“Dinara Kamo ni Jehova Digdi sa Pransia Para Maaraman an Katotoohan”

KAN aki pa si Antoine Skalecki, igwa siya nin sarong sadit na kabayo na pirmi niyang kaiba-iba. Sabay nindang linalakaw an marumarom na tunnel, dara an mga mina nin karbon, 500 metros sa irarom kan daga. Naerido an ama ni Antoine kan matumpag an sarong minahan, kaya napiritan an saiyang pamilya na papagtrabahuhon siya sa minahan, siyam na oras kada aldaw. Sarong beses, dikit-dikitan man na magadan si Antoine kan magaba an pinakabubungan nin sarong minahan.

Namundag si Antoine kaidtong mga dekada nin 1920 asin 1930. Saro siya sa dakul na namundag sa Pransia na taga Poland an mga magurang. Taano ta nagbalyo sa Pransia an mga taga Poland? Kan maibalik sa Poland an independensiya pagkatapos kan Giyera Mundiyal I, nagin dakulang problema kan gobyerno an sobrang populasyon ninda. Kabaliktaran ini sa nangyari sa Pransia na labing sarong milyon na lalaki an nagadan sa giyera kaya kinaipuhan nindang marhay nin mga minero. Iyan an dahilan kaya naggibo nin sarong kasunduan sa imigrasyon an gobyerno kan Pransia asin Poland kan Setyembre 1919. Kan taon 1931, uminabot sa 507,800 an populasyon kan mga taga Poland sa Pransia, na an dakul sa sainda nakaistar sa lugar nin mga minahan sa parteng norte.

Dara kan mahihigos na nagbalyong taga Poland an saindang sadiring kultura, pati na an pagigin relihiyoso ninda. “Dakula an paggalang kan sakong Lolo Joseph sa Banal na Kasuratan huling itinukdo iyan kan saiyang ama,” an sabi ni Antoine, na 90 anyos na ngunyan. Kada Domingo, an bilog na pamilya kan mga minerong ini isinusulot an pinakamagayon nindang bado para magsimba, arog kan ginigibo ninda kaidto sa Poland, na ikinakauyam kan nagkapirang mga taga Pransia na bakong gayong relihiyoso.

Puon pa kan 1904, maigot nang naghuhulit an mga Estudyante sa Bibliya sa lugar nin Nord-Pas-de-Calais, kun sain inot na nakaulay an dakul na taga Poland. Kan 1915, bulan-bulan nang inimprenta an The Watch Tower sa lengguwaheng Polish, asin kan 1925 nagkaigwa na man kan The Golden Age (Awake! ngunyan) sa lengguwaheng iyan. Dakul na pamilya an nag-ako kan mga itinutukdo kan mga magasin na ini na basado sa Bibliya, pati na kan librong The Harp of God sa lengguwaheng Polish.

Naaraman kan pamilya ni Antoine an dapit sa Mga Estudyante sa Bibliya paagi sa saiyang tiyo na inot na nag-atender sa pagtiripon kan 1924. Kan taon man na iyan, nagkaigwa kan inot na asembleya sa lengguwaheng Polish an Mga Estudyante sa Bibliya sa Bruay-en-Artois. Pakalihis nin dai pang sarong bulan, sa lugar man sanang iyan, sarong representante kan pambilog na kinaban na headquarters, na si Joseph F. Rutherford, an nagtao nin pampublikong pahayag na inatenderan nin 2,000 katawo. Huling naugmang marhay sa kadakulan kan nag-atender, na an kadaklan mga taga Poland, sinabi sa sainda ni Brother Rutherford: “Dinara kamo ni Jehova digdi sa Pransia para maaraman an katotoohan. Ngunyan, dapat man na tabangan nindo asin kan saindong mga aki an mga Pranses! Dakula pa an kaipuhan sa gibuhon na paghuhulit, asin masugo si Jehova nin mga parahayag para diyan.”

Asin iyan talaga an ginibo kan Diyos na Jehova! Kun paanong nagin maigot sa pagmimina an mga Kristiyanong taga Poland, arog man kaiyan sinda kaigot sa paghuhulit! Sa katunayan, an iba sa sainda nagbaralik sa Poland tanganing ipaabot man duman an mahalagang katotoohan na nanudan ninda. Kaiba si Teofil Piaskowski, Szczepan Kosiak, asin Jan Zabuda sa mga nagbalik para ibalangibog an maugmang bareta sa darakulang teritoryo sa Poland.

Pero dakul man na ebanghelisador na nagtataram nin Polish an dai naghali sa Pransia asin maigot na naghulit kaiba kan saindang mga tugang na Pranses. Sa ginibong general assembly kan 1926 sa Sin-le-Noble, 1,000 an nag-atender sa sesyon nin Polish, asin 300 sa sesyon nin Pranses. Ini an sinabi kan 1929 Yearbook: “Sa taon na ini, 332 na tugang na Polish an nagpabawtismo bilang simbolo kan saindang pagkonsagrar [pagdusay].” Bago magpuon an Giyera Mundiyal II, 32 sa 84 kongregasyon sa Pransia an Polish an lengguwaheng ginagamit.

Kan 1947, dakul na Saksi ni Jehova an nag-ako sa alok kan gobyerno nin Poland na magbalik na sa nasyon ninda. Pero dawa naghali sinda, nahiling an resulta kan paghihinguwa ninda asin kan mga kapagtubod nindang Pranses sa 10 porsiyentong pagdakul nin mga parahayag kan Kahadian kan taon na iyan. Sinundan iyan nin 20, 23, asin 40 porsiyento pa nganing pagdakul puon 1948 sagkod 1950! Kan 1948, nagnombra nin kainot-inuting mga paraataman nin sirkito an sangang opisina kan Pransia tanganing sanayon an bagong mga parahayag na ini. Sa limang napili, apat duman an Polish, asin saro sa sainda si Antoine Skalecki.

Dakul sa mga Saksi ni Jehova sa Pransia an may apelyido pa kan saindang mga apuon na Polish, na parehong nagin maigot sa pagmimina asin sa paghuhulit. Ngunyan, dakulon man na nagbalyo sa Pransia an naaraman an katotoohan sa nasyon na iyan. Magbalik man o dai sa sadiri nindang nasyon an mga nakakua kan katotoohan sa Pransia, nagigin sindang maigot na mga parabalangibog kan Kahadian arog kan mga taga Poland na nainot sa sainda.​—Hali sa samong archive sa Pransia.