Pam, kaiba kan saindang mga aki, na kaidto 8 asin 12 anyos, asin nag-andam na sindang magbalyo sa Mejico.

Sarong Mahiwas na Teritoryo

Isinaysay ni Ralph: “Bago kami naghale sa Estados Unidos, an nagkapirang tugang na may marahay na intension nagsabi sa samo: ‘Peligrosong gayo na magbalyo sa ibang nasyon!’ ‘Paano kun magkahelang kamo?’ ‘Taano ta mabalyo pa tanganing maghulit sa teritoryo na Ingles an lenguahe? An mga tawong nagtataram nin Ingles duman dai magigin interesado sa katotoohan!’ Minsan siring, desidido na kaming magduman. Total, an desisyon mi na magbalyo bakong basta bigla na sana. Dakol na taon mi nang pinagplanohan iyan. Linikayan mi an pag-utang na aaboton nin haloy bago mabayadan, nagtipon kami nin kuarta, asin dakol na beses kaming nag-orolay bilang pamilya manongod sa mga kadepisilan na tibaad mapaatubang sa samo.”

Enot, si Ralph asin an saiyang pamilya nagdalaw sa sangang opisina sa Mejico. Duman, ipinaheling sa sainda kan mga tugang an mapa kan bilog na nasyon asin sinabihan sinda, “Ini an saindong teritoryo!” Nag-istar an pamilya sa San Miguel de Allende, sarong banwaan na dakol an taga ibang nasyon asin mga 240 kilometros paamihanan-solnopan kan Siudad nin Mejico. Tolong taon pagkaabot ninda, naestablisar sa banwaan na iyan an sarong kongregasyon na Ingles an lenguahe na may 19 parahayag. Iyan an primerong kongregasyon sa Mejico na Ingles an lenguahe—alagad dakol pang gibohon an naghahalat.

Kinakarkulong sarong milyon na siudadano kan Estados Unidos an nag-iistar sa Mejico. Dugang pa, dakol na propesyonal asin estudyanteng Mejicano an nagtataram nin Ingles bilang ikaduwa nindang lenguahe. Ipinaliwanag ni Ralph: “Ipinamibi mi na logod magkaigwa nin dakol pang parahulit. Pirme kaming igwa nin ekstrang kuarto sa samong harong para sa mga tugang na nagduduman sa samong lugar tanganing ‘espiyahan an daga,’ kun baga.”—Bil. 13:2.

Pinasimple Ninda an Saindang Buhay Tanganing Pahiwason an Saindang Ministeryo

Dai nahaloy nag-abot an dakol pang tugang na gustong pahiwason an saindang ministeryo. Kabilang sa sainda si Bill asin Kathy hale sa Estados Unidos. Naglingkod na sinda nin 25 taon sa mga teritoryo na nangangaipong marhay nin mga parahayag. Iniisip ninda na mag-adal nin lenguaheng Kastila, alagad nagbago an saindang mga plano pakabalyo ninda sa banwaan nin Ajijic sa mga baybayon kan Danaw nin Chapala, na sarong magayon na lugar na iniistaran nin mga retirado hale sa Estados Unidos. Ipinaliwanag ni Bill, “Sa Ajijic nagin mas okupado kami sa paghanap nin mga tawong nagtataram nin Ingles na gustong makanood kan katotoohan.” Sa laog nin duwang taon pagkaabot sa banwaan na iyan, ipinaggayagaya ni Bill asin Kathy na maheling an pagkaestablisar nin sarong kongregasyon—an ikaduwang kongregasyon sa Mejico na Ingles an lenguahe.

Si Ken asin Joanne na taga Canada gustong pasimplehon an saindang buhay asin tawan nin mas dakol na panahon an mga gibohon na pang-Kahadean. Sinda nagbalyo man sa Mejico. Isinaysay ni Ken, “Nangaipo nin panahon tanganing matuod na mag-istar sa lugar na tibaad mayo nin maimbong na tubig, kuryente, o telepono sa laog nin dakol na aldaw.” Minsan siring, an pakikikabtang sa paghuhulit sarong gikanan nin kagayagayahan. Dai nahaloy, si Ken ninombrahan bilang ministeryal na lingkod asin pakalihis nin duwang taon, bilang magurang sa kongregasyon. Kan enot, nasakitan an saindang aking si Britanny na magin kabtang nin sarong sadit na kongregasyon na Ingles an lenguahe na may pira sanang ibang hoben. Minsan siring, kan magpoon siang makikabtang sa mga proyekto na pagtogdok nin Kingdom Hall, nagkaigwa sia nin dakol na marahay na katood sa bilog na nasyon.

Si Patrick asin Roxanne na taga estado nin Texas sa Estados Unidos naogmang marhay na maaraman an manongod sa langtad nin pagmimisyonero na bakong harayoon asin Ingles an tataramon kan mga tawo. “Pagkatapos dalawon an Monterrey, sarong banwaan sa amihanan-sirangan na Mejico, inisip niamo na ginigiyahan kami ni Jehova na magtabang duman,” an sabi ni Patrick. Sa laog nin limang aldaw nagibo nindang ikapabakal an saindang harong sa Texas asin ‘bumalyo pasiring sa Macedonia,’ kun baga. (Gibo 16:9) Bakong madaling maghanapbuhay sa Mejico, alagad sa laog nin duwa sanang taon, ipinaggayagaya nindang maheling na an sarong sadit na grupo nin 17 Saksi nagin nang kongregasyon na may 40 parahayag.

Si Jeff asin Deb saro pang mag-agom na pinasimple an saindang buhay tanganing pahiwason an saindang ministeryo. Ipinabakal ninda an saindang dakulang harong sa Estados Unidos asin nagbalyo sa sarong sadit na apartment sa Cancun, sarong siudad sa sirangan na baybayon nin Mejico. Kaidto, tuod sindang mag-atender sa asamblea na may air-con asin harani sa harong. Ngonyan kaipuhan nindang magbiahe nin walong oras tanganing mag-atender sa pinakaharaning asamblea na Ingles, na ginigibo sa sarong daing atop na pasilidad. Alagad may hararom na satispaksion sinda na maheling sa Cancun an pagkaestablisar nin sarong kongregasyon na may mga 50 parahayag.

An nagkapirang tugang na Mejicano nagpoon man na magtabang sa paghuhulit sa mga tawo na nagtataram nin Ingles. Halimbawa, kan mabaretaan ni Ruben asin kan saiyang pamilya na naestablisar sa San Miguel de Allende an enot na kongregasyon na Ingles an lenguahe asin na bilog na Mejico an teritoryo kan kongregasyon na iyan, nagdesisyon tolos sinda na magtabang. Nangahulogan ini na kaipuhan nindang makanood nin Ingles, magin pamilyar sa laen na kultura, asin magbiahe nin harayo—800 kilometros kada semana—tanganing mag-atender sa mga pagtiripon. Isinaysay ni Ruben: “Ipinaggayagaya mi na magpatotoo sa mga taga ibang nasyon na dakol na taon nang nakaistar sa Mejico alagad primero pa sanang makadangog kan mensahe kan maogmang bareta sa saindang sadiring lenguahe. An nagkapira sa sainda ipinahayag an pagpapahalaga ninda sa samo na may luha sa saindang mata.” Pagkatapos magtabang sa kongregasyon sa San Miguel de Allende, si Ruben asin an saiyang pamilya nagpayunir sa banwaan nin Guanajuato, sa sentro nin Mejico, na duman nagtabang sinda na mag-establisar nin sarong kongregasyon na Ingles an lenguahe na may labing 30 parahayag. Ngonyan, naglilingkod sinda sa sarong grupo na Ingles an lenguahe sa Irapuato, sarong banwaan harani sa Guanajuato.

Paghuhulit sa mga Depisil Mahulitan

Apuera sa mga taga ibang nasyon, dakol na Mejicano an nagtataram nin Ingles. Sa parate masakit ipaabot sa sainda an mensahe kan Kahadean huling nag-iistar sinda sa mga lugar nin mayayaman, na mga katabang an nagbubukas nin pinto. O kun mga kagharong man an magbukas nin pinto, tibaad habo nindang magdangog sa satong mensahe huli ta iniisip ninda na an Mga Saksi ni Jehova sarong sadit na lokal na sekta. Pero, kun mga Saksi hale sa ibang nasyon an nakikipag-olay sa siring na mga kagharong, naghihimate an nagkapira.

Estudyare an halimbawa ni Gloria sa siudad nin Queretaro, sa sentro nin Mejico. Ipinaliwanag nia: “Nakaolay na ako kaidto kan mga Saksi na Kastila an lenguahe alagad dai ako naghinanyog sa sainda. Minsan siring, kan magkaigwa nin mga problema an sakong pamilya asin mga katood, namondo ako nin makuri asin namibi sa Dios, na nakikimaherak sa saiya na tabangan akong makahanap nin solusyon. Dai nahaloy pagkatapos kaiyan, sarong babae na nagtataram nin Ingles an nagduman sa samo. Naghapot sia kun may siisay man sa harong na tataong mag-Ingles. Huli ta taga ibang nasyon sia, nagin interesado ako sa saiya, asin sinabi ko sa saiya na tatao talaga akong mag-Ingles. Mantang nagpapaliwanag sia, iniisip ko, ‘Ano an ginigibo kan Amerikanang ini digdi?’ Alagad naghagad ako nin tanda sa Dios. Kaya seguro an taga ibang nasyon na ini an simbag nin Dios sa pamibi ko.” Si Gloria nag-ako nin pag-adal sa Biblia asin marikason na nag-oswag sagkod na mabautismohan, sa ibong kan pagtumang nin pamilya. Ngonyan, naglilingkod si Gloria bilang regular payunir, asin naglilingkod man ki Jehova an saiyang agom saka aking lalaki.

Mga Balos sa mga Nagpapahiwas kan Saindang Ministeryo

May mga kadepisilan an paglilingkod sa lugar na mas nangangaipo nin mga parahayag kan Kahadean, alagad dakol an balos. Si Ralph, na nasambitan sa kapinonan, nagsabi: “Inadalan mi sa Biblia an mga tawo hale sa Britania, Jamaica, Sweden, Tsina, asin dawa an may sinasabing mga tawo hale sa Ghana. An nagkapira sa mga inaadalan na ini sa Biblia naglaog man sa bilog na panahon na paglilingkod. Sa nakaaging mga taon, naheling mi bilang pamilya an pagkaestablisar sa pitong kongregasyon na Ingles an lenguahe. An duwa ming aki parehong nagpayunir kaiba mi, asin ngonyan naglilingkod na sinda sa Bethel sa Estados Unidos.”

Sa Mejico, igwa ngonyan nin 88 kongregasyon asin dakol na grupo na Ingles an lenguahe. Ano an dahelan kan siring karikas na pag-oswag? Dakol na tawong nagtataram nin Ingles sa Mejico an dai pa noarin man nakaolay kaidto kan mga Saksi. An iba naghimate huli ta dai ninda naeksperyensiahan an panggigipit na puedeng nakaolang kutana sa sainda duman sa saindang sadiring lugar. An iba pa nag-ako nin pag-adal sa Biblia huli ta retirado na sinda asin igwa na nin panahon para sa espirituwal na mga bagay. Dugang pa, payunir an labing un-tersio (¹/₃) kan mga parahayag sa mga kongregasyon na Ingles an lenguahe, na dakula an ikinakakontribwir sa entusiasmo asin pag-oswag sa mga kongregasyon na iyan.

May Naghahalat na mga Bendisyon sa Saindo

Daing duda na dakol pang tawo sa bilog na kinaban an mahimate kun madadangog ninda an mensahe kan Kahadean na ihinuhulit sa sainda sa sadiri nindang lenguahe. Kun siring, nakakaogmang maaraman na dakol na tugang na espirituwal an kaisipan—hoben asin gurang, mayong agom asin may agom—an andam na magbalyo sa mga lugar na nangangaipong marhay nin dakol na parabalangibog kan Kahadean. Totoo, tibaad napapaatubang sinda sa mga kasakitan, alagad mayo sana ini kun ikokomparar sa kaogmahan na saindang namamatean mantang nanonompongan ninda an sadiosan an puso na mga indibiduwal na nag-aako kan mga katotoohan sa Biblia. Puede daw kamong gumibo nin mga pagliliwat na makakatabang sa saindo na magbalyo sa sarong teritoryo sa saindong nasyon o sa ibang nasyon na mas nangangaipo nin mga parahulit kan Kahadean?a (Luc. 14:28-30; 1 Cor. 16:9) Kun iyo, makakaseguro kamong may naghahalat na abundang bendisyon sa saindo.

[Nota sa Ibaba]

[Kahon sa pahina 21]

Naririsa an Maogmang mga Retirado

Si Beryl nagbalyo sa Canada hale sa Britania. Nagtrabaho sia duman bilang manedyer sa nagkapirang internasyonal na kompanya. Sia nagin matibay man na parakabayo asin napili pa ngani na irepresentar an Canada sa Olimpik kan 1980. Pakaretiro ni Beryl asin kan saiyang agom, nag-istar sinda sa Chapala, Mejico. Sa parate nagkakakan sinda sa lokal na mga restawran duman. Kun naririsa nia na garo baga maogma an mga retirado na nagtataram nin Ingles, nagpapabisto sia sa sainda asin naghahapot kun ano an ginigibo ninda sa Mejico. An maogmang mga nagkakakan sa restawran haros pirmeng mga Saksi ni Jehova. Inisip ni Beryl asin kan saiyang agom na kun an kaogmahan asin katuyohan sa buhay naggigikan sa pakamidbid sa Dios, kun siring gusto man nindang mamidbid sia. Pakaatender sa Kristianong mga pagtiripon sa laog nin nagkapirang bulan, uminoyon si Beryl na mag-adal nin Biblia asin nagin Saksi. Sa laog nin nagkapirang taon, nakapagregular payunir si Beryl.

[Kahon sa pahina 22]

“Sarong Bendisyon na Makaibanan Mi Sinda”

Inaapresyar na marhay kan lokal na mga tugang an mga nagbabalyo sa mga lugar na mas nangangaipo nin mga parahayag kan Kahadean. An sarong sangang opisina sa Caribe nagsurat: “Kun maghale an ginatos na taga ibang nasyon na naglilingkod digdi, maaapektaran an kakosogan kan kongregasyon. Sarong bendisyon na makaibanan mi sinda.”

Sinasabi kan Tataramon nin Dios na “an mga babaeng nagsasabi kan maogmang bareta sarong dakulang hukbo.” (Sal. 68:11) Sa siring, bakong makangangalas na dakol na tugang na babae na daing agom an kabilang sa mga naglilingkod sa ibang nasyon. Dakulang tabang an siring na mapagsakripisyong mga tugang na babae. Sarong sangang opisina sa Sirangan na Europa an nagsabi: “Sa kadaklan na kongregasyon sa samo, mas dakol an tugang na babae, na kun beses minaabot sa 70 porsiento. An kadaklan sa sainda bagohan pa sa katotoohan, alagad an daing agom na mga babaeng payunir hale sa ibang nasyon nagtatao nin mahalagang marhay na tabang paagi sa pagsanay sa mga bagohan na iyan. An mga tugang na babaeng ini hale sa ibang nasyon tunay na regalo sa samo!”

Ano an namamatean kan siring na mga tugang manongod sa paglilingkod sa ibang nasyon? “Dakol an kadepisilan,” an sabi ni Angelica, sarong tugang na 35 anyos asin naglingkod nin nagkapirang taon sa ibang nasyon bilang daing agom na payunir. “Sa sarong nadestinohan sa sako, aroaldaw, nasasakitan akong maglakaw sa malaboy na mga tinampo asin nakakaheling ako nin dakol na tawong nagsasakit, na nakakapanluyang gayo. Alagad nakakamate ako nin satispaksion sa pagtabang sa mga tawo sa ministeryo. Napapahiro man an sakong boot kan dakol na kapahayagan nin pagpasalamat hale sa mga tugang na babae digdi na sa parate nagpapasalamat sa sako huli sa pagdigdi ko tanganing tumabang sa sainda. Sarong tugang na babae an nagsabi sa sako na an halimbawa ko sa pagbiahe nin halawig pasiring sa saindang nasyon tanganing magpayunir nagpahiro sa saiya na maglaog man sa bilog na panahon na paglilingkod.”

Si Sue, sarong payunir na labi nang 50 anyos, nagsabi: “Siertong napapaatubang kamo sa mga kadepisilan, alagad an mga ini mayo sana kun ikokomparar sa mga bendisyon na inaako nindo. Nakakaogmang marhay an ministeryo! Huling nagagamit ko an dakol na oras sa paglilingkod kaiba an hoben na mga tugang na babae, sinasabi ko sa sainda an mga nanonodan ko sa Biblia asin sa mga publikasyon niato dapit sa kun paano aatubangon an mga olang. Parate nindang sinasabi sa sako na an sakong halimbawa nin pag-atubang sa mga problema mantang naglilingkod sa laog nin dakol na taon bilang daing agom na payunir nakakatabang sa sainda na masabotan na makakayanan man ninda an mga kadepisilan sa saindang buhay. An pagtabang sa mga tugang na babaeng ini nagtatao sa sako nin hararom na pakamate nin satispaksion.”

[Mapa sa pahina 20]

(Para sa aktuwal na format, hilingon an publikasyon)

MEJICO

Monterrey

Guanajuato

Irapuato

Ajijic

Chapala

Danaw nin Chapala

San Miguel de Allende

Queretaro

SIUDAD NIN MEJICO

Cancun

[Ritrato sa pahina 23]

An nagkapira naggagayagaya na magpatotoo sa mga taga ibang nasyon na primero pa sanang makadangog kan maogmang bareta