Rangahon an mga Nagmomondo

“Linahidan ako ni Jehova . . . sa pagranga kan gabos na nagtatangis.”—ISAIAS 61:1, 2.

1, 2. Siisay an maninigo niatong rangahon, asin taano?

SI Jehova, an Dios nin gabos na tunay na karangahan, tinotokdoan kita na magmakolog kun an iba nag-aagi nin kalamidad. Tinotokdoan nia kita na “magtaram na may pagranga sa mga kalag na nagmomondo nin makuri” asin rangahon an gabos na nagtatangis. (1 Tesalonica 5:14) Kun kinakaipuhan an siring na tabang, itinatao niato iyan sa mga kapwa parasamba. Nagpapaheling man kita nin pagkamoot sa mga nasa luwas kan kongregasyon, maski sa mga tibaad dai nagpaheling nin tanda nin ano man na pagkamoot sa sato kaidto.​—Mateo 5:43-48; Galacia 6:10.

² Binasa asin iinaplikar ni Jesu-Cristo sa saiyang sadiri an makahulang sugo: “An espiritu kan Soberanong Kagurangnan na Jehova yaon sa sako, huli ta linahidan ako ni Jehova na magsabi kan maogmang bareta sa mga mahoyo. Isinugo nia ako sa pagpaomay sa mga nasasakitan an puso, . . . sa pagranga kan gabos na nagtatangis.” (Isaias 61:​1, 2; Lucas 4:16-19) Haloy nang rinerekonoser kan linahidan na mga Kristiano sa presenteng panahon na an sugong ini aplikado man sa sainda, asin an “ibang karnero” maogmang nakikiiba sa sainda sa gibohon na iyan.—Juan 10:16.

 3. Kun an mga tawo naghahapot, “Taano ta itinotogot nin Dios an mga kalamidad?,” paano daw niato sinda matatabangan?

³ Kun biglang minaabot an mga kalamidad asin nasasakitan an puso kan mga tawo, sinda parateng naghahapot, “Taano ta itinotogot nin Dios an mga kalamidad?” Malinaw na sinisimbag kan Biblia an hapot na iyan. Minsan siring, tibaad kaipuhan an panahon tanganing an simbag lubos na masabotan nin sarong dai nag-adal sa Biblia. Itinatao an tabang sa mga publikasyon kan Mga Saksi ni Jehova.a Minsan siring, bilang pagpopoon, nagin nakararanga para sa nagkapira dawa maheling sana sa Biblia an teksto na arog kan yaon sa Isaias 61:​1, 2, huling ipinahahayag kaiyan an kamawotan nin Dios na an mga tawo matawan nin karangahan.

 4. Paano natabangan nin sarong Saksi sa Polandia an sarong napupurisaw na daragitang estudyante, asin paano an eksperyensiang iyan makatatabang sa saindo na tabangan an iba?

⁴ An mga hoben, saka an mga mas may edad, nangangaipo nin karangahan. An sarong tinedyer sa Polandia na nagmomondo nin makuri naghagad nin sadol sa sarong kamidbid. Paagi sa paghapot sa maboot na paagi, naaraman kan katood, na saro sa Mga Saksi ni Jehova, na an daragita kadakol nin hapot asin pagduda: “Taano ta grabe an karatan? Taano ta nagdudusa an mga tawo? Taano ta nagdudusa an tugang kong babae na paralisado? Taano ta bakong marahay an salud kan sakong puso? An sabi kan Iglesia kagustohan iyan nin Dios. Alagad kun totoo ini, habo ko nang magtubod sa saiya!” An Saksi namibi nin silensio ki Jehova dangan nagsabi: “Naoogma ako ta hinapot mo ako manongod kaini. Hihingoahon kong tabangan ka.” Iinestorya nia na nagkaigwa man sia nin mga pagduda kan aki pa sia asin na tinabangan sia kan mga Saksi ni Jehova. Ipinaliwanag nia: “Nanodan ko na dai pinapagdudusa nin Dios an mga tawo. Namomotan nia sinda, boot nia an pinakaikararahay ninda, asin sa dai na mahahaloy papangyayarihon nia an dakulang mga pagbabago digdi sa daga. An helang, an mga problema sa pagkagurang, asin an kagadanan mawawara na, asin mabubuhay sagkod lamang an makinuyog na mga tawo—digdi mismo sa planetang ini.” Ipinaheling nia sa daragita an Kapahayagan 21:3, 4; Job 33:25; Isaias 35:5-7 asin 65:21-25. Pakatapos nin halawig na pag-oolay, an daragita nagsabi, na risang-risa an pakaginhawa: “Aram ko na ngonyan an katuyohan ko sa buhay. Puede daw akong magdigdi tanganing makaolay ka giraray?” Inadalan sia sa Biblia nin duwang beses kada semana.

Paagi sa Karangahan na Itinatao nin Dios

 5. Kun kita nagpapahayag nin simpatiya, ano an matao nin tunay na karangahan?

⁵ Kun hinihingoa niato na rangahon an iba, angay nanggad an mga tataramon nin simpatiya. Hinihingoa niato na ipasabot sa tawong nagmomondo paagi sa tataramon asin tono nin boses na odok an satong pagmakolog sa saiyang kamugtakan. Dai ini nagigibo paagi sa paggamit nin mga sarabihon na daing kahulogan. An Biblia nagsasabi sa sato na “paagi sa satong pakatagal asin sa karangahan hale sa Kasuratan magkaigwa kita nin paglaom.” (Roma 15:4) Huli kaini, puede niatong ipaliwanag sa angay na panahon kun ano an Kahadean nin Dios, asin puede niatong ipaheling sa Biblia kun paano kaiyan reresolberan an presenteng mga problema. Dangan puede kitang makipagrasonan kun taano ta iyan masasarigan na paglaom. Paagi kaini, makatatao kita nin karangahan.

 6. Maninigo niatong tabangan an mga tawo na masabotan an ano tangani na sinda lubos na makinabang sa karangahan sa Kasuratan?

⁶ Tanganing lubos na makinabang sa karangahan na itinatao, kaipuhan na mamidbid nin saro an tunay na Dios, maaraman kun anong klaseng Persona sia, asin kun gurano kamasasarigan kan saiyang mga panuga. Kun hinihingoa niato na tabangan an saro na dai pa nagsasamba ki Jehova, marahay na ipaliwanag an minasunod na mga punto. (1) An karangahan na yaon sa Biblia gikan ki Jehova, an tunay na Dios. (2) Si Jehova an Makakamhan sa Gabos, an Kaglalang kan langit asin daga. Sia Dios nin pagkamoot asin abunda sa mamomoton na kabootan asin katotoohan. (3) Puede kitang mapakosog na makayang atubangon an mga situwasyon kun kita marani sa Dios paagi sa pagkua nin tamang kaaraman sa saiyang Tataramon. (4) An Biblia igwa nin mga teksto na may koneksion sa espesipikong mga pagbalo na inatubang nin manlaenlaen na indibiduwal.

 7. (a) Ano an mahahaman paagi sa pagdodoon na an karangahan na itinatao nin Dios ‘nagsosopay paagi sa Cristo’? (b) Paano daw nindo mararanga an saro na nakaaaram na maraot an saiyang iginawe?

⁷ An nagkapira nakatao nin sarong espirituwal na bendisyon sa mga nagmomondo na may aram na sa Biblia paagi sa pagbasa kan 2 Corinto 1:3-7. Kan binabasa iyan, idinoon ninda an mga pananaram na “an karangahan na nakukua niamo nagsosopay man paagi sa Cristo.” An tekstong ini tibaad makatabang sa saro na marealisar na an Biblia gikanan nin karangahan na dapat pa niang orog na estudyaran. Puede man iyan na magtao kan basehan para sa dugang na pag-oolay, tibaad sa iba pang mga panahon. Kun sa pagmate nin saro an mga problema nia resulta nin maraot na mga nagibo nia, kun siring puede niatong sabihon sa saiya, na dai nagigin mapaghusgar, na sarong karangahan na maaraman an nakasurat sa 1 Juan 2:1, 2 asin Salmo 103:11-14. Sa mga paaging ini talagang rinaranga niato an iba paagi sa karangahan na itinatao nin Dios.

Kun an Buhay Apektadong Marhay nin Kadahasan o Kasakitan sa Pagbuhay

8, 9. Paano angay na matatawan nin karangahan an mga tawo na nag-agi nin kadahasan?

⁸ An buhay nin dai mabilang na minilyon apektadong marhay nin kadahasan​—kriminal na kadahasan sa komunidad o kadahasan nin guerra. Paano niato sinda mararanga?

⁹ Nag-iingat an tunay na mga Kristiano na sa tataramon man o sa gibo dai sinda makikampi sa arin man na paksion sa mga ralaban sa kinaban. (Juan 17:16) Alagad angay nindang ginagamit an Biblia tanganing ipaheling na an presenteng masakit na mga kamugtakan dai magpapadagos sagkod lamang. Puede nindang basahon an Salmo 11:5 tanganing ipaheling kun ano an saboot ni Jehova manongod sa mga namomoot sa kadahasan o an Salmo 37:1-4 tanganing ipaheling an pag-enkaminar nin Dios na dai kita magbalos kundi magtiwala sa Dios. An mga tataramon sa Salmo 72:12-14 nagpapaheling kun ano an namamatean ni Salomon na Orog na Dakula, si Jesu-Cristo, na ngonyan namamahala bilang langitnon na Hade, manongod sa inosenteng mga tawo na nag-aagi nin kadahasan.

10. Kun nag-agi na kamo nin dakol na taon nin guerra, paano kamo mararanga kan sinitar na mga teksto?

¹⁰ May mga tawong sunod-sunod na guerra an inagihan mantang nag-iinagawan nin kontrol an magkalaban na mga paksion. Ipinamugtak na ninda na an guerra asin an resulta kaiyan kabtang na nin buhay. An malalaoman na sanang posibilidad na naheheling ninda iyo na tibaad magigin mas marahay an kamugtakan ninda kun sinda makakadulag pasiring sa ibang nasyon. Alagad an kadaklan sa sainda nungkang nakagibo kaiyan, asin dakol na nagprobar an nagadan. Parateng nanonompongan kan mga talagang nagbalyo sa ibang nasyon na an saindang mga problema nasalidahan sana nin ibang problema. An Salmo 146:3-6 puedeng gamiton tanganing tabangan an siring na mga tawo na ibugtak an saindang paglaom sa sarong bagay na mas masasarigan kisa pagbalyo sa ibang nasyon. An hula sa Mateo 24:3, 7, 14 o 2 Timoteo 3:1-5 tibaad makatabang sa sainda na mas lubos na masabotan an mga bagay-bagay asin an kahulogan kan mga kamugtakan na tinitios ninda, iyo na ngani, na kita nabubuhay na sa pagtatapos kan daan na sistema nin mga bagay. An mga teksto na arog kan Salmo 46:1-3, 8, 9 asin Isaias 2:2-4 tibaad makatabang sa sainda na marealisar na talagang igwa nin paglaom para sa sarong matoninong na ngapit.

11. Anong mga teksto an nakaranga sa sarong babae sa Solnopan na Aprika, asin taano?

¹¹ Durante nin nagpapadagos na guerra sa Solnopan na Aprika, an sarong babae duminulag hale sa saiyang harong na inooran nin mga bala. An saiyang buhay napano nin takot, kamondoan, asin makologon sa boot na pagkadesganar. Sa huri, mantang an pamilya nag-eerok sa ibang nasyon, an saiyang agom nagdesisyon na soloon an saindang sertipiko sa kasal, pahaleon sia na bados kan panahon na idto asin an saindang dies anyos na aking lalaki, asin magpadi. Kan binasa sa saiya an Filipos 4:​6, 7 asin Salmo 55:​22, saka an basado sa Kasuratan na mga artikulo sa An Torrengbantayan asin Awake!, nakanompong sia sa katapustapusi nin karangahan asin katuyohan sa buhay.

12. (a) Anong pakaginhawa an iinaalok kan Kasuratan para sa mga nasasakitan sa pagbuhay? (b) Paano natabangan nin sarong Saksi sa Asia an sarong parokyano?

¹² An pagbagsak nin ekonomiya nakadanyar sa buhay nin minilyon na tawo. Kun beses huli man ini sa guerra asin sa resulta kaiyan. Sa ibang panahon, an bakong madonong na mga palakaw nin gobyerno asin kahanaban patin pagkabakong onesto kan mga nasa kapangyarihan gabos nagtarabang na uboson an saray na kuarta nin mga tawo asin nagin dahelan na mapiritan sinda na iparemate an saindang mga rogaring. An iba nungkang nakamtan an dakol na bagay sa kinaban na ini. An gabos na iyan puedeng maranga kan pakaaram na an Dios nag-aasegurar nin pakaginhawa sa mga nagtitiwala sa saiya asin naggagarantiya nin sarong matanos na kinaban na dian an mga tawo maoogma sa gibohon kan saindang kamot. (Salmo 146:6, 7; Isaias 65:​17, 21-23; 2 Pedro 3:13) Kan madangog nin sarong Saksi sa sarong nasyon sa Asia an sarong parokyano na nagpapahayag nin pagkahadit sa situwasyon kan pagbuhay duman, ipinaliwanag nia na an nangyayari duman kabtang nin sarong dalagan nin mga pangyayari sa bilog na kinaban. An pag-oolay sa Mateo 24:3-14 asin Salmo 37:9-11 nagresulta sa regular na pag-adal sa Biblia.

13. (a) Kun an mga tawo nadesganar sa basang na mga panuga, paano niato magagamit an Biblia tanganing tabangan sinda? (b) Kun iniisip nin mga tawo na an maraot na mga kamugtakan nagpapatunay na mayo nin Dios, paano nindo puedeng hingoahon na makipagrasonan sa sainda?

¹³ Kun an mga tawo dakol nang taon na nagdudusa o nadesganar na sa dakol na basang na panuga, tibaad magin arog sinda kan mga Israelita sa Egipto na dai naghinanyog “huli sa pagkadesganar.” (Exodo 6:9) Sa siring na mga kamugtakan, tibaad kapakipakinabang na itampok an mga paagi na matatabangan sinda kan Biblia na mapangganang maatubang an presenteng mga problema asin malikayan an natatagong mga peligro na dai man kuta kaipuhan na makaraot sa buhay nin dakol. (1 Timoteo 4:8b) An nagkapira tibaad mansayon an maraot na mga kamugtakan kan saindang pagkabuhay bilang prueba na mayo nin Dios o na mayo sia nin pagmakolog sa sainda. Puede kamong makipagrasonan sa angay na mga teksto tanganing matabangan sindang marealisar na an Dios nagtao nin tabang alagad dakol an dai nag-ako kaiyan.—Isaias 48:17, 18.

Kun Apektado nin mga Bagyo Asin Linog

14, 15. Kan dakol an masustohan huli sa sarong kalamidad, paano ipinaheling kan mga Saksi ni Jehova an saindang pagmakolog?

¹⁴ Puedeng magkaigwa nin kalamidad dahelan sa bagyo, linog, pagkasolo, o eksplosion. Tibaad lakop an pagmondo. Ano an puedeng gibohon tanganing rangahon an mga nakaligtas?

¹⁵ An mga tawo kaipuhan na makaaram na may nagmamakolog. Pakatapos nin pag-atake nin mga terorista sa sarong nasyon, dakol an nasustohan. Dakol sa sainda an nawaran nin mga miembro nin pamilya, nagbubuhay sa pamilya, katood, trabaho, o ano man na pakamate nin seguridad na paghona ninda yaon sa sainda. Dinumanan kan mga Saksi ni Jehova an mga nasa komunidad ninda, na nagpapahayag nin pakikidamay sa grabeng nawara sa sainda asin nagtatao nin mga tataramon nin pagranga hale sa Biblia. Dakol an odok na nag-apresyar sa pagmakolog na ipinaheling.

16. Kan magkaigwa nin kalamidad sa sarong lugar sa El Salvador, taano ta epektibong marhay an paglilingkod sa langtad kan mga Saksi sa lokal?

¹⁶ Sa El Salvador sarong makosog na linog kan 2001 an sinundan nin grabeng pagbaha nin laboy na ikinagadan nin dakol. Nagadan an 25 anyos na aking lalaki nin sarong Saksi asin an duwang tugang na babae kan katrato kan lalaking iyan. An ina kan lalaki kaiba an katrato kaini tolos-tolos na nagin sibot sa paglilingkod sa langtad. Dakol an nagsabi sa sainda na an Dios an kuminua sa mga nagadan o na iyan kabotan nin Dios. Kinotar kan mga Saksi an Talinhaga 10:22 tanganing ipaheling na dai gusto nin Dios na kita magkaigwa nin kakologan sa boot. Binasa ninda an Roma 5:12 tanganing ipaheling na an kagadanan nangyari dahel sa kasalan nin tawo, bakong huli ta kabotan iyan nin Dios. Sinabi man ninda an mensahe nin karangahan na yaon sa Salmo 34:18, Salmo 37:29, Isaias 25:8, asin Kapahayagan 21:3, 4. An mga tawo daing pag-alangan na naghinanyog, nangorogna ta an duwang babae mismo nagadanan man nin miembro nin pamilya sa kalamidad, asin dakol na pag-adal sa Biblia an naponan.

17. Sa mga panahon nin kalamidad, anong klaseng mga tabang an ikatatao niato?

¹⁷ Kun igwa nin kalamidad, tibaad may manompongan kamong nangangaipo nin ensegidang tabang sa pisikal. Tibaad kalabot digdi an pag-apod nin doktor, pagtabang saiya sa pagduman sa ospital, o paggibo nin ano man na posible tanganing tumao nin kakanon asin maiistaran. Kan 1998 durante kan saro sa siring na kalamidad sa Italia, naobserbaran nin sarong peryodista na an Mga Saksi ni Jehova “naghihiro sa praktikal na paagi, nagtatabang sa mga apektado, na dai iniisip kun ano an saindang relihion.” Sa nagkapirang lugar, an mga pangyayaring ihinula para sa huring mga aldaw nagigin dahelan nin grabeng pagdusa. Sa mga lugar na iyan, itinotokdo kan Mga Saksi ni Jehova an mga hula sa Biblia, asin rinaranga ninda an mga tawo paagi sa garantiya kan Biblia na an Kahadean nin Dios matao nin tunay na seguridad sa katawohan.​—Talinhaga 1:33; Miqueas 4:4.

Kun Nagadan an Sarong Miembro nin Pamilya

18-20. Kun may nagadan sa pamilya, ano an puede nindong sabihon o gibohon tanganing tumao nin karangahan?

¹⁸ Kada aldaw minilyon na tawo an nagmomondo sa pagkagadan nin sarong namomotan. Tibaad manuparan nindo an mga nagmomondo kun kamo nakikikabtang sa Kristianong ministeryo o kun inaasikaso nindo an mga aktibidad sa aroaldaw na buhay. Ano an puede nindong sabihon o gibohon na matao nin karangahan?

¹⁹ Nasa emosyonal na kapurisawan daw an saro? Pano daw nin nagmomondong mga paryente an harong? Tibaad dakol kamong gustong sabihon, alagad mahalaga an diskresion. (Eclesiastes 3:1, 7) Tibaad an tamang gibohon iyo na magpahayag nin pakikidamay, magwalat nin angay na publikasyon sa Biblia (sarong brosyur, magasin, o pulyeto), dangan sumongko pakalihis nin pirang aldaw tanganing aramon kun baga puedeng tumao nin dugang na tabang. Sa angay na panahon, mag-alok na tumao nin nakaparirigon sa boot na mga punto hale sa Biblia. Puede ining magkaigwa nin nakakapakalma asin nakakarahay na epekto. (Talinhaga 16:24; 25:11) Dai nindo kayang buhayon an gadan, arog kan ginibo ni Jesus. Alagad puede nindong ipaabot an sinasabi kan Biblia manongod sa kamugtakan kan mga gadan, minsan ngani tibaad bako ini an tamang panahon na hingoahon na pahimutikan an salang mga punto de vista. (Salmo 146:4; Eclesiastes 9:​5, 10; Ezequiel 18:4) Puedeng basahon nindong duwa an mga panuga kan Biblia mapadapit sa pagkabuhay liwat. (Juan 5:28, 29; Gibo 24:15) Puede nindong ipaliwanag kun ano an kahulogan kan mga ini, na tibaad ginagamit an sarong report sa Biblia nin pagbuhay liwat tanganing gibohon iyan. (Lucas 8:49-56; Juan 11:39-44) Darahon man an atension sa mga kualidad kan mamomoton na Dios na nagtatao sa sato kan siring na paglaom. (Job 14:​14, 15; Juan 3:16) Ipaliwanag kun paano kamo nakinabang sa mga katokdoan na ini asin kun taano ta igwa kamo nin kompiansa dian.

²⁰ An pag-imbitar sa Kingdom Hall puedeng makatabang sa nagmomondo na mamidbid an mga tawo na totoong namomoot sa saindang kapwa asin tataong magpakinorosogkosogan. Nadiskobre nin sarong babae sa Sweden na ini an hinahanap nia sa bilog niang buhay.—Juan 13:35; 1 Tesalonica 5:11.

21, 22. (a) Ano an hinahagad sa sato tangani kitang makatao nin karangahan? (b) Paano nindo mararanga an saro na tatao nang marhay sa Kasuratan?

²¹ Kun aram nindo na may nakaeeksperyensia nin kamondoan, baga man sa laog kan Kristianong kongregasyon o sa luwas, kun minsan daw dai kamo segurado sa sasabihon o gigibohon nindo? An termino sa Griego na parateng tinatradusir na “karangahan” sa Biblia literal na nangangahulogan nin “pag-apod na tumaed.” An pagigin tunay na pararanga nangangahulogan nin pagigin yaon para sa mga nagmomondo.—Talinhaga 17:17.

²² Paano kun an gusto nindong rangahon nakakaaram na kan sinasabi kan Biblia manongod sa kagadanan, pantubos, asin pagkabuhay liwat? An mismong presensia nin sarong katood na kapareho an mga tinutubod puedeng makaranga. Kun gusto niang magtaram, magin kamong matibay maghinanyog. Dai pag-isipon na kaipuhan nindong magdiskurso. Kun nagbabasa nin mga teksto, ibilang ini na kapahayagan nin Dios na nagpapakosog sa puso nindong duwa. Ipahayag an makosog na kombiksion nindo pareho sa pagigin segurado kan mga panuga kaiyan. Paagi sa pagpabanaag nin diosnon na pagkaludok asin pagsabi kan mahalagang marhay na mga katotoohan na yaon sa Tataramon nin Dios, matatabangan nindo an mga nagmomondo na makakua nin karangahan asin kosog sa “Dios nin gabos na karangahan,” si Jehova.—2 Corinto 1:3.

[Nota sa Ibaba]

Ano an Komento Nindo?

• Kiisay ibinabasol nin dakol na tawo an mga kalamidad, asin paano niato sinda matatabangan?

• Ano an magigibo niato tanganing tabangan an iba na makinabang nin lubos sa karangahan na itinatao kan Biblia?

• Anong mga situwasyon an nagtatao nin kamondoan sa dakol sa lugar nindo, asin paano nindo sinda mararanga?

[Mga Ritrato sa pahina 23]

Pagpaabot nin mensahe nin tunay na karangahan sa mga panahon nin kapurisawan

[Credit Line]

Kampo nin mga dulag: UN PHOTO 186811/J. Isaac

[Ritrato sa pahina 24]

An mismong presensia nin sarong katood puedeng makaranga