Hanapon an Tunay na Kayamanan

1, 2. Sa sistemang ini nin mga bagay, taano ta pirming magkakaigwa nin mga pobre?

AN SISTEMA nin ekonomiya ngunyan daing hirak asin bakong patas. Dakul na hoben an nagpaparahanap nin trabaho pero mayo sindang makua. May mga nagsasapeligro man kan saindang buhay tanganing makabalyo sa mas mayaman na nasyon. Dakul man an pobre dawa sa mayaman na mga nasyon. Asin an mga mayaman lalong nagyayaman mantang an mga tios lalong nagtitios. Sigun sa dai pa sana nahahaloy na pagtantiya, an kayamanan kan mga pinakamayaman, na 1 porsiyento kan populasyon, kapantay na kan total na kayamanan kan gabos na iba pang tawo sa kinaban. Pagtantiya sana iyan, pero siguradong gabos mauyon na talagang binilyon na tawo an tios na marhay, mantang an iba may supisyenteng kayamanan na kayang sustentuhan an masurunod na henerasyon kan saindang pamilya. Aram iyan ni Jesus kaya sinabi niya: “An mga pobre pirmi nindong kaibanan.” (Mar. 14:7) Taano ta nangyayari an dai pagkapantay-pantay na ini?

² Aram ni Jesus na an sistema nin ekonomiya ngunyan magbabago sana pag nag-abot na an Kahadian nin Diyos. Kabtang kan kinaban ni Satanas an pulitika, relihiyon, saka an mahanab na sistema nin komersiyo na inaapod na “mga negosyante” sa Kapahayagan 18:3. Lubos na naisusuway kan mga lingkod nin Diyos an saindang sadiri sa pulitika asin palsong relihiyon, pero an kadaklan sa sainda dai lubos na naisusuway an saindang sadiri sa komersiyal na kabtang kan kinaban ni Satanas.

 3. Anong mga hapot an pag-uulayan niyato?

³ Bilang mga Kristiyano, marahay na siyasaton niyato an satong pagmansay sa sistema nin komersiyo ngunyan. Haputon an sadiri: ‘Paano ko magagamit an sakong materyal na mga pagsadiri tanganing ipahiling an sakong kaimbudan sa Diyos? Paano ko mababawasan an pagkaimbuwelto sa komersiyo kan kinaban? Anong mga eksperyensiya an nagpapahiling na an banwaan nin Diyos lubos na nagtitiwala sa saiya sa masakit na panahon na ini?’

4, 5. (a) Sa anong masakit na sitwasyon napaatubang an katiwala sa ilustrasyon ni Jesus? (b) Anong sadol an itinao ni Jesus sa saiyang mga parasunod?

⁴ Basahon an Lucas 16:1-9. Nakakapaisip an ilustrasyon ni Jesus dapit sa bakong matanos na katiwala. Pagkatapos na akusaran bilang magastuson na katiwala, naghiro siya nin may “kadunungan” tanganing ‘magkaigwa nin mga amigo’ para makatabang sa saiya pag nawaran na siya nin trabaho.a Siyempre, dai man dinadagka ni Jesus an saiyang mga disipulo na gumawi nin bakong matanos tanganing makaraos sa kinaban na ini. Sinabi ni Jesus na an “mga aki kan sistemang ini nin mga bagay” an naggigibo kan arog kaiyan, pero ginamit niya an ilustrasyon huling may gusto siyang itukdo.

⁵ Aram ni Jesus na arog kan katiwala na napaatubang sa dipisil na sitwasyon, kakaipuhanon man kan kadaklan kan mga parasunod niya na maghanapbuhay sa bakong patas na komersiyong ini kan kinaban. Kaya dinagka niya sinda: “Gamiton nindo an bakong matanos na kayamanan para magkaigwa kamo nin mga amigo, tanganing pag an kayamanan na iyan maubos na, aakuon ninda kamo [ni Jehova asin ni Jesus] sa mga irukan na nagdadanay sagkod lamang.” Ano an manunudan niyato sa sadol ni Jesus?

 6. Paano niyato naaraman na bakong kabtang kan katuyuhan nin Diyos an sistema nin komersiyo ngunyan?

⁶ Dai ipinaliwanag ni Jesus kun taano ta inapod niyang “bakong matanos” an kayamanan, pero malinaw na ipinapahiling kan Bibliya na bakong kabtang kan katuyuhan nin Diyos an komersiyalismo. Abundang itinao ni Jehova ki Adan asin Eva sa Eden an gabos nindang pangangaipo. (Gen. 2:15, 16) Pag-abot nin panahon, kan itao nin Diyos an saiyang banal na espiritu sa kongregasyon nin mga linahidan kan inot na siglo, “mayo ni saro sa sainda an [nagsabing] sadiri niya an arin man sa mga bagay na igwa siya, kundi an gabos na bagay na yaon sa sainda sadiri kan gabos.” (Gibo 4:32) Sinambit ni propeta Isaias na maabot an panahon na libreng magagamit kan gabos na tawo an gabos na bunga asin yaman kan daga. (Isa. 25:6-9; 65:21, 22) Pero mantang dai pa iyan nag-aabot, kaipuhan kan mga parasunod ni Jesus nin “kadunungan” tanganing makapaghanapbuhay gamit an “bakong matanos na kayamanan” kan kinaban ngunyan mantang hinihinguwang mapaugma an Diyos.

 7. Anong sadol an itinatao sa sato kan Lucas 16:10-13?

⁷ Basahon an Lucas 16:10-13. An katiwala sa ilustrasyon ni Jesus nakiamigo para sa personal na pakinabang. Pero, dinagka ni Jesus an saiyang mga parasunod na maghanap nin mga amigo sa langit para sa bakong makasadiring pakinabang. Sa kasunod na mga bersikulo kan ilustrasyon, ikinonektar an paggamit kan “bakong matanos na kayamanan” sa pagigin maimbod sa Diyos. An punto ni Jesus iyo na ‘maipapahiling niyato an satong kaimbudan’ sa Diyos sa paagi kan paggamit niyato kan mga kayamanan na igwa kita. Paano?

8, 9. Magtao nin mga halimbawa kun paano nagpapahiling nin kaimbudan an nagkapira sa paggamit ninda kan bakong matanos na kayamanan.

⁸ An sarong risang paagi na maipapahiling niyato na maimbod kita kun dapit sa paggamit kan satong materyal na mga bagay iyo an pagdonar sa pambilog na kinaban na gibuhon nin paghuhulit na ihinula ni Jesus na mangyayari. (Mat. 24:14) Sarong aking babayi sa India an igwa nin sadit na alkansiya na padiit-diit niyang hinuhulugan nin mga sinsilyo, pati na kan pambakal kuta niya nin mga kawatan. Kan pano na an alkansiya, idinonar niya an kuwarta para magamit sa gibuhon na paghuhulit. Sarong brother sa India na may niyugan an nagdonar nin dakul na niyog sa Malayalam remote translation office. Kaipuhan kan opisina na magbakal nin mga niyog, kaya naisip kan brother na an pagsuplay niya nin mga niyog sa opisina mas dakula an kapakinabangan kisa kun kuwarta an idodonar niya. Praktikal na kadunungan iyan. An mga tugang man sa Grecia regular na nagdodonar nin olive oil, keso, asin iba pang kakanon sa pamilyang Bethel.

⁹ Sarong brother na nakaistar na sa ibang nasyon an nagpapagamit kan saiyang harong sa Sri Lanka para sa mga pagtiripon saka asembleya asin para magin istaran nin mga naglilingkod nin bilog na panahon. Pagsasakripisyo iyan kan brother sa pinansiyal pero dakulang tabang iyan sa mga parahayag duman na medyo nagtitios. Sa mga lugar na ipinagbabawal an satong gibuhon, ipinapagamit kan mga brother an saindang harong bilang mga Kingdom Hall. Nakikinabang diyan an dakul na payunir asin an iba pang limitado sa pinansiyal huling may mapagtitiripunan sinda na mayong iniisip na babayadan.

10. Ano an nagkapirang bendisyon na makakamtan niyato kun matinao kita?

¹⁰ Ipinapahiling kan mga halimbawang ini kun paano an banwaan nin Diyos “maimbod pag-abot sa sadit na bagay,” an buot sabihon, sa paggamit ninda nin materyal na kayamanan, na mas hababa kun ikukumparar sa espirituwal na kayamanan. (Luc. 16:10) Ano an namamatian kan mga amigong ini ni Jehova sa mga pagsakripisyo nindang iyan? Nasasabutan ninda na an pagigin matinao sarong paagi tanganing makamtan an “tunay” na kayamanan. (Luc. 16:11) Sarong sister na regular na nagdodonar para sa gibuhon na pang-Kahadian an nag-istorya kan mga bendisyon na nakamtan niya: “Huli sa pagigin matinao ko, nagkaigwa nin pambihirang mga pagbabago sa sako sa nakaaging mga taon. Narisa ko na pag mas nagigin matinao ako sa materyal, mas nagigin matinao man ako may koneksiyon sa sakong pakikiiba. Nagin mas mapagpatawad asin mapagpasensiya ako sa iba, saka mas naaako ko an nakakadisganar na mga pangyayari saka an mga konseho sa sako.” Nanudan nin dakul na nakakapayaman sa espirituwal an pagigin matinao.—Sal. 112:5; Tal. 22:9.

11. (a) Taano ta pagpahiling nin “kadunungan” an satong boluntad na pagtao? (b) Anong pagpantay-pantay nin mga pondo an nangyayari sa banwaan nin Diyos ngunyan? (Hilingon an ritrato sa kapinunan kan artikulo.)

¹¹ An paggamit kan materyal na mga pagsadiri para sa intereses kan Kahadian pagpahiling nin “kadunungan” sa saro pang paagi. Paagi kaiyan, magagamit niyato an satong kamugtakan para makatabang sa iba. An mga may pansustento sa buhay pero dai makapaglingkod nin bilog na panahon o makabalyo sa ibang nasyon, nauugma na maaraman na an mga idinodonar ninda nakakasuportar sa ministeryo kan iba. (Tal. 19:17) An boluntad na mga kontribusyon nakakatabang sa paggibo nin mga literatura asin nakakasuportar sa gibuhon na paghuhulit sa mga lugar na tios na marhay pero dakul an nag-aako kan katotoohan. Sa laog nin haloy na panahon, sa mga nasyon arog nin Congo, Madagascar, asin Rwanda, mahalon an Bibliya. Kun minsan katumbas iyan nin sarong semana o sarong bulan na suweldo, kaya sa parati kaipuhan na pumili kan mga tugang kun baga ibabakal ninda iyan nin Bibliya o nin kakanon kan pamilya ninda. Ngunyan, paagi sa mga donasyon kan dakul asin sa “pagpantay-pantay” nin mga pondo, an organisasyon ni Jehova nakakapagtradusir asin nakakapagdistribwir nin mga Bibliya para sa lambang miyembro nin pamilya pati sa mga tinutukduan sa Bibliya na gutom sa espirituwal. (Basahon an 2 Corinto 8:13-15.) Kaya, parehong nagigin amigo ni Jehova an mga nagtatao asin mga nag-aako.

12. Paano ipinahiling ni Abraham na nagtitiwala siya sa Diyos?

¹² Puwede man kitang magin amigo ni Jehova kun babawasan ta an pagkaimbuwelto sa komersiyo kan kinaban asin kun gagamiton niyato an satong kamugtakan sa paghanap nin “tunay” na kayamanan. Iyan an ginibo kan maimbod na lalaking si Abraham kan suanoy na mga panahon. Nagsunod siya ki Jehova asin naghali sa mayaman na siyudad nin Ur tanganing mag-istar sa mga tolda huling gusto niyang magin amigo ni Jehova. (Heb. 11:8-10) Pirmi siyang nagtiwala sa Diyos bilang Gikanan nin tunay na kayamanan, asin nungka siyang naghanap nin materyal na mga bentaha na magpapahiling nin kawaran nin tiwala sa Diyos. (Gen. 14:22, 23) Dinagka ni Jesus an sarong mayaman na hoben na lalaki na magkaigwa kan arog kaining pagtubod: “Kun gusto mong magin perpekto, sige, ipabakal mo an saimong mga pagsadiri saka itao mo sa mga pobre an kuwarta, asin magkakaigwa ka nin kayamanan sa langit; asin madya, magin parasunod taka.” (Mat. 19:21) An lalaking ini mayo kan pagtubod na arog kan ki Abraham, pero may iba na nagpahiling nin lubos na pagtitiwala sa Diyos.

13. (a) Anong sadol an itinao ni Pablo ki Timoteo? (b) Paano niyato maiaaplikar an sadol ni Pablo ngunyan?

¹³ Si Timoteo igwa nin makusog na pagtubod. Pagkatapos apudon si Timoteo na “sarong matibay na suldados ni Cristo Jesus,” sinabi sa saiya ni Pablo: “Mayo nin suldados na nasa serbisyo an nakikilabot sa mga aktibidad na may koneksiyon sa pagnenegosyo, tanganing makamtan niya an pag-uyon kan saro na nagrehistro sa saiya bilang suldados.” (2 Tim. 2:3, 4) An mga parasunod ni Jesus ngunyan, kaiba na an hukbo nin labing sarong milyon na bilog na panahon na mga ministro, inaaplikar an sadol ni Pablo sagkod sa itinutugot kan saindang kamugtakan. Linalabanan ninda an mga pang-engganyo kan mga advertisement asin kan kinaban na ini. Ginigirumdom ninda an prinsipyong ini: ‘An minautang uripon kan nagpautang.’ (Tal. 22:7) Gusto ni Satanas na ubuson ta an gabos niyatong panahon asin kusog bilang mga uripon kan komersiyo kan kinaban na ini. May mga nangungutang nin dakulaon na halaga tanganing makabakal nin harong o mamahalon na awto, pambayad sa matrikula, o para sa magarbong kasal pa ngani. Kun dai kita mag-iingat puwede kitang magkautang sa laog nin dakul na taon. Nagpapahiling kita nin praktikal na kadunungan kun papasimplehon ta an satong buhay asin babawasan an utang saka mga gastos. Paagi kaiyan, magigin libre kitang maglingkod sa Diyos imbes na magin uripon kan komersiyo kan kinaban ngunyan.—1 Tim. 6:10.

14. Ano an dapat na magin determinasyon niyato? Magtao nin mga halimbawa.

¹⁴ Tanganing mapagdanay na simple an satong pamumuhay kaipuhan niyatong aramon kun ano an dapat na magin priyoridad niyato. Sarong mag-agom an igwa nin asensado asin dakulang negosyo. Pero, gusto nindang makabalik sa bilog na panahon na paglilingkod kaya ipinabakal ninda an saindang negosyo, baroto, asin iba pa nindang gamit. Dangan nagboluntaryo sindang tumabang sa pagtugdok kan world headquarters sa Warwick, New York. Sarong espesyal na bendisyon iyan para sa sainda, huling nakatrabaho ninda sa laog nin pirang semana an saindang aking babayi saka an agom kaini, pati an mga magurang kan lalaki, na nagtrabaho man sa proyekto sa Warwick. Sarong sister na payunir sa Colorado, U.S.A., an nagtatrabaho nin part-time sa sarong bangko. Nasunuan na marhay kan pinagtatrabahuhan niya an saiyang trabaho kaya inalukan siya nin sarong full-time na posisyon na triple an suweldo. Pero, huling maaapektaran kan trabahong iyan an pokus niya sa ministeryo, sinayumahan niya an alok na iyan dawa halangkaw an suweldo. Pira sana ini sa mga halimbawa nin kadakul na pagsakripisyo kan mga lingkod ni Jehova. An determinasyon niyatong iyan na inuton an intereses kan Kahadian nagpapahiling na mas pinapahalagahan tang marhay an pakikipag-amigo sa Diyos asin an espirituwal na kayamanan kisa sa mga iinaalok kan komersiyo kan kinaban ngunyan.

15. Anong kayamanan an nagtatao kan pinakadakulang kaugmahan?

¹⁵ An pagkaigwa nin materyal na kayamanan bako pirming tanda nin pagbendisyon nin Diyos. Binebendisyunan ni Jehova an mga “mayaman sa marahay na mga gibo.” (Basahon an 1 Timoteo 6:17-19.) Halimbawa, kan maaraman ni Luciab na nangangaipo nin mga parahayag sa Albania, nagbalyo siya duman haling Italy kan 1993. Mayo siyang trabaho duman pero lubos an tiwala niya na itatao ni Jehova an mga pangangaipo niya. Nagin matibay siyang mag-Albanian asin natabangan niya an labing 60 indibidwal sagkod na mabawtismuhan. Iyo, kadaklan sa mga lingkod nin Diyos dai man naghuhulit sa arog kaiyan kabungang teritoryo, pero ano man na ginigibo ta tanganing tabangan an iba na manumpungan an dalan pasiring sa buhay asin magdanay diyan sarong bagay na sagkod lamang niyatong ibibilang na kayamanan pati kan tinabangan ta.—Mat. 6:20.

16. (a) Ano an kaaabtan kan sistema nin komersiyo ngunyan? (b) Ano an dapat na magin epekto kaiyan sa pagmansay ta dapit sa materyal na mga bagay?

¹⁶ An sinabi ni Jesus, “pag an [bakong matanos na] kayamanan na iyan maubos na,” bakong ‘kun enkaso iyan maubos.’ (Luc. 16:9) An pagkalugi nin mga bangko asin pagbagsak nin ekonomiya na nangyayari sa huring mga aldaw na ini mayo lamang kun ikukumparar sa pagbagsak na madali nang mangyari sa bilog na kinaban. An enterong sistema ni Satanas—pulitikal, relihiyoso, asin komersiyal—siguradong mabagsak. Ihinula ni propeta Ezekiel asin Sofonias na an bulawan asin plata, na mahalagang marhay sa komersiyo kan kinaban puon pa kaidto, mawawaran nin halaga. (Ezeq. 7:19; Sof. 1:18) Ano daw an mamamatian ta kun madali nang matapos an satong buhay sa kinaban na ini tapos marealisar ta na isinakripisyo palan niyato an tunay na kayamanan para lang makakua nin dakulon na “bakong matanos na kayamanan” kan kinaban na ini? Tibaad mamatian ta an arog kan namatian kan sarong lalaki na nagtrabaho sa bilog niyang buhay para magtipon nin dakulon na kuwarta, pero kan huri naaraman niyang mga peke palan idto. (Tal. 18:11) Iyo, mauubos o mawawaran nin halaga an arog kaiyan na mga kayamanan, kaya aprobetsaran an oportunidad na gamiton iyan tanganing “magkaigwa kamo nin mga amigo” sa langit. An ano man na ginigibo niyato tanganing masuportaran an intereses kan Kahadian ni Jehova makakapayaman sa sato sa espirituwal.

17, 18. Ano an naghahalat para sa mga amigo nin Diyos?

¹⁷ Pag nag-abot na an Kahadian nin Diyos, mayo na nin babayadan na mga arkila, utang, saka pagpabulong. Libre asin abunda na man an kakanon. Magagamit kan daganon na pamilya nin Diyos an pinakamarahay na mga bagay na yaon sa daga. An bulawan, plata asin mamahalon na mga bato gagamiton bilang mga dekorasyon, bakong para sa pagpayaman. An de-kalidad na mga kahoy, gapo, asin metal libre nang magagamit sa pagtugdok nin magagayon na harong. Tatabangan kita kan satong mga amigo bakong huli sa kuwarta kundi dahil sa iyan an gusto ninda. Pakikinabangan kan kada saro sa sato an gabos na yaon sa daga.

¹⁸ Parte sana ini kan daing kaagid an halaga na mana para sa mga naghihinguwang magkaigwa nin mga amigo sa langit. Daing kapantay na kaugmahan an mamamatian kan mga parasamba ni Jehova sa daga pag nadangog na ninda si Jesus na magsabi: “Madya, kamong mga binendisyunan kan sakuyang Ama, manahon nindo an Kahadian na inandam para sa saindo puon pa sa pagkaestablisar kan kinaban.”—Mat. 25:34.